ʻOku Mafolalahia ʻa e Manavahē ki he Kau Maté
Kuo efiafi poʻuli. Kuo kiʻi tōmui ange ho taimi foki ki ʻapí ʻi he taimi ʻokú ke loto ki aí. ʻI hoʻo luelue atu ʻo mavahe mei ha faʻitoka ʻi he feituʻu ʻokú ke ʻi aí, ʻoku kamata ke kiʻi vave ange ʻa e tā ʻo ho mafú. ʻOku hanga ʻe he lōngonoa ʻo e pō kaupōʻulí ʻo ʻai koe ke ke ʻilo ha kiʻi longoaʻa siʻisiʻi ʻaupito. Fakafokifā ʻokú ke fanongo ki he mamaʻó ki ha ongo ʻoku leʻo kikī mo fakaʻohovale. ʻOku toe vave ange ʻa hoʻo laká—pea toe vave ange ʻa e tā ʻo ho mafú foki—ʻi hoʻo feinga ke fai mo ke aʻu ki he ongoʻi malu ʻo ho ʻapí.
KUÓ KE hokosia ha ngaahi ongoʻi tailiili ʻi he taimi naʻá ke ʻi ha faʻitoka ai pe ofi ki ai? Kapau naʻe pehē, naʻe tākiekina nai koe ʻe ha fakakaukau fakalotu ʻa ia ʻoku mafolalahia ʻi māmani lahi—ko e laumālie ʻo e kau maté ʻoku malava ke nau tokoni pe fai ha kovi ki he kau moʻuí.
ʻOku lahi ʻa e ngaahi tōʻonga ʻo e manavahē taʻeʻuhinga ki he ngaahi meʻa taʻehāmaí, kuo tupu mei he tui ʻo pehē ʻoku fiemaʻu ʻe he kau maté ʻa e tokoni mei he faʻahinga ʻoku kei moʻuí, pe ʻoku malava nai ke nau fai ha kovi ki he kau moʻuí ʻo kapau naʻe ʻikai ke fakafiemālieʻi kinautolu. Ko e fakatātaá, ʻi he ngaahi fonua ʻAmelika-Latina ʻe niʻihi, kuo angaʻaki ai ʻe he tokolahi ʻa hono fokotuʻu ha kiʻi fale mo ha kolosi ʻi he feituʻu naʻe mate ai ha taha ʻi ha fakatuʻutāmaki. ʻOku tutu ʻe he kakaí ʻa e ngaahi teʻelango pea ʻai mo e ngaahi matalaʻiʻakau ai ʻi he feinga ke fakahaaʻi ʻa e mahuʻingaʻia pe ko e tokoni ki he soulu pe ko e laumālie ʻo e tokotaha maté. ʻI he ngaahi meʻa ʻe niʻihi, ʻoku mafola holo ʻa e ngaahi fakamatala ʻo kau ki he ngaahi tali “fakaemana” ki he ngaahi lotu ʻoku faí, koeʻuhi ke kamata ʻa e kakaí ke nau ʻalu maʻu pē ki he feituʻu ʻo e animita, ko e kiʻi fale nofoʻanga ki he soulu pe laumālie ʻo e tokotaha maté. ʻOku nau fai ʻi ai ha mandas, pe ngaahi talaʻofa, ʻo pehē kapau ʻe tokoniʻi kinautolu ʻe he tokotaha maté ke nau lavaʻi pe maʻu ha meʻa—mahalo ko ha faifakamoʻui fakaemana—te nau toki fakahāhā ʻenau loto-houngá ʻi ha founga makehe. ʻI he tafaʻaki ʻe tahá, ʻoku ongona mai nai ʻo pehē ko e soulu ʻo ha tokotaha ʻoku hā holo ʻi he fakapoʻuli ʻo e poó, ʻo fakamanavaheeʻi ʻa e faʻahinga ʻoku ʻi aí. ʻOku faʻa leaʻaki ʻo pehē ko e ngaahi soulu ko iá ʻoku nau penando, fakahohaʻasi ʻa e kakai ʻoku kei moʻuí koeʻuhi ko ha ngaahi meʻa naʻe hoko ʻi he kuo hilí.
ʻI he ngaahi fonua lahi ʻoku feinga lahi ai ʻa e kakaí ke fakafiemālieʻi ʻa e “ngaahi laumālie” ʻo e kau maté. ʻOku fai ʻa e ngaahi kātoanga kai lahi, fai ʻa e ngaahi feilaulau, leaʻaki ʻa e ngaahi lea ko hono fakafiemālieʻi—ʻo fai kotoa ʻi he feinga ke ʻoua ʻe fai mai ha tautea ʻe he laumālie ʻo e tokotaha maté. ʻOku ʻi ai ʻa e fakakaukau, ko hono fakafiemālieʻi ʻa e laumālié, ʻe iku ai ki he ngaahi pale mo e ngaahi tāpuaki ki he faʻahinga ʻoku kei toé.
ʻOku pehē ʻe ha fakamatala ʻe taha mei ʻAfilika: “ʻOku tui ʻa e tokolahi ʻoku ʻikai ha meʻa ʻoku hoko ‘noa mai pē pe fakaenatula.’ Ko ha meʻa pē ʻoku hoko—hangē ko e puke, tuʻutāmaki, taʻefua, faingataʻaʻia fakaʻikonōmika, ʻuha lōvai ʻo fuʻu lahi pe laʻalaʻā, ngaahi fakatuʻutāmaki, movetevete ʻa e fāmilí, mate—ʻoku pehē ko e fakatupunga ia ʻe he ngaahi laumālie taʻehāmai ʻoku nau maʻu ʻa e ngaahi ivi ʻoku mahulu hake ia mei he tangatá.” ʻOku toe pehē ʻe ha fakamatala ʻe taha: “ʻOku tui ʻa e kakaí ko e ngaahi laumālie ʻo ʻenau ngaahi kuí ʻoku nau nofo ʻi ha feituʻu ʻi hēvani pea ʻoku nau tokanga hifo maʻu ai pē ki honau ngaahi kāinga ʻoku kei moʻui ʻi māmaní. ʻOku ʻi ai ʻa e tui ʻoku maʻu ʻe he ngaahi kuí ʻa e ngaahi ivi fakaeʻotua, ʻa ia ʻoku malava ke nau ngāueʻaki ki hono tāpuakiʻi mo hono maluʻi honau ngaahi kāinga ʻi he māmaní pe ko hono tautea kinautolu, ʻo makatuʻunga ʻi he fakalāngilangi pe ko hono siʻaki ʻe he ngaahi kāingá ʻa e kau maté.”
Ka ʻoku fehoanaki ia mo e Folofola ʻa e ʻOtuá? Ko e hā hoʻo fakakaukaú?
[Faktātā ʻi he peesi 4]
Ko ha “Animita” ʻi Saile