TALI ʻO E NGAAHI FEHUʻI FAKATOHITAPÚ

Ko e hā ʻa e ʻAho Fakamaau?

ʻI he taimi ʻo e Tohi Tapú, naʻe ngāueʻaki ʻe he ʻOtuá ʻa e kau fakamāú ke fakahaofi ʻene kakaí mei he fakamaau taʻetotonú. (Fakamaau 2:18) ʻOku fakamatalaʻi ʻe he Tohi Tapú ʻa e ʻAho Fakamaau ʻi he kahaʻú ko ha taimi fakafiefia ʻi hono fakahaofi ʻe Sihova ko e Fakamaau ʻo e māmaní kotoa ʻa e faʻahinga ʻo e tangatá mei he fakamaau taʻetotonú.—Lau ʻa e Saame 96:12, 13; ʻAisea 26:9.

Kuo fakanofo ʻe he ʻOtuá ʻa Sīsū ke ne ʻoange ʻa e fakamaau totonú ki he kau moʻuí mo e kau maté fakatouʻosi. (Ngāue 10:42; 17:31) Kuo mate ʻa e kakai tokolahi ʻo ʻikai ʻiloʻi ʻa e ʻOtuá. Lolotonga ʻa e ʻAho Fakamāú, ʻe fokotuʻu mai ʻe Sīsū ʻa e kakai ko iá koeʻuhi ke lava ʻo nau ʻilo mo ʻofa ki he ʻOtua moʻoní.—Lau ʻa e Ngāue 24:15.

Ko e hā ʻe feʻunga ai ʻa e ʻAho Fakamāú mo e taʻu ʻe taha afé?

ʻE fokotuʻu hake ʻa e kau maté ʻi he lolotonga ʻo e taʻu ʻe taha afé. (Fakahā 20:4, 12) ʻE fiemaʻu ʻa e taimi ke nau ako ai ki he ngaahi founga ʻa e ʻOtuá mo talangofua kiate ia. ʻI he kehe mei he fakakaukau manakoá, ʻoku fakahaaʻi ʻe he Tohi Tapú ko e kakai ko iá ʻe fakamāuʻi ʻo makatuʻunga ʻi he meʻa te nau fai ʻi he hili hono fokotuʻu hake kinautolú.—Lau ʻa e Loma 6:7.

ʻOku toe fakamatalaʻi ʻe he Tohi Tapú ko e ʻaho ʻo e fakamāú ʻe hoko fakafokifā ki muʻa ke kamata ʻa e taʻu ʻe taha afé. ʻOku toe ui ʻa e ʻaho ko iá ko e ngataʻanga ʻo hangē ko ia naʻe fakamatalaʻi ʻi he kupu tefito ʻo e ʻīsiu ko ení. ʻI he ʻaho ko iá, ʻe toʻo ʻosi atu ʻe he ʻOtuá ʻa e kotoa ʻo e kakai anga-taʻefakaʻotua mo fulikivanú. (2 Pita 3:7) Ko ia ai, ʻoku totonu ke tau tokanga ke fakamoʻoniʻi ʻetau ʻofa ki he ʻOtuá.—Lau ʻa e 2 Pita 3:9, 13.