Akoʻi Hoʻo Fānaú

Naʻe Liʻaki ʻe Sōasi ʻa Sihova Koeʻuhi ko e Feohi Koví

KO HA taimi fakalilifu moʻoni eni ʻi Selusalema, ʻa e kolo naʻe tuʻu ai ʻa e temipale ʻo e ʻOtuá. Ko Tuʻi ʻAhasaiá naʻe toki ʻosi pē ʻa hono fakapoongi. ʻOku faingataʻa naʻa mo e fakakaukau atu ki he meʻa naʻe fai ʻe ʻAtalaia, ko e faʻē ʻa ʻAhasaiá ʻi he taimi ko ení. Naʻá ne ʻai ʻa e ngaahi foha ʻo ʻAhasaiá​—ʻa hono fanga makapuná tonu​—ke fakapoongi! ʻOkú ke ʻilo ʻa hono ʻuhingá?​—a Koeʻuhi kae malava ke hoko ia ko e pule kae ʻikai ko ha taha ʻo kinautolu.

Kae kehe, ko e taha ʻi he fanga makapuna tangata ʻo ʻAtalaiá, ʻa e kiʻi pēpē ko Sōasí, naʻe fakahaofi ia, pea naʻe ʻikai teitei ʻilo ki ai ʻa ʻene kui-fefiné. ʻOkú ke loto ke ke ʻilo pe naʻe anga-fēfē?— Sai, naʻe ʻi ai ʻa e mehikitanga ʻo e kiʻi pēpeé ni ko hono hingoá ko Siosepa, ʻa ia naʻá ne fūfuuʻi ʻa Sōasi ʻi he temipale ʻo e ʻOtuá. Naʻe malava ke ne fai eni koeʻuhi ko hono husepānití ʻa e Taulaʻeiki Lahi ko Sihoiatá. Ko ia, naʻá na fakapapauʻi naʻe malu pē ʻa Sōasi.

Naʻe tauhi fakafufū ʻa Sōasi ʻi he temipalé ʻo feʻunga mo e taʻu ʻe ono. Naʻe akoʻi ai kiate ia ʻa e meʻa kotoa pē ʻo fekauʻaki mo Sihova ko e ʻOtuá pea mo ʻene ngaahi laó. Faifai atu pē, ʻi he taimi naʻe aʻu ai ʻa Sōasi ki hono taʻu fitú, naʻe fai ʻe Sihoiata ʻa e ngāue ke ʻai ʻa Sōasi ke hoko ko e tuʻi. ʻOkú ke fie fanongo pe naʻe anga-fēfē hono fai eni ʻe Sihoiatá pea mo e meʻa naʻe hoko ki he kui-fefine ʻa Sōasí, ʻa Kuini ʻAtalaia fulikivanu?—

Sai, naʻe ui fakafufū ʻe Sihoiata ke fakatahataha mai ʻa e kau kaʻate makehe ʻa ia naʻe maʻu ʻe he ngaahi tuʻi ʻi Selusalemá ʻi he taimi ko iá. Naʻá ne tala ange kiate kinautolu ʻa e founga ʻo ʻene fufū mo hono uaifí ʻa e kiʻi pēpē ko e foha ʻo Tuʻi ʻAhasaiá. Naʻe fakahā ange leva ʻe Sihoiata ʻa Sōasi ki he kau kaʻate ko iá, ʻa ia naʻa nau ʻiloʻi ko e pule totonú ia. Pea naʻe fai leva ha palani.

Naʻe ʻomai ʻe Sihoiata ʻa Sōasi ki tuʻa ʻo fakakalauni ia. ʻI he meʻa ko iá, ko e kakaí naʻe kamata ke nau “pasipasi nima, ʻo nau kalanga, Ke lakoifie ʻa e ʻafiona!” Naʻe tuʻu takai pē ʻa e kau kaʻaté ʻia Sōasi ke maluʻi ia. Ka ʻi he taimi naʻe fanongo ai ʻa ʻAtalaia ki he fuʻu fiefia kotoa ko ení, naʻá ne lele mai ki tuʻa ʻo ne fakahaaʻi ʻene taʻeloto ki aí. Ka ʻi he tuʻutuʻuni ʻa Sihoiatá, naʻe fakapoongi ai ʻe he kau kaʻaté ʻa ʻAtalaia.​—2 Tuʻi 11:1-16.

ʻOkú ke fakakaukau naʻe hokohoko atu ʻa e fanongo ʻa Sōasi kia Sihoiatá pea mo fai ʻa e meʻa naʻe totonú?​— Naʻá ne fai pehē ʻi he lolotonga ʻa e kei moʻui ʻa Sihoiatá. Naʻe aʻu ʻo fakapapauʻi ʻe Sōasi naʻe ʻomai ʻe he kakaí ʻa e paʻanga ke monomono ʻaki ʻa e temipale ʻo e ʻOtuá, ʻa ia naʻe tuku liʻaki ʻe heʻene tamaí, ʻe ʻAhasaia, pea mo ʻene kui-tangata ko Siholamé. Ka tau sio angé ki he meʻa naʻe hokó ʻi he taimi naʻe mate ai ʻa e taulaʻeiki lahi ko Sihoiatá.​—2 Tuʻi 12:1-16.

ʻI he taimi ko ení naʻe taʻu 40 nai ʻa Sōasi. ʻI he ʻikai kei hokohoko atu ʻene feohi mo e faʻahinga naʻe tauhi kia Sihová, naʻe hoko ʻa Sōasi ʻo kaungāmeʻa mo e faʻahinga naʻa nau lotu ki he ngaahi ʻotua loí. Ko Sākalaia, ko e foha ʻo Sihoiatá, ko e taulaʻeiki ia ʻa Sihova ʻi he taimi ko iá. ʻOkú ke fakakaukau ko e hā ʻa e meʻa ʻa Sākalaia naʻá ne fai ʻi heʻene ʻilo fekauʻaki mo e ngaahi meʻa kovi naʻe fai ʻe Sōasi he taimi ko ení?—

Naʻe tala ʻe Sākalaia kia Sōasi: “Koe mea i hoo . . . liaki a Jihova, kuo ne liaki ai . . . [koe] foki.” Naʻe ʻai ʻe he ngaahi lea ko iá ke ʻita lahi ʻa Sōasi ʻo ne fekauʻi ai ke tolomakaʻi ʻa Sākalaia ki he mate. Fakakaukau atu ki ai​—naʻe fakahaofi ʻa Sōasi mei ha tokotaha fakapō, ka ko ia tonu eni he taimí ni naʻá ne ʻai ke fakapoongi ʻa Sākalaia!​—2 Kalonikali 24:1-3, 15-22, PM.

ʻOku lava ke ke sio ki ha ngaahi lēsoni ke tau ako mei he fakamatala ko ení?​— Sai, ʻoku ʻikai ʻaupito te tau loto ke hangē ko ʻAtalaiá, ʻa ia naʻá ne loto-tāufehiʻa mo anga-fakamamahi. ʻI hono kehé, ʻoku totonu ke tau ʻofa ʻi hotau kaungālotú pea naʻa mo hotau ngaahi filí, ʻo hangē pē ko hono akoʻi ʻe Sīsū ke tau faí. (Mātiu 5:44; Sione 13:34, 35) Pea manatuʻi, kapau te tau kamata fai ʻa e meʻa ʻoku leleí, ʻo hangē ko ia naʻe fai ʻe Sōasí, ʻoku fiemaʻu ke tau hokohoko atu ʻa e fakakaungāmeʻa ki he faʻahinga ʻoku ʻofa kia Sihova pea ʻoku nau fakalototoʻaʻi kitautolu ke tauhi kiate iá.

[Fakamatala ʻi lalo]

Ngaahi Fehuʻi:

○ Naʻe anga-fēfē hono fakahaofi ʻo Sōasí, pea meia hai?

○ Naʻe anga-fēfē ʻa e hoko ʻa Sōasi ko e tuʻi totonú, pea ko e hā ha lelei naʻá ne fai?

○ Ko e hā naʻe hoko ai ʻo kovi ʻa Sōasí, pea ko hai naʻá ne fakapōngí?

○ Ko e hā ʻa e ngaahi lēsoni ʻoku malava ke tau ako mei he talanoa Fakatohitapu ko ení?

[Fakatātā ʻi he peesi 25]

Naʻe fakahaofi ʻa Sōasi