TALI ʻO E NGAAHI FEHUʻI FAKATOHITAPÚ

Ko e tokotaha fēfē ʻa e ʻOtuá?

Ko e ʻOtuá ko ha tokotaha laumālie taʻehāmai. Naʻá ne fakatupu ʻa e ngaahi langí, māmaní mo e ngaahi meʻa moʻuí kotoa. Naʻe ʻikai fakatupu ʻe ha taha ʻa e ʻOtuá—naʻe ʻikai ʻi ai hano kamataʻanga. (Saame 90:2) ʻOku finangalo ʻa e ʻOtuá ki he kakaí ke kumi kiate ia pea ʻiloʻi ʻa e moʻoni fekauʻaki mo iá.—Lau ʻa e Ngāue 17:24-27.

Ko e ʻOtuá ko e tokotaha ia ʻe lava ke tau ʻiloʻi ʻaki hono huafá. ʻE lava ke tau ʻiloʻi hono ngaahi ʻulungaanga ʻe niʻihi ʻaki ʻa e fakalaulauloto ki he ngaahi meʻa kuó ne ngaohí. (Loma 1:20) Ka ke ʻiloʻi lelei ʻa e ʻOtuá, ʻoku fiemaʻu ke tau ako ʻene Folofolá, ko e Tohi Tapú. ʻOku tau alāanga ai mo e ngaahi ʻulungaanga anga-ʻofa ʻo e ʻOtuá.—Lau ʻa e Saame 103:7-10.

ʻOku anga-fēfē ongoʻi ʻa e ʻOtuá ki he fakamaau taʻetotonú?

Ko hotau Tokotaha-Fakatupú, ʻa Sihova ʻoku fehiʻa ki he fakamaau taʻetotonú. Pea naʻá ne fakatupu ʻa e faʻahinga ʻo e tangatá ʻi hono ʻīmisí. (Teutalōnome 25:16) Ko e ʻuhinga ia ʻoku fehiʻa ai ʻa e tokolahi taha ʻo kitautolu ʻi he fakamaau taʻetotonú. Ko e fakamaau taʻetotonu takatakai ʻiate kitautolú ʻoku ʻikai ko e fakatupunga ia ʻe he ʻOtuá. Naʻe foaki ʻe he ʻOtuá ki he tangatá ʻa e tauʻatāina ke fili. Ko e meʻa fakamamahí, ʻoku ngāuehalaʻaki ʻe he kakai tokolahi ʻenau tauʻatāina ke filí mo nau tōʻongaʻaki ʻa e fakamaau taʻetotonú. ʻOku mamahi ʻa e loto ʻo Sihová.—Lau ʻa e Sēnesi 6:5, 6; Teutalōnome 32:4, 5.

ʻOku ʻofa ʻa Sihova ʻi he fakamaau totonú pea heʻikai ke ne kātakiʻi ʻo taʻengata ʻa e fakamaau taʻetotonú. (Saame 37:28, 29) ʻOku talaʻofa ʻa e Tohi Tapú ʻe vavé ni ke fakangata ʻe he ʻOtuá ʻa e kotoa ʻo e fakamaau taʻetotonú.—Lau ʻa e 2 Pita 3:7-9, 13.