ʻE Hoko ʻo Ngata ʻa e Māmaní?

▪ Naʻe tui ʻa e niʻihi ʻe ngata ʻa e māmaní ʻi he ʻaho 21 ʻo ʻOkatopa 2011. Naʻe ʻikai ke hoko ia. Ko ia, ko e kikite ʻa e faipolokalama letiō ʻAmelika ko Harold Camping naʻe ʻikai ke fakahoko moʻoni ia. Naʻá ne tomuʻa tala ko e ʻAho Fakamāú ʻe hoko mai ia ʻi he ʻaho 21 ʻo Mē 2011—ko ha fuʻu mofuike lahi ʻe hoko takatakai he kolopé, pea hili ha māhina ʻe nima mei ai, ʻi he ʻaho 21 ʻo ʻOkatopá, ʻe ʻauha ai ʻa e foʻi māmaní.

Kae kehe, ko e māmaní ʻe ʻikai ʻaupito ke hoko ʻo ngata ia. Ko e Tokotaha-Fakatupu ʻo e māmaní ʻe ʻikai ke ne fakaʻatā ia. ʻOku pehē ʻi heʻene Folofolá: “Kuo ke fokotuu a mamani, bea oku tuu mau ia.”—Saame 119:90, PM.

Kae kehe, ʻe talitekeʻi nai ia ʻe he kau lau Tohi Tapu ʻe niʻihi ʻo pehē ko e foʻi palanite ko ení ʻe fakaʻauhaʻaki ia ha afi. ʻOku nau ngāueʻaki ʻa e 2 Pita 3:7, 10 ke poupouʻiʻaki ʻa e fakakaukau ko iá: “ʻI he foʻi folofola tatau pē, ko e ngaahi langi pea mo e māmani ʻa ia ʻoku ʻi ai ʻi he taimi ní, ʻoku tuku tauhi ia ki he afi pea ʻoku kei tauhi pē ia kae ʻoua ke aʻu ki he ʻaho ʻo e fakamāú pea mo e ʻaho ʻo hono fakaʻauha ʻa e kakai anga-taʻefakaʻotuá. . . . Neongo ia ko e ʻaho ʻo Sihová ʻe hoko mai ia ʻo hangē ha kaihaʻá, ʻa ia ʻe mole atu ai ʻa e ngaahi langí fakataha mo ha fuʻu longoaʻa fakafokifā, ka ko e ngaahi ʻelemēnití ʻi heʻenau hoko ʻo mātuʻaki velá te nau vaia, pea ko e māmaní mo e ngaahi ngāue ʻi aí ʻe fakaeʻa.” ʻOku totonu ke fakaʻuhingaʻi fakahangatonu ʻa e ngaahi lea ko eni ʻa e ʻapositolo ko Pitá?

ʻIkai, ʻoku ʻikai ke pehē. Ko e hā hono ʻuhingá? Koeʻuhi ko hono fakaʻuhingaʻi ʻa e ongo veesi ko ení kuo pau ke fehoanaki ia mo e potutohi ʻo e tohi ʻa Pitá pea pehē ki he toenga ʻo e Tohi Tapú. Ko hano fakaʻuhingaʻi fakahangatonu ʻa e ongo veesi ko iá ʻe ʻuhinga iá ko e ngaahi langí, pe ʻunivēsí—ʻa e laulaui piliona ʻo e ngaahi fetuʻú mo e ngaahi meʻa kehé—ʻe keina ia ʻe he afí koeʻuhi ko ha kiʻi konga pē ʻe taha ʻi hono tuʻunga lahi kāfakafá ʻoku ʻi ai ha kakai fulikivanu. Te ke fakaʻauha ha laui maile ʻo ha matātahi ʻoneʻone koeʻuhi ko ha kiʻi foʻi ʻoneʻone ʻe taha ʻokú ke fehiʻa ai? ʻE ʻikai ke ʻuhinga lelei ia! Ko ia ʻoku tatau pē mo Sihova ʻe ʻikai ke ne fakaʻauha ʻa e kotoa ʻo e ʻuniveesi naʻá ne fakatupú koeʻuhi ko ha angatuʻu naʻe tupu mei ha taha pē ʻo ʻene ngaahi ngāue fakaefakatupú.

ʻIkai ko ia pē, ko ha vakai pehē ʻoku fepaki fakahangatonu ia mo e ngaahi lea ʻa Sīsū Kalaisi, ʻa ia naʻá ne pehē: “Fiefia ē ka ko e kau anga-maluú, he te nau maʻu ʻa e māmaní.” (Mātiu 5:5; Saame 37:29) ʻE hanga ʻe ha tamai ʻofa ʻo langa ha fale lelei maʻa hono fāmilí koeʻuhi pē ke tutu ia? (Saame 115:16) ʻE fuʻu fakavalevale ia! Ko Sihova ʻoku ʻikai ngata pē ʻi heʻene hoko ko e Tokotaha-Fakatupú ka ko ha Tamai ʻofa foki ia.—Saame 103:13; 1 Sione 4:8.

ʻOku ngāueʻaki ʻe Pita ʻa e foʻi lea “māmani” ʻi ha ʻuhinga fakaefakatātā, ʻo ʻuhinga ki he sōsaieti ʻo e faʻahinga ʻo e tangatá—ʻi he tuʻunga ko ení ko e sōsaieti fulikivanu ia ʻo e faʻahinga ʻo e tangatá. Fakatokangaʻi ʻoku fakahoatatau ia ʻe Pita ki he Lōmaki ʻi he ʻaho ʻo Noá. (2 Pita 3:5, 6) ʻI he meʻa ko ia naʻe hokó, ko e faʻahinga fulikivanu pē ʻo e tangatá naʻe fakaʻauhá; ko e foʻi māmaní tonu pea mo Noa anga-tonu mo hono fāmilí naʻe hao ia. ʻI he ʻuhinga meimei tatau, ko hono ngāueʻaki ko ia ʻe Pita ʻa e “ngaahi langi” ʻe toe ʻuhinga fakaefakatātā foki mo ia. ʻI he tuʻunga ko ení, ko e “ngaahi langi” ʻoku ʻuhinga ia ki he tuʻunga-pule fakaetangata ʻoku pule ki he kau anga-taʻefakaʻotuá. Ko ia, ko e kau fulikivanu taʻemangoí te nau puli atu, ʻo hangē pē ko e kotoa ʻo e ngaahi puleʻanga fulikivanú, ʻa ia ʻe vaia pea fetongi ʻe he pule, pe Puleʻanga fakahēvani ʻo e ʻOtuá.—Taniela 2:44.

Ko ia, ʻe hoko ʻo ngata ʻa e foʻi palanite ko māmaní? ʻIkai. Ko e meʻa ʻe ngatá ko e foʻi māmani fakaefakatātaá, pe ko e sōsaieti fulikivanu ʻo e faʻahinga ʻo e tangatá. Ko e foʻi māmaní tonu mo e sōsaieti anga-fakaʻotua ʻo e faʻahinga ʻo e tangatá ʻi he kahaʻú ʻe tuʻu ʻo taʻengata.—Palōveepi 2:21, 22.