Ko Cyril Lucaris​—Ko ha Tangata Naʻá Ne Fakamahuʻingaʻi ʻa e Tohitapú

Ko ha ʻaho ia ʻi he faʻahitaʻu māfana ʻi he 1638. Naʻe ʻohovale ʻa e kau tangata toutai ʻi he Tahi ʻo Marmara ofi ki Konisitanitinopalé (ʻIsitenipulu ʻi onopōní), ʻa e kolomuʻa ʻo e ʻemipaea ʻOtomení, ke sio ki ha ʻangaʻanga ʻoku tētē ʻi he vaí. ʻI heʻenau vakaiʻi ofi angé, naʻa nau ʻiloʻi ai fakataha mo e manavahē ko e sino ko ia naʻe noʻouʻá ko e sino ia ʻo e pēteliake fakasiasi ʻo Konisitanitinopalé, ko e ʻulu ʻo e Siasi ʻOfotokisií. Ko e ngataʻanga fakamamahi ia ʻo Cyril Lucaris, ko ha tokotaha ʻiloa fakalotu ʻo e senituli hono 17.

NAʻE ʻikai ke moʻui fuoloa feʻunga ʻa Lucaris ke sio ki heʻene misí—ko hono tukuange mai ha liliu ʻo e Ngaahi Konga Tohitapu Faka-Kalisi Kalisitiané ʻi he lea anga-maheni faka-Kalisí​—ʻi haʻane hoko ʻo moʻoni. Ko e toe misi ʻe taha ʻa Lucaris naʻe ʻikai ʻaupito fakahoko mo ia—ko e sio ko ia ki he toe foki ʻa e Siasi ʻOfotokisií ki he “tuʻunga fakaʻevangeliō mahinongofuá.” Ko hai ʻa e tangata ko ení? Ko e hā ʻa e ngaahi faingataʻaʻiaʻanga naʻá ne fehangahangai mo ia ʻi he ngaahi feinga ko iá?

Fakavaivaiʻi ʻe he ʻIkai ha Tuʻunga Fakaakó

Naʻe fāʻeleʻi ʻa Cyril Lucaris ʻi he 1572, ʻi Vēnisi-nofoʻi Kenitia (ko Iráklion ia he taimi ní), ʻi Kēliti. ʻI heʻene maʻu ha ngaahi talēniti leleí, naʻá ne ako ai ʻi Vēnisi mo Patua ʻi ʻĪtali peá ne toki fononga takai holo ai ʻi he fonua ko iá mo e ngaahi fonua kehe. ʻI he loto-kona ʻi he ngaahi fāinga fakafaʻafaʻahi ʻi he lotoʻi siasí pea tohoakiʻi ʻe he ngaahi ngaʻunu fakalelei-lotu ʻi ʻIulopé, naʻá ne ʻaʻahi nai ai ki Siniva, ʻa ia naʻe ʻi he malumalu ʻo e tākiekina ʻo e tui faka-Kalaviní ʻi he taimi ko iá.

Lolotonga ʻene ʻaʻahi ki Pōlaní, naʻe sio ai ʻa Lucaris ko e kau ʻOfotokisī ʻi aí, ʻa e kau taulaʻeikí ʻo tatau pē mo e kakai ʻo e siasí, naʻa nau ʻi ha tuʻunga kovi fakalaumālie ko e nunuʻa ia ʻo ʻenau taʻeakó. ʻI ʻAlekisanitulia mo Konisitanitinopale, naʻá ne hohaʻa ai ʻi he ʻiloʻi naʻa mo e ngaahi tuʻunga malangá—ʻa ia naʻe fai mei ai ʻa e lau ʻo e ngaahi Konga Tohitapú—ne toʻo ia mei he ngaahi falelotu ʻe niʻihi!

ʻI he 1602, naʻe ʻalu ai ʻa Lucaris ki ʻAlekisanitulia, ʻa ia naʻá ne fetongi ai ʻa hono kāinga, ko Pēteliake Meletios, ʻi he tuʻunga ko iá. Naʻá ne kamata he taimi ko iá ke fetohiʻaki mo e kau teolosia fakalelei-lotu kehekehe ʻi ʻIulopé. ʻI he taha ʻo e ngaahi tohi ko iá, naʻá ne fakatokangaʻi ai naʻe tauhi maʻu ʻe he Siasi ʻOfotokisií ʻa e ngaahi tōʻonga fehālaaki lahi. ʻI he ngaahi tohi kehe, naʻá ne fakamamafaʻi ai ʻa e fiemaʻu ki he siasí ke fetongi ʻa e manavahē taʻeʻuhingá ʻaki ʻa e “tuʻunga fakaʻevangeliō mahinongofuá” pea ke fakafalala ki he mafai pē ʻo e ngaahi konga Tohitapú.

Naʻe toe hohaʻa ʻa Lucaris ʻi hono fokotuʻu ʻa e mafai fakalaumālie ʻo e ngaahi Tamai ʻa e Siasí ʻo māʻolunga tatau mo e ngaahi lea ʻa Sīsū mo ʻene kau ʻapositoló. “ʻOku ʻikai ke u kei makātakiʻi ke fanongo ki he pehē ʻe he kau tangatá ko e ngaahi lea ʻo e talatukufakaholo fakaetangatá ʻoku mamafa tatau pē ia mo e ngaahi Konga Tohitapú,” ko ʻene tohí ia. (Mātiu 15:6) Naʻá ne tānaki mai ki ai, ko ʻene fakakaukaú, naʻe fakalilifu ʻa e lotu ʻīmisí. Ko e lotu ki he “kau sangató,” naʻá ne pehē, ko ha paetaku ia ki he Tokotaha-Fakalaloá, ʻa Sīsū.—1 Timote 2:5.

Tuʻuaki ʻa e Mafai Faka-Pēteliaké

Ko e ngaahi fakakaukau ko iá, fakataha mo ʻene fehiʻa ki he Siasi Katolika Lomá, naʻe ʻomai ai kia Lucaris ʻa e tāufehiʻa mo e fakatanga ʻa e kau Sēsutí mo e faʻahinga ko ia ʻi he Siasi ʻOfotokisií ʻa ia naʻa nau leleiʻia ʻi ha fakataha mo e ngaahi Siasi Katoliká. Neongo ʻa e fakafepaki ko iá, ʻi he 1620, naʻe fili ai ʻa Lucaris ke hoko ko e pēteliake ʻo Konisitanitinopale. Ko e nofoʻanga faka-pēteliake ʻo e Siasi ʻOfotokisií ʻi he taimi ko iá naʻe ʻi he malumalu ʻo e ʻEmipaea ʻOtomení. Ko e puleʻanga ʻOtomení naʻa nau mateuteu ke toʻo ha pēteliake pea fakangofua ha pēteliake foʻou ʻi ha totongi paʻanga.

Ko e ngaahi fili ʻo Lucaris, tautefito ki he kau Sēsutí pea mo e tuʻunga fakaetuʻitapu mafai lahi mo ilifiaʻi ko e Congregatio de Propaganda Fide (Fakatahaʻanga ki Hono Fakamafola ʻo e Tuí), naʻa nau hanganaki lauʻikoviʻi loi mo faʻufaʻu fakafufū kiate ia. “Naʻe ngāueʻaki ʻe he kau Sēsutí ʻa e founga kotoa pē, ʻi heʻenau tuli ki he taumuʻa ko ení—ko e kākā, tukuakiʻi loi, fakahekeheke, pea hiliō he meʻa kotoa, ko e totongi fakafufū, ʻa ia ko e mahafu ola lelei tahá ia ki hono maʻu ʻa e leleiʻia ʻa e kau taki fakapuleʻanga [ʻOtomení],” ko e fakamatala ia ʻa e tohi ko e Kyrillos Loukaris. Ko hono olá, ʻi he 1622, naʻe kapusi ai ʻa Lucaris ki he motu ko Lōtesí, pea ko Gregory ʻo ʻAmasiá naʻá ne maʻu ʻa e tuʻungá ki he koini siliva ʻe 20,000. Kae kehe, naʻe ʻikai malava ʻa Gregory ke ʻoange ʻa e lahi ʻo e paʻanga naʻá ne palōmesi ki aí, ko ia ai, naʻe maʻu ʻa e lakangá ʻe Anthimus ʻo ʻEtilianopalé, ʻo ne toki fakafisi ki mui. ʻOku fakaofó, he naʻe toe fakafoki ʻa Lucaris ki he mafai fakapēteliaké.

Naʻe fakapapauʻi ʻe Lucaris ke ngāueʻaki ʻa e faingamālie foʻou ko ení ke akoʻi ʻa e haʻa faifekau ʻOfotokisií mo e kakai ʻo e siasí ʻaki hono pulusi ha liliu ʻo e Tohitapú pea mo e ngaahi tuleki fakateolosiá. Ke fakahoko ʻa e meʻá ni, naʻá ne fokotuʻutuʻu ai ki ha mīsini paaki ke ʻomai ki Konisitanitinopale ʻi he malumalu ʻo e maluʻi ʻa e ʻamipasitoa Pilitāniá. Kae kehe, ʻi he taimi naʻe aʻu mai ai ʻa e mīsini pākí ʻi Sune 1627, naʻe tukuakiʻi ia ʻe he ngaahi fili ʻo Lucaris ko ʻene ngāueʻaki ia ki he ngaahi taumuʻa fakapolitikale, pea naʻe faifai pē ʻo nau fakaʻauha ia. Naʻe pau leva ʻi he taimi ko iá ke ngāueʻaki ʻe Lucaris ʻa e ngaahi mīsini paaki ʻi Sinivá.

Ko ha Liliu ʻo e Ngaahi Konga Tohitapu Faka-Kalisitiané

Ko e ʻapasia lahi ʻa Lucaris ki he Tohitapú mo hono mālohi ke faiakó naʻe tafunaki ai ʻa ʻene holi ke ʻai ʻa hono ngaahi leá ke toe ala maʻu lahi ange ki he kakai lāuvalé. Naʻá ne fakatokangaʻi ko e lea naʻe ngāueʻaki ʻi he ngaahi muʻaki maniusikilipi Tohitapu Kalisi fakamānavaʻí naʻe ʻikai ke kei mahino ia ki he kakai lāuvalé. Ko ia, ko e ʻuluaki tohi naʻe faʻu ʻe Lucaris ko ha liliu ʻo e Ngaahi Konga Tohitapu Faka-Kalisi Kalisitiané ki he lea faka-Kalisi ʻo hono taimí. Ko Maximus Callipolites, ko ha mōnike ako, naʻá ne kamata ngāue ki ai ʻi Māʻasi 1629. Naʻe vakai ʻa e kau ʻOfotokisī tokolahi ki he liliu ʻo e ngaahi Konga Tohitapú naʻe mātuʻaki kehe ʻaupito, neongo ʻa ʻene taʻemahino nai ʻa e konga tohí ki he kau lautohí. Ke fakafiemālieʻi kinautolu, naʻe ʻai ʻe Lucaris ʻa e muʻaki konga tohí mo hono fakalea ʻi onopōní ʻo pulusi ʻi he ngaahi kōlomu huʻufataha, ʻo tānaki atu pē ki ai ha fanga kiʻi fakamatala. Koeʻuhi naʻe mate ʻa Callipolites ʻo ʻikai fuoloa mei hono faʻu ʻo e maniusikilipí, naʻe lau ʻe Lucaris tonu ʻa e ngaahi fakatonutonú. Naʻe pulusi ʻa e liliu ko iá taimi nounou pē ʻi he hili ʻa e mate ʻa Lucaris ʻi he 1638.

Neongo ʻa e ngaahi tokanga ʻa Lucaris, naʻe fakatupunga ʻe he liliu ko iá ha ʻatimosifia hohaʻa ʻi he ʻikai leleiʻia ai ʻa e kau pīsope tokolahi. Ko e ʻofa ʻa Lucaris ki he Folofola ʻa e ʻOtuá naʻe lahi ange ia ʻi he fakamoʻoni ko ia ʻi he talateu ʻo e liliu ʻo e Tohitapu ko iá. Naʻá ne tohi ko e ngaahi Konga Tohitapú, naʻe ʻomai ʻi he lea ʻoku lea ai ʻa e kakaí, ko “ha pōpoaki lelei ia, kuo ʻomai kiate kitautolu mei hēvani.” Naʻá ne enginaki ki he kakaí “ke nau ʻiloʻi pea ke nau maheni mo e kotoa ʻo e ngaahi meʻa ʻi loto [ʻi he Tohitapú]” peá ne pehē ʻoku ʻikai ha toe founga ke ako ai fekauʻaki mo e “ngaahi meʻa ʻoku fekauʻaki totonu mo e tuí . . . ʻoku fakatolonga mai ʻi he Kōsipeli fakaʻotua mo toputapú.”—Filipai 1:​9, 10.

Naʻe talatalaakiʻi fefeka ʻe Lucaris ʻa e faʻahinga ko ia naʻa nau taʻofi ʻa hono ako ʻo e Tohitapú, pea pehē ki he faʻahinga ko ia naʻa nau talitekeʻi ʻa hono liliu ʻo e muʻaki konga tohí: “Kapau ʻoku tau lea pe lautohi ʻo ʻikai mahinoʻi, ʻoku hangē ia haʻatau lī atu ʻetau ngaahi leá ki he matangí.” (Fakafehoanaki mo 1 Kolinito 14:​7-9.) ʻI hono fakaʻosi ʻo e talateú, naʻá ne tohi: “Lolotonga ʻa hoʻomou lau kotoa ʻa e Kōsipeli fakaʻotua mo māʻoniʻoni ko ení ʻi hoʻomou leá, puke ʻa e ngaahi ʻaonga ʻoku maʻu mei hono laú, . . . pea ʻofa ke fakamaama ʻe he ʻOtuá homou halá ki he meʻa ko ia ʻoku leleí.”—Palovepi 4:18 (Lea Fakatātā, PM).

Ko ha Confession of Faith

Hili ʻa ʻene kamata ʻa e liliu Tohitapu ko iá, naʻe fou ʻa Lucaris ʻi ha toe sitepu loto-toʻa ʻe taha. ʻI he 1629 naʻá ne pulusi ʻi Siniva ha Confession of Faith. Ko ha fakamatalaʻi fakafoʻituitui ia ʻo e ngaahi tui ʻa ia naʻá ne ʻamanaki ʻe ohi ʻe he Siasi ʻOfotokisií. Fakatatau ki he tohi The Orthodox Church, ko e Confession ko iá ʻokú ne “fakatauʻatāinaʻi ʻa e ʻOfotokisií mei he tokāteline ʻa e tuʻunga taulaʻeikí mo e puleʻi fakalotu kotoa pē, pea fakameʻapangoʻia ʻi hono fakalāngilangiʻi ʻo e ngaahi fakatātā fakalotú pea ko e lotu ki he kau sangató ko e ngaahi founga ia ʻo e tauhi ʻaitolí.”

Naʻe ʻi he Confession ʻa e ngaahi kupu ʻe 18. Ko hono kupu hono uá ʻoku fakahaaʻi ai ko e ngaahi Konga Tohitapú ko e fakamānava ʻa e ʻOtuá pea ko honau mafaí ʻoku māʻolunga ange ia ʻi he siasí. ʻOku pehē ai: “ʻOku mau tui ko e Konga Tohitapu Māʻoniʻoní ko e ʻomai ia ʻe he ʻOtuá . . . ʻOku mau tui ko e mafai ʻo e Konga Tohitapu Māʻoniʻoní ʻoku māʻolunga ia ʻi he mafai ʻo e Siasí. Ke akoʻi ʻe he Laumālie Māʻoniʻoní ko ha meʻa kehe mamaʻo ia mei hono akoʻi ʻe he tangatá.”—2 Timote 3:16.

ʻOku poupouʻi ʻi he kupu hono valú mo hono hongofulú ko Sīsū Kalaisi ko e Tokotaha-Fakalaloá pē ia, ko e Taulaʻeiki Lahi, mo e ʻUlu ʻo e fakatahaʻangá. Naʻe tohi ʻe Lucaris: “ʻOku mau tui ko hotau ʻEiki ko Sīsū Kalaisí ʻokú ne tangutu ʻi he nima toʻomataʻu ʻo ʻEne Tamaí pea ʻokú Ne fai ai ʻa e fakalaloá maʻatautolu, ʻo fakahoko tokotaha pē ʻa e lakanga ʻo ha taulaʻeiki lahi mo e tokotaha-fakalaloa moʻoni mo fakalao.”—Mātiu 23:10.

ʻOku fakahaaʻi ʻe he kupu hono 12 ʻoku lava ke ʻalu hē ʻa e siasí, ʻo maʻuhala ʻa e loí ko e moʻoni, ka ko e maama ʻo e laumālie māʻoniʻoní te ne fakahaofi nai ia fakafou ʻi he ngaahi ngāue mālohi ʻa e kau faifekau anga-tonú. ʻI he kupu hono 18, ʻoku poupouʻi ai ʻe Lucaris ko pulekatolió ko ha fakakaukauloto pē ia: “ʻOku hā mahino ko e talanoa loi ʻo Pulekatolió ʻoku ʻikai totonu ke fakaʻatā.”

Ko e fakamatala ʻi mui ʻo e Confession ʻoku ʻi ai ʻa e ngaahi fehuʻi mo e tali. ʻOku ʻuluaki fakamamafaʻi ai ʻe Lucaris ʻoku totonu ke lau ʻa e ngaahi Konga Tohitapú ʻe he tokotaha anga-tonu kotoa pē pea ʻoku fakatupu maumau ki ha Kalisitiane ke taʻemalava ke ne lau ʻa e Folofola ʻa e ʻOtuá. Naʻá ne tānaki mai leva ko e ngaahi tohi faka-ʻApokalifá ʻoku totonu ke liʻaki.—Fakahā 22:​18, 19.

ʻOku ʻeke ʻi he fehuʻi hono faá: “ʻOku totonu ke fēfē ʻetau fakakaukau ki he ngaahi Fakatātā Fakalotú?” ʻOku tali ʻe Lucaris: “ʻOku akoʻi kitautolu ʻe he ngaahi Konga Tohitapu Fakaʻotua mo Toputapú, ʻa ia ʻoku pehē hangatonu ai, ‘ʻOua naʻá ke ngaohi maʻau ha ʻaitoli, pe ko ha tatau ʻo ha meʻa ʻa ia ʻoku ʻi hēvani ʻi ʻolunga, pe ʻi he māmaní ʻi lolofonua; ʻoua ʻe hū kiate kinautolu, pea ʻoua ʻe lotu kiate kinautolu; [Ekisoto 20:​4, 5]’ koeʻuhi ʻoku totonu ke tau lotu, ʻo ʻikai ki he meʻa fakatupú ka ki he Tokotaha-Fakatupu mo e Tokotaha-Faʻu pē ʻo hēvani pea mo e māmaní, pea ko Ia pē ke hū ki aí . . . . Ko e lotu mo e tauhi ʻo e [ngaahi fakatātā fakalotú], ʻi hono tapui . . . ʻi he Konga Tohitapu Toputapú, ʻoku tau talitekeʻi ai, ka faifai pea ngalo ʻiate kitautolu, pea ʻi he ʻikai fai ki he Tokotaha-Fakatupú mo e Tokotaha-Faʻú, ʻoku tau hū ki he ngaahi lanu, mo e ngaahi ngāue pōtoʻi, mo e ngaahi meʻa fakatupu.”—Ngāue 17:29.

Neongo naʻe ʻikai malava ʻa Lucaris ke ne ʻiloʻi kakato ʻa e ngaahi meʻa kotoa naʻe hala ʻi he kuonga ʻo e fakapoʻuli fakalaumālie ko ia ʻoku tau moʻui aí,a naʻá ne fai ʻa e ngaahi feinga ʻoku taau ke fakaongoongoleleiʻi, ke ʻai ke hoko ʻa e Tohitapú ko e mafai ia ʻi he tokāteline ʻa e siasí pea ke akoʻi ʻa e kakaí ʻo fekauʻaki mo ʻene ngaahi akonakí.

ʻI he hili pē hono tukuange mai ʻo e Confession ko ení, naʻe malanga hake ha toe peau foʻou ʻo e fakafepakí kia Lucaris. ʻI he 1633, ko Cyril Contari, ʻa e pīsope ʻo Pēleá (ko ʻAlepo ia he taimi ní), ko ha fili fakafoʻituitui ʻo Lucaris pea naʻe poupouʻi ʻe he kau Sēsutí, naʻá ne feinga ke felotoi mo e kau ʻOtomení ki he tuʻunga fakapēteliaké. Kae kehe, naʻe ʻikai lava ʻa e faʻufaʻú ko e ʻikai malava ʻa Contari ke totongi ʻa e paʻangá. Naʻe kei maʻu pē ʻe Lucaris ʻa e lakangá. ʻI he taʻu hono hokó naʻe totongi ai ʻe Athanasius ʻo Tesalonaiká ʻa e koini siliva ʻe 60,000 ki he lakangá. Naʻe toe fakahifo ʻa Lucaris. Ka ʻi loto ʻi ha māhina ʻe taha naʻe toe ui mai ia ʻo toe fakafoki ki he lakangá. ʻI he aʻu mai ki he taimi ko iá naʻe maʻu ʻe Cyril Contari ʻa ʻene koini siliva ʻe 50,000. Naʻe kapusi ʻi he taimi ko ení ʻa Lucaris ki Lōtesi. Hili ʻa e māhina ʻe ono, naʻe malava ʻa hono ngaahi kaungāmeʻá ke maluʻi ʻa hono toe fakafoki maí.

Kae kehe, ʻi he 1638, naʻe tukuakiʻi ai ʻe he kau Sēsutí mo honau kaungāngāue ʻOfotokisií ʻa Lucaris ki he talisone lahi ki he ʻEmipaea ʻOtomení. Naʻe tuʻutuʻuni he taimi ko ení ʻe he sulitaná ʻa ʻene maté. Naʻe puke ʻa Lucaris, pea ʻi Siulai 27, 1638, naʻe fakaheka ai ia ki ha kiʻi vaka siʻisiʻi ʻo hangē pē ko hano ʻave ʻo fakahēʻí. ʻI he mavahe atu pē ʻa e vaká ki tahí, naʻe noʻouʻa ia. Naʻe tanu ʻa hono sinó ʻo ofi ki he matātahí, pea ki mui ai naʻe taʻaki hake ia ʻo lī ki tahi. Naʻe maʻu ia ʻe ha kau tangata toutai pea tanu ia ki mui ʻe hono ngaahi kaungāmeʻá.

Ngaahi Lēsoni Maʻatautolu

“ʻOku ʻikai totonu ke tukunoaʻi, ko e taha ʻo e ngaahi taumuʻa tefito ʻa [Lucaris] ke fakamaama mo hiki hake ʻa e tuʻunga fakaeako ʻa ʻene kau faifekaú mo e tākangá, ʻa ia ʻi he senituli hono taha onó mo e konga ki muʻa ʻo e senituli hono taha fitú ne tō ai ia ki ha tuʻunga mātuʻaki māʻulalo,” ko e fakamatala ia ʻa ha mataotao ʻe taha. Naʻe taʻofi ʻe he ngaahi faingataʻaʻiaʻanga lahi ʻa Lucaris mei heʻene aʻu ki heʻene taumuʻá. Naʻe toʻo tuʻo nima ia mei he mafai fakapēteliaké. ʻI he taʻu ʻe tolungofulu mā fā hili ʻa ʻene maté, naʻe fakahaaʻi ʻi ha sinoti ʻi Selusalema ʻa e fehiʻa lahi ki heʻene ngaahi tuí ʻo pehē ko e lotu hē. Naʻa nau fakahaaʻi ai ko e ngaahi Konga Tohitapú “ʻoku totonu ke lau ia, ʻo ʻikai ʻe ha taha pē, ka ʻe he faʻahinga pē ʻoku nau fakasio ki he ngaahi meʻa loloto ʻo e laumālié hili hono fai ha fekumi feʻungamālie”—ʻa ia ko e haʻa faifekaú pē tokua ʻoku pehē naʻa nau akó.

Naʻe toe fakavaivaiʻi ai ʻe he kalasi pule fakasiasí ʻa e ngaahi feinga ke ʻai ke ala maʻu ʻa e Folofola ʻa e ʻOtuá ki heʻenau tākangá. Naʻa nau fakalongolongoʻi fakamālohi ha leʻo ʻoku lau ki he niʻihi ʻo e ngaahi hala ʻo ʻenau ngaahi tui ʻikai faka-Tohitapú. Naʻa nau fakamoʻoniʻi ʻa ʻenau ʻi he lotolotonga ʻo e ngaahi fili kovi taha ʻo e tauʻatāina mo e moʻoni fakalotú. Ko e meʻa pangó, ko ha fakakaukau eni ia ʻoku kei hao mai ʻi he ngaahi founga kehekehe ʻo aʻu mai ki hotau ʻahó ni. Ko ha fakamanatu fakamātoato ia ki he meʻa ʻoku hoko ʻi he taimi ʻoku hanga ai ʻe he ngaahi kākā fakalanga ʻe he haʻa faifekaú ʻo fakafepakiʻi ʻa e tauʻatāina ʻo e fakakaukaú mo e fakahaaʻi ʻo ha meʻa.

[Fakamatala ʻi lalo]

[Fakamatala ʻi he peesi 29]

Naʻe fai ʻe Lucaris ʻa e ngaahi feinga ʻoku taau ke fakaongoongoleleiʻi ke ʻai ʻa e Tohitapú ke hoko ko e mafai ia ʻi he tokāteline ʻa e siasí pea ke akoʻi ʻa e kakaí fekauʻaki mo ʻene ngaahi akonakí

[Puha/Fakatātā ʻi he peesi 28]

Lucaris mo e Codex Alexandrinus

Ko e taha ʻo e ngaahi siueli ʻo e Laipeli Pilitāniá ko e Codex Alexandrinus, ko ha maniusikilipi Tohitapu ʻi he senituli hono nima T.S. ʻI hono ngaahi muʻaki peesi naʻe ala maʻu ʻe 820, naʻe fakatolonga mai ai ʻa e 773.

Lolotonga ʻa e hoko ʻa Lucaris ko e pēteliake ʻo ʻAlekisanitulia, ʻIsipité, naʻá ne maʻu ha tānekinga lahi ʻo e ngaahi tohí. ʻI heʻene hoko ko e pēteliake ʻi Konisitanitinopalé, naʻá ne ʻave ai ʻa e Codex Alexandrinus. ʻI he 1624 naʻá ne foaki ia ki he ʻamipasitoa Pilitānia ʻi Toaké ko ha meʻaʻofa ki he Tuʻi Pilitānia, ko Sēmisi I. Naʻe foaki ia ki hono fetongí, ʻa Sālesi I, ʻi ha taʻu ʻe tolu ki mui ai.

ʻI he 1757 naʻe foaki ai ʻa e Laipeli Fakatuʻí ki he puleʻanga Pilitāniá, pea ko e codex lelei ko ení ʻoku lolotonga fakaʻaliʻali ia ʻi he John Ritblat Gallery ʻi he Laipeli Pilitānia foʻoú.

[Maʻuʻanga ʻo e Tā]

Gewerbehalle, Vol. 10

From The Codex Alexandrinus in Reduced Photographic Facsimile, 1909

[Maʻuʻanga ʻo e Tā ʻi he peesi 26]

Bib. Publ. Univ. de Genève