ʻAi ʻa e Taimi Akó ke Fakafiefia mo Ola Lelei Ange

ʻE lava fēfē ke tau maʻu e fiefia lahi ange ʻi hono ako ʻa e Tohi Tapú? ʻE lava fēfē ke tau ʻai ʻetau ngaahi taimi akó ke ola lelei angé? Tau lāulea nounou angé ki he sitepu mahuʻinga ʻe tolu ʻe tokoniʻi ai kitautolu ke maʻu ʻaonga lahi taha mei heʻetau ako fakafoʻituitui ʻa e Tohi Tapú.

1 LOTU: Ko e ʻuluaki sitepu ke fou aí ko e lotu. (Saame 42:8) Ko e hā hono ʻuhingá? ʻOku totonu ke tau fakakaukau ki he ako e Folofola ʻa e ʻOtuá ko e konga ia ʻetau lotú. Ko ia ai, ʻoku fiemaʻu ke tau kole kia Sihova ke ne ʻai ke tau maʻu e faʻunga fakakaukau totonu pea ʻomai kia kitautolu hono laumālie māʻoniʻoní. (Luke 11:13) ʻOku pehē ʻe Barbara, ko ha misinale fuoloa: “ʻOku ou lotu maʻu pē ki muʻa ke lau pe ako ʻa e Tohi Tapú. Hili iá, ʻoku ou ongoʻi ʻoku kau mo au ʻa Sihova pea ʻokú ne hōifua ki he meʻa ʻoku ou faí.” Ko e lotu ki muʻa ʻi he akó ʻokú ne fakaava hotau ʻatamaí mo e lotó ke tali kakato ʻa e meʻakai fakalaumālie lahi fau ʻoku ʻi muʻa ʻia kitautolú.

2 FAKALAULAULOTO: Koeʻuhi ko e siʻi ʻa e taimí, ʻoku fakangatangata pē ai ʻe he niʻihi kinautolu ki hano lau fakavave ʻa e Folofola ʻa e ʻOtuá. Kae kehe, ʻoku nau tō ai mei he ngaahi ʻaonga naʻe lava ke nau maʻu mei hono ako e Tohi Tapú. Ko Carlos, ʻa ia kuó ne tauhi kia Sihova laka hake he taʻu ʻe 50, kuó ne hoko ʻo ʻiloʻi ʻa e mahuʻinga hono vaheʻi ʻa e taimi ki he fakalaulaulotó ke ʻai ʻene akó ke ola lelei ange. ʻOkú ne pehē: “ʻOku ou lau he taimí ni ʻi ha taimi ha ngaahi peesi siʻi ange ʻo e Tohi Tapú—ko e peesi nai ʻe ua ʻi he ʻaho taki taha. ʻOku ou lava leva ke vaheʻi ʻa e taimi lahi ange ke fakalaulauloto ki he meʻa ʻoku ou laú koeʻuhi ke u ako ai ha ngaahi lēsoni mahuʻinga.” (Saame. 77:12) ʻI heʻetau vaheʻi ʻa e taimi ke fakalaulauloto aí, ʻoku tau fakalahi ai ʻetau ʻiloʻi mo mahinoʻi ʻa e finangalo ʻo e ʻOtuá.—Kol. 1:9-11.

3 NGĀUEʻAKI: Kapau ʻoku tau sio ki he mahuʻinga ʻo ha ngāue, ʻoku tau maʻu ʻaonga lahi ange mei ai. Ko e moʻoni eni ʻi he fekauʻaki mo e ako Tohi Tapú. “Ko e akó ʻoku tokoniʻi ai au ke ikuʻi e ngaahi palopalema ʻi he moʻui fakaʻahó, pea teuʻi ai au ke tokoniʻi ʻa e niʻihi kehé,” ko e lau ia ʻa Gabriel, ko ha tokoua kei talavou ʻoku ʻi ai ʻene founga ako Tohi Tapu tuʻumaʻu. ʻOkú ne toe pehē: “ʻOku ou feinga ke ngāueʻaki ʻi heʻeku moʻui fakafoʻituituí ʻa e meʻa kotoa ʻoku ou akó.” (Teu. 11:18; Sios. 1:8) ʻIo, ʻoku ʻi ai ha ʻilo fakaʻotua lahi ʻa ia ʻe lava ke tau maʻu pea ngāueʻaki.—Pal. 2:1-5.

FAKAMANATU: Ko ha monū ē ʻoku tau maʻu ke kumi ki he ʻilo kuo tokonaki mai ʻe Sihová, ʻa e Matavai ʻo e poto kotoa pē! (Loma 11:33) Ko ia ai, ko e taimi hoko te ke ako aí, fakapapauʻi ke ke ʻuluaki lotu kia Sihova ʻo kole kiate ia ke ne ʻoatu ʻa e faʻunga fakakaukau totonú mo hono laumālie māʻoniʻoní. Pea kiʻi tuʻu ʻi ha ngaahi taimi ke fakalaulauloto ai ki he meʻa ʻokú ke laú. Pehē foki, hokohoko atu pea ngāueʻaki ʻi hoʻo moʻui fakaʻahó ʻa e ngaahi meʻa ʻokú ke akó. ʻI hoʻo fou he ngaahi sitepu mahuʻinga ko ení, te ke ʻiloʻi ai ko hoʻo ako ʻa e Tohi Tapú ʻoku hoko ia ʻo fakafiefia mo ola lelei ʻaupito.