Meʻa ʻOku Tau Ako Meia Sīsū

Fekauʻaki mo e Moʻui Fakafāmilí

Ko e hā ʻa e vakai ki he nofo malí ʻokú ne ʻai ke fiefia ʻa e fāmilí?

Ko e malí ko ha haʻi ia ʻoku toputapu. ʻI hono ʻeke pe ʻoku ngofua ʻa e veté, naʻe pehē ʻe Sīsū: “Ne ʻikai te mou lau koā, Ko ia naʻa ne ngaohi ʻa e kakai ʻi he kamataʻanga naʻa ne ngaohi tangata mo fefine kinautolu; mo ne folofola, Ko e meʻa ko ia ʻe tuku ai ʻe ha tangata ʻene tamai mo ʻene faʻe, ka ne pikitai ki hono uaifi: pea ʻe hoko ʻa e toko ua ko e kakano pe taha? Ta ʻoku ʻikai te na kei ua, ka ko e kakano pe taha. ʻAua; pea ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata. . . . Ka ai ha taha te ne liʻaki hono uaifi, ʻo ʻikai ʻi haʻane feʻauaki, pea ne toki mali mo ha fefine kehe, ʻoku ne feʻauaki.” (Mātiu 19:4-6, 9) ʻI he taimi ʻoku muimui ai ha ongo meʻa mali ʻi he akonaki ʻa Sīsuú peá na fefaitōnungaʻakí, ʻoku ongoʻi malu mo fiefia ʻa e tokotaha kotoa ʻi he fāmilí.

Ko e hā ʻoku ʻai ai ʻe he ʻofa ki he ʻOtuá ke fiefia ʻa e fāmilí?

Naʻe pehē ʻe Sīsū: “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa. Koe uluaki bea koe lahi ia oe fekau.” Ko e hā ʻa e fekau lahi taha hono uá? Naʻe pehē ʻe Sīsū: “Ke ke ofa ki ho kaugaabi [kau ai ʻa e faʻahinga ʻoku nofo ofi taha kiate koé—ʻa ho fāmilí] o hage be ko koe.” (Mātiu 22:37-39, PM) Ko ia, ko e kī ki he fāmili fiefiá ko hono maʻu ha vahaʻangatae lelei mo e ʻOtuá, koeʻuhí he ko e ʻofa kiate iá ʻoku ueʻi ai kitautolu ke tau feʻofaʻaki.

ʻE lava fēfē ke fakatou ʻai ʻe he husepānití mo e uaifí ke na fiefia?

ʻOku ʻai ʻe he husepānití ke fiefia ʻa honau uaifí ʻi he taimi ʻoku nau muimui ai ki he faʻifaʻitakiʻanga ʻa Sīsuú. Naʻá ne feilaulauʻi-kita ʻi heʻene ʻofa ki hono uaifi fakaefakatātaá, ʻa ia ko e fakatahaʻangá. (Efeso 5:25) Naʻe pehē ʻe Sīsū: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia.” (Mātiu 20:28) Naʻe ʻikai ʻaupito fakaaoao pe anga-fefeka ʻa Sīsū ki he faʻahinga naʻá ne tokangaʻí ka naʻá ne hoko ko e fakaivifoʻou kia kinautolu. (Mātiu 11:28) Ko ia ai, ʻoku totonu ke ngāueʻaki ʻe he ngaahi husepānití honau mafaí ʻi ha founga anga-ʻofa ʻa ia ʻe maʻu ʻaonga mei ai ʻa e tokotaha kotoa ʻi he fāmilí.

ʻOku lava foki ke maʻu ʻaonga ʻa e uaifí mei he faʻifaʻitakiʻanga ʻa Sīsuú. “Ko e ʻulu ʻo Kalaisi ko e ʻOtua,” ko e lau ia ʻa e Tohi Tapú. ʻOku toe fakahaaʻi ai “ko e ʻulu ʻo e fefine ko e tangata.” (1 Kolinito 11:3) Naʻe ʻikai fakakaukau ʻa Sīsū ʻokú ne māʻulalo ʻi heʻene fakamoʻulaloa ki he ʻOtuá. Naʻá ne fakaʻapaʻapaʻi lahi ʻa ʻene Tamaí. “ʻOku ou fai maʻuaipē ʻa e ngaahi meʻa ʻoku ne hōhōʻia ai,” ko e lea ia ʻa Sīsuú. (Sione 8:29) Ko ha uaifi ʻokú ne fakamoʻulaloa ki he tuʻunga-ʻulu hono husepānití ʻi he ʻofa mo e fakaʻapaʻapa ki he ʻOtuá, ʻokú ne fai ʻa e meʻa lahi ange ke fiefia ai ʻa ʻene moʻui fakafāmilí.

Ko e hā ʻe lava ke ako ʻe he mātuʻá mei he anga ʻo e vakai ʻa Sīsū ki he fānaú?

Naʻe vaheʻi ʻe Sīsū ʻa e taimi ki he fānaú pea naʻá ne mahuʻingaʻia ʻi heʻenau fakakaukaú mo e ongoʻí. ʻOku pehē ʻe he Tohi Tapú: “Ka ka ui ange ʻe Sīsū ʻa e kau valevale, ʻo ne pehē, Tuku pe ʻa e kau tamaiki ke nau haʻu kiate au.” (Luke 18:15, 16) ʻI he taimi ʻe taha, naʻe fakaangaʻi ʻe he kakaí ha tamaiki tangata ʻi heʻenau lea ʻo kau ki heʻenau tui kia Sīsuú. Ka naʻe fakaongoongoleleiʻi ʻe Sīsū ʻa e fānaú, ʻi heʻene pehē ki honau kau fakaangá: “Kuo teʻeki koā ke mou lau, ʻo pehe, Ko e ngutu ʻo e tamaiki mo e valevale kuo ke tuʻutuʻuni mei ai hao fakamalo.”—Mātiu 21:15, 16.

Ko e hā ʻe lava ke ako ʻe he fānaú meia Sīsuú?

Naʻe tokonaki ʻe Sīsū ki he fānaú ha faʻifaʻitakiʻanga lelei ʻo e mahuʻingaʻia ʻi he meʻa fakalaumālié. ʻI heʻene taʻu 12, naʻe ʻilo ia “ki he Temipale, ʻoku ne lotolotoi ʻi he kau [akonaki], ʻo ne fakafanongo kiate kinautolu mo fakafehuʻi kiate kinautolu.” Pea ko e hā hono olá? “Ko kinautolu kotoa pē naʻe fanongo kiate ia, naʻa nau fakatumutumu ʻi he anga o ʻene fakakaukau mo ʻene ngaahi tali.” (Luke 2:42, 46, 47) Kae kehe, ko e ʻilo ʻa Sīsuú naʻe ʻikai ʻai ai ia ke ne hīkisia. Ka, naʻe ʻai ia ke ne fakaʻapaʻapa ki heʻene ongo mātuʻá. ʻOku pehē ʻe he Tohi Tapú: “Naʻa ne ʻi ai ʻo anganofo kiate kinaua.”—Luke 2:51.

Ki ha fakamatala lahi ange, sio ki he vahe 14 ʻo e tohi Ko e Hā ʻOku Akoʻi Moʻoni ʻe he Tohi Tapú?a

[Fakamatala ʻi lalo]