Ngaahi Fehuʻi mei he Kau Lautohí

ʻOku totonu ke fēfē ʻa e vakai ʻa e kau Kalisitiané ki hono ngāueʻaki ʻo e ngaahi maka ʻo e ʻaho fāʻeleʻí?

ʻI he ngaahi anga fakafonua ʻe niʻihi, ʻoku fekauʻaki ʻa e ngaahi maka ʻo e ʻaho fāʻeleʻí mo e māhina ʻo hono fāʻeleʻí. Pe ʻe tui ʻe ha Kalisitiane ha foʻi mama mo ha maka-koloa pau ko ha meʻa pē ia ke fai ʻa e fili fakafoʻituitui ki ai. (Kaletia 6:5) ʻI hono fai ʻo e fili ko iá, ʻoku ʻi ai ʻa e ngaahi meʻa mahuʻinga ke fakakaukau ki ai.

ʻOku pehē ʻe he Encyclopaedia Britannica ko ha maka ʻo e ʻaho fāʻeleʻí ko ha “maka-koloa ia ʻoku fekauʻaki mo e ʻaho ʻo hoto fāʻeleʻí, ʻa ia ko hono tuí ʻoku fakakaukau lahi ki ai ʻoku ʻomi ai ʻa e monū pe ko e moʻui lelei.” ʻOku tānaki mai ʻe he tohi maʻuʻanga fakamatala ko ení: “Kuo fuoloa e fakakaukau ʻa e kau ʻasitalolosiá ʻoku maʻu ʻe he ngaahi maka-koloa ʻe niʻihi ʻa e ngaahi mālohi mahulu hake ʻi natula.”

Naʻe tautefito ʻi he kuonga muʻá ʻa e tui ʻa e tokolahi ʻoku ʻomi ʻe he maka ʻo e ʻaho fāʻeleʻí ki he tokotaha ʻokú ne tuí ʻa e monū. ʻOku tui ha Kalisitiane moʻoni ki he meʻá ni? ʻIkai, he ʻokú ne ʻiloʻi ʻoku fakahalaiaʻi ʻe Sihova ʻa e faʻahinga ʻoku nau liʻaki ia pea nau falala ki he “ʻotua ʻo e Monuú.”​—Aisea 65:​11, NW.

Lolotonga ʻa e Ngaahi Kuonga Lotolotó, naʻe fili ai ʻe he kau vavaló ha maka-koloa ki he māhina taki taha ʻo e taʻú. Naʻa nau fakaʻaiʻai ʻa e kakaí ke nau tui ha maka-koloa ʻo e māhina ʻo honau fāʻeleʻí, ke maluʻi nai ai ʻa e tokotaha ʻokú ne tui iá mei ha maumau. Ka ʻe hala Fakatohitapu ki he kau Kalisitiané ke muimui ki he tataki ʻa e kau vavalo fakapalōfesinale ki he ngaahi meʻá, he ʻoku fakahalaiaʻi kinautolu ʻe he Tohitapú.​—Teutalonome 18:​9-​12.

ʻE toe taʻetaau foki ki he kau Kalisitiané ke nau fakahoko ha ʻuhinga makehe ki he moʻoniʻi meʻa ko ia ʻo e ʻi ai ha ʻuhinga makehe ʻo ha foʻi mama ʻoku ʻi ai ha maka ʻo e ʻaho fāʻeleʻí. ʻOku ʻikai ke kātoangaʻi ʻe he Kau Fakamoʻoni ʻa Sihová ʻa e ngaahi ʻaho fāʻeleʻí. Ko hono ʻuhingá koeʻuhí he ko e ngaahi kātoanga peheé ʻoku fakahanga ʻo fuʻu lahi ai ʻa e tokangá ki he tokotahá pea ko e ongo ʻaho fāʻeleʻi pē ʻoku lēkooti ʻi he Tohitapú ko e ʻaho fāʻeleʻi ʻo e ongo pule ʻa ia naʻe ʻikai te na tauhi ki he ʻOtuá.​—Senesi 40:20; Mātiu 14:​6-​10.

ʻOku tui ʻa e kakai ʻe niʻihi ko hono tui ha seti mama ʻoku ʻi ai ha maka ʻo e ʻaho fāʻeleʻí ʻoku ʻi ai ha tākiekina lelei ki he angaʻitangata ʻo e tokotaha ʻokú ne tuí. Kae kehe, ʻoku ʻikai ke tui ki he meʻá ni ʻa e kau Kalisitiane moʻoní, he ʻoku nau ʻiloʻi ko e “tangata foʻou” ʻoku kofuʻaki ia ʻi he malumalu ʻo e tākiekina ʻa e laumālie māʻoniʻoni ʻo e ʻOtuá pea ʻi hono ngāueʻaki ʻa e ngaahi tefitoʻi moʻoni Fakatohitapú.—Efeso 4:​22-24.

Ko ha meʻa mātuʻaki mahuʻinga ko e fakaueʻilotó. ʻI he fili pe ʻe tui ha foʻi mama mo ha maka ʻo e ʻaho fāʻeleʻí, ʻe ʻeke hifo nai ʻe ha Kalisitiane kiate ia, ‘ ʻOku ou loto ke tui ʻa e foʻi mamá ni koeʻuhi pē ʻoku hā fakamānako kiate au ʻa e maka-koloá, neongo ʻoku toe hoko ʻo fekauʻaki ia mo e maka ʻo e ʻaho fāʻeleʻí? Pe kuo tākiekina au ʻi ha tuʻunga ʻe he ngaahi fakakaukau tui taʻeʻuhinga ʻoku ʻai ʻe he kakai ʻe niʻihi ki he ngaahi makakoloa peheé?’

ʻOku totonu ki ha Kalisitiane ke ne sivisiviʻi ʻa hono lotó koeʻuhi ke fakapapauʻi ai ʻa ʻene fakaueʻilotó. “ʻI he meʻa kotoa ʻoku ke tauhi, muʻomuʻa ʻa e lama ʻo ho loto,” ko e lau ia ʻa e ngaahi Konga Tohitapú, “he ʻoku founga mei ai ʻa e ngaahi meʻa ʻoku ʻasi ʻi he moʻui.” (Palovepi 4:23) ʻI hono fai ʻene fili fekauʻaki mo e ngaahi maka ʻo e ʻaho fāʻeleʻí, ʻe lelei ki he Kalisitiane taki taha ke ne fakakaukau ki heʻene fakaueʻilotó pea mo e ngaahi ola ʻe lava ke hoko ʻi hono ʻalungá kiate ia pea mo e niʻihi kehé.​—Loma 14:13.