Ko Hai ʻa e ʻOtuá?

ʻE FĒFĒ haʻo tali ʻa e fehuʻi ko iá? ʻOku ongoʻi ʻe he niʻihi ʻoku nau ʻiloʻi lelei ʻa e ʻOtuá—ʻa ia ko iá ko ha kaumeʻa ofi. ʻOku vakai ʻa e niʻihi ki he ʻOtuá ko ha kāinga mamaʻo. ʻOku nau tui ʻokú ne ʻi ai ka ʻoku siʻi ʻenau ʻilo fekauʻaki mo iá. Kapau ʻokú ke tui ki he ʻOtuá, ʻe fēfē haʻo tali ʻa e ngaahi fehuʻi ʻoku fakahokohoko ʻi laló?

1. Ko e ʻOtuá ko ha tokotaha moʻoni?

2. ʻOku ʻi ai ha huafa ʻo e ʻOtuá?

3. Ko Sīsū ʻa e ʻOtua Māfimafi-Aoniú?

4. ʻOku tokanga mai ʻa e ʻOtuá kiate au?

5. ʻOku tali ʻe he ʻOtuá ʻa e founga lotu kotoa pē?

Kapau te ke kole ha niʻihi ke nau tali ʻa e ngaahi fehuʻí ni, ngalingali te ke maʻu ha ngaahi tali fakaʻohovale kehekehe. ʻOku ʻikai leva ha ofo ʻi he tupulaki ʻa e ngaahi talatupuʻa mo e fakakaukau hala ʻo fekauʻaki mo e ʻOtuá.

ʻUhinga ʻOku Mahuʻinga Ai ʻa e Talí

Lolotonga ʻene talanoa mo ha fefine lotu naʻá ne fetaulaki mo ia ʻi ha vaikeli, naʻe fakamamafaʻi ai ʻe Sīsū Kalaisi ʻa e fiemaʻu ke ʻilo ʻa e moʻoni fekauʻaki mo e ʻOtuá. Ko e fefiné ni, ko ha Samēlia, naʻá ne fakahaaʻi ko Sīsuú ko ha palōfita. Ka naʻe ʻi ai e meʻa naʻá ne fakahohaʻasi ia. Naʻe kehe ʻa e lotu ia ʻa Sīsuú mei haʻaná. ʻI heʻene fakahaaʻi ʻa e hohaʻa ko ení, naʻe tala mahino ai ʻe Sīsū kiate ia: “ʻOku mou lotu ki he meʻa ʻoku ʻikai te mou ʻilo ki ai.” (Sione 4:19-22) ʻOku hā mahino, naʻe ongoʻi ʻe Sīsū ʻoku ʻikai ʻiloʻi moʻoni ʻe he kakai lotu kotoa pē ʻa e ʻOtuá.

ʻOku ʻuhinga ʻa e fakamatala ʻa Sīsuú heʻikai lava ke ʻiloʻi moʻoni ʻe ha taha ia ʻa e ʻOtuá? ʻIkai. Naʻe hoko atu ʻa Sīsū ʻo ne pehē ki he fefiné ni: “Ko e kakai ʻoku lotu moʻoni te nau fai ʻi laumālie mo fai ʻi moʻoni ʻe nau lotu ki he Tamai: he ko e Tamai foki ʻoku ne kumi ʻa e faʻahinga ko ia, ʻakinautolu ʻoku matuaki lotu kiate ia.” (Sione 4:23) ʻOkú ke kau ʻi he faʻahinga ko ia ʻoku lotu ki he ʻOtuá ʻo “fai ʻi laumālie mo fai ʻi moʻoni”?

ʻOku mahuʻinga ʻaupito ke ke fakapapauʻi ʻa e tali ki he fehuʻi ko iá. Ko e hā hono ʻuhingá? Naʻe fakamamafaʻi ʻe Sīsū ʻa e fiemaʻu ʻo e ʻilo totonú ʻi heʻene lotu: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) ʻIo, ko hoʻo ʻamanaki tonu ki he moʻui ʻi he kahaʻú ʻoku felāveʻi vāofi ia mo hoʻo ʻiloʻi ʻa e moʻoni fekauʻaki mo e ʻOtuá!

ʻOku malava moʻoni ke ke ʻiloʻi ʻa e moʻoni fekauʻaki mo e ʻOtuá? ʻIo, ʻoku pehē! ʻE lava fēfē ke ke ʻiloʻi iá? Naʻe pehē ʻe Sīsū ʻo fekauʻaki mo ia tonu: “Ko au pe ko e Hala, pea mo e Moʻoni mo e Moʻui: ʻoku ʻikai haʻu ha taha ki he Tamai ka ʻi heʻene fou ʻiate au.” (Sione 14:6) Naʻá ne toe pehē: ‘ʻOku ʻikai ha toko taha ʻokú ne ʻilo pē ko hai ʻa e Tamaí, ngata pē ʻi he Fohá, pea mo ha taha ʻe loto ʻe he Fohá ke fakaʻilo ia ki ai.’—Luke 10:22.

Ko ia ko e kī ki hono ʻiloʻi ʻo e ʻOtuá ʻoku maʻu ia ʻi he ngaahi akonaki ʻa Sīsū Kalaisí, ʻa e ʻAlo ʻo e ʻOtuá. Ko hono moʻoní, ʻoku palōmesi mai ʻa Sīsū: “Kapau te mou nofo maʻu ʻi heʻeku akonaki, ko ʻeku kau ako moʻoni kimoutolu; pea ʻe faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.”—Sione 8:31, 32.

ʻE fēfē leva hono tali ʻe Sīsū ʻa e fehuʻi ʻe nima naʻe langaʻi hake ki muʻá?

[Fakatātā ʻi he peesi 4]

ʻOkú ke lotu ki ha ʻOtua ʻoku ʻikai moʻoni ke ke ʻiloʻi?