ʻUnuʻunu Ofi ki he ʻOtuá
“ʻOku Sio ʻa e ʻEiki ki he Loto”
ʻOKU lava ke kākā ʻa e fōtungá. Ko e tuʻunga ʻoku ʻi ai ha taha ʻi tuʻá ʻoku ʻikai ʻaupito fakahaaʻi ai ʻa e tuʻunga ia ʻokú ne ʻi ai ʻi lotó, ʻa e tefito ʻo hono lotó. ʻOku hehema ʻa e tangatá ke fakamaau mei he fōtunga ʻi tuʻá. Ko e meʻa ke fakamālōʻiá, ko Sihova ko e ʻOtuá ʻoku sio fakalaka ia ʻi he fōtunga ʻi tuʻá. ʻOku fakahaaʻi mahino eni ʻi he lea ʻoku hiki ʻi he 1 Samiuela 16:1-12.
Sioloto atu ki he meʻa ʻoku hokó. ʻOku teu ke pani ʻe Sihova ha tuʻi foʻou ki he puleʻanga ʻIsilelí. ʻOku folofola ʻa e ʻOtuá ki he palōfita ko Sāmiuelá: “Fai ʻeku fekau kia Sese ko e tangata Petelihema: he kuo u tokonaki haku tuʻi mei hono ngaahi foha.” (Veesi 1) ʻOku ʻikai tala ange ʻe Sihova ʻa e hingoá ka ʻokú ne pehē pē ko e tokotaha kuo filí ʻe ʻi he lotolotonga ʻo e ngaahi foha ʻo Sesé. ʻI he ʻalu ʻa Sāmiuela ki Pētelihemá, ʻokú ne fifili nai, ‘Te u ʻilo fēfē ʻa e tokotaha ʻi he ngaahi foha ʻo Sesé kuo fili ʻe Sihová?’
ʻI he aʻu ki Pētelihemá, ʻoku fokotuʻutuʻu ʻe Sāmiuela ke kau ʻa Sese mo hono ngaahi fohá ʻi ha kai ʻo e meʻa naʻe faiʻaki ʻa e feilaulaú. ʻI he hū mai ʻa ʻEliapi, ko e foha lahi tahá, ʻoku vave hono fakatokangaʻi ʻe Sāmiuela ʻa ʻene matātangatá. ʻOku fakakaukau ʻa Sāmiuela ko e lahi ʻo ʻEliapí ʻoku feʻunga ke hoko ko e tuʻi pea ʻokú ne pehē loto pē ʻiate ia: “Ta ko e pani ʻa e ʻAfiona ʻoku tau [feʻao].”—Veesi 6.
Kae kehe, ʻoku kehe ʻa e vakai ia ʻa Sihová. ʻOkú ne pehē kia Sāmiuela: “ʻOua naʻa tokangaʻi hono fotunga, pe ko hono maʻolunga; he kuo u liʻaki ia.” (Veesi 7) ʻOku ʻikai leleiʻia ʻa Sihova ʻi he lōloa mo e fakaʻofoʻofa ʻo ʻEliapí. ʻOku ʻafioʻi ʻe he fofonga ʻo Sihová ʻa e meʻa kotoa pē ʻo fakalaka atu ia ʻi he fōtunga ʻi tuʻá ki he feituʻu ʻoku lava ke maʻu ai ʻa e fakaʻofoʻofa moʻoní.
ʻOku fakamatala ʻa Sihova kia Sāmiuela: “He talaʻehai ko e fai ki he sio ʻa e tangata; he ʻoku sio ʻa e tangata ki he mata, ka ʻoku sio ʻa e ʻEiki ki he loto.” (Veesi 7) ʻIo, ko e lotó—ʻa e tokotaha ʻi lotó, ʻa e matavai ʻo e fakakaukau, tōʻonga, mo e ongoʻi ʻa e tokotahá—ʻoku mahuʻinga kia Sihová. “Ko e sivi loto” ʻokú ne talitekeʻi ʻa ʻEliapi—pea pehē ki he foha ʻe toko ono hoko mai ʻo Sese ʻoku nau haʻu ki he ʻao ʻo Sāmiuelá.—Palovepi 17:3.
ʻOku toe pē ʻa e foha ʻe taha ʻo Sese, ko Tēvita, ko e siʻi tahá, ʻa ia “ʻoku ne tauhi ʻa e fanga sipi.” (Veesi 11) Ko ia ʻoku fekau atu ai ʻa Tēvita ke haʻu mei he vaó ki he ʻao ʻo Sāmiuelá. Pea ʻoku folofola ange ʻa Sihova kia Sāmiuela: “Tuʻu ʻo pani ia; he ko ia ia”! (Veesi 12) Ko e moʻoni, ko Tēvitá “naʻe fakaʻofoʻofa hono ongo foʻi fofonga, pea ko e tama hoihoifua.” Ka ko hono lotó ʻokú ne ʻai ia ke fakahōifua moʻoni ʻi he vakai mai ʻa e ʻOtuá.—1 Samiuela 13:14.
ʻI ha māmani ʻoku fakamamafaʻi lahi ʻaupito ai ʻa e fakaʻofoʻofa ʻi tuʻá, ʻe lava ke tau maʻu ʻa e fiemālie ʻi he ʻilo ʻoku ʻikai tākiekina ʻa e ʻOtua ko Sihová ʻe he fōtunga ʻi tuʻá. ʻOku ʻikai mahuʻinga kiate ia pe ʻokú ke lōloa fēfē pe ʻoku sio atu ʻa e niʻihi kehé ʻokú ke talavou pe fakaʻofoʻofa. Ko e tuʻunga ʻokú ke ʻi ai ʻi lotó, ʻa ho lotó, ʻoku mahuʻinga kia Sihová. ʻOku hanga ʻe he ʻiloʻi iá ʻo ueʻi koe ke ke loto ke fakatupulekina ʻa e faʻahinga ʻulungaanga te ne ʻai koe ke ke fakaʻofoʻofa ʻi he vakai mai ʻa e ʻOtuá?