Fakahaofi ʻi ha Taimi ʻo e Tuʻutāmakí
KO E fuʻu falekoloa lahi fungavaka nima ʻi Seulu, Kōlea, naʻe holo fakafokifā, ʻo taʻomia ai ʻi loto ʻa e kakai ʻe laui ngeau! Naʻe ngāue ʻaho mo poʻuli ʻa e kau ngāue fakahaofí ke fakahaofi ʻa e ngaahi moʻui lahi taha ʻe ala lavá. ʻI he hili atu ʻa e ngaahi ʻaho, naʻe kamata ke mōlia atu ʻa e ngaahi faingamālie ki hano maʻu ha toe kau hao moʻui mei he tanumia ʻi he fuʻu fokotuʻunga mapakipakiʻi sima mo e ukamea ko ʻení.
ʻI he mole atu pē ha toe ʻamanakí, naʻe hoko ha meʻa fakaʻohovale. Naʻe ongona mei he lalo mafōfoaʻi simá ha tangi tautoʻe ngāvaivai. Naʻe keli fakatovave hake leva ʻe he kau fakahaofi-moʻuí ʻaki honau ongo nimá ke fakaʻatā hake ha kiʻi fefine taʻu 19 naʻe tanumia moʻui pē he ʻaho lōloa ʻe 16. Ko ha foʻi saafi ʻo ha lifi naʻe holo hifo ʻo ne fokotuʻu ha kiʻi ʻana haoʻanga kiate ia ʻo maluʻi ai ia mei he ngaahi toni ʻo e ngaahi holisi sima naʻe holo hifó. Neongo ʻa e mahahuʻa e sinó mo e lavelavea lalahí, naʻá ne hao mei he maté!
ʻI he ngaahi ʻahó ni, ʻoku ʻikai ke mei hala ha māhina ʻi hono līpooti mai ai ha fakatamaki, ʻo tatau pē pe ko ha mofuike, ko ha afā mālohi, ko ha puna ʻa ha moʻunga afi, ko ha fakatuʻutāmaki, pe ko ha honge. Pea ko e ngaahi talanoa fakaholomamata ʻo e ngaahi fakahaofí mo e ngaahi hao moʻuí ʻoku fakatupu mahuʻingaʻia mo fakamānako ia ki he laui miliona ko ia ʻoku nau muimui ki he ngaahi ongoongó. Kae kehe, ʻoku ʻi ai ha fakatokanga fekauʻaki mo ha fakatamaki ʻoku tuʻunuku mai—ko e fakatamaki ʻoku lahi ange ia ʻi ha toe fakatamaki kehe pē ʻi he hisitōlia ʻo e tangatá—kuo tukunoaʻi ʻe he tokolahi taha. (Mātiu 24:21) ʻOku fakamatalaʻi ʻe he Tohitapú ʻa e meʻa ko ʻeni ʻoku tuʻunuku maí ʻi he ngaahi leá ni: “Vakai, ko e kovi é ʻe ʻalu mei he puleʻanga ki he puleʻanga, pea ʻe langaʻi hake ha fuʻu afa mei he ngaahi ngataʻanga ʻo mamani. Pea ʻe fokotuʻutuʻu ʻa e ta ʻa Sihova ʻi he ʻaho ko ia mei he ngataʻanga ʻe taha ʻo mamani, ʻo aʻu ki hono ngataʻanga ʻe taha: ʻe ʻikai tengihia kinautolu, pea ʻe ʻikai tanaki, pea ʻe ʻikai tanu; te nau hoko ko e kinohaʻa pe ʻi he funga kelekele.”—Selemaia 25:32, 33.
He ngaahi lea fakaʻohovale ē! Ka ʻi he ʻikai ke hangē ko e ngaahi fakatamaki fakanatulá mo e ngaahi fakatuʻutāmakí, ʻe ʻikai ke hoko ʻa e tuʻutāmaki ia ko ʻení ko ha tāmate tavale. Ko hono moʻoní, ʻe ʻi ai ʻa e hao moʻui—ko haʻo hao moʻui—ʻoku lava ia!
Ko ha Taimi ʻo e Fakavavevave
Ke makupusi kakato ʻa e moʻoniʻi meʻá ni, kuo pau ke mahino kiate kita ʻa e ʻuhinga ʻe hoko mai ai ʻa e tuʻutāmaki ko ʻeni ki māmani kātoá. Ko hono moʻoní, ko e fakaleleiʻanga moʻoni pē ia ʻe taha ki he ngaahi palopalema ʻo e faʻahinga ʻo e tangatá. ʻOku tokosiʻi pē ʻa e kakai he ʻahó ni ʻoku nau ongoʻi hao mo malú. Neongo ʻa e ngaahi feinga lelei taha ʻa e kau saienisí, ʻoku kei hokohoko atu pē hono fakaʻauha ʻe he ngaahi mahaki pipihí ia ʻa e kakai ʻo e māmaní. Ko e ngaahi tau kuo tupu mei he ngaahi faikehekehe fakalotu, fakamatakali, mo e fakapolitikale ʻo mole ai ʻa e ngaahi moʻui fakaetangata ʻe laui afe. ʻOku tānaki atu ʻa e hongé ki he mamahiʻanga mo e faingataʻaʻia ʻa e kau tangata, kau fefine, mo e fānau taʻehalaiá. ʻOku keina ʻe he tōlalo fakaeʻulungaangá ʻa e faʻunga tefito ʻo e sōsaietí; naʻa mo e fānaú kuo fakameleʻi.
ʻI he fakaofo ʻo ʻene tonú, ko ha kikite faka-Tohitapu naʻe hiki ia ʻo laka hake ʻi he taʻu ʻe 1900 kuo maliu atú ʻokú ne fakamatalaʻi hotau tuʻungá. ʻOkú ne pehē: “Kuo pau ke ke fakatokangaʻi ʻi he ngaahi ʻaho fakaʻosí ko e ngaahi taimi ia ʻe fonu fakatuʻutāmaki.”—2 Timote 3:1, The New Testament in Modern English, fai ʻe J. B. Phillips; fakafehoanaki mo Mātiu 24:3-22.
ʻOku hā ngali ʻuhinga lelei kiate koe heʻikai ke tokotokanga mai ha ʻOtua ʻofa ia ki hotau faingataʻaʻiá? ʻOku pehē ʻe he Tohitapú: “Koe Otua be aia nae fakafuofua a mamani mo fakatubu ia; . . . nae ikai te ne gaohi ke tae aoga ia, naa ne fakafuofua ke nofo ai ae kakai.” (Aisea [Isaia] 45:18, PM) ʻIo, ʻi he ʻikai ke fakaʻatā ʻa e palanite fakaʻofoʻofa ko ʻení ke fakaʻauha pea fakangata mo e kakai ʻoku nofo aí, ʻe kau mai ʻa e ʻOtuá. Ko e fehuʻí ʻoku pehē, ʻE anga-fēfē ʻene fai iá?
Fili ki he Moʻuí!
ʻOku tali mai ʻe he Tohitapú ʻi he Sāme 92:7: “Ka faliki mai ʻa e angahala hange ha musie, pea fisi ʻa e kau faikovi fuape; ko hono ʻuhinga ke nau ʻauhia ai pe.” Ko e fakaleleiʻanga ʻa e ʻOtuá ki he ngaahi palopalema ʻo e māmaní ko hono toʻo atu ʻa e faikoví. Ko e meʻa fakafiefiá, ʻoku ʻikai ʻuhinga ʻeni ia ʻoku fiemaʻu ke toʻo atu ʻa e kakai kotoa pē. ʻOku fakapapauʻi mai ʻe he Sāme 37:34 kiate kitautolu: “Talitali kia Sihova, pea tauhi hono ʻalunga, pea te ne hakeakiʻi koe ke maʻu ʻa e fonua: Ka hoko ʻa e motuhi ʻo haʻa faikovi te ke mātā ia.”
ʻOku fakahaaʻi ʻe he ngaahi leá ni ʻoku ʻi ai ha faingamālie ke hao atu he fakatuʻutāmaki lahi taha ʻe tō mai ki he faʻahinga ʻo e tangatá. Kuo tuku mai ʻe he ʻOtuá ke tau fai ha fili. Ko e ngaahi lea ko ia naʻe naʻinaʻiʻaki ʻe Mōsese ki he kau ʻIsilelí ʻi heʻenau teu hū ki he Fonua ʻo e Talaʻofá ʻoku kaungatonu tatau pē kiate kitautolu he ʻaho ní: “Kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako.” (Teutalonome 30:19) Ka ʻe anga-fēfē ʻete “fili ki he moʻui” ka te hao? Ko e hā hono ʻuhinga moʻoni ʻo e fakamoʻui moʻoní?
[Maʻuʻanga ʻo e Tā ʻi he peesi 2]
TAKAFI: Pā: Copyright © Gene Blevins/Los Angeles Daily News
[Maʻuʻanga ʻo e Tā ʻi he peesi 3]
Yunhap News Agency/Sipa Press