Ngaahi Fāmili Kalisitiane—Muimui ʻi he Faʻifaʻitakiʻanga ʻa Sīsuú!
“Ne tuku [ʻe Kalaisi] ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia.”—1 PITA 2:21.
1. (a) Ko e hā ʻa e ngafa naʻe maʻu ʻe he ʻAlo ʻo e ʻOtuá ʻi he fakatupú? (e) ʻOku anga-fēfē ongoʻi ʻa Sīsū ki he faʻahinga ʻo e tangatá?
ʻI HE taimi naʻe ngaohi ai ʻe he ʻOtuá ʻa e langí mo e māmaní, naʻe ʻi hono tafaʻakí ʻa hono ʻAlo ʻuluaki-fakatupú ko ha “tokotaha ngāue mataotao.” Naʻe ngāue fāitaha ʻa e ʻAlo ʻo e ʻOtuá mo ʻene Tamaí ʻi he taimi naʻe faʻu ai pea fakatupu ʻe Sihova ʻa e fanga manu mo e ʻakau kehekehe lahi ʻi heni he māmaní ʻi Heʻene teuteuʻi ʻa e Palataisi ʻe hoko ko e ʻapi ki he ngaahi meʻamoʻui naʻe ngaohi ʻi Hono ʻīmisí mo hono tataú. Ko e ʻAlo ʻo e ʻOtuá, ʻa ia naʻe hoko ʻo ʻiloa ki mui ko Sīsuú, naʻá ne ʻofa lahi ki he faʻahinga ʻo e tangatá. “Ko e ngaahi meʻa [naʻá ne] hōhōʻia ʻaí ko e ngaahi foha ʻo e tangatá.”—Pal. 8:27-31, NW; Sen. 1:26, 27.
2. (a) Kuo anga-fēfē ʻa e tokonaki ʻa Sihova ki he faʻahinga taʻehaohaoa ʻo e tangatá? (e) Ko e hā ʻa e tafaʻaki ʻe taha ʻo e moʻuí ʻoku ʻomai ai ʻe he Tohi Tapú ha tataki?
2 Hili e faiangahala ʻa e ʻuluaki ongo meʻa fakaetangatá, naʻe hoko ai ʻa e huhuʻi ʻo e faʻahinga angahalaʻia ʻo e tangatá ko ha konga mahuʻinga ʻo e taumuʻa ʻa Sihová. Naʻe tokonaki mai ʻe Sihova ʻa e feilaulau huhuʻi ʻa Kalaisí ke ʻai ai ke malava ʻa e huhuʻi ko iá. (Loma 5:8) ʻIkai ko ia pē, naʻe tokonaki mai ʻe Sihova ʻa ʻene Folofolá, ʻa e Tohi Tapú, ʻa ia ʻoku ʻomai ai ʻa e tataki ki he tangatá ki he founga lelei taha ke fekuki ai mo e taʻehaohaoa tukufakaholó. (Sāme 119:105) ʻI heʻene Folofolá, ʻoku tokonaki mai ai ʻe Sihova ʻa e tataki ke tokoniʻi ʻa e kakaí ke nau tauhi maʻu ha ngaahi fāmili mālohi mo fiefia. ʻI he fekauʻaki mo e nofo malí, ko e tohi Senesí ʻoku fakahaaʻi ai kuo pau ki ha tangata ke “pikitai ki hono uaifi: pea te na hoko ko e kakano pe taha.”—Sen. 2:24.
3. (a) Ko e hā naʻe akoʻi ʻe Sīsū fekauʻaki mo e nofo malí? (e) Ko e hā te tau lāulea ki ai ʻi he kupu ko ení?
3 Lolotonga ʻa ʻene ngāue fakafaifekau ʻi he māmaní, naʻe fakamamafaʻi ai ʻe Sīsū ko e nofo malí naʻe fakataumuʻa ia ke tuʻuloa. Naʻá ne akoʻi ʻa e ngaahi tefitoʻi moʻoni ʻa ia ʻi hono ngāueʻakí, ʻe tokoniʻi ai ʻa e ngaahi mēmipa ʻo e fāmilí ke nau fakaʻehiʻehi mei he ngaahi fakakaukau mo e ʻulungaanga naʻe hoko ko e fakamanamana ki heʻenau nofo malí pe ko e fiefia ʻa honau fāmilí. (Mt. 5:27-37; 7:12) Ko e kupu ko ení ʻe lāulea ai ki he founga ʻe lava ai ʻe he ngaahi akonaki ʻa Sīsuú mo e faʻifaʻitakiʻanga naʻá ne fokotuʻu lolotonga ʻene ʻi māmaní ʻo tokoniʻi ʻa e ngaahi husepānití, ngaahi uaifí, mātuʻá mo e fānaú ke nau maʻu ʻa e moʻui fiefia mo fiemālie.
Founga ʻo e Fakalāngilangiʻi ʻe ha Husepāniti Kalisitiane ʻa Hono Uaifí
4. Ko e hā ʻa e tuʻunga meimei tatau ʻi he vahaʻa ʻo e ngafa ʻo Sīsuú mo e ngafa ʻo e ngaahi husepāniti Kalisitiané?
4 Naʻe fakanofo ʻe he ʻOtuá ʻa e husepānití ko e ʻulu ʻo e fāmilí, ʻo hangē pē ko e hoko ʻa Sīsū ko e ʻUlu ʻo e fakatahaʻangá. Naʻe pehē ʻe he ʻapositolo ko Paulá: “Ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi; ʻio ko ia ia ko e fakamoʻui ʻo e sino. ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia.” (Ef. 5:23, 25) Ko e moʻoni, ko e tōʻongafai ʻa Sīsū ki hono kau muimuí ʻoku fokotuʻu ai ʻa e faʻifaʻitakiʻanga ki he founga ʻoku fiemaʻu ke fai ʻe he kau tangata Kalisitiané ki honau uaifí. Tau lāulea angé ki he ngaahi founga ʻe niʻihi naʻe ngāueʻi ai ʻe Sīsū ʻa hono mafai ne ʻoange ʻe he ʻOtuá.
5. Naʻe anga-fēfē hono ngāueʻaki ʻe Sīsū ʻa hono mafaí ki heʻene kau ākongá?
5 Ko Sīsuú naʻe “anga-malū mo loto-fakatōkilalo.” (Mt. 11:29, NW) Ko e tangata foki ia naʻá ne fai ʻa e ngaahi ngāue pau. Naʻe ʻikai ʻaupito ke ne liʻaki hono ngaahi fatongiá. (Mk. 6:34; Sione 2:14-17) Naʻá ne fai ʻa e akonaki anga-ʻofa ki heʻene kau ākongá, pea aʻu ʻo toutou fai ʻi he taimi naʻe fiemaʻu aí. (Mt. 20:21-28; Mk. 9:33-37; Luke 22:24-27) Kae kehe, naʻe ʻikai ngāhiʻi pe fakamaaʻi kinautolu ʻe Sīsū, pea naʻe ʻikai te ne ʻai ke nau ongoʻi ʻoku ʻikai ʻofaʻi kinautolu pe ʻoku nau taʻemalava ke fakahoko ʻa e meʻa naʻá ne akoʻi kia kinautolu ke nau faí. ʻI hono kehé, naʻá ne fakahīkihikiʻi mo fakalototoʻaʻi ʻa ʻene kau ākongá. (Luke 10:17-21) ʻOku ʻikai ha ofo ʻi hono maʻu ʻe Sīsū ʻa e tokaʻi ʻa ʻene kau ākongá ʻi heʻene tōʻongafai anga-ʻofa mo manavaʻofa kia kinautolú!
6. (a) Ko e hā ʻe lava ke ako ʻe ha husepāniti mei he anga ʻo e tōʻongafai ʻa Sīsū ki heʻene kau ākongá? (e) Ko e hā ʻa e fakalototoʻa ʻoku fai ʻe Pita ki he ngaahi husepānití?
6 Ko e faʻifaʻitakiʻanga ʻa Sīsuú ʻoku akoʻi ai ki he ngaahi husepānití ko e tuʻunga-ʻulu faka-Kalisitiané ʻoku ʻikai ko ha tuʻunga ia ʻo e pule fefeka. ʻI hono kehé, ko e tuʻunga ia ʻoku fakaʻilongaʻi ʻaki ʻa e tokaʻi mo e ʻofa feilaulauʻi-kita. Naʻe fakalototoʻaʻi ʻe he ʻapositolo ko Pitá ʻa e ngaahi husepānití ke nau faʻifaʻitaki ki he ngaahi founga anga-ʻofa ʻa Sīsuú ʻaki ʻenau nofo ʻi he founga tatau mo honau uaifí, pea “tuʻutuʻuni [pe ʻoange] hanau fakaʻapaʻapa.” (Lau ʻa e 1 Pita 3:7.) ʻE lava fēfē leva ke ngāueʻaki ʻe ha husepāniti ʻa hono tuʻunga mafaí pea tōʻongafai ʻi he taimi tatau ki hono uaifí ko ha tokotaha ʻoku taau ke fakaʻapaʻapaʻi?
7. ʻI he founga fē ʻe lava ai ke fakaʻapaʻapaʻi ʻe ha husepāniti ʻa hono uaifí? Fakatātaaʻi.
7 Ko e founga ʻe taha ʻe lava ke fakaʻapaʻapaʻi ai ʻe he husepānití ʻa hono uaifí ko e fakakaukauʻi fakalelei ʻa ʻene vakaí mo ʻene ongoʻí ki muʻa ke ne fai ʻa e ngaahi fili ʻoku kaunga ki he fāmilí. Mahalo pē ʻe pau ke fai ha fili fekauʻaki mo e hiki ki ha feituʻu pe ko ha fetongi ʻo e ngāué pe fekauʻaki mo e ngaahi meʻa fakaʻahó, hangē ko e feituʻu ke ʻalu ki ai ʻo mālōlō ʻeveʻevá pe ko e founga ke feʻunuʻaki ai ʻa e patiseti ʻa e fāmilí koeʻuhi ke fekuki mo e ʻalu he ʻataá e totongi ʻo e koloá. Koeʻuhi ʻe uesia ʻa e fāmilí, ʻe ʻaonga pea ko e anga-ʻofa ia ki he husepānití ke vakaiʻi ʻa e fakakaukau ʻa hono uaifí, he ʻe tokoni nai ai kiate ia ke ne fai ha fili mafamafatatau mo fakaʻatuʻi, pea ʻe faingofua ange ai ki he uaifí ke ne poupou kiate ia. (Pal. 15:22) Ko e ngaahi husepāniti Kalisitiane ʻoku nau fakaʻapaʻapaʻi ʻa honau uaifí ʻoku nau maʻu ai ʻo ʻikai ko e ʻofa mo e ʻapasia pē ʻa honau uaifí, ka ko e meʻa ʻoku mahuʻinga angé ko e hōifua ʻa Sihová.—Ef. 5:28, 29.
Founga ʻo Hono Fakahāhā ʻe ha Uaifi ʻa e ʻApasia Loloto ki Hono Husepānití
8. Ko e hā ke fakaʻehiʻehi ai mei he faʻifaʻitakiʻanga ʻa ʻIví?
8 ʻOku maʻu ʻe he ngaahi uaifi Kalisitiané ʻia Sīsū ha faʻifaʻitakiʻanga haohaoa ʻo e moʻulaloa ki he tuʻunga mafaí. Ko ha faikehekehe ē ʻoku ʻi ai ʻi heʻene vakai ki he tuʻunga mafaí mo e fakakaukau naʻe fakahāhā ʻe he ʻuluaki uaifi fakaetangatá! Naʻe taʻemalava ke ʻomai ʻe ʻIvi ha faʻifaʻitakiʻanga lelei ki he ngaahi uaifí ke nau muimui ai. Naʻá ne maʻu ha ʻulu naʻe vaheʻi fakaʻotua mai ʻa ia naʻe fetuʻutaki ʻa Sihova fakafou ʻiate ia ʻi hono ʻomai ʻa e fakahinohinó. Neongo ia, naʻe ʻikai ʻapasia ʻa ʻIvi ki he fokotuʻutuʻu ko ení. Naʻá ne taʻemalava ke tali ʻa e fakahinohino naʻe ʻoange ʻe ʻĀtama kiate iá. (Sen. 2:16, 17; 3:3; 1 Kol. 11:3) Ko ia ai, naʻe kākaaʻi ʻa ʻIvi; ka naʻe totonu ke ne kumi faleʻi ki hono husepānití pe te ne talangofua ki he leʻo naʻe taukaveʻi ʻokú ne tala ange ʻoku “meaʻi ʻe he ʻOtua.” ʻI hono kehé, naʻá ne ʻafungi ʻo tākiekina ʻa hono husepānití.—Sen. 3:5, 6; 1 Tim. 2:14.
9. Ko e hā ʻa e faʻifaʻitakiʻanga ʻi he moʻulaloá ʻoku fokotuʻu ʻe Sīsuú?
9 Ko Sīsū, ʻi hono kehé, naʻá ne ʻomai ʻa e faʻifaʻitakiʻanga haohaoa ʻo e moʻulaloa ki hono ʻUlú. Ko ʻene fakakaukaú mo e ʻalunga moʻuí ʻoku fakahaaʻi ai “naʻe ʻikai te ne lau ʻene tatau mo e ʻOtua ko e meʻa ke haʻaki puke ki ai.” ʻI hono kehé, “naʻa ne fakamasivesivaʻi ʻe ia ia, heʻene toʻo ʻa e anga ʻo e tamaioʻeiki.” (Fili. 2:5-7) ʻI he ʻahó ni, ʻi hono tuʻunga ko e Tuʻi ʻoku pulé, ʻoku tauhi maʻu ʻe Sīsū ʻa e fakakaukau tatau. ʻOkú ne fakamoʻulaloa anga-fakatōkilalo ki heʻene Tamaí ʻi he meʻa kotoa pē pea poupouʻi ʻa Hono tuʻunga-ʻulú.—Mt. 20:23; Sione 5:30; 1 Kol. 15:28.
10. ʻE fēfē nai ʻa e poupou ʻa ha uaifi ki he tuʻunga-ʻulu ʻa hono husepānití?
10 ʻOku lelei ki ha uaifi Kalisitiane ke faʻifaʻitaki kia Sīsū ʻaki ʻene poupouʻi ʻa e tuʻunga-ʻulu ʻa hono husepānití. (Lau ʻa e 1 Pita 2:21; 3:1, 2.) Fakakaukau atu ki ha tuʻunga ʻokú ne maʻu ai ha faingamālie ke fai ení. ʻOku feinga ʻa hono fohá ke maʻu ha ngofua ke ne kau ʻi ha sipoti ʻoku fiemaʻu ke toki fakaʻatā pē ʻe he ongo mātuʻá. Koeʻuhi ne teʻeki ai fai ha lāulea ki muʻa ʻa e ongo mātuʻá ki he meʻa ko iá, ʻe feʻungamālie ki he faʻeé ke ne ʻeke, “Naʻá ke kole ki hoʻo tamaí?” Kapau ʻoku teʻeki ke fai ia ʻe he fohá, ʻoku totonu ke ne lāulea ki ai mo hono husepānití ki muʻa ʻi heʻene fili ke fai ha meʻá. ʻIkai ngata aí, ʻe fiemaʻu moʻoni ʻe ha uaifi Kalisitiane ke fakaʻehiʻehi mei he fakafepaki ki hono husepānití pe fakafetau ki heʻene fakakaukaú ʻo sio ki ai ʻena fānaú. Kapau ʻoku ʻikai te ne loto-tatau mo hono husepānití ki ha meʻa, naʻá na talanoa fakaekinaua pē ki ai.—Ef. 6:4.
Faʻifaʻitakiʻanga ʻa Sīsū ki he Mātuʻá
11. Ko e hā ʻa e faʻifaʻitakiʻanga naʻe fokotuʻu ʻe Sīsū ki he ngaahi mātuʻá?
11 Neongo naʻe ʻikai mali pe maʻu ʻe Sīsū ha fānau, ko ha faʻifaʻitakiʻanga lelei ʻaupito ia ki he ngaahi mātuʻa Kalisitiané. ʻO anga-fēfē? Naʻá ne akoʻi anga-ʻofa mo kātaki ʻa ʻene kau ākongá ʻi he lea mo e faʻifaʻitakiʻanga. Naʻá ne fakahaaʻi kia kinautolu ʻa e founga ke fakahoko ai ʻa e fekau naʻá ne ʻoange kia kinautolú. (Luke 8:1) Ko e ʻulungaanga mo e tōʻonga ʻa Sīsū ki heʻene kau ākongá naʻe akoʻi ai kia kinautolu ʻa e founga naʻe pau ke nau fefaiʻaki ʻiate kinautolú.—Lau ʻa e Sione 13:14-17.
12, 13. Ko e hā ʻoku fiemaʻú kapau ʻoku tonu ke ʻohake ʻe he mātuʻá ha fānau manavahē-ʻOtua?
12 ʻOku hehema ʻa e fānaú ke faʻifaʻitaki ki heʻenau mātuʻá ʻi he meʻa leleí pe ʻi he meʻa ʻoku koví. Ko ia ai ngaahi mātuʻa, ʻeke hifo kia kimoutolu: ‘Ko e hā ʻa e pōpoaki ʻoku tau ʻoatu ki heʻetau fānaú ʻi he lahi ʻo e taimi ʻoku tau tuku ki he TV mo e fakafiefiá pea ʻi he tafaʻaki ʻe tahá ki he ako Tohi Tapú mo e kau ʻi he ngāue fakamalangá? Ko e hā ʻoku fakamuʻomuʻa moʻoni ʻe hotau fāmilí? ʻOku tau fokotuʻu ha faʻifaʻitakiʻanga lelei ʻi hono fakatefito ʻetau moʻuí mo ʻetau ngaahi filí ʻi he lotu moʻoní?’ Ko e lao ʻa e ʻOtuá kuo pau ke muʻaki ʻi he loto moʻoni ia ʻo e ongo mātuʻá kapau ʻokú na loto ke ʻohake ha fānau manavahē-ʻOtua.—Teu. 6:6.
13 Kapau ʻoku feinga mālohi ʻa e ongo mātuʻá ke ngāueʻaki ʻa e ngaahi tefitoʻi moʻoni Fakatohitapú ʻi he ngaahi meʻa fakaʻahó, heʻikai puli eni mei heʻena fānaú. Ko e lea mo e faiako ʻa e ongo mātuʻá te ne tākiekina ʻa e fānaú. Kae kehe, kapau ʻoku ʻiloʻi ʻe he fānaú ha tuʻunga moʻui lōua ʻi he ongo mātuʻá, te nau maʻu nai ai ʻa e fakamulituku ko e ngaahi tefitoʻi moʻoni Fakatohitapú ʻoku ʻikai moʻoni ke mahuʻinga pe ʻaonga. Ko e ikuʻangá, ʻe hehema ange nai ai ʻa e fānaú ke vaivai ʻi he fetaulaki mo e tenge mei he māmaní.
14, 15. Ko e hā ʻa e ngaahi meʻa mahuʻinga ʻoku totonu ke fakatupulekina ʻe he ongo mātuʻá ʻi heʻena fānaú, pea ko e hā ʻa e founga ʻe taha ʻe lava ke na fai ai ení?
14 ʻOku ʻiloʻi ʻe he ngaahi mātuʻa Kalisitiané ko e ʻohake ʻo ha kiʻi tama ʻoku kau ki ai ʻa e meʻa lahi ange ʻi hono tokonaki pē ʻene ngaahi fiemaʻu fakamatelié. Ko ia ai, ko e sio nounou ʻaupito ia ke akoʻi ha kiʻi tama ke ne tuli ki he ngaahi taumuʻa ʻa ia ʻe kaunga ʻataʻatā pē ki he ʻaonga fakamatelié. (Koh. 7:12) Naʻe akoʻi ʻe Sīsū ʻa ʻene kau ākongá ke nau ʻai ko e meʻa muʻomuʻá ʻa e ngaahi meʻa fakalaumālié mo e ngaahi ngāue fakalaumālié. (Mt. 6:33) Ko ia ai, ʻi he faʻifaʻitaki kia Sīsuú, ko e ngaahi mātuʻa Kalisitiané ʻoku totonu ke nau toe feinga foki ke fakatupulekina ʻi heʻenau fānaú ha holi ke tuli ki he ngaahi taumuʻa fakalaumālié.
15 Ko e founga ʻe taha ʻe lava ke fai ai eni ʻe he ngaahi mātuʻá ko hono kumi ha ngaahi faingamālie ke feohi ai ʻenau fānaú mo e faʻahinga ʻoku nau ʻi he ngāue taimi-kakató. Fakakaukau atu ki he fakalototoʻa ʻe lava ke hoko ki he kau taʻu hongofulu tupú ʻi heʻenau maheni mo e kau tāimuʻá pe ko e ʻovasia sēketí mo hono uaifí. Ko e kau misinale, kau ngāue Pēteli mo e faʻahinga ʻoku nau fai ʻa e ngāue langa fakavahaʻapuleʻangá ʻi heʻenau ʻaʻahí ʻe lava ke nau talanoa loto-māfana ʻo fekauʻaki mo e fakafiefia ʻo e ngāue kia Sihová. ʻOku ʻikai ha veiveiua ko e kau ʻaʻahi ko iá ʻe ʻi ai ʻenau hokosia fakaueʻiloto te nau fakamatala ki ai. Ko ʻenau faʻifaʻitakiʻanga ʻo e ngāue feilaulauʻi-kitá ʻe tokoni lahi nai ia ki hoʻo fānaú ke nau fai ʻa e ngaahi fili fakapotopoto, fokotuʻu ʻa e ngaahi taumuʻa fakalaumālie ʻoku taau ke fakahīkihikiʻi pea maʻu ha tuʻunga fakaako feʻungamālie ke malava ʻo tokoni kia kinautolu ʻi he ngāue taimi-kakató.
Fānau—Ko e Hā Te Ne Tokoniʻi Kimoutolu ke Muimui ʻi he Faʻifaʻitakiʻanga ʻa Sīsuú?
16. Naʻe anga-fēfē hono fakaʻapaʻapaʻi ʻe Sīsū ʻa ʻene ongo mātuʻa fakaemāmaní mo ʻene Tamai fakahēvaní?
16 Fānau, ʻoku tokonaki mai ʻe Sīsū ha faʻifaʻitakiʻanga lelei ʻaupito kia kimoutolu foki. Naʻe tuku ʻa Sīsū ke tokangaʻi ʻe Siosifa mo Mele, pea naʻá ne talangofua kia kinaua. (Lau ʻa e Luke 2:51.) Naʻá ne ʻiloʻi neongo ʻena taʻehaohaoá, naʻe ʻoange kia kinaua ʻe he ʻOtuá ʻa e fatongia ke na tokangaʻi ia. ʻI he tuʻunga ko iá, naʻe pau ai ke fakaʻapaʻapaʻi kinaua. (Teu. 5:16; Mt. 15:4) ʻI heʻene tupu haké, naʻe fai maʻu pē ʻe Sīsū ʻa e ngaahi meʻa naʻe fakahōifua ki heʻene Tamai fakahēvaní. Naʻe ʻuhinga iá ko hono talitekeʻi ʻa e ʻahiʻahí. (Mt. 4:1-10) Ko kimoutolu fānaú ʻe ʻahiʻahiʻi nai kimoutolu ʻi ha ngaahi taimi ke mou talangataʻa ki hoʻomou mātuʻá. Ko ia ko e hā ʻe lava ke ne tokoniʻi kimoutolu ke mou muimui ʻi he faʻifaʻitakiʻanga ʻa Sīsuú?
17, 18. (a) Ko e hā ʻa e faʻahinga tenge ʻoku fehangahangai mo e fānaú ʻi he ʻapiakó? (e) Ko hono manatuʻi ʻa e hā ʻe lava ke tokoni ki he kau talavoú ke nau talitekeʻi ai ʻa e ngaahi ʻahiʻahí?
17 Ngalingali, ko e tokolahi taha ʻo ho kaungāakó ʻoku siʻi pe ʻikai haʻanau tokanga ki he ngaahi tuʻunga ʻa e Tohi Tapú. Te nau feinga nai ke ʻai koe ke ke kau ʻi ha ngaahi ngāue ala fehuʻia pea fakakata ʻaki koe ʻi hoʻo fakafisi ke kau aí. ʻOku ʻaiʻai leaʻi koe ʻe he kaungāakó koeʻuhi ko hoʻo fakafisi ke kau mo kinautolu ʻi ha ngaahi sipoti ʻe niʻihi? Kapau ko ia, ʻoku fēfē hoʻo talí? ʻOkú ke ʻiloʻi kapau te ke fakaʻatā ke ke hoko ʻo ilifia pea ʻalu fakataha mo kinautolu, te ke fakalotomamahiʻi ai ʻa hoʻo ongo mātuʻá mo Sihova. Naʻá ke mei iku ki fē kapau naʻá ke muimui ʻi ho kaungāakó? Mahalo pē kuó ke fokotuʻu haʻo ngaahi taumuʻa pau, hangē ko e hoko ko ha tāimuʻa pe ko ha sevāniti fakafaifekau, ngāue ʻi ha feituʻu ʻoku lahi ange ai ʻa e fiemaʻu ki he kau malanga ʻo e Puleʻangá, pe hoko ko ha tokotaha ngāue Pēteli. ʻE tokoni ʻa e feohi mo ho kaungāakó ke ke aʻusia ai hoʻo ngaahi taumuʻá?
18 Ko kimoutolu kau talavou ʻi he fakatahaʻanga Kalisitiané kuo faifai ange pea mou ʻi ha ngaahi tuʻunga ʻoku ʻahiʻahiʻi ai hoʻomou tuí? ʻOku anga-fēfē hoʻomou talí? Fakakaukau ki homou faʻifaʻitakiʻangá, ʻa Sīsū. Naʻá ne fakafisi ke ʻunua ki he ʻahiʻahí pea tuʻu mālohi ki he meʻa naʻá ne ʻiloʻi naʻe totonú. Ko hono manatuʻi ení ʻe tokoni ia ke mou maʻu ai ʻa e mālohi ke tala mahino ki homou kaungāakó ʻoku ʻikai te mou loto ke kau fakataha mo kinautolu ʻi hono fai ʻa e meʻa ʻoku mou ʻiloʻi ʻoku halá. ʻI he hangē ko Sīsuú, hanganaki tokangataha ki he ʻamanaki ki ha moʻui ʻo e ngāue fiefia mo talangofua kia Sihova.—Hep. 12:2.
Kī ki he Moʻui Fakafāmili Fiefia
19. Ko e hā ʻa e ʻalunga moʻui ʻoku ʻomai ai ʻa e fiefia moʻoní?
19 Ko e ʻOtua ko Sihová mo Sīsū Kalaisi ʻokú na loto ke maʻu ʻe he faʻahinga ʻo e tangatá ʻa e meʻa lelei tahá. Naʻa mo e ʻi hotau tuʻunga taʻehaohaoá, ʻoku malava ke tau maʻu ha fiefia. (Ai. 48:17, 18; Mt. 5:3) Naʻe akoʻi ʻe Sīsū ʻa e ngaahi moʻoni fakalotu ʻoku makatuʻunga mei ai ʻa e fiefia ʻa e faʻahinga ʻo e tangatá, ka naʻe ʻikai ko e kotoa ia ʻo e meʻa naʻá ne fakahaaʻi ki heʻene kau ākongá. Naʻe toe akoʻi foki ʻe Sīsū ʻa e founga lelei taha ʻo e moʻuí. ʻIkai ngata aí, naʻá ne tuku mai ha faʻifaʻitakiʻanga lelei ʻo ha moʻui mafamafatatau mo ha fakakaukau mafamafatatau. Ko kitautolu kotoa, ko e hā pē hotau ngafa ʻi he fāmilí, ʻe lava ke tau maʻu ʻaonga mei he muimui ki heʻene faʻifaʻitakiʻangá. Ko ia ai, ngaahi husepāniti, ngaahi uaifi, mātuʻa mo e fānau, muimui ʻi he faʻifaʻitakiʻanga ʻa Sīsuú! Ko hono maʻu ʻa ʻene ngaahi akonakí pea faʻifaʻitaki ki heʻene faʻifaʻitakiʻangá ʻa e kī moʻoni ke maʻu ai ha moʻui fakafāmili fakalata mo fakafiefia.
ʻE Fēfē Haʻo Tali?
• ʻOku totonu ke fēfē hono ngāueʻaki ʻe he ngaahi husepānití ʻa honau mafai kuo ʻoange ʻe he ʻOtuá?
• ʻE lava fēfē ke faʻifaʻitaki ha uaifi ki he faʻifaʻitakiʻanga ʻa Sīsuú?
• Ko e hā ʻe lava ke ako ʻe he ngaahi mātuʻá mei he anga ʻo e tōʻongafai ʻa Sīsū ki heʻene kau ākongá?
• Ko e hā ʻe lava ke ako ʻe he fānaú mei he faʻifaʻitakiʻanga ʻa Sīsuú?
[Fakatātā ʻi he peesi 8]
Ki muʻa ʻi hono fai ha fili ʻoku kaunga ki he fāmilí, ko e hā ʻe fai ʻe ha husepāniti ʻofa?
[Fakatātā ʻi he peesi 9]
Ko e hā ʻa e tuʻunga ʻoku ʻoange ai ki ha uaifi ha faingamālie ke poupou ki he tuʻunga-ʻulu ʻo hono husepānití?
[Fakatātā ʻi he peesi 10]
ʻOku faʻifaʻitaki ʻa e fānaú ki he ʻulungaanga lelei ʻo ʻenau mātuʻá