Talanoa ki he Moʻuí
Ko Hono ʻOhake ʻa e Fānau ʻe Toko Valu ʻi he Ngaahi Founga ʻa Sihová ko ha Pole Ia mo ha Fiefiaʻanga
FAKAMATALA FAI ʻE JOYCELYN VALENTINE
ʻI he 1989 naʻe ʻalu ai ʻa hoku husepānití ke ngāue ʻi muli. Naʻá ne palōmesi mai te ne ʻomai ʻa e paʻanga ki ʻapi koeʻuhi ke u lava ʻo tokangaʻiʻaki ʻeku fānau ʻe toko valú. Naʻe ʻosi mei ai ha ngaahi uike, ka naʻe ʻikai te u fetuʻutaki mo ia. Naʻe ʻosi mo ha ngaahi māhina mo e kei ʻikai ai pē ha ongoongo mei hoku husepānití. Naʻá ku fakapapauʻi maʻu pē kiate au, ‘ʻI heʻene hoko pē ʻo lelei ʻa hono tuʻungá, te ne foki mai ki ʻapi.’
ʻI HE ʻikai ha paʻanga ke tokangaʻiʻaki ʻa hoku fāmilí, naʻe hoko ai ʻo mole ʻa ʻeku ʻamanakí. Lolotonga ʻa hoku ngaahi pō taʻemamohe lahí, naʻá ku ʻeke hifo ai kiate au ʻi he taʻetui, ‘ʻE lava fēfē ke ne fai eni ki hono fāmilí?’ Naʻe faifai pē ʻou tali ʻa e tuʻunga fakamamahi moʻoni, kuo liʻaki kimautolu ʻe hoku husepānití. ʻI he ʻahó ni, ʻi he taʻu nai ʻe 16 hili ʻene liʻaki kimautolú, ʻoku teʻeki ai pē ke ne foki mai. Ko hono olá, naʻá ku ʻohake ai ʻa ʻeku fānaú ʻo ʻikai ha tokoni ʻa ha hoa. Naʻe faingataʻa ʻa e meʻá ni, ka ʻi he sio ki hono tali ʻe heʻeku fānaú ʻa e ngaahi founga ʻa Sihová kuo ʻomai ai kiate au ʻa e fiefia lahi. Kae kehe, ki muʻa ke u fakamatala ki he anga ʻo ʻemau lavameʻa ʻi he tuʻunga ko ha fāmilí, tuku ke u fakamatala atu fekauʻaki mo hono ʻohake aú.
Kumi ki ha Tataki Fakatohitapu
Naʻe fāʻeleʻi au ʻi he 1938 ʻi he motu Kalipiane ko Samaiká. Neongo naʻe ʻikai ʻaupito ke mēmipa ʻa e tangataʻeikí ʻi ha siasi, naʻá ne fakakaukau ko ha tokotaha manavahē-ʻOtua ia. ʻI he poʻulí naʻá ne faʻa kole mai ai ke u lautohi ange kiate ia mei he tohi Tohi Tapu ʻo e Sāmé. Naʻe vave ʻeku malava ke toutou leaʻaki maʻuloto ʻa e ngaahi saame lahi. Ko e fineʻeikí ko ha mēmipa ia ʻo ha siasi fakalotofonua, pea naʻá ne ʻave au ʻi he taimi ki he taimi ki ha ngaahi fakataha fakalotu.
ʻI he ngaahi fakataha ko iá, naʻe tala mai ai kiate kimautolu ʻoku ʻave ʻe he ʻOtuá ʻa e kakai leleí ki hēvani peá ne tutu ʻa e kakai koví ʻo taʻengata ʻi ha afi ko heli. Naʻe toe tala mai kiate kimautolu ko Sīsū ʻa e ʻOtuá pea ʻokú ne ʻofa ʻi he fānaú. Naʻá ku hoko ai ʻo mātuʻaki puputuʻu mo ilifia ʻi he ʻOtuá. Naʻá ku fifili, ‘ʻE lava fēfē ʻe ha ʻOtua ʻoku ʻofa ʻiate kitautolu ke ne fakamamahiʻi ʻa e kakaí ʻi ha afi?’
Ko e fakakaukau ki he afi ʻo helí naʻá ne ʻai ai ʻou maʻu ha ngaahi misi fakamanavahē. ʻI he faai atu ʻa e taimí, naʻá ku kau ai ʻi ha koosi fetohiʻaki Fakatohitapu naʻe fakapaʻanga ʻe he Siasi ʻAho-Fitú. Naʻa nau akoʻi ʻo pehē ko e kakai fulikivanú ʻe ʻikai ke fakamamahiʻi taʻengata, ka ʻi hono kehé, ʻe tutu kinautolu ʻo efuefu ʻi he ulo afí. Naʻe ongo ʻuhinga lelei ange eni, pea naʻá ku kamata ai ke maʻu ʻenau ngaahi fakataha fakalotú. Ka naʻá ku ʻiloʻi naʻe fakatupu puputuʻu ʻenau ngaahi akonakí, pea ko e meʻa naʻá ku akó naʻe ʻikai te ne fakatonutonu ʻeku ngaahi fakakaukau fehālaaki ki he tuʻunga fakaeʻulungāangá.
ʻI he taimi ko iá, naʻe tali lahi ai ʻe he kakaí ʻa e pehē naʻe hala ʻa e feʻauakí. Neongo ia, ko au mo e tokolahi kehe naʻa mau tui ko e faʻahinga pē ʻoku ʻi ai honau vā fakaefehokotaki fakasino mo e ngaahi hoa tokolahí naʻa nau hoko ko e kau feʻauakí. Ko ia ai, ko ha ongo meʻa taʻemali ʻa ia ʻoku fakangatangata pē ʻiate kinaua ʻena fehokotaki fakasinó naʻe ʻikai te na angahala kinaua. (1 Kolinito 6:9, 10; Hepelu 13:4) Ko e tui ko iá naʻe fakalahi ai ʻeku hoko ko ha faʻē taʻemali ʻo ha fānau ʻe toko ono.
Ko Hono Fai ʻo e Fakalakalaka Fakalaumālié
ʻI he 1965, naʻe haʻu ai ʻa Vaslyn Goodison mo Ethel Chambers ke nofo ʻi he kolo ofi mai ko Bath. Ko e ongo tāimuʻa kinaua, pe ongo faifekau taimi-kakato ʻa e Kau Fakamoʻoni ʻa Sihová, pea ʻi he ʻaho ʻe taha naʻá na talanoa ai mo ʻeku tamaí. Naʻá ne tali ʻa ʻena tuʻuaki ange ʻo ha ako Tohi Tapu ʻi ʻapí. Kapau naʻá ku ʻi ʻapi ʻi he taimi naʻá na ʻaʻahi mai aí, naʻá na toe talanoa foki mo au. Neongo naʻá ku vakai fakataha mo e huʻuhuʻu lahi ki he Kau Fakamoʻoni ʻa Sihová, naʻá ku fili ke ako Tohi Tapu mo kinaua ke fakamoʻoniʻi naʻá na hala.
Naʻá ku ʻeke ʻa e ngaahi fehuʻi lahi lolotonga ʻa e akó, pea naʻe tali kotoa ia ʻe he ongo Fakamoʻoní ʻo ngāueʻaki ʻa e Tohi Tapú. ʻAki ʻena tokoní, naʻá ku ʻiloʻi ai ko e kau maté ʻoku ʻikai te nau ʻiloʻi ha meʻa pea ʻoku ʻikai te nau faingataʻaʻia ʻi heli. (Koheleti 9:5, 10) Naʻá ku toe ako ai fekauʻaki mo e ʻamanaki ʻo e moʻui taʻengata ʻi Palataisi ʻi he māmaní. (Sāme 37:11, 29; Fakahā 21:3, 4) Neongo naʻe ʻikai ke toe hoko atu ʻe heʻeku tamaí ʻa ʻene ngaahi ako Tohi Tapú, naʻá ku kamata ke maʻu ʻa e ngaahi fakataha ʻa e fakatahaʻanga fakalotofonua ʻa e Kau Fakamoʻoni ʻa Sihová. Ko e founga melino mo maau ʻa ia naʻe faiʻaki ʻa e ngaahi fakataha ko iá naʻe fakaʻatā ai au ke u ako ʻa e meʻa lahi ange fekauʻaki mo Sihova. Naʻá ku toe maʻu ʻa e ngaahi ʻasemipilī fakasēketí mo e ngaahi fakataha-lahi fakavahé, ʻa e ngaahi fakatahataha lalahi naʻe fokotuʻutuʻu ʻe he Kau Fakamoʻoní. Ko e vakai ko eni ki he Tohi Tapú naʻá ne fakatupu ʻiate au ha holi mālohi ke lotu kia Sihova ʻi he founga ʻoku ala talí. Kae kehe, naʻe ʻi ai ha fakafaingataʻaʻiaʻanga kiate au.
ʻI he taimi ko iá, naʻá ku nofo taʻemali ai mo e tamai ʻa e toko tolu ʻi heʻeku fānau ʻe toko onó. Mei he Tohi Tapú, naʻá ku ako ai ʻoku fakahalaiaʻi ʻe he ʻOtuá ʻa e ngaahi vā fakaefehokotaki fakasino ʻi tuʻa mei he nofo malí pea naʻe kamata ke fakahohaʻasi au ʻe hoku konisēnisí. (Palovepi 5:15-20; Kaletia 5:19) ʻI he hoko ʻo loloto ange ʻa ʻeku ʻofa ki he moʻoní, naʻá ku fakaʻamu ke ʻai ʻeku moʻuí ke fehoanaki mo e lao ʻa e ʻOtuá. Faifai atu pē, naʻá ku fai ha fili. Naʻá ku tala ange ki hoku hoa naʻá ma nonofó ʻa e tuʻunga ko e hala pē heʻema mali ko e ngata ia ʻa homa vahaʻangataé. Neongo naʻe ʻikai ke kau ʻa e tokotaha naʻá ma nonofó ʻi heʻeku tuí, naʻá ma mali fakalao ʻi ʻAokosi 15, 1970, ko e taʻu ia ʻe nima hili ʻa e ʻuluaki lea mai kiate au ʻa e ongo Fakamoʻoní. ʻI Tīsema ʻo e 1970, naʻá ku fakaʻilongaʻi ai ʻeku fakatapui kia Sihová ʻaki ʻeku papitaiso ʻi he vaí.
ʻI he fekauʻaki mo e ngāue fakafaifekaú, heʻikai ʻaupito ngalo ʻiate au ʻa e ʻuluaki ʻaho naʻá ku kau ai ʻi he ngāue fakamalangá. Naʻá ku manavasiʻi pea naʻe ʻikai te u ʻiloʻi ʻa e founga ke kamata ai ha fetalanoaʻaki Fakatohitapú. Ko hono moʻoní, naʻá ku fiefia ʻi he fakangata vave ʻe he ʻuluaki tokotaha-ʻapí ʻema fetalanoaʻakí. Neongo ia, ne ʻikai fuoloa kuo ʻikai te u kei manavasiʻi. ʻI he ngataʻanga ʻo e ʻahó, naʻá ku fiefia ʻaupito, koeʻuhi naʻá ku talanoa nounou ki he kakai ʻe niʻihi ʻo fekauʻaki mo e Tohi Tapú pea tuku ha niʻihi ʻo ʻemau ʻū tohi makatuʻunga ʻi he Tohi Tapú kiate kinautolu.
Ko Hono Tauhi ke Mālohi Fakalaumālie ʻa e Fāmilí
ʻI he 1977 naʻe ʻalu hake ai ʻo toko valu ʻa e fānau ʻi homa fāmilí. Naʻá ku fakapapauʻi ke fai ʻeku lelei tahá ke tokoniʻi ʻa hoku fāmilí ke nau tauhi kia Sihova. (Siosiua 24:15) Ko ia naʻá ku ngāue mālohi ke fai ha ako Tohi Tapu fakafāmili tuʻumaʻu. ʻI he taimi ʻe niʻihi, koeʻuhi ko e helaʻiá, naʻá ku kiʻi tule ʻo mohe lolotonga hono lau leʻo-lahi ʻe he taha ʻo e fānaú ha palakalafi pea naʻe pau ai ke fafangu au ʻe he fānaú. Ka ko ʻeku ongosia fakaesinó naʻe ʻikai ke taʻofi ai kimautolu mei hono ako fakafāmili ʻa e Tohi Tapú.
Naʻá ku toe faʻa lotu maʻu pē mo ʻeku fānaú. ʻI heʻenau aʻu pē ʻo lahi feʻungá, naʻá ku akoʻi kinautolu ke nau lotu kia Sihova ʻia kinautolu pē. Naʻá ku fakapapauʻi ʻoku nau taki taha fai ha lotu fakafoʻituitui ʻi he taimi mohé. Naʻá ku lotu tāutaha mo e kiʻi tama taki taha ʻa ia naʻe fuʻu kei siʻi ke ne fai ha lotú.
ʻI he ʻuluaki taimí naʻe fakafepaki ʻa hoku husepānití ki heʻeku ʻave ʻa e fānaú ki he ngaahi fakataha ʻa e fakatahaʻangá. Kae kehe, ko e fakatuʻotuʻa atu ki hono tokangaʻi ʻiate ia pē ʻa e fanaú lolotonga ʻeku ʻi he ngaahi fakatahá naʻe holo ai ʻa ʻene fakafepakí. ʻI he poʻulí, naʻá ne manako ke ʻalu ʻo ʻeva mo fakamoleki ha taimi mo hono ngaahi kaumeʻá, ka ko e fakakaukau atu ki hono fai ia ʻo ō fakataha mo e fānau ʻe toko valú naʻe ʻikai ke fakamānako ia kiate ia! Ki mui ai, naʻe aʻu ʻo ne kamata ke tokoni mai kiate au ʻi hono ʻai ke maau ʻa e fānaú ke ō ki he Fale Fakatahaʻangá.
Naʻe vave ʻa e hoko ʻa e fānaú ʻo anga ki hono maʻu ʻa e ngaahi fakataha kotoa ʻa e fakatahaʻangá mo e kau ʻi he ngāue fakafaifekau ki he kakaí. Lolotonga ʻenau ngaahi ʻaho mālōlō he faʻahitaʻu māfaná, naʻa nau faʻa ʻalu ʻi he ngāue fakamalangá fakataha mo e kau tāimuʻá, pe ko e kau faifekau taimi-kakato ʻi he fakatahaʻangá. Naʻe tokoniʻi ʻe he meʻá ni ʻeku fānaú ke nau fakatupulekina ha ʻofa ongoʻi loloto ki he fakatahaʻangá pea ki he ngāue fakamalangá.—Mātiu 24:14.
Ngaahi Taimi ʻo e ʻAhiʻahi
Ke fakaleleiʻi ʻa e tuʻunga fakapaʻanga ʻa e fāmilí, naʻe kamata ke folau ai ʻa hoku husepānití ke ngāue ʻi muli. Naʻá ne mamaʻo mei he fāmilí ʻi he ngaahi vahaʻa taimi lōloa kae foki mai ʻi ha ngaahi taimi tuʻumaʻu. Kae kehe, ʻi he 1989, naʻá ne mavahe ai pea ʻikai te ne toe foki mai. Hangē ko ia naʻá ku lave ki ai ki muʻá, ko e mole ʻa hoku husepānití ʻo hoko ai ʻo lōmekina au ʻe he mamahí. ʻI he ngaahi pō lahi naʻá ku tangi ai mo lotu tōtōivi kia Sihova ki ha fakafiemālie mo ha kātaki, pea naʻá ku ongoʻi naʻá ne tali ʻeku ngaahi lotú. Ko e ngaahi konga Tohi Tapu hangē ko e Aisea 54:4 mo e 1 Kolinito 7:15 naʻá ne ʻomai kiate au ʻa e nonga pea mo e mālohi ke hokohoko atu ai ʻi he moʻuí. ʻI he fakatahaʻanga Kalisitiané, naʻe toe tokoniʻi fakaeongo mo fakamatelie ai au ʻe he ngaahi kāingá mo e kaungāmeʻá. ʻOku ou houngaʻia ʻaupito ʻia Sihova mo ʻene kakaí ʻi heʻenau tokoní.
Naʻe ʻi ai homau ngaahi ʻahiʻahi kehe. ʻI he taimi ʻe taha naʻe fakamavaheʻi ai ʻa e taha ʻo ʻeku tamaiki fefiné mei he fakatahaʻangá ʻi ha ʻulungāanga taʻefakatohitapu. Naʻá ku ʻofa lahi ʻi he kotoa ʻo ʻeku fānaú, neongo ia ko ʻeku mateaki kia Sihová ʻoku muʻomuʻá. Ko ia lolotonga ʻa e taimi ko iá, ko ʻeku fānau kehé mo au naʻa mau tauhi fefeka ki he tataki ʻa e Tohi Tapú ʻi he founga ke fai ki he faʻahinga ʻoku tuʻusí. (1 Kolinito 5:11, 13) Naʻa mau maʻu ai ʻa e fakaanga lahi mei he kakai ko ia naʻe ʻikai te nau mahinoʻi ʻa homau tuʻungá. Kae kehe, hili hono toe fakafoki ki he fakatahaʻangá ʻa ʻeku tamá, naʻe tala mai ʻe hono husepānití kiate au ko ʻemau tuʻu mālohi ʻi he ngaahi tefitoʻi moʻoni Fakatohitapú naʻe maongo ia kiate ia. ʻOkú ne tauhi he taimí ni kia Sihova fakataha mo hono fāmilí.
Fehangahangai mo e Ngaahi Palopalema Fakapaʻangá
ʻI hono liʻaki kimautolu ʻe hoku husepānití, naʻe ʻikai ke ʻi ai haʻaku paʻanga hū mai tuʻumaʻu, pea naʻe ʻikai kei maʻu ʻe he fāmilí ʻa ʻene tokoni fakapaʻangá. Naʻe akoʻi kimautolu ʻe he tuʻunga ko ení ke mau fiemālie pē ʻi ha moʻui faingofua pea ke fakamahuʻingaʻi ʻa e ngaahi koloa fakalaumālié ʻo laka ange ia ʻi he ngaahi ngāue fakamatelié. ʻI he ako ʻa e fānaú ke nau feʻofaʻaki mo fetokoniʻakí, naʻa nau tupu hake ai ʻo vāofi. ʻI he kamata ngāue ʻa e faʻahinga lalahi angé, naʻa nau tokoniʻi loto-lelei honau fanga kiʻi tokoua iiki angé. Ko ʻeku taʻahine lahi tahá, ko Marseree, naʻá ne tokoniʻi ʻa hono tokoua siʻisiʻí, ko Nicole, ke fakakakato ʻa ʻene ako tefito ʻi he ako lotolotó. Tānaki atu ki ai, naʻá ku malava ke fakalele ha kiʻi falekoloa meʻakai. Naʻe tokoniʻi ai au ʻe he kiʻi paʻanga hū maí ke u tokangaʻi ʻa e niʻihi ʻo ʻemau ngaahi fiemaʻu fakamatelié.
Kuo ʻikai ʻaupito ke liʻaki kimautolu ʻe Sihova. ʻI he taimi ʻe taha, naʻá ku tala ange ai ki ha tokoua Kalisitiane naʻe ʻikai fakaʻatā kimautolu ʻe homau tuʻunga fakapaʻangá ke mau maʻu ʻa e fakataha-lahi fakavahé. Naʻá ne tali mai: “Tokoua Val, ʻi hoʻo fanongo pē fekauʻaki mo ha fakataha-lahí, kamata faʻo leva ʻo teu ki he fonongá! ʻE tokonaki mai ʻa Sihova.” Naʻá ku muimui ʻi heʻene faleʻí. Naʻe tokonaki mai ʻa Sihova, pea kuó ne hokohoko fai ia. Kuo ʻikai ʻaupito ke tō homau fāmilí ʻi ha ʻasemipilī pe ko ha fakataha-lahi koeʻuhi ko ha hala paʻanga.
ʻI he 1988, naʻe haveki ai ʻe he Afā ko Kilipetí ʻa Samaika, pea naʻa mau mavahe ai mei homau ʻapí ki ha maluʻanga ʻi ha feituʻu malu ange. Lolotonga ha kiʻi nonga ʻi he afaá, naʻá ku mavahe ai mo hoku fohá mei he feituʻu maluʻangá ke vakaiʻi homau ʻapi ʻa ia kuo maumaú. Lolotonga ʻa e kumi holo ʻi he toetoenga ʻo e maumaú, naʻá ku sio ai ki ha meʻa naʻá ku loto ke fakahaofi. Fakafokifā pē, naʻe toe longoaʻa mai ʻa e matangí, ka naʻá ku kei piki pē ki he meʻa naʻá ku loto ke fakahaofí. “Fineʻeiki, tuku ki lalo ʻa e televīsoné. Ko e uaifi koe ʻo Loté?” (Luke 17:31, 32) Ko e lea ko ia ʻa hoku fohá naʻá ne ʻai au ke u toe fakakaukau lelei. Naʻá ku lī ʻa e TV kuo pīponu he ʻuhá, peá ma fakatou lele ki ha maluʻanga.
ʻOku ou tete he taimí ni ʻi heʻeku manatu ki heʻeku tuku ʻeku moʻuí ki ha fakatuʻutāmaki koeʻuhi ko ha TV. Ka ʻoku fakamāfana ki hoku lotó ʻa e taimi ʻoku ou fakakaukau atu ai ki he lea fakatokanga fakalaumālie naʻe fai ʻe hoku fohá ʻi he taimi ko iá. Mālō mo e ako Fakatohitapu naʻá ne maʻu mei he fakatahaʻanga Kalisitiané, naʻá ne malava ai ke tokoniʻi au ke kalofi ha maumau lahi fakaesino pea mo fakalaumālie nai.
Naʻe fakaʻauha ʻe he afaá homau ʻapí mo ʻemau ngaʻotoʻotá, pea naʻe hoko ai ʻo mau loto-siʻi. Naʻe aʻu mai leva ʻa homau fanga tokoua Kalisitiané. Naʻa nau fakalototoʻaʻi kimautolu ke fehangahangai mo ʻemau molé fakataha mo e falala kia Sihova pea ke hokohoko atu ʻa e longomoʻui ʻi he ngāue fakafaifekaú, pea naʻa nau tokoniʻi kimautolu ke toe langa homau ʻapí. Ko e ngāue anga-ʻofa mo feilaulauʻi-kita ko iá ʻa ia naʻe fai ʻe he Kau Fakamoʻoni pole mei Samaika mo mulí naʻe maongo loloto ia kia kimautolu.
Ko Hono Fakamuʻomuʻa ʻo Sihová
Hili hono fakakakato ʻene akó, ko ʻeku tama hono uá, ko Melaine, naʻá ne ngāue ko ha faifekau tāimuʻa. Naʻá ne tali leva ha fakaafe ke ngāue ko ha tāimuʻa ʻi ha toe fakatahaʻanga ʻe taha, ʻa ia naʻe ʻuhinga iá ʻe pau ke ne tukuange ʻene ngāué. Neongo ko e ngāue ko iá naʻe fakaʻatā ai ia ke ne fai ha tokoni fakapaʻanga lahi ki homau fāmilí, naʻa mau falala ʻe tokangaʻi kimautolu ʻe Sihova kapau ʻoku mau taki taha fakamuʻomuʻa ʻa e ngaahi meʻa ʻo e Puleʻangá. (Mātiu 6:33) Ki mui ai, ko hoku fohá, ko Ewan, naʻá ne toe maʻu ha fakaafe ke ngāue ko ha tāimuʻa. Naʻá ne tokoniʻi fakapaʻanga ʻa e fāmilí, ka naʻa mau fakaʻaiʻai ia ke ne tali ʻa e fakaafé pea fakahaaʻi ʻemau fakaʻamu te ne maʻu ʻa e tāpuaki ʻa Sihová. Kuo ʻikai ʻaupito te u ʻai ke loto-siʻi ʻa e fānaú mei hono fakalahi ʻenau ngāue ki he Puleʻangá, pea ko kimautolu ko ia naʻe nofo pē ʻi ʻapí kuo ʻikai ʻaupito te mau tofanga ʻi ha masiva. ʻI hono kehé, kuo tupulekina ʻemau fiefiá, pea ʻi he taimi ʻe niʻihi, kuo mau malava ai ke tokoniʻi ʻa e faʻahinga kehe ʻoku masivá.
ʻI he ʻahó ni, ʻoku ʻomai kiate au ʻa e fiefia lahi ʻi he sio ki heʻeku fānaú “ʻoku nau laka ʻi he moʻoni.” (3 Sione 4) Ko e taha ʻo ʻeku tamaiki fefiné, ʻa Melaine, ʻoku ʻalu fakataha he taimí ni mo hono husepānití ʻi heʻene ngāue fakafaifekau fefonongaʻakí ʻi he tuʻunga ko ha ʻovasia sēketi. Ko ʻeku taʻahine ko Andrea mo hono husepānití ʻokú na ngāue ko e ongo tāimuʻa makehe, pea ʻokú ne ʻalu fakataha mo hono husepānití ʻi heʻene ʻaʻahi ki he ngaahi fakatahaʻangá ʻi he tuʻunga ko ha ʻovasia sēketi tokoni. Ko hoku fohá, ʻa Ewan, mo hono uaifí ʻokú na ngāue ko e ongo tāimuʻa makehe pea ko ha mātuʻa ia ʻi he fakatahaʻangá. Ko e taʻahine leva ʻe taha, ko Ava-Gay, ʻokú ne ngāue mo hono husepānití ʻi he ʻōfisi vaʻa ʻo e Kau Fakamoʻoni ʻa Sihová ʻi Samaiká. Ko Jennifer, Genieve mo Nicole ʻoku nau ngāue fakataha mo honau ngaahi husepānití mo e fānaú ko e kau mēmipa longomoʻui ʻo ʻenau ngaahi fakatahaʻangá taki taha. Ko Marseree ʻokú ne nofo mo au, pea ko kimaua ʻokú ma lolotonga kau ki he Fakatahaʻanga Port Morant. ʻOku lahi ʻa hoku ngaahi tāpuakí, he ko e kotoa ʻo ʻeku fānau ʻe toko valú ʻoku hokohoko atu ʻenau lotu kia Sihová.
Ko e ʻalu ko ia ʻa e taimí kuó ne ʻomai ai kiate au ha ngaahi palopalema fakaesino. ʻOku pau ke u kātekina he taimí ni ʻa e langa huí, ka ʻoku ou kei fiefia pē ʻi he ngāue ko ha tāimuʻá. Neongo ia, ʻi ha taimi he kuohilí, naʻe hoko ai ʻo faingataʻa ʻaupito ʻa e luelue ʻi he feituʻu kaungāʻapi māʻolunga ʻa ia naʻá ku nofo aí. Naʻá ku faingataʻaʻia ʻi he ʻalu ʻi heʻeku ngāue fakafaifekaú. Naʻá ku ʻahiʻahi heka ʻi ha pasikala pea naʻe faingofua ange ia kiate au ʻi he luelué. Ko ia naʻá ku fakatau mai ai ha pasikala ʻosi ngāueʻaki ʻo kamata ke ngāueʻaki ia. ʻI he ʻuluaki taimí, naʻe faingataʻa ki heʻeku fānaú ʻa ʻenau sio mai ki heʻenau faʻē langa huí ʻokú ne heka pasikalá. Neongo ia, naʻa nau fiefia ʻaupito ʻi he sio mai ʻoku ou hokohoko atu ʻa e malangá ʻo fakatatau ki he holi ʻa hoku lotó.
ʻOku ʻomai kiate au ʻa e fiefia lahi ʻi he sio ki he kakai naʻá ku ako mo iá ʻoku nau tali ʻa e moʻoni Fakatohitapú. ʻOku ou lotu maʻu pē ke tokoniʻi ʻe Sihova ʻa e tokotaha kotoa ʻi hoku fāmilí ke nau faitōnunga ai pē kiate ia ʻi he taimi ko eni ʻo e ngataʻangá pea faai atu ai ki ʻitāniti. ʻOku ʻave ʻeku fakahīkihikí mo ʻeku fakamāloó kia Sihova, ʻa e tokotaha “ogoʻi ae lotu,” ʻi heʻene ʻai ke u malava ʻo fehangahangai mo e pole ʻo hono ʻohake ʻeku fānau ʻe toko valú ʻi heʻene ngaahi foungá.—Sāme 65:2, PM.
[Fakatātā ʻi he peesi 10]
Mo ʻeku fānaú mo honau ngaahi hoá mo hoku fanga makapuná
[Fakatātā ʻi he peesi 12]
ʻOku ou ngāueʻaki he taimí ni ha pasikala ke fakahokoʻaki ʻeku ngāue fakafaifekaú