Lipooti ʻa e Kau Fanongonongo ʻo e Puleʻangá

Ko e Ngaahi Ngāue Leleí ʻOku Fakamālōʻia Ai ʻa Sihova

ʻI HEʻENE Malanga ʻi he Moʻungá, naʻe pehē ai ʻe Sīsū ki heʻene kau ʻaposetoló: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” (Mātiu 5:16) Pehē foki, ko e kau Kalisitiane moʻoni ʻi he ʻaho ní ʻoku nau kau ʻi he “ngāhi ngaue lelei” ʻoku fakamālōʻia ai ʻa Sihová.

Ko e hā ʻa e ngaahi ngāue lelei ko iá? ʻOku kau ki ai ʻa hono malangaʻi ʻo e ongoongo leleí, ka ko hotau ʻulungaanga faʻifaʻitakiʻangá ko e toe konga mahuʻingá ia. Ko hotau ʻulungaanga leleí ʻoku faʻa hoko ia ke ne ʻuluaki tohoakiʻi mai ai ʻa e kakaí ki he fakatahaʻanga Kalisitiané. ʻOku fakatātaaʻi ʻe he ngaahi meʻa naʻe hokosia ʻoku hoko haké ʻa e anga ʻo hono ʻai ʻe he Kau Fakamoʻoni ʻa Sihova ʻi Mātinikueí ke ‘ulo atu ʻenau māmá ke hā ki he kakaí.’

◻ ʻI he lolotonga ʻo e kau ki he ngāue fakamalanga fale-ki-he-falé, naʻe ʻaʻahi ai ha taha ʻo e Kau Fakamoʻoni ʻa Sihová ki ha fefine Katolika. Ko e fefiné ni naʻá ne nonofo ʻi he taʻu ʻe 25 mo ha taha ʻa ia naʻe ʻikai te ne mali mo ia. Naʻá ne maheni mo e ngaahi meʻa ʻoku akoʻi ʻe he Kau Fakamoʻoni ʻa Sihová, koeʻuhi ʻi he taʻu nai ʻe fitu ki muʻá, naʻá ne maʻu ai ʻa e tohi Te Ke Malava ʻo Moʻui Taʻengata he Palataisi ʻi he Māmaní.a Naʻe pehē ʻe he fefiné ki he tokotaha Fakamoʻoní: “ʻOku fuʻu lahi ʻa e ngaahi lotú. ʻOku ʻikai te u ʻilo pe ko hai ke tui ki ai ʻi he lolotonga ʻo e ngaahi puputuʻú ni kotoa.” Naʻe fakamatalaʻi ʻe he tokotaha Fakamoʻoní ko e moʻoní ʻe lava ke maʻu pē ia ʻi he Tohitapú pea ke ne maʻu iá, kuo pau ke ne ako fakalelei ʻa e Tohitapú pea lotu ki he ʻOtuá ʻo kole hono laumālié pea mo e fakahinohinó.

ʻI ha vahaʻa taimi, neongo ʻa e mahuʻingaʻia ʻi hono ako ʻa e Tohitapú, naʻe talitekeʻi ʻe he fefiné ha ngaahi fakaafe ke ne maʻu ʻa e ngaahi fakataha faka-Kalisitiané ʻi he Fale Fakatahaʻanga ʻo e Kau Fakamoʻoni ʻa Sihová. Ko e hā hono ʻuhingá? Naʻá ne mātuʻaki mā. Kae kehe, hili hono maʻu ha fakaafe ki he Fakamanatu ʻo e pekia ʻa Kalaisí, naʻá ne ikuʻi ʻene maá peá ne maʻu ia.

Ko e meʻa naʻe maongo lahi taha kiate ia fekauʻaki mo e fakatahá ko e ʻatimosifia ʻo e ʻofá ʻi he Fale Fakatahaʻangá. Naʻe ʻikai ʻaupito te ne hokosia ha kaungāmeʻa moʻoni pehē ʻi he lotu naʻá ne kau ki aí! Hili ʻa e fakataha ko iá naʻe kamata ke ne maʻu maʻu pē ʻa e ngaahi fakataha kotoa naʻe fai ʻe he Kau Fakamoʻoni ʻi he koló, pea naʻá ne mali leva mo e tangata ko ia naʻá ne nonofo mo iá. ʻOkú ne hoko he taimí ni ko ha mēmipa ʻosi papitaiso ʻi he fakatahaʻangá.

◻ Ko e ngaahi ngāue lelei ʻa ha tokotaha Fakamoʻoni ʻe taha naʻe maʻu ai ha ngaahi ola lelei. Naʻá ne maʻu ha tuʻunga lakanga ʻi ha ʻōfisi. ʻI he hili hono ʻomai ha tangata mei he kiʻi motu ko Réunion ke ngāue, naʻe manukiʻi ʻa e tangatá ni ʻe he kau ngāue ʻe niʻihi koeʻuhi ko ʻene pukupukú. Naʻá ne hoko ko ha meʻa fakakata. ʻI hono kehe ʻaupitó, ko e tokotaha Fakamoʻoní ia naʻe anga-ʻofa pea mo anga-fakaʻapaʻapa maʻu pē ki he tangatá. Naʻe ʻeke ange leva ʻe he tangatá kiate ia pe ko e hā hono ʻuhinga ʻokú ne fuʻu kehe ʻaupito aí.

Naʻe fakamatalaʻi ange ʻe he tokotaha Fakamoʻoní ko ʻene ʻulungaanga fakaʻapaʻapá ko ha ola ia ʻo e ngaahi tefitoʻi moʻoni ʻo e Tohitapú ʻa ia naʻá ne ako mei he Kau Fakamoʻoni ʻa Sihová. Naʻá ne fakahā ange foki kiate ia ʻa e lau ʻa e Tohitapú ʻo fekauʻaki mo e ngaahi taumuʻa ʻa e ʻOtuá pea mo e ʻamanaki ki he maama foʻoú. Naʻe tali ʻe he tangatá ha ako Tohitapu, kamata ke ne maʻu ʻa e ngaahi fakatahá, pea mali foki mo e fefine ʻa ia naʻá ne nonofo mo iá.

Faifai atu pē naʻá ne foki ki Réunion. ʻI he kuohilí, naʻá ne hokosia ha ngaahi faingataʻa mei hono ngaahi kāingá, kae tautefito ki he fāmili hono uaifí. Ka ʻi he taimí ni kuo nau ʻohovale ʻi heʻene ʻulungaanga faka-Kalisitiane leleí. Naʻe papitaiso leva ʻa e tangatá ni pea ʻi he taimí ni ko ha sevāniti fakafaifekau ia. Ko e ngaahi mēmipa ʻe niʻihi ʻo e fāmilí, kau ai hono uaifí pea mo hono ʻofefine ʻe toko ua, ʻoku nau kau foki ʻi he fakatahaʻanga Kalisitiané ko e kau malanga ʻo e ongoongo lelei ʻo e Puleʻanga ʻo e ʻOtuá.

[Fakamatala ʻi lalo]