TALI ʻO E NGAAHI FEHUʻI FAKATOHITAPÚ
Ko e moʻoni naʻe fokotuʻu hake ʻe Sīsū ha kakai mei he maté?
Naʻe toe fokotuʻu ʻe Sīsū ʻa Lāsalosi, ʻa ia naʻe mate feʻunga mo e ʻaho ʻe fā
ʻOku fakamatalaʻi mahino mai ʻi he Tohi Tapú naʻe fokotuʻu ʻe Sīsū ʻa e kakai maté ke moʻui. Ko e fakamatala ko iá ʻoku ʻikai ko ha talatupuʻa; naʻe hoko ia ʻi he ngaahi feituʻu moʻoni pea ʻi he ngaahi taimi pau. Ko e fakatātaá, ʻi he lolotonga ʻa e faʻahitaʻu māfana ʻo e taʻu 31 T.S., naʻe fononga ai ʻa Sīsū fakataha mo ha kakai tokolahi mei Kāpaneume ki Neini. ʻI heʻenau aʻu atú naʻa nau toe fetaulaki ai mo ha kakai tokolahi. ʻOku lava ke ke falala ki he fakamatala hono hoko fekauʻaki mo e toetuʻú koeʻuhi ʻoku lēkooti ia ʻi he Folofola ʻa e ʻOtuá, ko e Tohi Tapú, pea koeʻuhí naʻe fakahoko ʻi he feituʻu ʻo sio ki ai ʻa e kau fakamoʻoni kotoa ko iá.—Lau ʻa e Luke 7:11-15.
Naʻe toe fokotuʻu foki ʻe Sīsū hono kaumeʻa ko Lāsalosí, ʻa ia naʻe mate feʻunga mo e ʻaho ʻe fā. ʻOku lava ke ke tui ki he fakamatala fekauʻaki mo e meʻa naʻe fakahoko ʻe Sīsū ʻi he ʻaho ko iá koeʻuhí naʻe sio foki ki ai ʻa e kau fakamoʻoni tokolahi.—Lau ʻa e Sione 11:39-45.
Ko e hā naʻe fokotuʻu hake ai ʻe Sīsū ʻa e kakaí?
Naʻe fokotuʻu hake ʻe Sīsū ʻa e kakaí koeʻuhi naʻe ueʻi ia ʻe heʻene manavaʻofá. Naʻá ne toe fakahoko iá ke fakahaaʻi ai ko ʻene Tamaí, ʻa e Tokotaha-Fakatupu ʻo e moʻuí naʻá ne ʻoange kiate ia ʻa e mālohi ke ikuʻi ʻa e maté.—Lau ʻa e Sione 5:21, 28, 29.
Ko e fokotuʻu hake ʻe Sīsū ʻa e kau maté ʻoku tau maʻu ai ʻa e falala-pau ʻi heʻene ngaahi talaʻofa fekauʻaki mo e kahaʻú. Te ne fokotuʻu hake ha fuʻu kakai tokolahi, ʻo kau ai ʻa e kakai taʻemāʻoniʻoni naʻe ʻikai ʻaupito haʻanau ʻilo ki he ʻOtua moʻoní. ʻE ʻoange ai kiate kinautolu ha faingamālie ke nau ʻiloʻi mo ʻofa kia Sihova ko e ʻOtuá.—Lau ʻa e Ngāue 24:15.