Sīsū—Ko ʻEne Moʻuí mo ʻEne Ngāue Fakafaifekau

ʻI he Fokotuʻu ʻo Lasalosi mei he Maté

ʻOKU aʻu atu ʻeni ʻa Sīsū mo kinautolu ʻoku nau ō mo iá ki he faʻitoka ʻo Lasalosí. Ko hono moʻoní ko ha ʻana pea mo ha fuʻu maka naʻe tāpuni ʻaki ʻa e hūʻangá. ʻOku pehē ʻe Sīsū: “Toʻo ʻa e maka.”

ʻOku lea fakafepaki atu ʻa Māʻata, he ʻoku ʻikai ke mahino kiate ia ʻa e meʻa ʻe fai ʻe Sīsuú. ʻOkú ne pehē: “ʻEiki, kuo namuhāhā; he ko hono ʻaho fa mālō ʻeni.”

Ka ʻoku ʻeke ʻe Sīsū: “ʻIkai naʻa ku tala atu, kapau te ke tui, te ke mamata ki he langilangi ʻo e ʻOtua?”

Ko ia ʻoku toʻo ʻa e maká. Pea ʻoku hanga hake ʻa e fofonga ʻo Sīsū ʻo ne lotu: “ʻAlā Tamai, ʻoku ou fakafetaʻi atu koeʻuhi naʻa ke ongoʻi au. ʻIo, kuo u ʻilo pē ʻe au ʻoku ke ongoʻi au maʻu ai pē: ka ko ʻeku lea koeʻuhi ko e fuʻu kakai ʻoku tutuʻu ni, koeʻuhi ke nau tui ko koe kuo ke fekau mai au.” ʻOku lotu fakahāhā ʻa Sīsū koeʻuhi ke ʻilo ʻe he kakaí ko e meʻa ko ia ʻokú ne teu ke faí ʻe fakahoko ia ʻi he mālohi ʻoku maʻu mei he ʻOtuá. Pea ʻokú ne kalanga leʻo lahi: “Lasalosi, tuʻu mai kituʻa.”

ʻI he taimi ko iá, ʻoku hū mai ki tuʻa ʻa Lasalosi. ʻOku kei haʻi pē hono ongo nimá mo hono ongo vaʻé ʻaki ʻa e ngaahi noʻo ʻi hono tanú, pea ko hono matá ʻoku ʻufiʻufiʻaki ia ha tupenu. ʻOku pehē atu ʻe Sīsū: “Vete ia, pea tukuange ke ne ʻalu.”

ʻI heʻenau sio ki he maná, ko e tokolahi ʻo e kau Siu kuo nau haʻu ko e fakafiemālie kia Mele mo Māʻatá ʻoku nau tui leva kia Sīsū. Kaekehe, ʻoku ʻalu atu ʻa e niʻihi ke tala ki he kau Fālesí ʻa e meʻa kuo hokó. Ko kinautolu mo e houʻeiki taulaʻeikí ʻoku nau fokotuʻutuʻu leva ke fai ha fakataha ʻa e fakamaauʻanga māʻolunga ʻa e kau Siú, ko e Sanetalimí.

ʻOku kau ki he Sanetalimí ʻa e kau Fālesí mo e kau Sātusí, houʻeiki taulaʻeikí, ko e taulaʻeiki lahi lolotongá, ko Kaiafasi, mo e kau taulaʻeiki lahi ki muʻá. ʻOku lāunga ʻa e faʻahingá ni ʻo nau pehē: “Ko e ha muʻa ʻoku tau fai? he ko e tangata ni ko e meʻa ngei ʻene fai mana. Kapau te tau tuku ia ke fai pehē ai pē, ʻe tui pikitai kiate ia ʻa e kakai kotoa pē, pea ʻe haʻu ʻa e kau Loma, ʻo ʻave hotau fonua mo hotau puleʻanga fakatouʻosi.”

Neongo ʻoku tala ko e moʻoni ʻe he kau taki lotú ʻoku fai ʻe Sīsū “ha ngahi mana,” ko e meʻa pē ʻe taha ʻoku nau tokanga kinautolu ki aí ko honau tuʻungá mo honau mafai ʻonautolú. Ko hono fokotuʻu ʻo Lasalosí ko ha tā mātuʻaki mālohi ia ki he kau Sātusí, koeʻuhi he ʻoku ʻikai te nau tui kinautolu ki he toetuʻú.

Ko Kaiafasi, ʻa ia ko ha Sātusi nai, ʻokú ne lea ʻo pehē: “Ta ko e kakai kimoutolu ʻoku ʻikai te mou momoʻi ʻilo ha meʻa; pē te mou fakakaukau, ʻoku lelei muʻa kiate kimoutolu ke mate ha foʻi tangata ʻe toko taha koeʻuhi ko e faʻahinga tapu, pea ʻoua naʻa ʻauha ʻa e puleʻanga kotoa.”

Naʻe tākiekina ʻe he ʻOtuá ʻa Kaiafasi ke ne leaʻaki ʻa e meʻá ni, he ki mui mai naʻe tohi ʻe he ʻapositolo ko Sioné: “Ka naʻe ʻikai meiate ia [Kaiafasi] ʻa e lea ko ia.” Ko e ʻuhinga ʻa Kaiafasí ke tāmateʻi ʻa Sīsū ke fakangata Ia mei haʻane toe hokohoko atu ʻene fakavaivaiʻi honau ngaahi tuʻunga ʻo honau mafaí mo e tākiekiná. Ka fakatatau kia Sione, ‘naʻe kikite ʻa Kaiafasi kuo pau ke pekia ʻa Sīsū ʻo ʻikai koeʻuhi ko e puleʻanga pē, ka koeʻuhi foki ke fakatahatahaʻi ʻa e fānau ʻa e ʻOtua.’ Pea ko e moʻoni, ko e taumuʻa ia ʻa e ʻOtuá ke pekia ʻa hono ʻAló ko ha huhuʻi maʻá e kakai kotoa pē.

ʻOku lavameʻa ʻa Kaiafasi ʻi hono tākiekina ʻa e Sanetalimí ke fai ha ngaahi faʻufaʻu ke tāmateʻi ʻa Sīsū. Ka ʻoku mavahe mei ai ʻa Sīsū, ʻoku ngalingali ʻokú ne ʻilo ki he ngaahi faʻufaʻu ko ʻení meia Nikotīmasi, ko ha mēmipa ia ʻo e Sanetalimí ʻoku anga-fakakaumeʻa kiate ia. Sione 11:​38-54.

◆ Ko e hā ʻoku lotu fakahāhā ai ʻa Sīsū ki muʻa ʻi hono fokotuʻu ʻo Lasalosí?

◆ Ko e hā ʻa e meʻa ʻoku fai ʻe he faʻahinga naʻa nau sio ki he toetuʻu ko iá?

◆ Ko e hā ʻokú ne fakahā ʻa e anga-fulikivanu ʻa e kau mēmipa ʻo e Sanetalimí?

◆ Ko e hā ʻa e taumuʻa ʻa Kaiafasí, ka naʻe ngāueʻaki ia ʻe he ʻOtuá ke fai ʻa e kikite ki he hā?