Līpooti ʻa e Kau Fanongonongo ʻo e Puleʻangá
Ngāueʻaki ʻa e Faingamālie Kotoa Pē
KO E Kau Fakamoʻoni ʻa Sihová ʻoku ʻiloa ʻi māmani lahi ʻi heʻenau ngāue fakaeako Tohitapú. Ka ʻoku nau toe fai ʻa e ngaahi polokalama ʻa ia ʻokú ne ʻomai ʻa e ngaahi ʻaonga kehe ki he sōsaietí. Ko e ngāue ko ʻeni ki he kakaí kuo tali lelei, hangē ko ia ʻoku fakahaaʻi ʻi he ngaahi meʻa hoko hake naʻe hokosia ʻi ʻEkuatoá.
◻ Naʻe fiemaʻu ʻi hono fakalele ʻo ha fuʻu falengāue sioʻata ke fokotuʻutuʻu ha koosi fekauʻaki mo e ngaahi meʻa mahuʻinga ki he fāmilí maʻa ʻenau kau ngāué. Naʻe fakaafeʻi ʻe he talēkita ʻo e kau ngāué ha kau pātele Katolika ʻe niʻihi ke nau kau mai, ka naʻe ʻikai ha tali. Naʻe tala ange ʻe he pātele ʻe taha kiate ia ʻoku tokosiʻi ʻaupito ʻa e kau pātele naʻa nau taau ke talanoa ʻi he tuʻunga-leá ʻa ia ʻoku hangehangē ʻe ʻikai ala maʻu ai ha taha. ʻI he fanongo ki hení, naʻe fai ai ʻa e ngaahi fokotuʻutuʻu ʻe ha tokotaha ngāue ko ha Fakamoʻoni ki ha tokoua ʻa ia ʻokú ne faʻa ngāueʻi ʻa e ngaahi feituʻu pisinisí ke ʻaʻahi ki he falengāué.
ʻI he ʻaho pē hono hokó, naʻe ʻalu atu ai ʻa e tokotaha Fakamoʻoní ki he talēkita ʻo e kau ngāué mo ha fokotuʻu ki ha koosi ako. Naʻe toʻo hake ha lisi ʻo e ngaahi tuʻunga-lea mei he ngaahi tohi kehekehe ʻa e Sōsaieti Taua Leʻó. Naʻe maongo ki he talēkitá. Naʻá ne fili ʻa e tuʻunga-lea ʻe tolu ki he fetalanoaʻakí—vahaʻangatae fakaetangatá, tefitoʻi moʻoni fakaeʻulungaanga ʻi he ngāueʻangá, mo e tefitoʻi moʻoni fakaeʻulungaanga ʻi he fāmilí. Naʻe fai leva ai ʻa e ngaahi fokotuʻutuʻu ke vakai ki he fakamatalá mo e kau ngāué kotoa.
Naʻe vahevahe ʻa e kau ngāué ki he kulupu ʻe fitu ʻo taki toko 30 he kulupu, hili iá naʻe fakahoko kiate kinautolu ʻa e fakamatalá ʻe he fanga tokoua taau ʻe toko tolu. Ko e hā ʻa e olá? Naʻe kole ʻa e kau ngāue tokolahi ke ʻaʻahi ange kiate kinautolu ʻi honau ngaahi ʻapí, pea naʻe tufa ai ʻa e ngaahi tohi tokoni ako Tohitapu ʻe 216. Naʻe mātuʻaki maongo ki he kau taki ʻo e ngāué ʻo nau kole pe ʻe lava ʻa e Kau Fakamoʻoní ʻo teuteu ha ngaahi toe malanga hokohoko.
◻ Ki mui mai, naʻe paasi ai ʻi ʻEkuatoa ha lao ʻoku fakaʻatā ai ʻa e lotú ke akoʻi ʻi he akoʻangá. Naʻe ʻaʻahi ai ha tuofefine misinale ki ha pule ako fefine ʻo ha ako siʻi peá ne ʻeke ʻa e founga hono fakahoko ʻo e lao foʻoú. Naʻe fakamatala ʻa e pule akó naʻe fai ha feinga ke kamata ha polokalama ʻi he lotu kia Maliá ka naʻe halaʻatā ke fakahoko. ʻI he fakamatala ʻa e tuofefiné ʻe lava ke fakatupu ha ngaahi palopalema ʻi he founga-lotu peheé ki he fānau ʻikai ke Katoliká, naʻe loto-tatau mo ia ʻa e pulé. “ʻI he tafaʻaki ʻe tahá,” naʻe pehē ʻe he misinalé, “ʻoku ʻi ai ʻemau polokalama ki hono akoʻi ʻa e ngaahi tefitoʻi moʻoni fakaeʻulungaanga mei he Tohitapú ʻa ia ʻoku ʻikai te ne fakamoʻuaʻi ha tokotaha ke ne tali ha lotu tefito.” Naʻe tali ange ʻa e pulé: “ʻE lava ke ke haʻu ʻafē? Ko e ʻaho hoko mai ʻapongipongí?” Hili hono fakahā ange ʻe he misinalé kiate ia ʻa e tohi ko e Listening to the Great Teacher, naʻe fakapapauʻi ai ke nau vakai ki he vahe “Fiefiaā ka ko e Kau Fakamelinó.”
ʻI heʻene foki atú, naʻe fakamoleki ai ʻe he misinalé ʻa e houa ʻe tolu ʻi heʻene ʻaʻahi ki he ngaahi loki ako kehekehe ʻe fitu mo e pulé naʻe kau ʻi he fanongó. Hili ha fakataha mo ha kalasi kuleiti nima, naʻe pehē ange ai ʻe ha tokotaha ako ʻe taha: “Taʻahine, kātaki fakapapauʻi ange muʻa ke ke ʻaʻahi ki he kuleiti onó. ʻOku nau feinga maʻu pē ke tā kimautolu mo fakalanga fuhu!” Naʻe pehē ʻe ha faiako ʻe taha: “Ko e fakamālohí ko ha tuʻunga-lea mahuʻinga ia. ʻOku mau fiemaʻu ʻa e taimi lahi ange ke lāulea ai ki he meʻá ni.”
Naʻe fai ʻa e ngaahi fokotuʻutuʻu ki ha ngaahi toe ʻaʻahi ki he akoʻangá ke lāulea ki he ngaahi kaveinga pehē hangē ko e talangofuá mo e loí. Ko ia ko e meʻa ʻoku hokó, kuo mātuʻaki fakafiemālie ʻa e olá. Ko ia, ʻi he taimi ʻoku luelue atu ai ʻa e tuofefine misinalé he halá, ʻoku lele mai ʻa e fānaú ʻo fakafeʻiloaki mo ʻeke ʻa e ngaahi fehuʻi faka-Tohitapu. ʻOku fakafeʻiloaki laukauʻaki ia ʻe he niʻihi kehé ki heʻenau mātuʻá. Tānaki atu ki ai, kuo kamata ha ako Tohitapu ʻi ʻapi mo e toko ua ʻo e fānau akó.