ʻOku Ofí Ni ʻa e Fakahaofi ʻe Fai ʻe he Puleʻanga ʻo e ʻOtuá!
“Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.”—MT. 6:10, Ko e Taulua.
1. Ko e hā ʻa e akonaki tefito ʻa Sīsuú?
ʻI HE taimi naʻe fai ai ʻe Sīsū ʻene Malanga ʻi he Moʻungá, naʻá ne fakakau ai ha sīpinga lotu ʻa ia naʻe fakanounou ai ʻene ngaahi akonaki tefitó. Naʻá ne akoʻi hono kau muimuí ke nau lotu ki he ʻOtuá: “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.” (Mt. 6:9-13, Tl) Pea naʻe fononga ʻa Sīsū mei he “kolo mo e vilisi, ʻi heʻene fanongonongo ʻa e Puleʻanga ʻo e Otua, mo ne tala hono ongoongolelei.” (Luke 8:1) Naʻe fakaʻaiʻai ʻe Kalaisi hono kau muimuí: ‘Ka mou fuofua kumi ae buleaga oe Otuá, mo ene maonioní.’ (Mt. 6:33, PM) ʻI hoʻo ako ʻa e kupú ni, fakasio ʻa e ngaahi founga ke ke ngāueʻaki ai ʻa e ngaahi fakamatalá ʻi hoʻo ngāue fakafaifekaú. Ko e fakatātaá, fakakaukau angé pe ʻe anga-fēfē hoʻo tali ʻa e ngaahi fehuʻí ni: ʻOku mahuʻinga fēfē ʻa e pōpoaki ʻo e Puleʻangá? Ko e hā ʻa e meʻa ʻoku fiemaʻu ke fakahaofi mei ai ʻa e faʻahinga ʻo e tangatá? Pea ʻe anga-fēfē hono tokonaki mai ʻe he Puleʻanga ʻo e ʻOtuá ʻa e fakahaofí?
2. ʻOku mahuʻinga fēfē ʻa e pōpoaki ʻo e Puleʻanga?
2 Naʻe muʻaki tala ʻe Sīsū: “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mt. 24:14) Ko e ongoongo lelei fekauʻaki mo e Puleʻanga ʻo e ʻOtuá ʻoku mātuʻaki mahuʻinga ʻaupito. Ko e ʻuhinga ia ʻoku mahuʻinga taha ai ʻa e pōpoaki ko iá ʻi he māmaní! Laka hake ʻi he ngaahi fakatahaʻanga ʻe 100,000 ʻo e Kau Fakamoʻoni ʻa Sihová ʻi māmani lahi, ʻoku fakafuofua ki he toko fitu miliona ʻo e kau sevāniti ʻa e ʻOtuá ʻoku nau kau atu ʻi he ngāue fakamalanga ʻikai alafakatataua ko ia, ko hono talaki ki he niʻihi kehé kuo ʻosi fokotuʻu ʻa e Puleʻanga ʻo e ʻOtuá. Ko e ongoongo lelei ia ʻa hono fokotuʻú koeʻuhí he ʻoku ʻuhinga ia kuo fokotuʻutuʻu ʻe he ʻOtuá ha founga-pule ʻi hēvani ke ne puleʻi fakaʻaufuli ʻa e ngaahi meʻa ʻi he māmaní. ʻI he malumalu e pule ʻa e Puleʻangá, ʻe fakahoko leva ai ʻe Sihova hono finangaló ʻi māmani ʻo hangē ko ia ʻoku fai ʻi hēvaní.
3, 4. Ko e hā leva ʻe iku ki aí ʻi he taimi ʻe fai ai e finangalo ʻo e ʻOtuá ʻi he māmaní?
3 Ko e hā ʻe hoko ki he faʻahinga ʻo e tangatá ʻi he taimi ʻe fai ai ʻa e finangalo ʻo e ʻOtuá ʻi he māmaní? ʻE hanga ʻe Sihova ʻo “holoholo ʻa e loʻimata kotoa pē mei honau mata, pea ʻe ʻikai toe ai ha mate, pea ʻe ʻikai toe ai ha mamahi pe ha tangi pe ha ongosia.” (Fkh. 21:4) ʻE ʻikai ke toe puke pe mate ʻa e kakaí koeʻuhi ko e angahala tukufakaholó mo e taʻehaohaoá. Ko e kau mate ko ia ʻoku ʻi he manatu ʻa e ʻOtuá ʻe ʻi ai ʻa e faingamālie ke nau moʻui taʻengata ai, he ʻoku talaʻofa mai ʻe he Tohi Tapú: “ʻE faifai pea hoko ha toetuʻu ʻa e angatonu mo e angahala fakatouʻosi.” (Ng. 24:15) ʻE ʻikai toe ʻi ai ha tau, mahamahaki, pe fiekaia, pea ʻe liliu ʻa e foʻi māmani ke hoko ko ha palataisi. Naʻa mo e fanga manu ʻoku fakatuʻutāmaki he taimi ní te nau melino mo e tangatá pea ʻiate kinautolu.—Sāme 46:9; 72:16; Ai. 11:6-9; 33:24; Luke 23:43.
4 ʻI he ngaahi tāpuaki fakaofo ko ia ʻoku ʻomai ʻe he pule ʻa e Puleʻangá, ʻoku ʻikai ai ha ofo ʻi he ngaahi kikite Fakatohitapu ʻoku lave ki he moʻui ʻi he taimi ko iá ʻi he ngaahi lea fakanonga lotó ni: “Ko e agamalu te nau maʻu ae fonua, o nau fakafiemalieʻi akinautolu i hono lahi oe melino.” Ka ko e hā ʻe hoko ia ki he kakai ʻoku nau fakatupu ʻa e koví? ʻOku tomuʻa tala ʻe he Folofolá: “He oku toetoe jii be, bea e ikai ae agakovi.” Ko ia ai, “ko kinautolu oku tatali kia Jihova, te nau maʻu ae fonua.”—Sāme 37:9-11, PM.
5. Ko e hā ʻe hoko ki he fokotuʻutuʻu lolotonga ní?
5 Ke hoko kotoa ʻa e ngaahi meʻá ni, ʻoku fiemaʻu ke toʻo atu ʻa e fokotuʻutuʻu ʻo e ngaahi meʻa lolotonga ní fakataha mo hono ngaahi founga-pule, ngaahi lotu mo e ngaahi founga fakakomēsiale fepakipakí. Pea ko e meʻa tofu pē ia ʻe fai ʻe he founga-pule fakahēvaní. Naʻe fakamānavaʻi ʻa e palōfita ko Tanielá ke ne tomuʻa tala: “Ka ʻi he taimi ʻo e ngaahi tuʻi ko ia [ʻoku lolotonga pulé ni], ko e ʻOtua ʻo Langi te ne fokotuʻu ha puleʻanga [ʻi hēvani] ʻe ʻikai fulihi ʻo taʻengata, pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” (Tan. 2:44) Ko e Puleʻanga ʻo e ʻOtuá—ko ha founga-pule fakahēvani foʻou—ʻe pule mai ki he sōsaieti ʻo e foʻi māmani foʻou. ʻE ʻi ai ʻa e “langi foʻou mo ha māmani foʻou . . . , ʻa ia ʻe maʻu tofiʻa ai ʻa e faitotonú.”—2 Pita 3:13, Tl.
Fiemaʻu Lahi Ange ʻa e Fakahaofí ʻi he Taimí Ni
6. ʻOku anga-fēfē hono fakamatalaʻi ʻe he Tohi Tapú ʻa e tuʻunga kovi ʻo e māmani fulikivanú ni?
6 ʻI he taimi naʻe angatuʻu ai ʻa Sētane, ʻĀtama pea mo ʻIvi ki he ʻOtuá, ʻi heʻenau fiemaʻu ke fai pē ʻe kinautolu hono fakapapauʻi ʻo e leleí mo e koví, naʻe kamata mei ai ha ʻalunga ʻo e fokotuʻutuʻu fakatupu ʻauha ʻo e fāmili fakaetangatá. Ki muʻa ʻi he Lōmaki fakaemāmanilahí, laka hake ʻi he taʻu ʻe 1,600 mei ai, “kuo fakautuutu ʻa e kovi ʻa e tangata ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.” (Sen. 6:5) Hili mei ai ha taʻu ʻe 1,300 nai, naʻe lāuʻilo ai ʻa Solomone ki he kovi ʻo e ngaahi tuʻungá ʻo ne tohi ai: “Naaku leleiia mooni i he mate kuo mate i he moui oku kei moui. Io, bea oku lelei hake ia iate kinaua fakatouoji, aia oku heeki ai fakatubu be mamata ki he gaue kovi oku fai i he lalo laa.” (Koh. 4:2, 3, PM) Ko e toe taʻu ʻe 3,000 mei ai ki hotau ʻahó ni, ʻoku ʻāsili ai pē ʻa e fakautuutu e koví.
7. Ko e hā ʻoku fiemaʻu lahi ange ai ʻa e fakahaofi mei he ʻOtuá ʻi he taimi ní?
7 Neongo ʻoku moʻoni kuo fuoloa ʻa e ʻi ai ʻa e koví, ka ʻi he lolotongá ni ko e taimi eni ia ʻoku fiemaʻu lahi taha ai ʻa e fakahaofi ʻoku fai ʻe he Puleʻanga ʻo e ʻOtuá ʻi ha toe taimi. Ko e ngaahi tuʻunga ʻo e taʻu ʻe 100 kuohilí kuo kovi ange ia ʻi ha toe taimi, pea ʻoku nau hokohoko atu ai pē ki he kovi ʻaupito. Ko e fakatātaá, ʻoku fakamatala ʻe he Akoʻanga Vakaiʻi ʻo e Māmaní: “ʻOku liunga tolu ʻa e tokolahi ʻo e kakai naʻa nau mate ʻi he taú ʻi he senituli [hono uofulú] ʻi he kakai naʻa nau mate ʻi he ngaahi tau ko ia naʻe fai mei he ʻuluaki senituli K.M. ki he taʻu 1899.” Talu mei he taʻu 1914, laka hake ʻi he ngaahi moʻui ʻe 100 miliona kuo mole ʻi he ngaahi taú! ʻOku fakafuofua ʻe he ʻenisaikolopētia ʻe taha ʻoku aʻu ki he kakai ʻe 60 miliona naʻe mate ʻi he Tau Lahi hono uá. Ko e ngaahi puleʻanga lahi ʻi he taimí ni kuo aʻu ʻo nau ʻosi fakamahafu ʻaki ʻa e ngaahi naunau tau fakaniukilia, ʻoku ʻi he tangatá ai ʻa e malava ke ne tafiʻi atu ʻa e ngaahi konga lahi ʻo e kakai ʻoku nau nofoʻi ʻa e māmaní. Pea neongo ʻa e ngaahi ʻilo fakalakalaka ʻi he malaʻe ʻo e saienisí mo e faitoʻó, ʻoku kei mate pē ʻi he fiekaiá ʻa e longaʻi fānau ʻoku ʻi he nima milioná ʻi he taʻu taki taha.—Sio ki he vahe 9 ʻo e tohi Ko e Hā ʻOku Akoʻi Moʻoni ʻe he Tohi Tapú?
8. Ko e hā kuo fakamoʻoniʻi taʻetoeveiveiua ʻi he laui afeʻi taʻu ʻo e pule ʻa e tangatá?
8 ʻOku ʻikai malava ʻe he ngaahi feinga ʻa e tangatá ke ne fakangata ʻa e koví. ʻOku ʻikai lava ke fakahoko ʻe he ngaahi fokotuʻutuʻu fakapolitikalé, fakakomēsialé mo e fakalotú ʻa e fiemaʻu tefito ko ia ʻa e tangatá ki he melinó, tuʻumālié mo e moʻui leleí. ʻI he ʻikai ke nau lava ʻo fakaleleiʻi ʻa e ngaahi palopalema lalahi ʻoku lolotonga fehangahangai mo e faʻahinga ʻo e tangatá, ʻoku toe fakalahi mai ʻe he ngaahi fokotuʻutuʻu ia ko ení ʻa e ngaahi palopalemá ni. Ko e moʻoni, ʻi he laui afeʻi taʻu ʻo e pule ʻa e tangatá kuo fakamoʻoniʻi ai ʻa e moʻoni ʻo e ngaahi leá: “Oku ikai i he tagata be hono hala. Oku ikai i he tagata oku eveeva ke fakahinohino hono aluaga.” (Sel. 10:23, PM) ʻIo, “oku bule ae tagata e toko taha ki he toko taha ka e kovi ai ia.” (Koh. 8:9, PM) ʻIkai ngata aí, “oku toʻetoʻe mo feiga i he lagā fakataha a mamani kotoabe.”—Loma 8:22, PM.
9. Ko e hā ʻa e ngaahi tuʻunga ʻoku ʻamanekina ʻe he kau Kalisitiane moʻoní ʻe hoko ʻi he “ngaahi ʻaho fakaʻosi”?
9 Fekauʻaki mo hotau taimí, naʻe muʻaki tala ʻi he Tohi Tapú: “Ka hokosia ʻa e kuonga fakamui, ʻe ai ha ngaahi taimi faingataʻa.” Hili hono fakamatalaʻi ko ia ʻa e ngaahi tuʻunga ʻo e ngaahi ʻaho fakaʻosí ʻi he malumalu ʻo e pule ʻa e tangatá, ʻoku pehē ʻe he kikité: “Ko e kakai kovi mo fakahekeheke te nau fakaaʻau atu mei he kovi ki he kovi.” (Lau ʻa e 2 Timote 3:1-5, 13.) Ko e meʻa ia ʻoku ʻamanekina ʻe he Kalisitiané, he “ko hono kotoa ʻo mamani ʻoku ʻi he nima ʻo e Fili,” ʻa Sētane. (1 Sione 5:19) Ka neongo ia, ko e ongoongo leleí ʻoku vavé ni ke fakahaofi ʻe he ʻOtuá ʻa e faʻahinga ko ia ʻoku ʻofa kiate iá. ʻE fakahaofi kinautolu mei he māmani ko ení, ʻa ia ʻoku fakaʻaʻau vave ʻene koví ki he toe kovi angé.
Ko e Matavai Falalaʻanga Pē Taha ʻo e Fakahaofi
10. Ko e hā ko Sihova tokotaha ai pē ʻa e Matavai falalaʻanga ʻo e fakahaofí?
10 ʻI hoʻo fanongonongo ko ia ʻa e ongoongo leleí, fakamatalaʻi ki hoʻo kau fanongó ko Sihova tokotaha pē ʻa e Matavai falalaʻanga ʻo e fakahaofí. Ko ia tokotaha pē ʻoku ʻi ai ʻa e mālohi mo e holi ke fakahaofi ʻene kau sevānití mei he ngaahi tuʻunga koví. (Ng. 4:24, 31; Fkh. 4:11) ʻE lava ke tau fakapapauʻi ʻe fakahaofi maʻu ai pē ʻe Sihova ʻene kakaí mo fakahoko ʻene ngaahi taumuʻá, he kuó ne fuakava: “Hange ko ʻeku fakakaukau ʻe pehe ʻene hoko.” Ko ʻene leá “ʻe ʻikai foki ngeʻesi mai.”—Lau ʻa e Aisea 14:24, 25; 55:10, 11.
11, 12. Ko e hā ʻoku fakapapauʻi ʻe he ʻOtuá te ne fakahoko ki heʻene kau sevānití?
11 Kuo fakapapauʻi mai ʻe Sihova te ne fakahaofi ʻene kau sevānití ʻi he taimi ko ia te ne fakahoko ai ʻene fakamaau ki he fulikivanú. ʻI he taimi naʻá ne fekauʻi ai ʻa e palōfita ko Selemaiá ke lea loto-toʻa ki he kau angahala mamafá, naʻe pehē ʻe Sihova: “ʻOua te ke manavahe.” Ko e hā hono ʻuhingá? “He ʻoku ou ʻiate koe ke fai ho fakahaofi.” (Sel. 1:8) ʻI he tuʻunga meimei tatau, ʻi he taimi naʻe teu ke fakaʻauha ai ʻe Sihova ʻa e koví mei Sōtoma pea mo Komolá, naʻá ne fekau atu ha ongo ʻāngelo ʻe toko ua ke na taki ʻa Lote mo hono fāmili ke hao mai ki tuʻa mei he koló. “Pea naʻe toki fakaʻuha ʻe Sihova ki Sotoma mo Komola ʻa e makavela mo e afi mei heʻene ʻAfio.”—Sen. 19:15, 24, 25.
12 ʻOku aʻu ki ha tuʻunga fakaemāmanilahi, ʻe fakahaofi ai ʻe Sihova ʻa e faʻahinga ko ia ʻoku nau fai hono finangaló. ʻI he taimi naʻá ne fakaʻauha ai ʻa e māmani fulikivanu motuʻá ʻaki ʻa e Lōmakí, naʻá ne “tauhi pe ha toko fitu, pea valu ʻaki ʻa Noa, ʻa ia naʻa ne malangaʻaki ʻa e maʻoniʻoni.” (2 Pita 2:5) ʻE toe fakahaofi ʻe Sihova ʻa e anga-tonú ʻi he taimi te ne fakaʻauha ai ʻa e māmani fulikivanu lolotonga ní. Ko ia ʻoku fakamatala mai ai ʻi heʻene Folofolá: “Mou kumi kia Jihova, akimoutolu kotoabe ae agamalu oe fonua . . . Kumi ki he maonioni, kumi ki he agamalu: heiilo e fufu akimoutolu i he aho oe houhau o Jihova.” (Sef. 2:3, PM) Ko e ola ʻo e fakaʻauha fakaemāmanilahi ko iá, ‘ko e kau angatonú te nau nofoʻia ʻa e fonuá, ka ko e kakai koví ʻe tuʻusi mei ai.’—Pal. 2:21, 22.
13. ʻE anga-fēfē hono fakahaofi ʻo e kau sevāniti ʻa Sihova kuo nau ʻosi maté?
13 Ka neongo iá, ko e tokolahi ʻo e kau sevāniti ʻa Sihová kuo nau ʻosi mate mei he mahamahakí, fakatangá mo e ngaahi tupuʻanga kehe. (Mt. 24:9) Ka, ʻe anga-fēfē hano fakahaofi ʻa e faʻahinga kotoa ko ení? Hangē ko ia naʻa tau ʻosi lave ki aí, “ʻe faifai pea hoko ha toetuʻu ʻa e angatonu mo e angahala fakatouʻosi.” (Ng. 24:15) He fiemālie ē ʻi hono ʻiloʻi ko hono fakahaofi ʻe Sihova ʻene kau sevānití heʻikai ala taʻofi!
Ko ha Founga-Pule Māʻoniʻoni
14. Ko e hā e ʻuhinga ʻoku tau falala-pau ai ko e Puleʻanga ʻo e ʻOtuá ko ha founga-pule māʻoniʻoni?
14 ʻI hoʻo ngāue fakafaifekaú, ʻe lava ke ke fakamatalaʻi ko e Puleʻanga fakahēvani ʻo Sihová ko ha founga-pule māʻoniʻoni. ʻOku hoko ʻo peheé koeʻuhí ʻoku tapua atu ai ʻa e ngaahi ʻulungāanga fakaofo ʻo e ʻOtuá, hangē ko e fakamaau totonú, māʻoniʻoní pea mo e ʻofá. (Teu. 32:4; 1 Sione 4:8) Kuo foaki ʻe Sihova ʻa e Puleʻangá kia Sīsū Kalaisi, ʻa e tokotaha ʻoku taau lahi taha ke ne puleʻi ʻa e māmaní. Kuo toe fakataumuʻa ʻe Sihova ke ʻohake ʻa e kau Kalisitiane kuo pani ʻe toko 144,000 mei he māmaní ki he moʻui fakahēvaní ke nau hoko ko e kaungāʻea ʻo Kalaisi ʻi he ngāue fakataha mo ia ki hono puleʻi mai ʻo e māmaní.—Fkh. 14:1-5.
15. Fakafaikehekeheʻi angé ʻa e pule ʻa e Puleʻanga ʻo e ʻOtuá pea mo e pule fakaetangatá.
15 Ko ha faikehekehe lahi moʻoni ē ʻi he vahaʻa ʻo e pule ʻa Sīsū mo e toko 144,000 pea mo e faʻahinga taʻehaohaoa ko ia ʻo e tangatá! ʻOku faʻa angakovi ʻa e kau pule ʻo e fokotuʻutuʻu lolotonga ní ʻo taki atu ai honau kakaí ki he tau, ʻo fakapoongi ai e laui miliona. Tā neʻineʻi ke akonakiʻi kitautolu ʻe he Folofolá ke ʻoua ʻe tuku ʻetau falalá ki ha tangata, “aia oku ikai ha fakamoui iate ia”! (Sāme 146:3, PM) Ka ko Sīsū ʻe pule ia ʻo fehoanaki pea mo ʻene anga-ʻofá! “Haʻu kiate au, ʻa kimoutolu kotoa pe ʻoku fakaongosia mo māfasia,” ko e lea ia ʻa Sīsū, “pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au, he ʻoku ou faʻa kataki mo angafākatuʻa, pea te mou ʻilo ha mālōlō ʻi hoʻomou laumalie. He ko e ioke aʻaku ʻoku molū, pea ko e kavenga aʻaku ʻoku maʻamaʻa.”—Mt. 11:28-30.
Ofi ke Ngata ʻa e Ngaahi ʻAho Fakaʻosí!
16. ʻE fakangata fēfē ʻa e ngaahi ʻaho fakaʻosí?
16 Ko e māmani ko ení ʻoku ʻi he ngaahi ʻaho fakaʻosí, pe “fakaʻosi ʻo e kuonga,” talu mei he taʻu 1914. (Mt. 24:3) ʻOku vavé ni ʻaupito ke hoko ʻa e meʻa naʻe ui ʻe Sīsū ko e “mamahi lahi.” (Lau ʻa e Mātiu 24:21.) ʻE fakangata ʻe he mamahi ʻikai alafakatataua ko iá ʻa e kotoa ʻo e māmani ʻo Sētané. Ka ʻoku anga-fēfē ʻa e kamata ʻa e mamahi lahí? Pea ʻe ngata fēfē?
17. Ko e hā ʻoku fakahaaʻi mai ʻe he Tohi Tapú fekauʻaki mo e kamata ʻa e mamahi lahí?
17 ʻE kamata fakafokifā ʻa e mamahi lahí. ʻIo, “ko e ʻaho ʻo Sihova” ʻe hoko mai taʻeʻamanekina ia “ʻoka nau ka behe; Fiemalie mo lelei be.” (Lau ʻa e 1 Tesalonaika 5:2, 3, “PM.”) Ko e mamahi lahi naʻe muʻaki talá ʻe kamata ia ʻi he taimi ʻoku fakakaukau ai ʻa e ngaahi puleʻangá ʻoku nau ofi ki hono fakaleleiʻi ʻa e niʻihi ʻo ʻenau ngaahi palopalema lalahí. ʻE fakaʻohovale ki he māmaní hono fakaʻauha fakafokifā ko ia ʻo “Babilone koe Lahi,” ʻa e ʻemipaea ʻo e lotu loí. ʻE ofoofo ʻa e ngaahi Tuʻí pea pehē ki he niʻihi ʻi he taimi ʻe fakahoko ai ʻa e fakamāú ki Pāpilone ko e Lahí.—Fkh. 17:1-6, 18, PM; Fkh 18:9, 10, 15, 16, 19.
18. ʻOku anga-fēfē ʻa e fakafeangai ʻa Sihova ki he ʻohofi ʻoku fai ʻe Sētane ki Heʻene kakaí?
18 ʻI ha foʻi taimi tauhaʻa, ʻe ʻi ai ha “ngaahi fakaʻilonga ʻi he laʻa, mo e māhina, moe ngaahi fetuʻu,” pea “ʻe toki ha ʻi he langi ʻa e fakaʻilonga ʻo e Fanautama ʻa Tangata.” ʻE lava ke tau ‘hanga hake he ʻoku ofi ai hotau huhuʻí.’ (Luke 21:25-28; Mt. 24:29, 30) Ko Sētane, pe Koki, te ne fakahanga ʻene ngaahi kongakaú ki he kakai ʻa e ʻOtuá. Kae fekauʻaki mo kinautolu ʻoku nau ʻohofi ʻa ʻene kau sevāniti anga-tonú, ʻoku pehē ai ʻe Sihova: “He ko ia oku ala kiate kimoutolu oku ne ala ki he kanoʻi mata uli o hoku mata.” (Sak. 2:8, PM) Ko ia ai, heʻikai lavameʻa ʻa e feinga ko ia ʻa Sētane ke fakaʻauha kinautolú. Ko e hā hono ʻuhingá? Koeʻuhí ko ʻĀtonai Sihova te ne fakafeangai vave leva ki ai kae malava ʻo fakahaofi ʻa ʻene kau sevānití.—Isi. 38:9, 18.
19. Ko e hā ʻoku lava ke tau falala-pau ai ʻe fakaʻauha ʻe he kongakau fakahoko tautea ʻa e ʻOtuá ʻa e fokotuʻutuʻu ʻa Sētané?
19 ʻI he taimi ʻoku ngāue mai ai ʻa e ʻOtuá ki he ngaahi puleʻangá, ‘te nau ʻilo ko Sihova ia.’ (Isi. 36:23) Te ne tuku atu ʻene kongakau fakahoko tauteá—ʻa e laui mano ʻo e ngaahi meʻamoʻui laumālie ʻoku tataki ʻe Kalaisi Sīsū—ke fakaʻauha ʻa e toenga ʻo e ngaahi fokotuʻutuʻu ʻa Sētane ʻi he māmaní. (Fkh. 19:11-19) ʻI heʻetau manatu ko ia ki he taimi ʻe taha naʻe hanga ai ʻe he ʻāngelo ʻe taha ʻi ha pō pē ʻe taha ʻo “taaʻi ha toko taha kilu ma valu mano” ʻo e ngaahi fili ʻo e ʻOtuá, ʻe lava ai ke tau falala-pau ko e meʻa noa pē ki he kau tau fakahēvaní hono fakaʻauha ʻa e toetoenga kotoa ʻo e fokotuʻutuʻu ʻa Sētane ʻi he māmaní ʻi he aʻu ʻa e mamahi lahí ki hono tumutumú ʻi ʻĀmaketoné. (2 Tuʻi 19:35; Fkh. 16:14, 16) ʻE lī ʻa Sētane mo ʻene kau tēmeniō ki he luo taʻehanotakelé ʻo feʻunga mo e taʻu ʻe taha afe. ʻE faai atu pē, ʻe toki fakaʻauha kinautolu.—Fkh. 20:1-3.
20. Ko e hā ʻe fakahoko ʻe Sihova fakafou ʻi he Puleʻangá?
20 ʻE toki maʻa leva ai ʻa hēvani mo māmani mei he koví, pea ko e faʻahinga anga-tonu ʻo e tangatá te nau moʻui taʻengata ʻi he foʻi kolopé ni. ʻE fakamoʻoniʻi ai ko Sihová ko e Faifakahaofi Lahí ia. (Sāme 145:20) Fakafou ʻi he Puleʻangá, te ne fakatonuhiaʻi ai hono tuʻunga-hau fakalevelevá, fakamāʻoniʻoniʻi hono huafa toputapú, pea mo fakahoko ʻene taumuʻa maʻongoʻonga ko ia ki he māmaní. ʻOfa ke ke maʻu ʻa e fiefia lahi ʻi hoʻo ngāue fakafaifekaú ʻi hoʻo talaki ko ia ʻa e ongoongo leleí ni pea tokoniʻi ʻa kinautolu “nae loto ki he moui taegata” ke nau ʻiloʻi ko e fakahaofi ʻe fai ʻe he Puleʻanga ʻo e ʻOtuá ʻoku ofí ni!—Ng. 13:48, PM.
[ʻOkú Ke Manatuʻi?]
• Naʻe anga-fēfē hono fakamamafaʻi ʻe Sīsū ʻa e mahuʻinga ʻo e Puleʻangá?
• Ko e hā ʻoku fiemaʻu lahi ange ai ʻa e fakahaofí ʻi he taimí ni ʻi ha toe taimi ki muʻa?
• Ko e hā ʻa e ngaahi meʻa ʻoku tau ʻamanekina ʻe hoko lolotonga ʻa e mamahi lahí?
• ʻOku anga-fēfē hono fakamoʻoniʻi ko Sihova ʻa e Faifakahaofi Lahí?
[Fakatātā ʻi he peesi 12, 13]
Naʻe tomuʻa tala ʻe he Folofola ʻa e ʻOtuá ha ngāue fakamalanga ʻikai alafakatataua ʻi māmani lahi ʻi hotau taimí
[Fakatātā ʻi he peesi 15]
Hangē ko ia ko hono fakahaofi ʻe Sihova ʻa Noa mo hono fāmilí, te Ne lava ʻo fakahaofi mo kitautolu
[Fakatātā ʻi he peesi 16]
ʻE hanga ʻe Sihova ʻo “holoholo ʻa e loʻimata kotoa pē . . . , pea ʻe ʻikai toe ai ha mate.” —Fkh. 21:4