Ko e Hā ʻOku Pehē Ai ʻe he Kakaí ʻOku Anga-Fakamamahi ʻa e ʻOtuá?

ʻOKÚ KE ongoʻi ʻoku fakaʻohovale ʻa e fehuʻi ʻi he takafi ʻo e makasini ko ení? ʻOku pehē ʻa e niʻihi, ka ko ha kakai tokolahi he ʻahó ni ʻoku nau fifili pe ʻoku anga-fakamamahi ʻa e ʻOtuá—pe ʻoku nau fakamahalo ʻokú ne pehē. Ko e hā hono ʻuhingá?

ʻOku ʻeke ʻe he niʻihi ʻoku nau hao mei he ngaahi fakatamaki fakanatulá: “Ko e hā ʻoku fakaʻatā ai ʻe he ʻOtuá ke hoko ʻa e meʻá ni? ʻOkú ne taʻemahuʻingaʻia? Pe ʻokú ne anga-fakamamahi?”

Ko e niʻihi ʻoku fakahohaʻasi tatau ʻi heʻenau lau ʻa e Tohi Tapú. ʻOku nau ʻiloʻi ʻa e ngaahi fakamatala ko ia fekauʻaki mo Noa mo e Lōmakí, pea nau fifili, ‘Ko e hā naʻe hanga ai ʻe ha ʻOtua ʻofa ʻo tāmateʻi ʻa e kakai kotoa ko iá? ʻOkú ne anga-fakamamahi?’

ʻOkú ke faʻa ʻeke ʻa e ngaahi fehuʻi peheé ʻi ha taimi? Pe ʻoku ʻikai te ke malava ke ʻoatu ha tali ki he faʻahinga ʻoku nau fifili pe ʻoku anga-fakamamahi ʻa e ʻOtuá? Pe ko e hā pē ʻa e tuʻungá, fakakaukau ki ha fehuʻi kehe ʻe tokoni nai.

KO E HĀ ʻOKU TAU FEHIʻA AI ʻI HE ANGA-FAKAMAMAHÍ?

ʻI hono ʻai mahinó, ʻoku tau fehiʻa ʻi he anga-fakamamahí koeʻuhí he ʻoku tau ʻiloʻi ʻa e tonú mo e halá. ʻOku tau kehekehe lahi mei he fanga monumanú ʻi he tuʻunga ko iá. Naʻe ngaohi kitautolu ʻe hotau Tokotaha-Fakatupú “ʻi he imisi oʻona.” (Sēnesi 1:27) ʻOku ʻuhinga iá ki he hā? Naʻá ne ʻomai kia kitautolu ʻa e malava ke tapua atu hono ngaahi angá mo e ngaahi tuʻunga fakaeʻulungāngá, mo ʻene ʻiloʻi ʻa e tonú mo e halá. Fakakaukau ki heni: Kapau ko e ʻiloʻi ʻo e tonú mo e halá ʻoku tau maʻu ia mei he ʻOtuá pea ʻoku tau hehema ke fehiʻa ʻi he anga-fakamamahí, ʻikai ʻoku fakahuʻunga mei ai ko e ʻOtuá ʻoku fehiʻa mo ia ai?

ʻOku fakapapauʻi ʻi he Tohi Tapú ʻa e foʻi fakakaukau ko iá, he ʻi he Tohi Tapú, ʻoku fakapapauʻi mai ʻe he ʻOtuá: “ʻOku maʻolunga hoku ngaahi ʻalunga ʻi he ngaahi ʻalunga ʻomoutolu, mo ʻeku ngaahi fakakaukau ʻi he ngaahi fakakaukau ʻamoutolu.” (ʻAisea 55:9) Kapau te tau fakamāuʻi ʻa e ʻOtuá ʻokú ne anga-fakamamahi, ʻikai te tau leaʻaki ʻa e fehangahangaí—ʻo pehē ʻoku māʻolunga ange hotau ngaahi ʻalungá ʻi hono ngaahi ʻalungá? ʻE fakapotopoto ange ke maʻu ha ngaahi moʻoni lahi ange ki muʻa ke tau fakakaukau peheé. Mahalo ʻoku totonu ke tau ʻeke, ʻo ʻikai ko e anga-fakamamahi ʻa e ʻOtuá, ka ko e ʻuhinga ʻoku hā ngali anga-fakamamahi ai ʻene ngaahi ngāue ʻe niʻihi. Ke tokoniʻi kitautolú, tau fakakaukau angé ki he ʻuhinga moʻoni ʻo e “anga-fakamamahí.”

ʻI he taimi ʻoku tau ui ai ha taha ʻoku anga-fakamamahi, ʻoku tau fakamāuʻi ʻene ngaahi fakaueʻilotó. Ko ha tokotaha anga-fakamamahi ko e tokotaha ia ʻokú ne fiefia ʻi he sio ʻoku faingataʻaʻia ʻa e niʻihi kehé pe ʻoku ʻikai ke ne mahuʻingaʻia ʻi heʻenau mamahí. Ko ia ai, ko ha tamai ʻokú ne akonekina hono fohá koeʻuhí ʻokú ne saiʻia ʻi hono fakamamahiʻi e ongo hono fohá ʻoku anga-fakamamahi. Ka ko ha tamai ʻokú ne akonekina hono fohá ke fakahinohinoʻi pe maluʻi ia ʻoku lelei. Ko e ngaahi fakaueʻilotó ʻoku faingofua ke maʻuhala, ʻo hangē ko ia ʻokú ke ʻiloʻi leleí kapau kuo faifai ange ʻo fakamaauhalaʻi koe ʻe ha taha.

Tau vakai angé ki he ʻuhinga ʻe ua ʻoku fakakaukau ai ʻa e niʻihi ʻoku anga-fakamamahi ʻa e ʻOtuá—ko e ngaahi fakatamaki fakanatula ʻoku tau sio ki ai he ʻaho ní pea mo e ngaahi fakamaau fakaʻotua ʻoku tau lau ʻi he Tohi Tapú. ʻOku fakahaaʻi ʻi he ngaahi foʻi moʻoní ʻoku anga-fakamamahi ʻa e ʻOtuá?