ʻUnuʻunu Ofi ki he ʻOtuá

“Naʻa Ne Ngaue ke Fakamokomoko ʻa e Finangalo ʻo Sihova”

“NAʻÁ KU ongoʻi taʻetaau ʻaupito,” ko e lau ia ʻa ha tangata naʻá ne hē mei he tuʻunga fakaʻotua naʻe ʻohake ai iá. ʻI he kamata ke ne fou ʻi ha ngaahi sitepu ke foki mai aí, naʻá ne manavahē naʻa ʻikai ʻaupito fakamolemoleʻi ia ʻe he ʻOtuá. Ka ko e tokotaha angahala fakatomala ko ení naʻá ne maʻu ʻa e ʻamanaki ʻi he talanoa he Tohi Tapú fekauʻaki mo Manasé, kuo lēkooti ʻi he 2 Kalonikali 33:1-17. Kapau kuo faifai ange peá ke ongoʻi taʻetaau koeʻuhi ko e ngaahi angahala he kuohilí, ko koe foki te ke maʻu ʻa e fakafiemālie ʻi he faʻifaʻitakiʻanga ʻa Manasé.

Naʻe ʻohake ʻa Manase ʻi ha ʻapi anga-fakaʻotua. Ko ʻene tamaí, ʻa Hesekaia, ko e taha ia ʻo e ngaahi tuʻi ʻiloa taha ʻo Siutá. Naʻe fanauʻi ʻa Manase ʻi he taʻu nai ʻe tolu hili hono fakalōloa fakaemana ʻe he ʻOtuá ʻa e moʻui ʻa ʻene tamaí. (2 Tuʻi 20:1-11) ʻOku ʻikai ha veiveiua naʻe vakai ʻa Hesekaia ko e foha ko ení ko ha meʻaʻofa ia tupu mei he meesi ʻa e ʻOtuá pea naʻá ne feinga ke fakahūhū kiate ia ha ʻofa ki he lotu maʻá. Ka ko e fānau ʻa e ngaahi mātuʻa anga-fakaʻotuá ʻoku ʻikai maʻu pē ke nau muimui ʻi he ʻalunga ʻa ʻenau ngaahi mātuʻá. Ko e tuʻunga ia naʻe ʻi ai ʻa Manasé.

Naʻe taʻu 12 ʻa Manase ʻi he taimi naʻe mate ai ʻa ʻene tamaí. Ko e meʻa fakamamahí, ko Manasé naʻe “fai ʻe ia ʻa e meʻa naʻe tau kovi ki he finangalo ʻo Sihova.” (Veesi 1, 2) Naʻe tākiekina ʻa e tuʻi kei siʻí ʻe he kau faleʻi naʻe ʻikai te nau tokanga ki he lotu moʻoní? ʻOku ʻikai tala mai ia ʻe he Tohi Tapú. Ko e meʻa ʻokú ne tala maí ko Manasé naʻe hōloa ia ki he tauhi ʻaitoli mafatukituki mo e anga-fakamamahi. Naʻá ne fokotuʻu ʻa e ngaahi ʻōlita ki he ngaahi ʻotua loí, feilaulauʻaki ʻa hono ngaahi fohá tonu, fai ʻa e fakahaʻele faʻahikehe, pea fokotuʻu ʻa e ʻīmisi kuo tongi ʻi he temipale ʻo Sihova ʻi Selusalemá. Naʻe fakafisi ʻa e tokotaha anga-mālohi ko Manasé ke tokanga ki he toutou fakatokanga meia Sihová, ʻa e ʻOtua ʻa ia ko ʻene maná ē naʻe malava ai ke fanauʻi mai iá.—Veesi 3-10.

Naʻe faifai pē ʻo fakaʻatā ʻe Sihova ke haʻi sēiniʻi ʻa Manase ʻo ʻave ki Pāpilone. ʻI ai, ʻi hono fakahēʻí, naʻe maʻu ai ʻe Manase ha faingamālie ke fakakaukauloto ai ki hono ʻalungá. Naʻá ne sio he taimi ko ení ko ʻene ngaahi ʻaitoli ʻikai hanau mālohi mo maté naʻe ʻikai te nau malava ke maluʻi ia? Naʻe foki ʻene fakakaukaú ki he ngaahi meʻa naʻe akoʻi kiate ia ʻi heʻene kei siʻí ʻe heʻene tamai anga-fakaʻotuá? Ko e hā pē ʻa e tuʻungá, naʻe liliu ʻa e fakakaukau ʻa Manasé. ʻOku pehē ʻe he fakamatalá: “Naʻa ne ngaue ke fakamokomoko ʻa e finangalo ʻo Sihova ko hono ʻOtua, pea ne matuʻaki fakavaivaiʻi ia . . . ʻIo, naʻa ne punou ʻo hu ki Heʻene ʻAfio.”a (Veesi 12, 13) Ka ʻe lava moʻoni ʻo fakamolemoleʻi ʻe he ʻOtuá ha tangata naʻá ne fai ʻa e ngaahi angahala mamafa pehē?

Naʻe maongo kia Sihova ʻa e fakatomala loto-moʻoni ʻa Manasé. Naʻe fanongo ʻa e ʻOtuá ki heʻene ngaahi kōlenga ki ha mēsí “ʻo ne fakafoki ia ki Selusalema ki hono puleʻanga.” (Veesi 13) ʻI he fakamoʻoni ki heʻene fakatomalá, naʻe fai leva ʻe Manase ʻa e meʻa naʻá ne malavá ke fakatonutonu ʻa ʻene fehālaakí, fakaʻauha ʻa e tauhi ʻaitolí mei hono puleʻangá pea fakaʻaiʻai ʻa e kakaí “ke tauhi kia Sihova.”—Veesi 15-17.

Kapau ʻokú ke ongoʻi taʻetaau mo e fakamolemole ʻa e ʻOtuá koeʻuhi ko e ngaahi angahala ʻi he kuohilí, loto-toʻa ʻi he faʻifaʻitakiʻanga ʻa Manasé. Ko e talanoá ni ko e konga ia ʻo e Folofola fakamānavaʻi ʻa e ʻOtuá. (Loma 15:4) ʻOku hā mahino, ʻoku fiemaʻu ʻe Sihova ke tau ʻiloʻi ʻokú ne “faʻa fakamolemole.” (Sāme 86:5) ʻOku ʻikai ko e angahalá ka ko e tuʻunga ʻo e loto ʻo e tokotaha angahalá ʻoku mahuʻinga kiate iá. Ko ha tokotaha angahala ʻoku lotu fakataha mo ha loto-mafesí, liʻaki ʻa hono ngaahi ʻalunga halá, pe fai ʻa e ngaahi feinga ʻosi fakapapauʻi ke fai ʻa e meʻa ʻoku totonú ʻokú ne hoko nai ai ʻo ‘ngaue ke fakamokomoko ʻa e finangalo ʻo Sihová,’ ʻo hangē pē ko ia naʻe fai ʻe Manasé.—Aisea 1:18; 55:6, 7.

[Fakamatala ʻi lalo]