Ngaahi Fehuʻi mei he Kau Lautohí

ʻI heʻene sīpinga lotú, naʻe fakahuʻunga ai ʻe Sīsū naʻe fai ʻa e finangalo ʻo e ʻOtuá ʻi hēvani neongo naʻe teʻeki ai ke kapusi ki tuʻa ʻa e kau ʻāngelo fulikivanú?

Hangē ko ia naʻe lēkooti ʻi he Mātiu 6:​10, naʻe pehē ʻe Sīsū: “Ke fai ho Finangalo, hange ko ia ʻi he langi ke pehe foki ʻi māmani.” Ko e kolé ni ʻoku lava ke mahinoʻi ia ʻi ha taha pē ʻo e founga ʻe ua. ʻUluakí, ʻi he tuʻunga ko ha kole ki he finangalo ʻo e ʻOtuá ke fai ʻi māmani ʻo hangē ko ia kuo fai ʻi hēvaní, pe ko hono uá, ko ha kole ke fai kakato ia fakatouʻosi ʻi hēvani mo māmani.a Ko e ʻuhinga ʻoku tuʻu mei mui ʻi he ngaahi lea ki muʻa ʻa Sīsū, “ke hoko [mai] hoʻo Pule,” ʻoku fakahaaʻi ai ko e mahino hono uá ʻoku fehoanaki lahi ange ia mo e ngaahi Konga Tohitapú. Pea ʻoku tapua mei ai ʻa e tuʻunga ʻi he taimi naʻe ʻi māmani ai ʻa Sīsuú pea mo e vahaʻa taimi lōloa ʻi he hili iá. Anga-fēfē?

Ko e tohi ʻa Fakahaá ʻoku tuhu ia ki he ola makehe ʻe ua ʻo hono fokotuʻu ʻo e Puleʻanga ʻo e ʻOtuá ʻi hēvaní. Ko e ʻuluakí ʻoku laveʻi ai ʻa hēvani tonu, ko hono uá, ko e māmaní. ʻOku pehē ʻi he Fakahā 12:​7-9, 12: “Naʻe hoko ha tau ʻi he langi: ko Maikeli mo ʻene kau ʻangelo naʻa nau fai tau mo e Talakoni, pea naʻe tau ʻa e Talakoni mo ʻene kau ʻangelo aʻana, ka naʻe ʻikai te nau lava; ʻio, naʻe ʻikai kei maʻu hanau potu ʻi he langi. Pea naʻe kapusi ʻa e Talakoni lahi, ʻa ia ko e Ngata ʻo ono ʻaho, ʻa e toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa: naʻe li ia ki mamani, pea li mo ia ʻene kau ʻangelo. Ko ia mou fiefia ʻa e ngaahi langi, mo kimoutolu ʻoku nofo tapanekale ʻi ai. Ka ʻoiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”

Ko hono kapusi ʻo Sētane mo e kau tēmenioó mei hēvani hili ʻa e 1914 naʻe toʻo ai mei he nofoʻanga ko iá ʻa e kau laumālie angatuʻu kotoa pē, ʻo ʻoatu ai ʻa e fiefia lahi ki he ngaahi foha fakaeʻāngelo mateaki ʻa Sihová, ʻa ia ʻoku nau fakafofongaʻi tefito ʻa e tokolahi ʻo ʻene meʻamoʻui laumālié. (Siope 1:​6-​12; 2:​1-7; Fakahā 12:10) Ko ia, ko e kole ʻi he sīpinga lotu ʻa Sīsuú, hangē ko ia ko hono ngāueʻaki ki hēvaní, naʻe fakahoko ia. Ko e faʻahinga kotoa naʻe nofo maʻu ʻi he nofoʻanga fakahēvani ko iá naʻa nau mateaki kia Sihova pea fakamoʻulaloa kakato ki hono tuʻunga-haú.

Kuo pau ke fakamamafaʻi naʻa mo e ki muʻa aí, ʻi he kei hū ʻa e kau ʻāngelo fulikivanú ki hēvaní, naʻe ʻikai fakakau kinautolu ki he fāmili ʻo e ʻOtuá pea ne nau ʻi he malumalu ʻo e ngaahi fakangatangata pau. Hangē ko ení, ʻoku fakaeʻa ʻi he Siutasi 6 ne ʻosi hoko ʻi he ʻuluaki senituli T.S., ʻa e “moʻu tauhia ʻa kinautolu . . . ʻi he ngaahi haʻi taʻengata ʻi he lalo fakapoʻuli [fakalaumālie], ʻo aʻu ki he fakamāu ʻo e ʻAho Lahi.” ʻI he tuʻunga tatau, ʻoku pehē ʻe he 2 Pita 2:4: “Naʻe ʻikai ke maemaeʻekina ʻe he ʻOtua ha kau angelo naʻe angahala, ka ne lolofonuaʻi [ko ha tuʻunga ololalo fakaʻaufuli], ʻo ne tuku ki he ngaahi ʻana, ʻa ia ko e koto fakapoʻuli [fakalaumālie], ke tauhi ki he Fakamāu.”b

ʻI he faikehekehe makehe mo honau tuʻunga ko e faʻahinga ne kapusi lolotonga ʻenau kei ʻi hēvaní, kuo ngāueʻi ʻe he kau ʻāngelo fulikivanú ʻa e mafai lahi ki he māmaní. Ko hono moʻoní, ʻoku ui ʻe he Folofola ʻa e ʻOtuá ʻa Sētane ko e “ʻeiki ʻo e maama ko eni,” pea ʻokú ne ui ʻa e kau tēmenioó ko e “houʻeiki fakaleveleva ʻo e fakapoʻuli ni.” (Sione 12:31; Efeso 6:​11, 12; 1 Sione 5:19) Koeʻuhi ko hono mafaí, naʻe lava ke tuʻuaki ʻe he Tēvoló kia Sīsū ʻa e “ngāhi puleʻanga kotoa pe ʻo mamani mo honau nāunau” ʻi he fakafetongi ki ha foʻi ngāue pē ʻe taha ʻo e lotú. (Mātiu 4:​8, 9) ʻOku hā mahino leva, ʻi he taimi ʻe ‘hoko mai’ ai ʻa e Puleʻanga ʻo e ʻOtuá ʻi he fekauʻaki mo e māmaní, te ne fakahoko ʻa e ngaahi liliu lahi.

ʻI heni he māmaní, ko e ‘hoko mai’ ʻa e Puleʻanga ʻo e ʻOtuá ʻe iku ia ki ha fokotuʻutuʻu foʻou fakaʻaufuli ʻo e ngaahi meʻá. ʻE laiki ʻe he Puleʻangá ʻa e ngaahi tuʻunga-pule faʻu kotoa ʻe he tangatá pea hoko ko e founga-pule pē ia ʻe taha ki he māmaní. ʻI he taimi tatau, ko e faʻahinga manavahē-ʻOtua ʻoku pule ki aí te nau hoko ko e “fonua foʻou.” (2 Pita 3:13; Taniela 2:44) ʻE toe toʻo ʻe he Puleʻangá ʻa e angahalá mei he faʻahinga talangofua ʻo e tangatá pea ʻe faifai atu pē ʻo ne ʻai ʻa e foʻi māmaní ke hoko ko ha palataisi fakalūkufua, ʻo fakangata ai ʻa e mingimingiʻi meʻa kotoa ʻo e pule fakasētané.​—Loma 8:​20, 21; Fakahā 19:17–​21.

ʻI he ngataʻanga ʻo e Taʻu ʻe Taha Afé, ʻi he taimi kuo fakahoko ai ʻe he Puleʻanga faka-Mīsaiá ʻa e finangalo ʻo e ʻOtuá ki aí, “ʻe toki tuku ki lalo, ʻa e ʻAlo ʻe ia kiate ia naʻa ne fai ʻa e tuku ki lalo ʻo e meʻa kotoa pe kiate ia; koeʻuhiā ke tāfataha ʻa e ʻOtua ʻi he meʻa kotoa pe.” (1 Kolinito 15:28) ʻE ʻi ai leva ha ʻahiʻahi fakaʻosi, ʻa ia ʻe fakangata tuʻuloa ai ʻa Sētane, ko ʻene kau tēmenioó, mo ha kau angatuʻu fakaetangata pē ne takihalaʻi, ʻi he “Mate ʻAngaua.” (Fakahā 20:​7-15) Hili iá, ko e meʻa fakatupu maʻu ʻatamai kotoa pē ʻi hēvani pea ʻi māmani te nau fakahoko fiefia ʻa e fakamoʻulaloa ki he tuʻunga-hau anga-ʻofa ʻo Sihová. ʻI he tafaʻaki kotoa pē, ʻe hoko ia ko e fakahoko kakato ʻo e ngaahi lea ʻo e sīpinga lotu ʻa Sīsuú.​—1 Sione 4:​8.

[Fakamatala ʻi lalo]