ʻUnuʻunu Ofi ki he ʻOtuá
Tokotaha ʻOfa ki he Fakamaau Totonú
KUO maʻukovia koe ʻi ha taimi ʻi he tōʻongafai taʻetotonu pe anga-fakamamahi mei ha tokotaha nai ʻoku hā ngali hao mei he tauteá pea naʻá ne fakahāhā ha taʻefakatomala? ʻOku ʻi ai ʻa e meʻa siʻi ʻoku lava ke faingataʻa ange ʻa e fekuki mo iá ʻi he fakamaau taʻetotonu peheé, tautefito kapau ko e fakamamahí naʻe fakahoko ia ʻe ha taha ʻa ia naʻá ke ʻamanekina te ne ʻofa mo tokanga kiate koe. Te ke fifili nai, ‘Ko e hā ʻoku fakaʻatā ai ʻe he ʻOtuá ʻa e ngaahi meʻa peheé ke hokó?’a Ko hono moʻoní ʻoku fehiʻa ʻa e ʻOtua ko Sihová ʻi he fakamaau taʻetotonu kotoa pē. Ko ʻene Folofolá, ʻa e Tohi Tapú, ʻoku fakapapauʻi mai ai heʻikai hao ʻa e kau faiangahala loto-fefeká mei he tautea ʻa e ʻOtuá. Tau fakakaukau angé ki he ngaahi lea ʻa e ʻapositolo ko Paulá ʻoku hiki ʻi he Hepelu 10:26-31.
ʻOku tohi ʻe Paula: “Kapau ʻoku tau angahala fie angahala hili ʻetau ʻilo kanokano ki he moʻoni, ʻoku ʻikai kei toe ha feilaulau koeʻuhi ko e angahala.” (Veesi 26) Ko e kau faiangahala fie angahalá ʻoku nau tuha moʻoni mo e fakamāú. Ko e hā hono ʻuhingá? ʻUluakí, ʻoku ʻikai te nau fai ha angahala makehe ʻi ha mōmeniti ʻo e vaivai—ko e faʻahinga fehālaaki ʻoku tau fai kotoa ʻi he ngaahi taimi koeʻuhi ko ʻetau taʻehaohaoá. ʻOku nau tōʻongaʻaki ʻa e angahalá. Uá, ko ʻenau angahalá ʻoku ʻosi fakataumuʻa. Hangē ko ia ko hono fakalea ʻe he Bible in Basic English, ʻoku nau “fai ʻosi fakataumuʻa ʻa e koví.” ʻOku fonu honau lotó ʻi he kovi kuo tō loloto. Tolú, ko ʻenau angahalá ʻoku ʻikai ko e tupu ia mei he taʻeʻilo. ʻOku nau maʻu ha “ʻilo kanokano ki he moʻoni” fekauʻaki mo e finangalo pea mo e ngaahi founga ʻa e ʻOtuá.
ʻOku anga-fēfē ʻa e vakai ʻa e ʻOtuá ki he kau faiangahala taʻefakatomala mo loto-koví? “ʻOku ʻikai kei toe ha feilaulau koeʻuhi ko e angahala,” ko e lau ia ʻa Paulá. Ko e feilaulau ʻa Kalaisí—ʻa e meʻaʻofa ʻa e ʻOtuá ki he faʻahinga ʻo e tangatá—ʻokú ne ʻufiʻufi ʻa e angahala ʻoku tau fai koeʻuhi ko ʻetau taʻehaohaoá. (1 Sione 2:1, 2) Ka ko e faʻahinga ʻoku faiangahala taʻefakatomalá ʻoku nau fakahaaʻi ʻoku ʻikai haʻanau tokanga ki he meʻaʻofa mahuʻinga ko ení. ʻI he vakai mai ʻa e ʻOtuá, kuo nau “mala ʻi he ʻAlo ʻo e ʻOtua, pea . . . kuo [nau] lau . . . ko e meʻa noa pe, ʻa e taʻataʻa” ʻo Sīsuú. (Veesi 29) ʻI honau ʻalungá, ʻoku nau fakahaaʻi ʻa e paetaku kia Sīsū pea tōʻongafai ki hono taʻataʻá “ko ha meʻa maʻamaʻa,” ʻoku ʻikai kei ʻi ai hano mahuʻinga ʻo hangē ko ha tangata taʻehaohaoá. (Today’s English Version) Ko e kau taʻehoungaʻia peheé ʻoku ʻikai te nau ʻi ha tuʻunga ke maʻu ʻaonga ai mei he feilaulau ʻa Kalaisí.
Ko e hā ʻe lava ke ʻamanekina ʻe he fulikivanú? Kuo talaʻofa ʻa e ʻOtua ʻo e fakamaau totonú: “ʻOku aʻaku ʻa e sauni, Ko au te u ʻatu hono tuha.” (Veesi 30) Ke tokanga ʻa e faʻahinga kotoa ʻoku nau hehema ki hono fai ʻo e angahalá ʻo faingataʻaʻia ai ʻa e niʻihi kehé. ʻOku ʻikai lava ke talangataʻa ha taha ki he ngaahi lao māʻoniʻoni ʻa e ʻOtuá ʻo taʻetautea. ʻOku faʻa uesia kinautolu ʻe heʻenau ngaahi founga fulikivanú. (Kaletia 6:7) ʻI he ikuʻangá, te nau tuʻu ʻi he ʻao ʻo e ʻOtuá ʻi he kahaʻu ofi maí ʻi he taimi te ne haʻu ai ke toʻo ʻosi mei he māmani ko ení ʻa e fakamaau taʻetotonu kotoa pē. (Palovepi 2:21, 22) ʻOku fakatokanga mai ʻa Paula: “ʻE, ko e meʻa fakailifia ke te to ki he nima ʻo e ʻOtua ʻoku Moʻui.”—Veesi 31.
Ko e ʻiloʻi ʻoku ʻikai fakamolemoleʻi ʻe he ʻOtua ko Sihová ʻa e angahala fie angahalá ʻoku fakatou fakafiemālie mo fakanonga, tautefito ki he faʻahinga kuo fakamamahiʻi ʻe ha tokotaha faihala loto-fefeka. ʻOku lava ke tau loto-falala fakaʻaufuli ʻo tuku ʻa e sāuní ki he nima ʻo e ʻOtuá, ʻa ia ʻoku fehiʻa ʻi he fakamaau taʻetotonu kotoa pē.
[Fakamatala ʻi lalo]
a Ki ha fetalanoaʻaki ki he ʻuhinga kuo fakaʻatā ai ʻe he ʻOtuá ʻa e faingataʻá, sio ki he peesi 106-114 ʻo e tohi Ko e Hā ʻOku Akoʻi Moʻoni ʻe he Tohi Tapú? ʻoku pulusi ʻe he Kau Fakamoʻoni ʻa Sihová.