Ngaahi Fehuʻi mei he Kau Lautohí

ʻOku pehē ʻi he Teutalonome 14:21: “ʻOku tapu hoʻomou kai ha meʻa ʻoku mate ʻiate ia pe.” ʻOku fepaki nai ia mo e Livitiko 11:​40, ʻa ia ʻoku pehē ai: “Ko ia te ne kai ha meʻa mei he ʻangaʻanga te ne fo hono kofu, pea te ne taʻemaʻa ʻo aʻu ki he poʻuli”?

ʻOku ʻikai ha fepaki ʻi he vahaʻa ʻo e ongo veesi ko ení. Ko e ʻuluaki konga tohí ʻokú ne toe leaʻaki ai ʻa e tapui ʻo hono kai ha manu ʻoku maʻu kuo ʻosi mate, ko ha manu naʻe tāmateʻi nai ʻe ha fanga manu fekai. (Ekisoto 22:31; Livitiko 22:8) Ko e konga tohi hono uá ʻoku fakamatalaʻi ai ʻa e meʻa naʻe lava ke fai ʻe ha ʻIsileli kapau naʻá ne maumauʻi ʻa e tapui ko iá, ʻi ha tuʻunga fāinoa nai.

Ko e moʻoniʻi meʻa ko ia ʻo hono tapui ha meʻa ʻe he Laó naʻe ʻikai ʻuhinga iá ko e tapuí ʻe ʻikai tukunoaʻi ia ʻi ha taimi. Ko e fakatātaá, naʻe ʻi ai ʻa e ngaahi lao fekauʻaki mo e kaihaʻá, fakapoó, fai ha fakamoʻoni loí mo e hā fua. ʻI he taimi tatau, naʻe ʻi ai ʻa e ngaahi tautea ki hono maumauʻi ʻa e ngaahi lao ko ia naʻe ʻomai fakaʻotuá. Ko e ngaahi tautea peheé naʻá ne ʻai ke mālohi ʻa e ngaahi laó pea fakahaaʻi ai ʻa e anga ʻo ʻenau mafatukitukí.

Ko ha tokotaha naʻe talangataʻa ki he tapui hono kai ʻa e kakano ʻo ha manu naʻe maʻu kuo maté ʻe taʻemaʻa ia ʻi he ʻafio mai ʻa Sihová pea ʻe pau ke ne fou ʻi he founga totonu ki he fakamaʻá. Kapau ʻe ʻikai malava ke ne fakamaʻa fakalelei ia, ʻe pau ke ne “fua ʻene kovi.”​—Livitiko 17:​15, 16.