ʻE Lava ke Ongoʻi Mamahi ʻa e ʻOtuá—Founga ʻe Lava Ke Tau ʻOatu Ai Kiate Ia ʻa e Fiefiá

Kuo faifai ange peá ke ongoʻi mamahi lahi ʻaupito ʻoke tangi?—a Ko kitautolu kotoa ʻoku ngalingali kuo tau pehē. Kae kehe, ʻi he taimi ʻe niʻihi ʻoku ʻikai nai ko e mamahí ʻoku hoko ia ki hotau sinó. ʻE lea ʻaki nai ʻe ha tokotaha ha ngaahi meʻa ʻoku kovi fekauʻaki mo kitautolu ʻa ia ʻoku ʻikai ke moʻoni. ʻOku lava ke fakalotomamahi ia, ʻikai ko ia?— Ko e ʻOtuá foki ʻe lava ke ne ongoʻi mamahi ʻi he taimi ʻoku tala ai ha ngaahi loi fekauʻaki mo ia. Tau lāulea angé ki he meʻá ni pea sio ki he founga ʻe malava ke tau ʻoatu ai ki he ʻOtuá ʻa e fiefia kae ʻikai ko e mamahi.

ʻOku pehē ʻe he Tohi Tapú ko e kakai ʻe niʻihi naʻa nau lau ʻoku nau ʻofa ki he ʻOtuá naʻa nau “fakamamahiʻi ia.” ʻIo, naʻa “nau hūhūmamaʻi” pe fakalotomamahiʻi ʻa e ʻOtuá! Ko e moʻoni, ʻoku ʻikai lava ʻe ha taha ke ne fakamamahiʻi ʻa e sino ʻo Sihova ko e ʻOtuá. Ko e māfimafi-aoniú ia. Ko ia ai, tau sio angé ki he ʻuhinga ʻoku ongoʻi mamahi ai ʻa Sihova ʻi he taimi ʻoku ʻikai ke tau fai ai ʻa e meʻa ʻokú ne folofolaʻakí.

Ko e ʻuluaki ongo mātuʻa naʻe fakatupu ʻe Sihova ʻi he māmaní naʻá na ʻai ia ke hoko ʻo ongoʻi mamahi lahi. Naʻe tuku ʻa e toko ua ko ení he Palataisi ʻi he māmaní naʻe ui ko e “ngouetapu ʻo Iteni.” Ko hai ʻa e toko ua ko ení?— ʻIo ko ʻĀtama pea hoko mai leva ʻi ha taimi ki mui ai ʻa ʻIvi. Tau sio angé ki he meʻa naʻá na fai ʻo fakatupunga ai ʻa Sihova ke mamahí.

Hili hono tuku kinaua ʻe Sihova ki he ngoue ko iá, naʻá ne tala ange kiate kinaua ke na tokangaʻi ia. Naʻá ne toe tala ange foki kiate kinaua ʻe malava ke na maʻu fānau pea nofo fakataha ʻi he ngoué ʻo ʻikai toe mate. Ka ki muʻa pea maʻu fānau ʻa ʻĀtama mo ʻIví, naʻe hoko ha meʻa fakalilifu. ʻOkú ke ʻiloʻi ko e hā e meʻa ko iá?— Ko ha ʻāngelo naʻá ne ueʻi ʻa ʻIvi pea ki mui aí ko ʻĀtama ke na angatuʻu ʻo fakafepaki kia Sihova. Tau sio angé ki he founga naʻe hoko ai ení.

Naʻe ʻai ʻe ha ʻāngelo ha ngata ke hā ngali naʻe lea. Naʻe saiʻia ʻa ʻIvi ʻi he meʻa naʻe fanongo ki aí—naʻe tala ange ʻe he ngatá te ne hoko ʻo “hange ko e ʻOtua.” Ko ia, naʻá ne fai ʻa e meʻa naʻe tala ange ʻe he ngatá ke ne faí. ʻOkú ke ʻiloʻi ko e hā ia?—

Naʻe kai ʻa ʻIvi mei he fuʻu ʻakau naʻe tala ʻe Sihova kia ʻĀtama ʻoku totonu ke ʻoua te na kai mei aí. Ki muʻa ke ngaohi ʻe he ʻOtuá ʻa ʻIví, naʻá ne tala kia ʻĀtama: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.”

Naʻe ʻosi ʻiloʻi ʻe ʻIvi ʻa e lao ko iá. Kae kehe, naʻá ne hanganaki sio ki he fuʻu ʻakau ko iá, peá ne vakai “ʻoku lelei ki he kai, pea matamatalelei ki he mata . . . pea ne hanga ʻo toli hono fua, ʻo kai.” Ki mui ai, naʻá ne ʻoange ʻa e fuaʻiʻakaú kia ʻĀtama pea “kai mo ia.” ʻOkú ke fakakaukau ko e hā naʻá ne fai ai iá?— Koeʻuhí naʻe hoko ʻa ʻĀtama ʻo ʻofa lahi ange ia ʻia ʻIvi ʻi heʻene ʻofa kia Sihová. Naʻá ne fili ke fakahōhōʻiaʻi ʻa ʻIvi kae ʻikai ke fakahōifuaʻi ʻa e ʻOtuá. Ka ko e talangofua kia Sihová ʻoku mahuʻinga ange ia ʻi he talangofua ki ha toe taha kehe pē!

ʻOkú ke manatuʻi ʻa e ngata naʻe lea kia ʻIví? Hangē pē ko e lava ke ʻai ʻe ha tokotaha ha tamapua ke hā ngali ʻoku leá, naʻe ʻai ʻe ha tokotaha ʻa e ngata ko iá ke hā ngali ʻoku lea. Ko e leʻo ʻo hai naʻe haʻu mei he ngatá?— Ko e leʻo ia ʻo e “ngata ʻo onoʻahó, ʻa e tokotaha ʻoku ui ko e Tēvoló mo Sētané.”

ʻOkú ke ʻiloʻi ʻa e founga ʻe lava ke ke ʻai ai ʻa Sihova ke fiefiá?— ʻE lava ke ke fai pehē ʻaki ʻa e feinga maʻu pē ke fakahōifuaʻi ia. ʻOku pehē ʻe Sētane ʻoku lava ke ne ʻai ʻa e tokotaha kotoa pē ke nau fai ʻa e meʻa ʻokú ne fiemaʻu ke nau faí. Ko ia ʻoku ekinaki mai ʻa Sihova kiate kitautolu: “E hoku foha [pe ʻofefine], ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.” ʻOku manukiʻi pe lumaʻi ʻe Sētane ʻa Sihova. ʻOkú ne pehē ʻe lava ke ne fakatafokiʻi ʻa e tokotaha kotoa pē mei he tauhi kiate Iá. Ko ia ai, ʻai ʻa Sihova ke fiefia ʻaki ʻa e talangofua kiate ia mo tauhi ia! Te ke feinga mālohi ke fai ia?—