Ko e ʻOtuá ko ha Tokotaha Moʻoni?
Tali anga-mahení:
◼ “ʻOkú ne ʻi he potu kotoa pē, ʻi he meʻa kotoa pē. ʻOkú ne hangē ko e matangí.”
◼ “Ko iá ko ha poto taʻealafakamatalaʻi, ko ha foʻi mālohi pē.”
Ko e hā naʻe leaʻaki ʻe Sīsuú?
◼ “ʻI he ʻapi o ʻeku Tamai ʻoku lahi ʻa e ngaahi nofoʻanga.” (Sione 14:2) Naʻe lea ʻa Sīsū ʻo fekauʻaki mo ʻene maʻu ha fale fakaefakatātā, pe nofoʻanga.
◼ “Naʻa ku ʻalu atu mei he Tamai, pea kuo u haʻu ki māmani: ko eni ʻoku ou tuku ʻa māmani ʻo u ʻalu ki he Tamai.” (Sione 16:28) Naʻe tui ʻa Sīsū ko e ʻOtuá ko ha Tokotaha moʻoni ʻoku nofo ʻi ha feituʻu pau.
NAʻE ʻikai ʻaupito lave ʻa Sīsū ia ki he ʻOtuá ko ha foʻi mālohi pē. ʻI hono kehé, naʻá ne talanoa ki he ʻOtuá pea lotu kiate ia. Naʻá ne faʻa ui ʻa Sihova ko ʻene Tamai fakahēvani, ko ha kupuʻi lea ʻoku fakahaaʻi ai ʻa ʻene fekoekoeʻi vāofi mo e ʻOtuá.—Sione 8:19, 38, 54.
Ko e moʻoni “ko e meʻa ki he ʻOtua, kuo teʻeki ke mamata ki ai ʻe ha taha ʻi ha taimi” pea “ko e ʻOtua ko e laumālie.” (Sione 1:18; 4:24) Ka ʻoku ʻikai ʻuhinga eni iá ʻoku ʻikai hano faʻahinga sino ʻona pe fōtunga. ʻOku tala mai ʻe he Tohi Tapú: “Kapau ʻoku ai ha sino fakakakano, ta ʻoku ʻi ai mo ha sino fakalaumalie.” (1 Kolinito 15:44) Ko ia ai, ʻoku maʻu ʻe Sihova ha sino fakalaumālie?
ʻIo. ʻI he taimi naʻe toetuʻu ai ʻa Sīsuú, naʻá ne “hu . . . ki he langi tonu, ke fakaha ni ia ki he fofonga ʻo e ʻOtua maʻatautolu.” (Hepelu 9:24) ʻOku akoʻi mai ʻe he meʻá ni kia kitautolu ʻa e moʻoniʻi meʻa mahuʻinga ʻe ua fekauʻaki mo e ʻOtuá. ʻUluakí, ʻoku ʻi ai hono nofoʻanga. Uá, ko ha Tokotaha ia, ʻo ʻikai ko ha mālohi taʻealafakamatalaʻi ʻoku ʻi he potu kotoa pē.
ʻOku lava fēfē leva ke puleʻi ʻe he ʻOtuá ʻa e meʻa ʻi he feituʻu kotoa pē? ʻOku lava ke tuku mai ʻe he ʻOtuá ʻa hono laumālie māʻoniʻoní, pe ivi ngāué, ki ha feituʻu pē ʻi he ʻunivēsí. ʻI he hangē ko ha tamai ʻoku fakaaʻu mai hono nimá ke fakafiemālieʻi mo poupouʻi ʻa ʻene fānaú, ʻoku fakaaʻu mai ʻe he ʻOtuá ʻa hono laumālie māʻoniʻoní ke fakahoko ʻa ʻene taumuʻá.—Sāme 104:30; 139:7.
Koeʻuhi ko e ʻOtuá ko ha Tokotaha, ʻokú ne toe maʻu ha ʻulungāanga fakataha mo e saiʻia mo e fehiʻa—naʻa mo e ongoʻi. ʻOku tala mai ʻe he Tohi Tapú ʻokú ne ʻofa ʻi hono kakaí, fiefia ʻi heʻene ngaahi ngāué, fehiʻa ʻi he tauhi ʻaitolí, pea ongoʻi mamahi ʻi he fulikivanú. (Senesi 6:6; Teutalonome 16:22; 1 Tuʻi 10:9; Sāme 104:31) ʻI he 1 Timote 1:11 (NW), ʻoku ui ia ai ko e “ʻOtua fiefia.” ʻOku ʻikai ha ofo ʻi he pehē ʻe Sīsū ʻe lava ke tau ako ke ʻofa ki he ʻOtua ko ení ʻaki hotau lotó kotoa!—Maake 12:30.a
[Fakamatala ʻi lalo]
a Ki ha fakamatala lahi ange ki he kaveinga ko ení, sio ki he vahe 1 ʻo e tohi Ko e Hā ʻOku Akoʻi Moʻoni ʻe he Tohi Tapú? ʻoku pulusi ʻe he Kau Fakamoʻoni ʻa Sihová.
[Fakatātā ʻi he peesi 5]
ʻI he hangē ko ha tamai ʻoku fakaaʻu mai hono nimá, ʻoku fakaaʻu mai ʻe he ʻOtuá ʻa hono laumālie māʻoniʻoní ke fakahoko ʻa ʻene taumuʻá