Ko e Hā ke Ako Ai ʻa e Tohi Tapú?

Kuó ke ʻeke hifo kiate koe ʻa e ngaahi fehuʻi hangē ko ení? Kapau ʻoku pehē, ʻoku ʻikai ko koe pē. ʻOku fakakaukau ʻa e kakai takatakai ʻi he māmaní ki he ngaahi fehuʻi mahuʻinga ʻi he moʻuí. ʻE lava ke ke maʻu ʻa e talí?

ʻOku laui miliona ʻa e kakai te nau pehē, “ʻIo!” Ko e hā hono ʻuhingá? Koeʻuhí kuo nau maʻu ʻa e ngaahi tali fakafiemālie ki heʻenau ngaahi fehuʻí mei he Tohi Tapú. Te ke saiʻia ke ʻiloʻi ʻa e meʻa ʻoku leaʻaki ʻe he Tohi Tapú? Te ke fakaʻamu nai ke maʻu ʻaonga mei he polokalama ako Tohi Tapu taʻetotongi ʻoku fai ʻe he Kau Fakamoʻoni ʻa Sihová.a

Ko e moʻoni, ko e taimi ke sio ai ki he Tohi Tapú, ʻoku pehē ʻe he kakai ʻe niʻihi: “ʻOku ou fuʻu femoʻuekina.” “ʻOku fuʻu faingataʻa.” “ʻOku ou manavasiʻi ke fai ha fakapapau.” Ka ʻoku kehe ʻa e vakai ia ʻa e niʻihi. ʻOku nau tali lelei ʻa e faingamālie ke ako ʻa e meʻa ʻoku akoʻi ʻe he Tohi Tapú. Sio angé ki ha fakatātā ʻe niʻihi:

• “Naʻá ku ʻalu ki he siasi Katoliká mo e Palotisaní, temipale Sīkí, monasiteliō Putá pea naʻá ku ako teolosia ʻi ha ʻunivēsiti. Neongo ia naʻe teʻeki ai pē tali ʻeku ngaahi fehuʻi lahi fekauʻaki mo e ʻOtuá. Naʻe ʻaʻahi mai leva ʻa e taha ʻo e Kau Fakamoʻoni ʻa Sihová ki hoku ʻapí. Naʻe maongo kiate au ʻene ngaahi tali makatuʻunga ʻi he Tohi Tapú peá u loto ke ako Tohi Tapu.”—Gill, ʻIngilani.

• “Naʻe lahi ʻeku fehuʻi fekauʻaki mo e moʻuí, ka naʻe ʻikai ke fakafiemālie ʻa e tali naʻe ʻomai ʻe he faifekau ʻi hoku siasí. Kae kehe, naʻe tali ʻe he taha ʻo e Kau Fakamoʻoni ʻa Sihová ʻeku ngaahi fehuʻí ʻo ngāueʻaki pē ʻa e Tohi Tapú. ʻI heʻene ʻeke mai pe ʻoku ou fie ako lahi angé, naʻá ku tali fiefia ia.”—Koffi, Penini.

• “Naʻá ku fieʻilo ki he tuʻunga ʻo e kau maté. Naʻá ku tui ko e kau maté ʻe lava ke nau uesia ʻa e kau moʻuí, ka naʻá ku loto ke ʻiloʻi ʻa e lau ʻa e Tohi Tapú. Ko ia naʻá ku kamata ako Tohi Tapu mo ha kaungāmeʻa ʻa ia ko ha Fakamoʻoni.”—José, Pelēsila.

• “Naʻá ku lau ʻa e Tohi Tapú ka naʻe ʻikai lava ke u mahinoʻi. Pea naʻe ʻaʻahi mai kiate au ʻa e Kau Fakamoʻoni ʻa Sihová ʻo fakamatalaʻi mahino ha ngaahi kikite mei he Tohi Tapú. Naʻá ku loto ke u toe ʻilo lahi ange.”—Dennize, Mekisikou.

• “Naʻá ku fifili pe ʻoku tokanga moʻoni mai ʻa e ʻOtuá. Ko ia, naʻá ku lotu ai ki he ʻOtua ʻo e Tohi Tapú. ʻI he ʻaho hokó naʻe tukituki mai ʻa e Kau Fakamoʻoní ʻi hoku matapaá pea naʻá ku tali ha ako Tohi Tapu.”—Anju, Nepolo.

ʻOku fakamanatu mai ʻe he ngaahi hokosia ko ení ʻa e lea ʻa Sīsū: “Fiefia ē ka ko kinautolu ʻoku nau lāuʻilo ʻoku ʻi ai ʻenau fiemaʻu fakalaumālié.” (Mātiu 5:3) ʻIo, ko e faʻahinga ʻo e tangatá ʻoku fakanatula pē ke ʻi ai ʻenau fiemaʻu fakalaumālie. Ko e ʻOtuá pē ʻoku lava ke ne fakalato ʻa e fiemaʻu ko iá pea ʻokú ne fai eni fakafou ʻi heʻene Folofolá ʻa e Tohi Tapú.

Ko ia, ko e hā ʻoku kau ki ha ako Tohi Tapu? ʻE lava fēfē ke ke maʻu ʻaonga mei ai? Ko e ongo fehuʻi ko ení ʻe tali ia ʻi he kupu hoko maí.