Fekauʻi Atu ʻe Kiliati ʻa e Kau Misinale “ki he Ngataʻanga ʻo Māmani”
KUO laka hake ʻi he vaeuaʻi senituli he taimí ni, ʻa hono fekauʻi atu ʻe he Akoʻanga Taua Leʻo Tohitapu ko Kiliatí ʻa e kau misinalé. ʻI Sepitema 11, 1999, naʻe foaki tohi fakamoʻoni ako ai ʻa e kalasi hono 107 ʻo Kiliatí. Naʻe kau ki ai ʻa e kau ako ʻe toko 48 mei he ngaahi fonua ʻe 11, pea naʻe vaheʻi ʻa e faʻahingá ni ke nau ngāue ʻi he ngaahi fonua kehekehe ʻe 24. Te nau kau fakataha ai mo e laui afe ʻo e kau misinale kehe, ʻa ia kuo nau fakahoko ha ngafa mahuʻinga ʻi hono fakahoko ʻa e ngaahi lea fakaʻosi ʻa Sīsū ki muʻa ke ne ʻalu hake ki hēvaní. Naʻá ne tomuʻa tala ai ko ʻene kau ākongá te nau hoko ko e “kau fakamoʻoni [ʻaʻana], . . . ʻo aʻu ki he ngataʻanga ʻo māmani.”—Ngāue 1:8.
Ko e polokalama foaki tohi fakamoʻoni akó, naʻe fai ʻi he Senitā Fakaeako Taua Leʻo ʻi Patterson, Niu ʻIoké, naʻe fakamoʻoniʻi ʻa ʻene hoko ko ha kātoanga maʻongoʻonga ʻi ha ngaahi ʻātakai fakaʻofoʻofa. Naʻe fiefia ʻaupito ʻa e kau ako maʻu tohi fakamoʻoni akó ʻi he kau mai ki ai ʻa e ngaahi kāingá, ngaahi kaumeʻa ofí, mo e kau fakaafé. Naʻe kau fakataha mai ki ai ʻa e faʻahinga naʻa nau fanongo mo mamata ʻaki ʻa e ngaahi fehokotakiʻanga ki he ngaahi fale ʻi Brooklyn mo Wallkill, ʻi he ʻeá mo e vitioó, ko e fakakātoá ko e toko 4,992.
Tauhi Anga-Tonu ʻa Sihova mo e Kaungāʻapí
“Ko Hai ʻOku ʻi he Faʻahi ʻa Sihova?” Ko e kaveinga ia ʻo e ngaahi lea fakaava ʻa Carey Barber, ko ha mēmipa ʻo e Kulupu Pulé mo e sea ʻo e polokalama foaki tohi fakamoʻoni akó. Naʻá ne fakamatala ko e ʻīsiu eni naʻe fehangahangai mo e kau ʻIsileli ʻi he ʻaho ʻo Mōsesé. Ko e kau ako maʻu tohi fakamoʻoni akó mo e faʻahinga naʻe kau ki aí naʻe fakamanatu kiate kinautolu ko e tokolahi ʻo e kau ʻIsilelí ne mole ʻenau moʻuí ʻi he toafá koeʻuhi naʻe ʻikai ke nau nofo mateaki ʻi he tafaʻaki ʻa Sihová. Hili ʻenau tō ʻo maʻukovia ʻe he tauhi ʻaitolí, naʻa nau “nofo . . . ʻo kai mo inu kava, pea nau tutuʻu ke vaʻinga.” (Ekisoto 32:1-29) Naʻe fakatokanga ʻa Sīsū ki he kau Kalisitiané ʻo fekauʻaki mo e fakatuʻutāmaki tatau: “Mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia.”—Luke 21:34-36.
Ko e tokotaha malanga hono hokó, ʻa Gene Smalley, ʻo e Potungāue Faitohí, naʻá ne ʻeke ki he kau ako maʻu tohi fakamoʻoni akó: “Te Mou Fakamoʻoniʻi ʻa Hoʻomou Hoko ko ha Faitoʻo Fakanongá?” Naʻá ne fakamatala ko e foʻi lea faka-Kalisi ko e pa·re·go·riʹa naʻe ohi mai ia ki he lea faka-Pilitāniá ko ha hingoa ki ha fefiohi fakaefaitoʻo ʻa ia ʻokú ne fakanonga ʻa e mamahí. Kae kehe, naʻe ngāueʻaki ʻe he ʻapositolo ko Paulá ʻa e foʻi lea faka-Kalisi mahuʻinga ko ení ʻi he Kolose 4:11 ke fakamatalaʻiʻaki ʻa hono kaungāngāué. ʻI he New World Translation, ʻoku liliu ai ʻa e foʻi leá ni ko “ha tokoni fakaivimālohi.”
ʻI honau ngaahi vāhenga-ngāué ʻoku lava ke hoko ʻa e kau misinale maʻu tohi fakamoʻoni ako ʻi onopōní ko e kau faitoʻo fakanonga ʻi ha founga mātuʻaki ʻaonga ʻaki ʻa e hoko anga-fakatōkilalo ko ha tokoni fakaivimālohi ki he fanga tokoua mo e fanga tuofāfine fakalotofonuá pea ʻi hono tapua atu ha laumālie fāitaha mo anga-ʻofa ʻi he feohi mo e kaungā misinalé.
Ko Daniel Sydlik, ko ha mēmipa ʻo e Kulupu Pulé, naʻá ne lea hokó ʻi he kaveinga “Ko e Lao Koula ke Moʻuiʻakí.” Naʻá ne fakamatala ko e tefitoʻi moʻoni māʻolunga naʻe fokotuʻu ʻe Sīsū ʻi he Mātiu 7:12, “ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu,” ʻoku kau ki ai ʻa hono fai ʻa e ngaahi meʻa lelei ki he niʻihi kehé, ʻo ʻikai ko e fakaʻehiʻehi pē mei hano fai ha maumau.
Ke fai lavameʻa ʻa e meʻá ni, ʻoku fiemaʻu ki ai ʻa e meʻa ʻe tolu: ko ha sio ʻa e matá, ko ha loto kaungāongoʻi, pea mo ha nima tokoni. ʻI hono fakatahaʻí, naʻá ne pehē: “Kapau ʻoku tau ongoʻi ha holi ke tokoni, ʻoku totonu leva ke tau tokoni. Kuo pau ke tau feinga mālohi ke fai ki he niʻihi kehé ʻa e meʻa te tau saiʻia ke nau fai mai kiate kitautolú.” ʻE tautefito ʻa e moʻoni ʻo e meʻá ni ʻi he kau misinale ʻoku nau ō ki he ngaahi fonua kehé ke tokoniʻi ʻa e kakaí ke nau tōʻongaʻaki ʻa e lotu faka-Kalisitiane moʻoní.
Fai ʻe he Kau Faiakó ʻa e Ngaahi Fakamanatu Fakalotomāfana
Naʻe fakalotolahiʻi ʻe he faiako Kiliati ko Karl Adams ʻa e kau misinale maʻu tohi fakamoʻoni akó ke nau “Hanganaki Tupulekina.” ʻI he ngaahi tafaʻaki fē? ʻUluakí, ʻi he ʻiló pea ʻi he malava ke ngāueʻaki lelei iá. ʻI Kiliati, naʻe ako ai ʻa e kau akó ki he founga ke fai ai ʻa e fekumi ke maʻu ʻa e ʻātakai mo e fokotuʻutuʻu ki he ngaahi fakamatala ʻi he Tohitapú. Naʻe fakalotolahiʻi kinautolu ke nau fakakaukau ki he founga ʻoku totonu ke laveʻi ai ʻenau moʻuí ʻe he fakamatala taki taha. Naʻe fakaʻaiʻai kinautolu ke nau hanganaki fai ʻa e meʻá ni.
“Ko hono uá, ko e hanganaki tupulekina ʻi he ʻofá. Ko e ʻofá ko e meʻa ia, ʻoku tupu ʻi he taimi ʻoku fafangaʻi aí. ʻOku lava ke mate ia, ʻi hono fakaliʻeliʻakí,” ko e lea ia ʻa Tokoua Adams. (Filipai 1:9) ʻI heʻenau hoko ko eni ko e kau misinalé, ʻe fiemaʻu ke nau tupulekina ʻi he ʻofá ʻi he malumalu ʻo e ngaahi tuʻunga kehekehe. Pea ko hono tolú: “Mou tupu ai pe ʻi he kelesi [“ʻofa maʻataʻatā,” NW], pea ʻi he ʻiloʻi ʻo hotau ʻEiki mo Fakamoʻui ko Sīsū Kalaisi.” (2 Pita 3:18) “Ko e ʻofa fakaofo eni naʻe fakahaaʻi ʻe Sihova fakafou ʻi hono ʻAló,” ko e lea ia ʻa e tokotaha malangá. “ʻI heʻetau tupulekina ʻi he houngaʻia ki he ʻofa maʻataʻatā ko ení, ʻoku tupulekina ai ʻetau fiefia ʻi hono fai ʻo e finangalo ʻo e ʻOtuá pea ʻi hono fakahoko ʻa e meʻa kuó ne vaheʻi mai ke tau faí.”
Ko e tokotaha faiako Kiliati ʻe taha, ko Mark Noumair, naʻá ne lea ʻi he kaveinga “Tali Ia ʻAki ʻa e ʻOfá, pea Te Ke Lava ʻo Matatali Ia.” Naʻá ne naʻinaʻi: “Ako ke tali ʻa e ngaahi tuʻunga ko e pole ʻi he moʻui fakaemisinalé ʻaki ʻa e ʻofá, pea te mou malava ke matatali ia. ʻOku akonakiʻi pē ʻe Sihova ʻa e faʻahinga ko ia ʻokú ne ʻofaʻí. Neongo kapau ʻoku mou ongoʻi ʻoku taʻefakapotopoto ha akonaki pau, ʻo filifilimānako, pe ʻikai ke sai, ko e ʻofa kia Sihová mo homou vahaʻangatae mo iá te ne tokoniʻi kimoutolu ke mou tali ia.”
Naʻe fakahaaʻi ʻe Tokoua Noumair ko e ngāue misinalé ʻoku kau ki ai ʻa e ngaahi fatongia lahi. “Ka ko e fatongia ʻoku ʻikai ʻi ai ha ʻofá te ne ʻai kimoutolu ke mou taʻefiemālie. ʻI he ʻikai ha ʻofá, ko homou ngaahi fatongia fakaʻapí—hangē ko e feimeʻatokoní, faifakataú, fufulu ʻo e fuaʻiʻakaú, fakalili vaí—ʻe lava ke hoko ia ʻo mātuʻaki fakafiu. Kuo pau ke ke tuʻu ʻo ʻeke hifo kiate koe tonu, ‘Ko e hā ʻoku ou fai ai ení?’ Sai, kapau ʻokú ke pehē hifo kiate koe, ‘ʻOku tokoni ʻa ʻeku ngaahi feingá ki he moʻui lelei mo e fiefia ʻa hoku kaungā misinalé,’ ʻe ʻikai leva ke faingataʻa ke tali ia.” ʻI hono fakanounoú, naʻá ne enginaki: “Tatau ai pē pe ko e hoko mai ki hono tali ʻa e akonakí, fakahoko hoʻomou ngaahi tukupā fakaemisinalé, pe ko hono fakaleleiʻi ʻa e ngaahi taʻefemahinoʻakí, ko hono fai ia ʻaki ʻa e ʻofá te ne ʻai ai ke mou malava ʻo kātaki ʻi homou vāhenga-ngāué. ‘Ko ʻofá ʻoku ʻikai kaʻanga.’”—1 Kolinito 13:8.
Ko e faiako Kiliati ko Wallace Liverance naʻá ne sea hono hokó ʻi hono toe fakahoko ha ngaahi meʻa fakafiefia naʻe hokosia ʻe he kau akó lolotonga ʻenau ngāue mo e ngaahi fakatahaʻanga fakalotofonuá. ʻI he tānaki atu ki he ʻalu fale ki he falé, naʻa nau ngāueʻaki honau akoʻi fakamisinalé ʻi he kumi ki he kakai ʻi he ngaahi tauʻanga lolí, ngaahi fale foó, ngaahi tauʻanga lēlué, mo e ngaahi feituʻu kehé.
Fai ʻe he Kau Misinale Taukeí ʻa e Ngaahi Fakapapau
ʻI he taimi ʻoku ō ai ʻa e kau misinale foʻoú ki ha fonua muli, ʻoku ʻi ai ha fiemaʻu ki ha hohaʻa ʻo loto-moʻua? ʻE lava ke nau fetaulaki mo e ngaahi pole ʻi ha vāhenga-ngāue muli? Ko e hā ʻoku fai ʻe he ngaahi ʻōfisi vaʻá ke tokoniʻi ʻa e kau aʻu foʻou atu ko ení ke nau lavameʻá? Ke tali eni mo e ngaahi fehuʻi kehe, ko Steven Lett, ʻo e Potungāue Ngāué, mo David Splane, ʻo e Potungāue Faitohí, naʻá na fakaʻekeʻeke ʻa e fanga tokoua ko ia naʻa nau kau ki he ako ʻa e vaʻá ʻi he Senitā Fakaeako Taua Leʻó. Ko e fanga tokoua naʻe fakaʻekeʻeké ʻoku nau ngāue ʻi he ngaahi kōmiti vaʻa ʻi Sipeini, Hongo Kongo, Laipīlia, Penini, Matakasikā, Pelēsila, mo Siapani.
Ko e kau sevāniti taukei ko eni ʻa Sihová, ko e tokolahi ai kuo nau ngāue ko e kau misinale ʻi he laui hongofuluʻi taʻu, naʻa nau fakapapauʻi ia ki he kau ako maʻu tohi fakamoʻoni akó pea pehē ki heʻenau ngaahi mātuʻá mo e ngaahi kāinga naʻe haʻu ki aí. Makatuʻunga ʻi heʻenau taukei fakafoʻituituí tonu pea pehē ki he kaungā misinalé, naʻa nau fakahaaʻi ai ko e ngaahi palopalemá mo e ngaahi loto-hohaʻá ʻoku lava ke fekuki lavameʻa mo ia. ʻE lahi nai ʻa e palopalema te nau fehangahangai mo iá, “ka ʻe lava ke solova, pea ʻoku tokoniʻi kitautolu ʻe he Sōsaietí,” ko e fakamatala ia ʻa Raimo Kuokkanen, ko ha misinale ʻi Matakasikā. “Naʻe ʻikai te mau fili ʻa e vāhenga-ngāué, naʻa mau maʻu ia,” ko e lea ia ʻa Östen Gustavsson, ʻoku ngāue he taimí ni ʻi Pelēsila. “Ko ia ai, naʻa mau fakapapauʻi ke fai ʻemau lelei tahá ke pipiki ki ai.” Ko James Linton, ʻa ia ʻoku ngāue ʻi Siapaní, naʻá ne pehē ko e meʻa naʻá ne tokoniʻi iá “ko e ʻi ai ʻa e fanga tokoua kuo nau ʻosi ngāue ʻi ha vāhenga-ngāue fakamisinalé.” Ko e ngāue fakamisinalé ko ha founga fakafiefia mo fakafiemālie ia ʻo hono tauhi ʻa Sihova mo tokangaʻi ʻa ʻene fanga sipí.
Fakaʻehiʻehi mei he Mahaki Fakaʻauha Ko Ia ʻOkú Ne Tāmateʻi ʻa e Tuʻunga Fakalaumālié
Ko Theodore Jaracz, ko ha mēmipa ʻo e Kulupu Pulé, ʻa ia ko ia tonu naʻe maʻu tohi fakamoʻoni ako ʻi he kalasi hono fitu ʻa Kiliatí ʻi he 1946, naʻá ne fai ʻa e malanga fakaʻosí, ʻi he kaveinga “Ko e Pole ke Hanganaki Moʻui Fakalaumālié.” ʻI he ʻuluaki lāuʻilo ki he ngaahi kovi fakalilifu ʻoku hoko ʻi he ngaahi tapa kehekehe ʻo e māmaní, naʻá ne fakahaaʻi ko e ngaahi fakatamaki kovi ange moʻoní, ʻoku hoko ia ki he faʻahinga ʻo e tangatá.
ʻI he lave ki he Sāme 91, naʻe fakahaaʻi ai ʻe Tokoua Jaracz ko e “mahaki lahi” mo e “fakaauha” ʻa e meʻa ko ia kuó ne ʻai ke puke mo tāmateʻi fakalaumālie ʻa e laui miliona takatakai ʻiate kitautolú. Ko e Tēvoló mo e ʻene fokotuʻutuʻu fulikivanú kuó ne ngāueʻaki ʻa e fakakaukau hangē ha mahaki fakaʻauhá, ʻo makatuʻunga ʻi he poto fakaeʻatamaí, mo e ʻofa ki he meʻa fakamatelié, ke ne fakavaivaiʻi mo tāmateʻi ʻa e tuʻunga fakalaumālié, ka ʻoku fakapapauʻi mai ʻe Sihova kiate kitautolu ko e mahaki fakaʻauha ko ení ʻe ʻikai hoko mai ia ʻo ofi kiate “ia oku nofo i he botu lilo i he fugani maoluga.”—Sāme 91:1-7, PM.
“Ko e polé,” ko e lea ia ʻa Tokoua Jaracz, “ko e hanganaki moʻui lelei ʻi he tuí, ke nofo maʻu ai ʻi he feituʻu malú. Heʻikai lava ke tau hangē ko e kau manuki ‘ʻoku ʻikai hanau tuʻunga fakalaumālié.’ Sai ko ha palopalema eni ia ʻi he ʻahó ni. Ko e taha ia ʻoku fehangahangai mo kitautolu kotoa ʻi he kautahá. ʻE lava ke mou toe fehangahangai mo ia ʻi homou vāhenga-ngāue fakamisinalé.” (Siutasi 18, 19) Ka naʻe tala ki he kau misinale maʻu tohi fakamoʻoni akó ʻe lava ke nau tauhi maʻu lavameʻa honau tuʻunga fakalaumālié ʻi honau ngaahi vāhenga-ngāué. Ko e fakatātaá, naʻe fakaʻaiʻai kinautolu ke nau fakakaukau, ki he founga ʻo e kātaki ʻa hotau fanga tokoua ʻi Lūsiá, ʻi ʻĒsiá, pea ʻi he ngaahi fonua ʻAfiliká—neongo ʻa e ngaahi fakataputapui, fakafepaki lahi, manuki, fakakaukau fakaʻikaiʻi-ʻOtua, mo e ngaahi tukuakiʻi loí. Pea, ʻi he ngaahi tuʻunga lahi, ʻoku tānaki mai ki ai ʻa e ngaahi palopalema fakaesino, ʻoku ʻomai ʻi he ngaahi vākovi fakafaʻahingá mo e ngaahi nounou ʻi he ngaahi fiemaʻú.
ʻI he taimi ʻoku ʻi ai ai ha tōlalo ʻi he tuʻunga fakalaumālié, “ʻoku fiemaʻu ke fakahanga ʻa e tokangá ki he tupuʻanga ʻo e palopalemá pea ngāue leva ki ai, ʻo ngāueʻaki ʻa e akonaki ʻi he Folofola ʻa e ʻOtuá.” Naʻe ʻomai ʻa e ngaahi faʻifaʻitakiʻanga faka-Tohitapu. Naʻe fakalotolahiʻi ʻa Siosiua ke ne lau ʻa ʻene tatau ʻo e Laó ʻi ha leʻo-siʻi ʻi he ʻaho kotoa pē. (Siosiua 1:8) ʻI hono maʻu ʻa e tohi ʻo e Laó ʻi he ʻaho ʻo Siosaiá, naʻe tāpuakiʻi ʻe Sihova ʻa e ngāueʻaki anga-tonu ʻo hono ngaahi fakahinohinó. (2 Tuʻi 23:2, 3) Naʻe ʻiloʻi ʻe Tīmote ʻa e ngaahi tohi māʻoniʻoní mei heʻene kei valevalé. (2 Timote 3:14, 15) Naʻe laka hake ʻa e kau Pēleá mei he hoko pē ko e kau fanongo leleí; naʻe lāulea kiate kinautolu naʻa nau “anga fakaʻeiʻeiki” koeʻuhi naʻa nau sivisiviʻi fakaʻaho ʻa e ngaahi Konga Tohitapú. (Ngāue 17:10, 11) Pea ko Sīsū Kalaisi ʻa e faʻifaʻitakiʻanga tuʻu-ki-muʻa ʻo e tokotaha naʻá ne ʻiloʻi mo ngāueʻaki ʻa e Folofola ʻa e ʻOtuá.—Mātiu 4:1-11.
ʻI he fakaʻosí, naʻe naʻinaʻi fakalotomāfana ai ʻa Tokoua Jaracz ki he kau misinale foʻoú: “Kuo mou mateuteu eni ke fakahoko homou vāhenga-ngāue misinalé. Pea te mou ō ki he mamaʻó, ʻi ha tuʻunga mātuʻaki moʻoni, ki he ngaahi tapa kehekehe ʻo e māmaní. Kapau ʻoku tau fetaulaki mo e pole ke hanganaki moʻui fakalaumālié, ʻe ʻikai leva ke tau tuku ha meʻa pē ke ne fakahohaʻasi kitautolu mei hono fakahoko ʻa e meʻa kuo tau fakapapauʻi ke faí. Te mou malanga ʻaki ʻa e faivelenga, ʻo ueʻi ʻa e niʻihi kehé ke faʻifaʻitaki ki hoʻomou tuí, pea te mau lotu fakataha mo kimoutolu ke ʻai ʻe Sihova ʻa e faʻahinga ko ia ʻoku mou akoʻí, ke nau moʻui ʻo hangē ko ia kuó ne fai kiate kitautolú. Pea ke hola ai ʻa e tokolahi ange mei he fakatamaki fakalaumālie ʻoku lolotonga hoko lahi ʻi māmani lahí. Te nau kau fakataha mo kitautolu ʻi he fuʻu tokolahi fakautuutu ke fai ʻa e finangalo ʻo Sihová. Pea ʻofa ke faitāpuekina kimoutolu ʻe Sihova ʻi he meʻa ko iá.”
Hili hono lau ʻe he seá ʻa e ngaahi talamonū mei he ngaahi fonua kehekehe takatakai ʻi he māmaní, naʻe hoko mai leva ʻa e taimi ki hono foaki ki he kau ako maʻu tohi fakamoʻoni akó ʻa honau tipilomá. Pea naʻe hoko atu ai ʻa hono lau ha tohi fakalotomāfana ʻo e houngaʻiá naʻe faʻu ʻe he kau akó. He fakamālō ē ko kinautolu kia Sihova mo ʻene kautahá ki he akoʻi makehe naʻa nau maʻú pea ki honau ngaahi vāhenga-ngāue makehe ʻi he ō “ki he ngataʻanga ʻo e māmani”!—Ngāue 1:8.
[Puha ʻi he peesi 29]
Tokolahi ʻo e Kalasí
Fika ʻo e ngaahi fonua naʻe fakafofongaʻí: 11
Fika ʻo e ngaahi fonua naʻe vaheʻi ki aí: 24
Fika ʻo e kau akó: 48
Fika ʻo e ngaahi hoa malí: 24
ʻAvalisi ʻo e taʻumotuʻá: 34
ʻAvalisi ʻo e ngaahi taʻu ʻi he moʻoní: 17
ʻAvalisi ʻo e ngaahi taʻu ʻi he ngāue fakafaifekau taimi-kakató: 12
[Fakatātā ʻi he peesi 26]
Kalasi Maʻu Tohi Fakamoʻoni Ako Hono 107 ʻa e Akoʻanga Tohitapu Taua Leʻo ko Kiliatí
ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, pea ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.