2 Maʻu ʻa e ʻIlo Totonu ki he ʻOtuá
“Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha.”—Sione 17:3.
KO E HĀ ʻA E POLÉ? ʻOku pehē ʻe he niʻihi ʻoku ʻikai moʻoni ke ʻi ai ha ʻOtua. ʻOku fakakaukau ʻa e niʻihi ko e ʻOtuá ko ha mālohi kāfakafa ia ʻo ʻikai ko ha tokotaha. Ko e faʻahinga ʻoku nau tui ko ha tokotaha moʻoni iá ʻoku nau akoʻi ʻa e ngaahi tokāteline fepakipaki fekauʻaki mo ia mo e ngaahi ʻulungaanga ʻokú ne fakahāhaá.
ʻE LAVA FĒFĒ KE KE IKUʻI ʻA E POLÉ? Ko e founga ʻe taha ke maʻu ai ʻa e ʻilo ki he ʻOtuá ko e sio ki he ngaahi meʻa kuó ne ngaohí. Naʻe pehē ʻe he ʻapositolo ko Paulá: “Naʻa mo e ngaahi meʻa oʻona [ʻOtuá] ʻoku taʻehāmai, ka talu e ngaohi ʻo mamani mo e ha ia, ʻi hono ʻutangiʻi mei he ngaahi meʻa kuo ne ngaohi, ʻio, ʻa hono māfimafi mo hono ʻotua.” (Loma 1:20) ʻI hono siofi fakalelei ʻa e māmani kuo fakatupú, ʻe lava ke ke ako ai ʻa e meʻa lahi fekauʻaki mo e poto pea mo e mālohi ʻo hotau Tokotaha-Fakatupú.—Sāme 104:24; Aisea 40:26.
Kae kehe, ke maʻu ʻa e ʻilo totonu ki he ʻulungaanga ʻo e ʻOtuá, ʻoku fiemaʻu ʻa e tokotaha tāutaha ke ne fakaava ʻa e Folofola ʻa e ʻOtuá, ʻa e Tohi Tapú, peá ne sivisiviʻi tonu ia. ʻOua ʻe fakaʻatā noa pē ʻa e niʻihi kehé ke nau fakafuo hoʻo fakakaukaú. ʻI hono kehé, muimui ʻi he faleʻi ʻa e Tohi Tapú: “ʻOua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua.” (Loma 12:2) Ko e fakatātaá, fakakaukau angé ki he ngaahi moʻoniʻi meʻa hono hoko ʻoku fakahaaʻi ʻe he Tohi Tapú fekauʻaki mo e ʻOtuá.
Ko e ʻOtuá ʻoku ʻi ai hono huafa fakafoʻituitui. Ko e huafa fakafoʻituitui ʻo e ʻOtuá naʻe muʻaki ʻasi tuʻo laui afe ia ʻi he Tohi Tapú kotoa. ʻOku fakakau ia ʻe he kau liliu Tohi Tapu tokolahi ʻi he Sāme 83:18 (PM), ʻa ia ʻoku pehē ai: “Koeuhi ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.”
Ko e ʻOtua ko Sihová ʻoku ʻi ai ʻene ngaahi ongoʻi ʻa ia ʻoku uesia ʻe he ngaahi tōʻonga ʻa e faʻahinga ʻo e tangatá. Hili hono fakatauʻatāinaʻi ʻe Sihova ʻa e kakai ʻIsilelí mei he nofo pōpula ʻi ʻIsipité, naʻa nau tukunoaʻi ʻi he taimi ʻe niʻihi ʻa ʻene akonaki fakapotopotó. Ko honau ʻalunga angatuʻú naʻe ʻai ai ia ke ne ‘mamahi.’ Ko ʻenau tōʻongá naʻe “hūhūmamaʻi [pe fakalotomamahiʻi ai] ae Toko Taha Maonioni o Isileli.”—Sāme 78:40, 41, PM.
ʻOku tokanga mai ʻa Sihova kia kitautolu ʻi hotau tuʻunga tāutahá. ʻI he lea ki heʻene kau ākongá, naʻe pehē ʻe Sīsū: “ʻIkai ʻoku fakatau ha ongo kiʻi misi ʻe toko ua ki ha konga seniti pe? ka ʻe ʻikai patū ki he kelekele hana taha taʻe meʻa ki ai ʻe hoʻomou Tamai. Ka ko e meʻa kiate kimoutolu, ko homou ngāhi tuʻoni louʻulu kuo ʻosi lau fakalautelau. Ko ia ʻoua te mou manavahe: ʻoku mou mahuʻinga kimoutolu ʻi ha fanga misi tokolahi.”—Mātiu 10:29-31.
ʻOku ʻikai saiʻia ʻa e ʻOtuá ʻi ha matakali pe anga fakafonua ʻo laka ia ʻi he matakali ʻe tahá. Naʻe pehē ʻe he ʻapositolo ko Paulá ki he kau Kalisi ʻi ʻAtenisí ko e ʻOtuá “naʻa ne oʻi foki ʻa e ngaahi faʻahinga kakai ʻa ia ʻoku nau tupunga taha kotoa pe, ke nau nofoʻia ʻa e funga kotoa ʻo māmani.” Naʻá ne toe pehē ko e ʻOtuá “talāʻehai ʻoku ne mamaʻo mei hatau toko taha.” (Ngāue 17:26, 27) Naʻe pehē ʻe he ʻapositolo ko Pitá: “ʻOku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”—Ngāue 10:34, 35.
KO E HĀ ʻA E PALÉ? ʻOku maʻu ʻe he niʻihi ha “mamahiʻi ʻa e ʻOtua, ka ʻoku ʻikai fou ʻi he ʻilo totonu.” (Loma 10:2) Kapau ʻokú ke ʻiloʻi ʻa e meʻa ʻoku akoʻi moʻoni ʻe he Tohi Tapú fekauʻaki mo e ʻOtuá, te ke fakaʻehiʻehi mei hano takihalaʻi pea te ke malava ai ke “ʻunuʻunu atu ki he ʻOtua.”—Semisi 4:8.
Ki ha fakamatala lahi ange, sio ki he vahe 1, “Ko e Hā ʻa e Moʻoni Fekauʻaki mo e ʻOtuá?,” ʻi he tohi Ko e Hā ʻOku Akoʻi Moʻoni ʻe he Tohi Tapú?a
[Fakamatala ʻi lalo]
a Pulusi ʻe he Kau Fakamoʻoni ʻa Sihová.
[Fakatātā ʻi he peesi 6]
Ko e founga ʻe taha ke maʻu ai ʻa e ʻilo ki he ʻOtuá ko e sio ki he ngaahi meʻa kuó ne ngaohí