Kau Tauhi-Sipí ko e “Faʻifaʻitakiʻanga ki he Fanga Sipi”
“ʻE, mou fei mo tauhi ʻa e fanga sipi ʻa e ʻOtua ʻoku ʻiate kimoutolu . . . ʻi he loto fiefai . . . , ʻi he ʻofa ki he ngaue . . . , hoko ko e faʻifaʻitakiʻanga ki he fanga sipi.”—1 PITA 5:2, 3.
1, 2. (a) Ko e hā ʻa e monū naʻe tuku ʻe Sīsū ki he ʻapositolo ko Pitá, pea ko e hā naʻe ʻikai hala ai ʻa e falala ki ai ʻa Sīsuú? (e) ʻOku anga-fēfē ʻa e ongoʻi ʻa Sihova ʻo fekauʻaki mo e kau tauhi-sipi kuo fakanofó?
ʻI HA taimi ki muʻa ʻi he Penitekosi ʻo e 33 T.S., naʻe kai ai ʻe Pita mo e kau ākonga kehe ʻe toko ono ha kai pongipongi naʻe teuteu ʻe Sīsū ʻi he matāfanga ʻo e Tahi Kālelí. Naʻe ʻikai ko e ʻuluaki taimi ʻeni ne mātā ai ʻe Pita ʻa Sīsū he hili ʻEne toetuʻú, pea ʻoku ʻikai ha veiveiua naʻá ne fiefia he sio kia Sīsū kuo moʻui maí. Ka naʻe toe loto-hohaʻa nai ʻa Pita. Ko hono ʻuhingá, ʻi ha ngaahi ʻaho siʻi ki muʻa hení naʻá ne fakaʻikaiʻi ai ʻi he ʻao ʻo e kakaí ʻo pehē ʻoku ʻikai haʻane teitei ʻilo kia Sīsū. (Luke 22:55-60; 24:34; Sione 18:25-27; 21:1-14) Naʻe ngāhiʻi ʻe Sīsū ʻa e tokotaha fakatomala ko Pitá ʻi he vaivai ʻene tuí? ʻIkai. ʻI hono kehé, naʻá ne tuku kia Pita ʻa e monū ko hono fafanga mo tauhi ʻa e ‘siʻi fanga sipi’ ʻa Sīsuú. (Sione 21:15-17) Hangē ko ia ʻoku fakahaaʻi ʻe he fakamatala ʻa e Tohi Tapú ki he hisitōlia ʻo e fakatahaʻanga Kalisitiane ʻi he taimi ʻo e kau ʻapositoló, naʻe ʻikai hala ʻa e falala ʻa Sīsū kia Pitá. ʻI he kau fakataha ʻa Pita mo e kau ʻapositolo kehé pea mo e kau tangata matuʻotuʻa ange ʻi Selusalemá, naʻá ne hoko atu ke tauhi ʻa e fakatahaʻanga Kalisitiané ʻi ha vahaʻa taimi ʻo e ngaahi ʻahiʻahi kakaha mo e tupulaki vave ʻaupito.—Ngāue 1:15-26; 2:14; 15:6-9.
2 ʻI he ʻahó ni, kuo fakanofo ʻe Sihova fakafou ʻia Sīsū Kalaisi ha kau tangata taau ke nau hoko ko e kau tauhi-sipi fakalaumālie ke tataki ʻEne fanga sipí ʻi he ngaahi taimi faingataʻa taha ko ʻeni ʻi he hisitōlia ʻo e tangatá. (Efeso 4:11, 12; 2 Timote 3:1) Kuo hala ʻa e falala pehē kiate kinautolú? ʻOku fakamoʻoniʻi ʻe he fetokouaʻaki faka-Kalisitiane melino ʻoku hoko ʻi māmani lahí kuo ʻikai hala ia. Ko e moʻoni, hangē pē ko Pitá, ko e kau tauhi-sipí ni ko e faʻahinga angahalaʻia pē kinautolu ʻo e tangatá. (Kaletia 2:11-14; Semisi 3:2) Neongo ia, ʻoku falala ʻa Sihova kiate kinautolu te nau tokanga ki he fanga sipí ʻa ia naʻá ne fakatauʻaki ʻa e taʻataʻa ʻo hono ʻAló. (Ngāue 20:28) ʻOku ʻofa loloto ʻa Sihova ʻi he kau tangatá ni, ʻo ne fakakaukau ai ke “atu kiate kinautolu ae fakaabaaba lahi.”—1 Timote 5:17, PM.
3. ʻOku anga-fēfē hono tauhi maʻu ʻe he kau tauhi-sipi fakalaumālié ha laumālie ʻo e loto-fiefai mo e ʻofa ki he ngāué?
3 ʻOku anga-fēfē hono tauhi maʻu ʻe he kau tauhi-sipi fakalaumālié ha laumālie ʻo e loto-fiefai mo e ʻofa ki he ngāué, ʻo hoko ai ko e ngaahi faʻifaʻitakiʻanga ki he fanga sipí? ʻI he hangē ko Pita mo e kau tauhi-sipi kehe ʻo e taimi ko iá, ʻoku nau falala ki he laumālie māʻoniʻoni ʻo e ʻOtuá, ʻa ia ʻokú ne ʻoange kiate kinautolu ʻa e mālohi ʻoku fiemaʻu ke fuaʻaki honau fatongiá. (2 Kolinito 4:7) ʻOku toe fakatupu ʻe he laumālie māʻoniʻoní ʻiate kinautolu ʻa e fua ʻo e laumālié, ʻa ia ko e ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kitá. (Kaletia 5:22, 23) Tau lāulea angé ki ha ngaahi founga pau ʻa ia ʻe lava ke fokotuʻu ai ʻe he kau tauhi-sipí ha faʻifaʻitakiʻanga ʻi hono fakahāhā ʻa e fua ko ʻení ʻi heʻenau tauhi mo tokangaʻi ʻa e fanga sipi ʻa e ʻOtuá.
ʻOfa Fakatouʻosi ki he Fanga Sipí Fakalūkufua mo e Sipi Tāutaha
4, 5. (a) ʻOku anga-fēfē hono fakahāhā ʻe Sihova mo Sīsū ʻa e ʻofá ki he fanga sipí? (e) Ko e hā ha ngaahi founga ʻoku fakahāhaaʻi ai ʻe he kau tauhi-sipi fakalaumālié ʻa e ʻofá ki he fanga sipí?
4 Ko e ʻulungāanga tuʻu-ki-muʻa taha ʻoku fakatupu ʻe he laumālie ʻo e ʻOtuá ko e ʻofá. ʻOku fakahāhaaʻi ʻe Sihova ʻene ʻofa ki he fanga sipí fakalūkufua ʻi heʻene tokonaki ki ai ha meʻakai fakalaumālie lahi faú. (Aisea 65:13, 14; Mātiu 24:45-47) Ka, ʻokú ne fai ʻa e meʻa lahi ange ʻo ʻikai ko hono fafanga pē ʻo e fanga sipí. ʻOkú ne tokanga fakafoʻituitui ki he sipi tāutaha. (1 Pita 5:6, 7) ʻOku ʻofa foki mo Sīsū ʻi he fanga sipí. Naʻá ne tukuange ʻene moʻuí maʻanautolu, pea ʻokú ne ʻiloʻi ʻa e sipi tāutaha “ʻi honau hingoa taki taha.”—Sione 10:3, 14-16.
5 ʻOku faʻifaʻitaki ʻa e kau tauhi-sipi fakalaumālié kia Sihova mo Sīsū. ʻOku nau fakahāhā ʻa e ʻofá ki he fanga sipi fakalūkufua ʻa e ʻOtuá ʻaki ʻenau ‘tokaga ke akonaki’ ki he fakatahaʻangá. ʻOku tokoni ʻenau ngaahi malanga makatuʻunga ʻi he Tohi Tapú ke fafanga mo maluʻi ʻa e fanga sipí, pea ʻoku hā atu ki he faʻahinga kotoa ʻa ʻenau ngāue mālohi ʻi he meʻa ko iá. (1 Timote 4:13, 16, PM) Ko e meʻa ʻoku ʻikai loko ʻiloʻí ko e taimi ko ia ʻoku nau vaheʻi ki hono tauhi mo tokangaʻi ʻa e ngaahi lēkōtí mo e faitohí, ko hono ʻai ha ngaahi taimi-tēpile, pea mo hono tokangaʻi ʻo e ngaahi meʻa lahi kehe koeʻuhi ke fakapapauʻi ʻoku fakahoko ʻa e ngaahi fakataha mo e ngaahi ngāue kehe ʻa e fakatahaʻangá ʻo “tāu mo māu.” (1 Kolinito 14:40) ʻOku ʻikai hā ki he niʻihi kehe ʻa e konga lahi ʻo e ngāué ni pea ʻoku ʻikai loko fakatokangaʻi nai ia. Ko ha ngāue ʻofa moʻoni ia.—Kaletia 5:13.
6, 7. (a) Ko e hā ʻa e founga ʻe taha ʻe hoko ai ʻa e kau tauhi-sipí ʻo maheni lelei ange mo e fanga sipí? (e) Ko e hā ʻoku ʻaonga ai ʻi he taimi ʻe niʻihi ke fakahaaʻi ʻetau ngaahi ongoʻí ki ha tokotaha mātuʻá?
6 ʻOku feinga ʻa e kau tauhi-sipi Kalisitiane ʻofá ke fakahāhā ʻa e tokanga fakafoʻituitui ki he sipi tāutaha ʻi he fakatahaʻangá. (Filipai 2:4) Ko e founga ʻe taha ʻoku hoko ai ʻa e kau tauhi-sipí ʻo maheni lelei ange mo e sipi tāutahá ko e ngāue fakataha mo kinautolu ʻi he ngāue fakamalangá. Naʻe faʻa ʻia Sīsū maʻu pē ʻene kau muimuí ʻi he ngāue fakamalangá pea naʻá ne ngāueʻaki ʻa e ngaahi taimi peheé ke fai ai ha fakalototoʻa. (Luke 8:1, 2a) ʻOku pehē ʻe ha tauhi-sipi taukei ʻe taha: “ʻOku ou ʻiloʻi ko e taha ʻo e ngaahi founga lelei taha ke te hoko ʻo ʻiloʻi mo fakalototoʻaʻi ai ha tokoua pe ko ha tuofefine ko e ngāue fakataha mo ia ʻi he ngāue fakamalangá.” Kapau kuo teʻeki te ke maʻu ha faingamālie ke ngāue ai mo ha taha ʻo e kau mātuʻá ʻi he ngāue fakamalangá, fēfē ke fai ha fokotuʻutuʻu ke fai leva ia?
7 Naʻe ueʻi ʻe he ʻofá ʻa Sīsū ke ne kaungā fiefia mo kaungā mamahi mo hono kau muimuí. Ko e fakatātaá, ʻi he foki fiefia mai ʻa ʻene kau ākonga ʻe toko 70 mei heʻenau malangá, naʻe hoko ʻa Sīsū ʻo “hakailangitau” ai. (Luke 10:17-21) Kae kehe, ʻi he taimi naʻá ne sio ai ki he uesia ʻo Mele mo e ngaahi mēmipa hono fāmilí mo e ngaahi kaumeʻá ʻi he mate ʻa Lāsalosí, “naʻe tutulu ʻa Sīsū.” (Sione 11:33-35) ʻOku ongoʻi pehē pē ʻe he kau tauhi-sipi tokanga he ʻaho ní ʻa e fanga sipí. ʻOku ueʻi kinautolu ʻe he ʻofá ke nau “fiefia mo kinautolu ʻoku fiefia” pea ke “tangi mo kinautolu ʻoku tangi.” (Loma 12:15) Kapau ʻokú ke hokosia ha fiefia pe mamahi ʻi hoʻo moʻuí, ongoʻi tauʻatāina ke fakahā hoʻo ngaahi ongoʻí ki he kau tauhi-sipi Kalisitiané. ʻE fakalototoʻaʻi kinautolu ʻi heʻenau fanongo ki hoʻo fiefiá. (Loma 1:11, 12) ʻI heʻenau ʻilo fekauʻaki mo e ngaahi ʻahiʻahi ʻoku hoko kiate koé ʻe fakamafeia ai kinautolu ke nau fakaivimālohiʻi mo fakafiemālieʻi koe.—1 Tesalonaika 1:6; 3:1-3.
8, 9. (a) Naʻe anga-fēfē hono fakahāhā ʻe ha tokotaha mātuʻa ʻe taha ʻa e ʻofa ki hono uaifí? (e) ʻOku mahuʻinga fēfē ki ha tauhi-sipi ke ne fakahāhā ʻa e ʻofá ki hono fāmilí?
8 ʻOku tautefito ʻa e hā ʻa e ʻofa ʻa ha tauhi-sipi ki he fanga sipí ʻi he founga ʻokú ne feangai ai mo hono fāmilí tonu. (1 Timote 3:1, 4) Kapau ʻokú ne ʻosi mali, ko e ʻofa mo e fakaʻapaʻapa ko ia ʻokú ne fakahaaʻi ki hono uaifí ʻokú ne fokotuʻu ai ha faʻifaʻitakiʻanga ki he ngaahi husepāniti kehé ke nau faʻifaʻitaki ki ai. (Efeso 5:25; 1 Pita 3:7) Fakakaukau atu ki he fakamatala ʻa ha fefine Kalisitiane ko hono hingoá ko Linda. Ko ha ʻovasia hono husepānití ʻo laka hake ʻi he taʻu ʻe 20 ki muʻa peá ne maté. ʻOku pehē ʻe Linda: “Naʻe femoʻuekina lahi maʻu pē ʻa hoku husepānití ʻi hono tokangaʻi ʻa e fakatahaʻangá. Ka naʻá ne ʻai au ke u ongoʻi naʻá ma kei ʻi he timi pē taha. Naʻá ne faʻa fakahaaʻi ʻa e houngaʻia ki heʻeku poupoú, pea naʻá ne vaheʻi hono taimi ʻataá kiate au. Ko hono olá, naʻá ku ongoʻi naʻe ʻofaʻi au pea naʻe ʻikai ke u meheka ai ki he taimi naʻá ne vaheʻi ki he ngāue ʻa e fakatahaʻangá.”
9 Kapau ʻoku maʻu fānau ha tauhi-sipi Kalisitiane, ko e founga ko ia ʻo ʻene akonekina anga-ʻofa mo fakaongoongoleleiʻi maʻu pē ʻa ʻene fānaú ʻoku tokonaki mai ai ha sīpinga ki he ngaahi mātuʻa kehé ke nau muimui ai. (Efeso 6:4) Ko hono moʻoní, ko e ʻofa ko ia ʻokú ne fakahāhā ki hono fāmilí ʻokú ne ʻomai ʻa e fakamoʻoni hokohoko ʻokú ne alafalalaʻanga ʻi hono tuʻunga fakanofo ʻe he laumālie māʻoniʻoní.—1 Timote 3:4, 5.
Pouaki ʻe he Fetuʻutakí ʻa e Fiefiá mo e Melinó
10. (a) Ko e hā ʻoku malava ke ne uesia kovi ʻa e fiefia mo e melino ʻa e fakatahaʻangá? (e) Ko e hā ʻa e fakakikihi naʻá ne mei maumauʻi ʻa e melino ʻa e fakatahaʻanga ʻi he taimi ʻo e kau ʻapositoló, pea naʻe fakaleleiʻi fēfē ʻa e fakakikihi ko iá?
10 ʻOku malava ʻe he laumālie māʻoniʻoní ke ne fakatupu ʻa e fiefiá mo e melinó ʻi he loto ʻo ha Kalisitiane tāutaha, he lotolotonga ʻo e kulupu ʻo e kau mātuʻá, pea ʻi he fakatahaʻangá fakalūkufua. Kae kehe, ʻoku malava ʻe he ʻikai loko fetuʻutaki tauʻatāiná ʻo uesia kovi ʻa e fiefia mo e melino ko ʻení. Naʻe pehē ʻe Solomone ʻo e kuonga muʻá: “ʻOku maumau fakakaukau ʻa e ʻikai fai ha alea.” (Palovepi 15:22) ʻI he tafaʻaki ʻe tahá, ʻoku hanga ʻe he fetuʻutaki anga-fakaʻapaʻapa mo lea totonú ʻo pouaki ʻa e fiefiá mo e melinó. Ko e fakatātaá, ʻi he mei maumauʻi ʻe he fakakikihi fekauʻaki mo e kamú ʻa e melino ʻa e fakatahaʻanga ʻi he taimi ʻo e kau ʻapositoló, naʻe kumi ai ʻa e kulupu pule ʻi Selusalemá ki he tataki ʻa e laumālie māʻoniʻoní. Naʻa nau toe fakahaaʻi ʻenau ngaahi vakai kehekehe fekauʻaki mo e tuʻunga ko iá. ʻI he hili ʻo ha fetalanoaʻaki lōloa mo longomoʻui, naʻa nau fai leva ai ha fili. ʻI he taimi naʻa nau fakahoko atu ai ʻenau fili loto-tahá ki he ngaahi fakatahaʻangá, naʻe hoko ai ʻa e fanga tokouá ʻo “fiefia ʻi he tokoni kuo fai.” (Ngāue 15:6-23, 25, 31; 16:4, 5) Naʻe pouaki ai ʻa e fiefiá mo e melinó.
11. ʻE lava fēfē ke pouaki ʻe he kau mātuʻá ʻa e fiefia mo e melino ʻi he fakatahaʻangá?
11 ʻOku pehē pē ʻi he ʻahó ni, ʻoku pouaki ʻe he kau tauhi-sipí ʻa e fiefia mo e melino ʻi he fakatahaʻangá ʻaki ʻenau hoko ko e kau fetuʻutaki lelei. ʻI he taimi ʻoku hā ngali ʻe maumauʻi ai ʻe ha ngaahi palopalema ʻa e melino ʻa e fakatahaʻangá, ʻoku nau fakatahataha ʻo fakahaaʻi tauʻatāina ʻenau ngaahi fakakaukaú. ʻOku nau fanongo anga-fakaʻapaʻapa ki he ngaahi fakamatala ʻa honau kau kaungā tauhi-sipí. (Palovepi 13:10; 18:13) ʻI he hili ʻa e lotu ʻo kole ʻa e laumālie māʻoniʻoní, ʻoku nau fakatuʻunga ʻenau ngaahi filí ʻi he ngaahi tefitoʻi moʻoni ʻa e Tohi Tapú pea ʻi he ngaahi tataki kuo pulusi mai ʻe he “tamaioeiki agatonu mo boto.” (Mātiu 24:45-47, PM; 1 Kolinito 4:6) ʻI he hili pē ʻa hono fai ʻe he kulupu ʻo e kau mātuʻá ha fili makatuʻunga ʻi he Tohi Tapú, ʻoku muimui leva ʻa e tokotaha mātuʻa taki taha ki he tataki ʻa e laumālie māʻoniʻoní ʻaki hono poupouʻi ʻa e fili ko iá neongo naʻe ʻikai loto-tatau ʻa e tokolahi ia mo ʻene fakakaukau fakafoʻituituí. ʻOku pouaki ʻe he anga-fakanānā peheé ʻa e fiefiá mo e melinó pea fokotuʻu ai ha faʻifaʻitakiʻanga lelei ki he fanga sipí ki he founga ke ʻaʻeva ai mo e ʻOtuá. (Maika 6:8) ʻOkú ke poupouʻi anga-fakanānā ʻa e ngaahi fili Fakatohitapu ʻoku fai ʻe he kau tauhi-sipi ʻi he fakatahaʻangá?
Hoko ʻo Kātaki-Fuoloa mo Anga-Lelei
12. Ko e hā naʻe fiemaʻu ai kia Sīsū ke ne kātaki-fuoloa mo anga-lelei ʻi heʻene ngaahi feangainga mo e kau ʻapositoló?
12 Naʻe kātaki-fuoloa mo anga-lelei ʻa Sīsū ʻi heʻene ngaahi feangainga mo ʻene kau ʻapositoló, neongo ʻenau toutou fehālaakí. Ko e fakatātaá, naʻe toutou feinga ʻa Sīsū ke maongo kiate kinautolu ʻa e fiemaʻu ke nau anga-fakatōkilaló. (Mātiu 18:1-4; 20:25-27) Kae kehe, ʻi he pō fakaʻosi ʻo e moʻui ʻa Sīsū ʻi he māmaní, ʻi he hili pē ʻene akoʻi kinautolu ki he anga-fakatōkilaló ʻaki hono fufulu honau vaʻé, “naʻe ai foki ha fakakikihi ʻiate kinautolu, pe ko hai ʻiate kinautolu ʻoku matamata ko e māʻolunga.” (Luke 22:24; Sione 13:1-5) Naʻe tafuluʻi ʻe Sīsū ʻa e kau ʻapositoló? ʻIkai, naʻá ne anga-lelei ʻo fakaʻuhinga mo kinautolu, ʻo pehē: “Kohai oku lahi, ko ia oku ne nofo o kai, be ko ia oku ne tauhi? ikai ko ia oku nofo o kai? ka oku ou iate kimoutolu o hage ko ia oku tauhi.” (Luke 22:27, PM) Naʻe faai atu pē ʻo aʻu ki he loto ʻo e kau ʻapositoló ʻa e kātaki-fuoloa mo e anga-lelei ʻa Sīsuú, pea pehē foki ki heʻene faʻifaʻitakiʻanga leleí.
13, 14. ʻOku tautefito ki he taimi fē ʻoku fiemaʻu ke anga-lelei ai ʻa e kau tauhi-sipí?
13 ʻI he tuʻunga meimei tatau, ʻe fiemaʻu nai ki ha tauhi-sipi fakalaumālie ke ne toutou fai ha akonaki ki ha tokotaha ʻi he fekauʻaki mo ha fehālaaki pau. ʻE lava ke hoko ʻo pāhia ʻa e tauhi-sipí ʻi he tokotaha ko iá. Kae kehe, ʻi hono manatuʻi ʻe he tauhi-sipí ʻene ngaahi fehālaaki ʻaʻaná ʻi heʻene ‘valokiʻi ʻa e tokotaha fakamaveuveú,’ te ne malava ai ke fakahāhā ʻa e kātaki-fuoloá mo e anga-leleí ki hono tokouá. Te ne faʻifaʻitaki ai kia Sīsū mo Sihova, ʻa ia ʻokú na fakahāhā ʻa e ongo ʻulungāanga ko iá ki he kotoa ʻo e kau Kalisitiané, ʻo kau ai ʻa e kau tauhi-sipí.—1 Tesalonaika 5:14, PM; Semisi 2:13.
14 ʻI he taimi ʻe niʻihi, ʻe fiemaʻu nai ki he kau tauhi-sipí ke nau fai ha akonaki fefeka ki ha taha kuó ne fai ha angahala mamafa. Kapau ʻoku ʻikai ke fakatomala ʻa e tokotaha ko iá, kuo pau ke fakamavaheʻi ʻe he kau tauhi-sipí ʻa e tokotaha faihala ko iá mei he fakatahaʻangá. (1 Kolinito 5:11-13) Neongo ia, ko e founga ko ia ʻoku nau feangainga ai mo e tokotaha ko iá ʻoku hā mei ai ʻoku nau fehiʻa ʻi he angahalá, ʻikai ko e tokotaha faihalá. (Siutasi 23) Ko e anga-lelei ʻa e kau tauhi-sipí ʻokú ne ʻai nai ai ke faingofua ange ki ha sipi hē ke faai atu pē ʻo ne foki mai ki he tākangá.—Luke 15:11-24.
ʻOku Ueʻi ʻe he Tuí ʻa e Ngaahi Ngāue Leleí
15. Ko e hā ʻa e founga ʻe taha ʻoku faʻifaʻitaki ai ʻa e kau tauhi-sipí ki he lelei ʻa Sihová, pea ko e hā ʻokú ne ueʻi kinautolu ke nau fai peheé?
15 “ʻOku lelei ʻa Sihova ki he meʻa kotoa pe,” ʻo aʻu ki he faʻahinga ko ia ʻoku ʻikai te nau houngaʻia ʻi he meʻa ʻokú ne fai maʻanautolú. (Sāme 145:9; Mātiu 5:45) ʻOku tautefito ʻa e hā ʻa e lelei ʻa Sihová ʻi heʻene fekauʻi atu ʻene kakaí ke malangaʻi ʻa e ‘ongoongolelei ʻo e puleʻangá.’ (Mātiu 24:14) ʻOku tapua atu ʻe he kau tauhi-sipí ʻa e lelei ʻa e ʻOtuá ʻi heʻenau takimuʻa ʻi he ngāue fakamalanga ko ʻení. Ko e hā ʻokú ne ueʻi kinautolu ke nau feinga tōtōiví? Ko e tui mālohi kia Sihova mo ʻene ngaahi talaʻofá.—Loma 10:10, 13, 14.
16. ʻE lava fēfē ke “fai lelei” ʻa e kau tauhi-sipí ki he fanga sipí?
16 Tānaki atu ki he “fai lelei ki he kakai kotoabe” ʻaki ʻa e malangá, ko e fatongia ia ʻo e kau tauhi-sipí ke nau fai ʻa e meʻa ʻoku leleí ʻo “ajili be kiate kinautolu oku i he fale oe tui.” (Kaletia 6:10, PM) Ko e founga ʻe taha ʻoku nau fai ai ʻení ko hono fai ha ngaahi ʻaʻahi fakatauhisipi fakalototoʻa. ʻOku pehē ʻe ha tokotaha mātuʻa ʻe taha: “ʻOku ou fiefia ʻi hono fai ʻa e ngaahi ʻaʻahi fakatauhisipí. ʻOku nau ʻomai kiate au ʻa e faingamālie ke fakaongoongoleleiʻi ai ʻa e fanga tokouá mo e fanga tuofāfiné ki heʻenau ngaahi feingá pea ke tokoniʻi ai kinautolu ke nau ʻiloʻi ʻoku fakahoungaʻi ʻenau ngāue mālohí.” ʻI he taimi ʻe niʻihi, ʻe fokotuʻu atu nai ʻe he kau tauhi-sipí ha ngaahi founga ʻa ia ʻe lava ai ha taha ke ne fakaleleiʻi ʻene ngāue kia Sihová. ʻI he fai peheé, ʻoku faʻifaʻitaki ai ʻa e kau tauhi-sipi fakapotopotó ki he ʻapositolo ko Paulá. Fakakaukau atu ki he founga naʻá ne kōlenga ai ki he fanga tokoua ʻi Tesalonaiká: “ʻOku mau falala ʻi he ʻEiki ʻoku mou fai, pea te mou fai, ʻa e ngaahi meʻa ʻoku mau fekau atu.” (2 Tesalonaika 3:4) Ko hono fakahāhaaʻi pehē ʻo e falalá ʻoku langaʻi ai ʻa e fanga sipí ke nau hehema ki he leleí pea faingofua ange ai kiate kinautolu ke nau “tuitala ki he kau tuʻukimuʻa.” (Hepelu 13:17) ʻI hono fai atu ha ʻaʻahi fakatauhisipi fakalototoʻa kiate koe, fēfē ke ke fakahaaʻi hoʻo houngaʻia ki ai?
ʻOku Fiemaʻu ki he Anga-Maluú ʻa e Mapuleʻi-Kitá
17. Ko e hā naʻe ako ʻe Pita meia Sīsuú?
17 Naʻe anga-malū ʻa Sīsū, naʻa mo e taimi naʻe fakaʻitaʻi ai iá. (Mātiu 11:29) ʻI he taimi naʻe lavakiʻi mo puke ai ʻa Sīsuú, naʻá ne fakahāhā ʻa e anga-malū mo e mapuleʻi-kita lahi. ʻI he ʻohoʻoho ʻa Pitá, naʻá ne unuhi hake ha heletā ʻo ne ngāueʻaki. Ka naʻe fakamanatu ange ʻe Sīsū: “ʻOku ke pehe koā ʻoku faingataʻa kiate au ke kole ʻeni ki heʻeku ʻEiki, ka ne ʻomi ha kongakau angelo ʻe hongofulu ma ua, pe lahi hake, ke tapa kiate au?” (Mātiu 26:51-53; Sione 18:10) Naʻe ako mei ai ʻa Pita peá ne fakamanatu ki he kau Kalisitiané ki mui ai: “Naʻe kataki mamahi ʻa Kalaisi foki koeʻuhi ko kimoutolu, ʻo ne tuku ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia. . . . ʻI hono leakovia naʻe ʻikai te ne tali ʻaki ha leakovi; ʻi hono ngaohikoviʻi naʻe ʻikai te ne fakamana.”—1 Pita 2:21-23.
18, 19. (a) ʻOku tautefito ki he taimi fē kuo pau ke fakahāhā ai ʻe he kau tauhi-sipí ʻa e anga-maluú mo e mapuleʻi-kitá? (e) Ko e hā ʻa e ongo fehuʻi te tau toki lāulea ki aí?
18 ʻOku anga-malū pehē pē ʻa e kau tauhi-sipi lavameʻá naʻa mo e taimi ʻoku ngaohikoviʻi ai kinautolú. Hangē ko ʻení, ʻoku ʻikai nai ke fai ha tali lelei ia ʻe he niʻihi ko ia ʻoku feinga ʻa e kau tauhi-sipí ke tokoniʻi ʻi he fakatahaʻangá. Kapau ʻoku kafo pe puke fakalaumālie ʻa e tokotaha ko ia ʻoku fiemaʻu ki ai ʻa e tokoní, te ne taliʻaki nai ki he akonakí ha “lau ʻoku hange ko e hokohokai ha heleta.” (Palovepi 12:18) Kae kehe, ʻi he hangē ko Sīsuú, ʻoku ʻikai ke toe taliʻaki ʻe he kau tauhi-sipí ha ngaahi lea māsila pe ngaahi ngāue kovi. ʻI hono kehé, ʻoku nau ngāueʻaki ʻa e mataʻofi-kitá mo fakahāhā ʻa e kaungāongoʻi, ʻa ia ʻe fakamoʻoniʻi nai ai ko ha tāpuaki ia ki he tokotaha ʻoku fiemaʻu ki ai ʻa e tokoní. (1 Pita 3:8, 9) ʻOkú ke ako mei he faʻifaʻitakiʻanga ʻa e kau mātuʻá pea fakahāhā ʻa e anga-maluú mo e mapuleʻi-kitá ʻi hono akonakiʻi koé?
19 ʻOku ʻikai ha veiveiua, ʻoku houngaʻia ʻa Sihova mo Sīsū ʻi he ngāue mālohi ʻa e kau tauhi-sipi ʻe laui afe ko ia ʻoku nau tokangaʻi loto-lelei ʻa e fanga sipí ʻi māmani lahí. ʻOku toe ʻofa loloto ʻa Sihova mo hono ʻAló ki he kau sevāniti fakafaifekau ʻe laui afe ko ia ʻoku nau poupou ki he kau mātuʻá ʻi hono ‘tauhi ae kaiga maonioní.’ (Hepelu 6:10, PM) Ko e hā leva ʻoku toumoua ai ʻa e fanga tokoua ʻosi papitaiso ʻe niʻihi mei he kakapa atu ki he “ngaue lelei” ko ʻení? (1 Timote 3:1) Pea ʻoku anga-fēfē hono akoʻi ʻe Sihova ʻa e faʻahinga ko ia ʻokú ne fakanofo ko e kau tauhi-sipí? Te tau lāulea ki he ongo fehuʻí ni ʻi he kupu hoko maí.
ʻOkú Ke Manatuʻi?
• Ko e hā ha ngaahi founga ʻoku fakahāhā ai ʻe he kau tauhi-sipí ʻa e ʻofa ʻi he fanga sipí?
• ʻE lava fēfē ke pouaki ʻe he faʻahinga kotoa ʻi he fakatahaʻangá ʻa e fiefiá mo e melinó?
• Ko e hā ke kātaki-fuoloa mo anga-lelei ai ʻa e kau tauhi-sipí ʻi hono fai ha akonakí?
• ʻOku anga-fēfē hono fakahāhā ʻe he kau mātuʻá ʻa e leleí mo e tuí?
[Fakatātā ʻi he peesi 18]
ʻOku ueʻi ʻe he ʻofá ʻa e kau mātuʻá ke nau tauhi ʻa e fakatahaʻangá
[Fakatātā ʻi he peesi 18]
ʻOku nau toe vaheʻi ʻa e taimi mo honau ngaahi fāmilí fakatouʻosi ʻi he fakafiefia . . .
. . . mo e ngāue fakamalanga
[Fakatātā ʻi he peesi 20]
ʻOku pouaki ʻe he fetuʻutaki lelei ʻi he lotolotonga ʻo e kau mātuʻá ʻa e fiefia mo e melino ʻi he fakatahaʻangá