Ko e Hā ke Fakatupulekina Ai e ʻUlungaanga Leleí?

KO HA tangata Siapani matuʻotuʻa ko hono hingoá ko Kunihito naʻá ne toki hiki ki muí ni ki he ʻIunaite Seteté.a ʻI ha ngaahi uike hili ʻene tūʻuta ki aí, naʻá ne fehangahangai ai mo ha tuʻunga ʻa ia ne mei lava ke maumauʻi ai ʻa ʻene ngāué. ʻOku fakamatala ʻa Kunihito: “ʻI he taimi naʻe kole mai ai ʻa hoku supavaisá pe ʻe lava ke u fakahoko ha fatongia paú, naʻá ku ongoʻi mātuʻaki loto-falala fekauʻaki mo hono tali iá. Ka, ʻi hono ʻohake ke vakai ki he anga-fakanānaá ko ha ʻulungaanga leleí, naʻá ku tali ange: ‘ʻOku ʻikai te u fakapapauʻi pe ʻe lava ke u fai ia, ka te u feinga ʻaki ʻa ʻeku lelei tahá.’ Ki hoku supavaisa ʻAmeliká, naʻe ongo ʻa e meʻá ni ia ʻo hangē naʻá ku taʻefeʻunga pea ʻikai ha loto-falalá. ʻI heʻeku ʻiloʻi iá, naʻá ku fakatokangaʻi ai naʻe fiemaʻu ke u fai ha ngaahi feʻunuʻaki.”

Ko Malia, ʻa ia ʻokú ne nofo ʻi Kolo Niu ʻIoke, ko ha tokotaha ako lelei ʻaupito ia, ʻo ne fiefia maʻu pē ke tokoniʻi ʻa hono kaungā kalasí. Ko Siueni ko ha kaungāako ia ʻa ia naʻá ne toutou maʻu ʻa e tokoni ʻa Maliá. Ka naʻá ne toe mahuʻingaʻia ʻi ha tuʻunga manako ʻiate ia peá ne feinga ke ʻai ke maongo kia Malia. Neongo ʻa ʻene holi ke kei maʻa fakaeʻulungaanga ai peé, naʻe tō ʻa Malia ʻi he ngaahi fakaofiofi ʻa Siuení peá ne kau ʻi he ʻulungaanga taʻetotonu fakaefehokotaki fakasinó.

Ko hono fakahāhā ʻa e ʻulungaanga leleí ʻi ha māmani kehekehe ʻa hono tōʻonga fakafonuá mo fakameleʻi fakaeʻulungaanga ʻi he ʻaho ní ko ha pole moʻoni ia. Ko ia ko e hā ke fakatupulekina ai ʻa e ʻulungaanga leleí? Koeʻuhí he ko e tōʻonga ʻulungaanga leleí ʻoku fakafiefiaʻi ai ʻa e ʻOtuá, pea ko e tokolahi taha ʻo kitautolú ʻoku tau holi moʻoni ke maʻu ʻa ʻene hōifuá.

Ko e Folofola ʻa e ʻOtuá, ʻa e Tohitapú, ʻokú ne enginakiʻi ʻa ʻene kau lautohí ke nau fakatupulekina ʻa e ʻulungaanga leleí. Ko e fakatātaá, ʻoku tohi ʻa e ʻapositolo ko Paulá: “Ka ai ha ʻulungaanga lelei, pea ka ai ha meʻa ʻoku fakamaloʻia, ko e ngaahi meʻa ia ke mou tokanga ki ai.” (Filipai 4:8) Pea ʻoku uki kitautolu ʻe he ʻapositolo ko Pitá ke tau fai hotau ‘tukuingatá ke lava ʻi heʻetau maʻu tuí na ʻa e ʻulungaanga leleí.’ (2 Pita 1:5) Ka ko e hā ʻa e ʻulungaanga leleí? ʻE lava ke akoʻi ia ʻi ha loki ako? ʻE anga-fēfē nai haʻatau fakatupulekina ia?

[Fakamatala ʻi lalo]