“Ko Hoku Tokoni ʻOku Meia Sihova”

Ko e Feilaulauʻi-Kitá ʻOku ʻOmi Ai ʻa e Tāpuaki ʻa Sihová

ʻOKU fononga pasikala atu ha tangata ʻi he loto vaotātā ʻo Kameluní. ʻI ha ngaahi laui houa, ʻokú ne ʻaka atu ai ʻi ha ngaahi hala anoano pea aʻa atu he pelepelá, ʻo fehangahangai mo e fakatuʻutāmakí koeʻuhi ke fakaivimālohiʻi ʻa e niʻihi kehé. Ke akoʻi ha kulupu nofo mavahe, ʻoku lue ʻa e toko ua ia ʻi Simipāpuē ʻi he kilomita ʻe 15 ʻo fou ʻi he ngaahi vaitafe tāfeá, ʻo hili fakamafamafatatau ʻa hona valá mo hona suú ʻi hona ʻulú ke kei mātuʻu. ʻI he feituʻu ia ʻe taha, ʻoku tuʻu hake ha fefine ʻi he faá pongipongi ke ʻaʻahi pea ke akoʻi ha neesi ʻoku toki faingamālie pē pongipongia ʻi he ʻahó ʻi ha houa ʻe taha.

Ko e hā ʻoku faitatau ai ʻa e kakai ʻoku nau fai ʻa e ngaahi feinga peheé? Ko e kau faifekau taimi-kakato kotoa kinautolu ʻo e Kau Fakamoʻoni ʻa Sihová ʻa ia ʻoku nau kau ʻi he ngāue ʻo hono akoʻi ʻa e moʻoni ʻo e Tohi Tapú. ʻOku kau ai ʻa e kau tāimuʻa tuʻumaʻu mo e tāimuʻa makehe, kau misinale, kau ʻovasia fefonongaʻaki mo e laui afe ʻo e kau ngāue pole ʻi he ngaahi ʻapi Pēteli takatakai ʻi he māmaní. Pea ko e meʻa ʻoku nau makehe aí ko ʻenau feilaulauʻi-kitá.a

Fakaueʻiloto Totonu

ʻOku talangofua ʻa e Kau Fakamoʻoni ʻa Sihová ki he ekinaki ʻa e ʻapositolo ko Paulá kia Tīmoté: “Ke ke feinga ke fakaha koe ki he ʻOtua ʻoku ke tuʻu mo e lau; ko e tangata ngaue ʻoku ʻikai mā, ko hoʻo tofa totonu ʻa e folofola ʻo e moʻoni.” (2 Timote 2:15) Ka ko e hā ʻokú ne ueʻi ʻa e laui kilu ʻo e Kau Fakamoʻoní ke nau ngāue ko e kau faifekau taimi-kakató?

ʻI he taimi ʻoku ʻeke ange ai ki he kau faifekau taimi-kakató ʻa e ʻuhinga ʻoku nau feinga mālohi ai ke kau ʻi he ngāue ʻa Sihová, ko ʻenau talí ʻoku kau ai ʻa e ʻofa ki he ʻOtuá pea ki he kaungā faʻahinga ʻo e tangatá. (Mātiu 22:​37-39) ʻOku feʻungamālie ʻaupito eni, he kapau ko e fakaueʻilotó ia ʻoku ʻikai ko e ʻofa, tatau ai pē pe ko e hā ʻa e lahi ʻo ʻenau feingá ʻe koto kulanoa pē ia.—1 Kolinito 13:​1-3.

Ngāue Feilaulauʻi-Kita

Kuo tali ʻe he kau Kalisitiane fakatapui kotoa pē ʻa e ui ʻa Sīsuú: “Kabau e muimui ha taha iate au, tuku ke ne liaki eia ia, bea too hake ene akau mafajia o muimui iate au.” (Mātiu 16:​24, PM) Ke liʻaki kitautolú ʻoku ʻuhingá ke fakamoʻulaloa loto-lelei ki he hoko ʻo puleʻi pea tataki kitautolu ʻe Sihova ko e ʻOtuá pea mo Sīsū Kalaisi. Ki he tokolahi, kuo taki atu eni ki he ngāue feilaulauʻi-kita ʻi he ngāue fakafaifekau taimi-kakató.

ʻOku fai ʻe he Kau Fakamoʻoni tokolahi ʻa e ngaahi feinga lahi ke fakalahi atu ʻa ʻenau ngāue kia Sihová. Fakakaukau angé kia Júlia taʻu 56, ko ha tāimuʻa tuʻumaʻu ʻi São Paulo, ʻi Pelēsila. ʻOkú ne manatuʻi: “Naʻe telefoni mai ha tuongaʻane Siaina ke ʻeke mai kiate au pe naʻá ku loto-lelei ke ako ʻa e lea faka-Siainá. Koeʻuhi ko hoku taʻú, naʻe ʻikai te u fakakaukau ki hano ako ha lea foʻou. Ka ʻi he hili ha ngaahi ʻaho siʻi, naʻá ku tali ai ʻa e ngāue faingataʻá ni. ʻI he ʻahó ni, ʻoku ou malava ke fai ʻa e ngaahi tuʻuaki Fakatohitapu ʻi he lea faka-Siainá.”

ʻOku līpooti mai ʻe he ʻōfisi vaʻa ʻo e Kau Fakamoʻoni ʻa Sihova ʻi Peluú: “ʻI he ngaahi taʻu ki muí ni maí, kuo hiki ai ʻa e laui ngeau ʻo e kau tāimuʻa tuʻumaʻú ki he ngaahi feituʻu ʻoku teʻeki vaheʻi ki ai ha taha ia, ʻo nau fakahāhaaʻi ai ha laumālie loto-toʻa mo feilaulauʻi-kita. ʻOku nau hiki ki he fanga kiʻi kolo mamaʻo ʻa ia ʻoku ʻikai ke ʻi ai ha ngaahi ngāueʻanga paú pea ʻoku fakangatangata ai ʻa e ngaahi faingamālie ngāué. ʻOku loto-lelei ʻa e fanga tokoua mo e fanga tuofāfine ko ení ke nau fai ha faʻahinga meʻa pē ʻe fiemaʻu ke nau kei nofo pē ai ʻi honau ngaahi vāhenga-ngāué. Ka ko e meʻa mahuʻinga tahá, ko ʻenau ngāue ʻi he ngāue fakafaifekaú ko ha tāpuaki ia ʻi he feituʻu kotoa pē. ʻOku līpooti mai ʻe he kau ʻovasia fefonongaʻakí kuo fokotuʻu ʻa e ngaahi kulupu foʻou ʻaki e tokoni ʻa e kau tāimuʻa tuʻumaʻu feilaulauʻi-kita ko ení.”

Kuo fakaʻatā ʻe he kau Kalisitiane ʻe niʻihi ke faingataʻaʻia ʻenau moʻuí kae lava ke tokoniʻi ʻa e ngaahi kaungātuí. (Loma 16:​3, 4) ʻOku līpooti mai ʻe ha ʻovasia sēketi ʻi ha feituʻu ne haveki ʻe he taú ʻi ʻAfilika: “Ki muʻa ke aʻu ki he taʻofiʻanga meʻalele fakamuimui ʻi he vahaʻa ʻo e kolo ʻoku puleʻi ʻe he kau angatuʻú mo ia ʻoku puleʻi ʻe he puleʻangá, naʻe takatakaiʻi au mo hoku uaifí ʻe he kau taki fakakautau angatuʻu ʻe toko fā pea mo ʻenau kau sōtia maluʻí, ʻa ia naʻa nau ʻeke mai ke ʻoange ʻa ʻema kaati fakaʻilongá. Lolotonga hono vakaiʻi ʻa ʻema kaati fakaʻilongá, naʻa nau sio ai naʻá ma haʻu mei he feituʻu ʻoku puleʻi ʻe he puleʻangá, ko ia naʻa nau hoko ʻo huʻuhuʻu. Naʻe tukuakiʻi au ki he hoko ko ha sipai. Ko ia ai, naʻa nau fakapapauʻi ai ke lī au ki ha luo. Naʻá ku fakamatalaʻi ange kimaua, pea naʻe faifai atu pē ʻo nau tukuange kimaua.” He houngaʻia moʻoni ē ko e ngaahi fakatahaʻangá ʻi he lavameʻa ʻa e ongo meʻa mali feilaulauʻi-kita ko ení ʻi he ʻaʻahi ange kia kinautolú!

Neongo ʻa e ngaahi faingataʻa naʻa nau hokosiá, ko e tupulaki ʻo e kau faifekau taimi-kakato peheé ʻoku fakautuutu ia ʻi māmani kotoa. (Aisea 6:8) Ko e kau ngāue tōtōivi ko ení ʻoku nau lotoʻaki ʻa honau monū ko e tauhi kia Sihová. ʻAki ha laumālie meimei tatau ʻo e feilaulauʻi-kitá, ʻoku laui miliona ʻa e faʻahinga kehe ʻoku nau fakahīkihikiʻi he taimí ni ʻa Sihova. ʻOkú ne mohu faitāpuekina leva ai kiate kinautolu. (Palovepi 10:22) ʻI he loto-falala-pau ki heʻene tāpuakí mo e poupou hokohokó, ʻoku tapua atu ʻe he kau ngāue mālohi peheé ʻa e fakakaukau ʻo e tokotaha-tohi-sāmé ʻa ia naʻá ne hiva: “Ko hoku tokoni ʻoku meia Sihova.”—Sāme 121:2.

[Fakamatala ʻi lalo]

[Fakamatala ʻi he peesi 9]

“ʻE foaki loto-lelei atu ʻe hoʻo kakaí kinautolu ʻi he ʻaho ʻo hoʻo fakatē taú.”—SĀME 110:​3, NW

[Puha ʻi he peesi 8]

ʻOKU KOLOAʻAKI ʻE SIHOVA ʻA ʻENE KAU SEVĀNITI LĪʻOÁ

“Ko ia, siʻoku kainga ʻofaʻanga, ke mou tuʻu maʻu, taʻe ngaūe, ʻo mou tupulekina maʻu ai pe ʻi he ngaue ʻa e ʻEiki: ʻi hoʻomou ʻilo ni, ko e meʻa ki he ʻEiki, ko hoʻomou fakaongosia ʻoku ʻikai ko e laufanō ia.”—1 Kolinito 15:58.

“He talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa.”—Hepelu 6:10.