ʻOkú Ke Fakaʻatā ʻa e Tufunga-ʻUmea Lahí Ke Ne Fakafuo Koe?

1, 2. Ko e hā naʻe vakai ai ʻa e ʻOtuá kia Taniela ko ha “tangata ʻofeina lahi,” pea ʻe lava fēfē ke tau talangofua ʻo hangē ko Tanielá?

ʻI HE taimi naʻe ʻave ai ʻa e kau Siú ki Pāpiloné, naʻa nau hū atu ki he kolo naʻe fonu ʻi he ngaahi ʻaitolí mo e kakai naʻe lotu ki he ngaahi laumālie fulikivanú. Neongo ia, ko e kau Siu faitōnungá, hangē ko Taniela mo hono ngaahi kaumeʻa ʻe toko tolú, naʻa nau fakafisi ke fakafuo kinautolu ʻe he kakai ʻo Pāpiloné. (Tan. 1:6, 8, 12; 3:16-18) Naʻe tali ʻe Taniela mo hono ngaahi kaumeʻá ʻa Sihova ko honau Tufunga-ʻUmeá ia pea naʻe hokohoko atu pē ʻenau lotu kiate iá. Neongo naʻe nofo ʻa Taniela ʻi ha ʻātakai kovi ʻi he lahi taha ʻo ʻene moʻuí, naʻe pehē ʻe he ʻāngelo ʻa e ʻOtuá naʻá ne hoko ko ha “tangata ʻofeina lahi.”​—Tan. 10:11, 19.

² ʻI he taimi ʻo e Tohi Tapú, naʻe pau ke ngaohi ʻe he tufunga-ʻumeá ke molū ʻa e ʻumeá kae malava ke fakafuoʻaki ha meʻa. ʻI he ʻahó ni, ʻoku ʻiloʻi ʻe he kau lotu moʻoní ko Sihova ʻa e Tokotaha-Pule ʻo e ʻunivēsí pea kuó ne maʻu ʻa e mafai ke fakafuo ʻa e ngaahi puleʻangá. (Lau ʻa e Selemaia 18:6.) ʻOku toe maʻu ʻe he ʻOtuá ʻa e mafai ke ne fakafuo kitautolu taki taha. Kae kehe, ʻoku ʻikai ke fakamālohiʻi ʻe Sihova ha taha ke liliu. ʻI hono kehé, ko hono finangaló ia ke tau loto-lelei ke tau fakaʻatā ia ke ne fakafuo kitautolu. ʻI he kupu ko ení, te tau ako ki he founga ʻe lava ke tau kei hoko ai pē ʻo hangē ha ʻumea molū ʻi he nima ʻo e ʻOtuá. Te tau lāulea ai ki he fehuʻi ʻe tolu ko ení: (1) ʻE lava fēfē ke tau fakaʻehiʻehi mei hono fakahāhā ʻa e ngaahi tōʻonga te ne ʻai nai kitautolu ke tau talitekeʻi ʻa e akonaki ʻa e ʻOtuá pea hoko ai ʻo hangē ha ʻumea fefeká? (2) ʻE lava fēfē ke tau fakatupulekina ʻa e ngaahi ʻulungaanga te ne tokoniʻi kitautolu ke tau kei talangofua ai pē mo hangē ha ʻumea molū? (3) ʻE lava fēfē ke ngāue fakataha ʻa e ngaahi mātuʻa Kalisitiané mo e ʻOtuá ʻi he taimi ʻoku nau fakafuo ai ʻenau fānaú?

FAKAʻEHIʻEHI MEI HE NGAAHI TŌʻONGA TE NE ʻAI NAI KE FEFEKA ʻA E LOTÓ

3. Ko e hā ʻa e ngaahi tōʻonga ʻe lava ke ne ʻai kitautolu ke tau loto-fefeká? ʻOmai ha fakatātā.

³ “ʻI he meʻa kotoa ʻoku ke tauhi, muʻomuʻa ʻa e lama ʻo ho loto, he ʻoku founga mei ai ʻa e ngaahi meʻa ʻoku ʻasi ʻi he moʻui,” ko e lau ia ʻa e Palōveepi 4:23. Ke maluʻi hotau lotó mei heʻene hoko ʻo fefeká, kuo pau ke tau fakaʻehiʻehi mei he ngaahi tōʻonga ʻikai lelei ʻo hangē ko e pōlepolé, tōʻongaʻaki ʻa e angahalá mo e vaivai ʻetau tuí. Kapau heʻikai ke tau tokanga, ʻe lava ʻe he ngaahi meʻa ko ení ke ne ʻai kitautolu ke tau talangataʻa mo angatuʻu. (Tan. 5:1, 20; Hep. 3:13, 18, 19) Ko e meʻa ia naʻe hoko kia Tuʻi ʻŪsaia ʻo Siutá. (Lau ʻa e 2 Kalonikali 26:3-5, 16-21.) ʻI he ʻuluaki taimí, naʻe talangofua ʻa ʻŪsaia pea maʻu ʻa e vahaʻangatae lelei mo e ʻOtuá, ko ia naʻe ʻoange ai ʻe he ʻOtuá kiate ia ʻa e mālohi. Ka “ʻi heʻene malohi naʻe mahiki hono loto.” Naʻá ne fuʻu pōlepole ʻo ne feinga ai ke tutu ʻa e ʻinisēnisi ʻi he temipalé, neongo ko e kau taulaʻeikí pē naʻe totonu ke nau fai iá. ʻI hono tala ange ʻe he kau taulaʻeikí ʻene halá, naʻe ʻita lahi ʻa ʻŪsaia! Naʻe fakamāʻulaloʻi ʻe Sihova ʻa e tuʻi pōlepole ko ení, pea naʻá ne kilia ʻo aʻu ki heʻene mate.​—Pal. 16:18.

4, 5. Ko e hā ʻe lava ke hokó kapau heʻikai ke tau maluʻi kitautolu mei he pōlepolé? ʻOmai ha fakatātā.

⁴ Kapau heʻikai ke tau fakaʻehiʻehi mei he pōlepolé, ʻe lava ke kamata ke tau fakakaukau ʻoku tau lelei ange ʻi he niʻihi kehé pea kamata nai ke tau talitekeʻi ʻa e akonaki ʻoku ʻomai mei he Tohi Tapú. (Pal. 29:1; Loma 12:3) Ko e meʻa ia naʻe hoko ki ha tokotaha mātuʻa ko Jim. Naʻe ʻi ai ha meʻa naʻe ʻikai ke ne loto-tatau ai mo e kau mātuʻa kehe ʻi he fakatahaʻangá. ʻOku pehē ʻe Jim, “Naʻá ku tala ange ki he fanga tokoua ko ení naʻe ʻikai ke nau anga-ʻofa, peá u mavahe leva mei he fakatahá.” ʻI he māhina nai ʻe ono ki mui aí, naʻá ne hiki ki ha fakatahaʻanga ʻe taha ka naʻe ʻikai ke fakanofo ia ko ha mātuʻa. Naʻe loto-mamahi lahi ʻa Jim. Naʻá ne tuipau naʻá ne tonuhia, ko ia naʻe ʻikai ai ke ne toe tauhi kia Sihova pea hoko ʻo ʻikai toe longomoʻui ʻi he taʻu ʻe hongofulu. ʻOkú ne pehē naʻá ne pōlepole pea naʻe kamata ke ne tukuakiʻi ʻa Sihova ki he meʻa naʻe hokó. Naʻe ʻaʻahi mo feinga ke tokoni ʻa e fanga tokouá kiate ia ʻi he ngaahi taʻu lahi, ka naʻe fakafisi ʻa Jim ke tali ʻenau tokoní.

⁵ ʻOku pehē ʻe Jim, “Naʻe ʻikai pē ke u lava ʻo toʻo mei heʻeku fakakaukaú ʻa e fehālaaki naʻe fai ʻe he niʻihi kehé.” Ko ʻene faʻifaʻitakiʻangá ʻoku fakahaaʻi mai ai, ko e pōlepolé ʻe lava ke ne ʻai kitautolu ke fakatonuhiaʻi ʻaki ʻetau tōʻonga halá. ʻI he taimi ʻoku hoko ai iá, ʻoku ʻikai ke tau kei hangē ai ha ʻumea moluú. (Sel. 17:9) Kuo fakaʻitaʻi koe ʻe ha tokoua pe tuofefine? Kuó ke loto-mamahi nai koeʻuhí ko e mole ha monū meiate koe? Naʻe anga-fēfē hoʻo fakafeangai? Naʻá ke pōlepole, pe naʻá ke ʻiloʻi ko e fakamelino mo ho tokouá mo e mateaki ai pē kia Sihová ʻa e meʻa mahuʻinga tahá?​—Lau ʻa e Saame 119:165; Kol. 3:13.

6. Ko e hā ʻe lava ke hokó kapau ʻoku tau tōʻongaʻaki ʻa e angahalá?

⁶ ʻI he taimi ʻoku hokohoko atu ha taha ʻi he faiangahalá pea aʻu ʻo ne fūfuuʻi iá, ʻe faingataʻa nai kiate ia ke ne tali ʻa e ngaahi akonaki fakaʻotuá. ʻE faingofua ange leva ki he tokotaha ko iá ke ne faiangahala. Naʻe pehē ʻe ha tokoua, naʻe aʻu ki ha taimi naʻe kamata ke ne ongoʻi ʻoku ʻikai kovi ʻa e ʻulungaanga taʻetaau naʻá ne fakahokó. (Koh. 8:11) Ko ha tokoua ʻe taha naʻe ʻi ai ha taimi naʻá ne angaʻaki ʻa e sio ʻi he ʻata fakalieliá, ki mui ai naʻá ne pehē: “Naʻe kamata ke u fakatupulekina ʻa e fakakaukau fakaanga ki he kau mātuʻá.” Ko ʻene tōʻongá naʻá ne maumauʻi hono vahaʻangatae mo Sihová. ʻI he taimi naʻe ʻiloʻi ai ʻe he niʻihi kehé ʻa e meʻa naʻá ne faí, naʻá ne kumi tokoni ki he kau mātuʻá. Ko e moʻoni, ʻoku tau taʻehaohaoa kotoa. Ka ʻo kapau te tau fakaangaʻi ʻa e faʻahinga ʻoku nau akonakiʻi kitautolú pe kapau ʻoku tau kumi kalofanga ʻi he taimi ʻoku tau faihala aí kae ʻikai kole ki he ʻOtuá ke ne fakamolemoleʻi mo tokoniʻi kitautolu, ʻe kamata ke fefeka nai hotau lotó.

7, 8. (a) Naʻe anga-fēfē hono fakahāhā ʻe he kau ʻIsileli ʻo e kuonga muʻá naʻa nau loto-fefeka tupu mei he vaivai ʻenau tuí? (e) Ko e hā ʻa e lēsoni kiate kitautolú?

⁷ ʻI he taimi naʻe fakatauʻatāinaʻi ai ʻe Sihova ʻa e kau ʻIsilelí mei ʻIsipité, naʻa nau mamata ai ki heʻene fakahoko ʻa e ngaahi mana fakaofó. Neongo ia, ʻi heʻenau ofi atu ki he Fonua ʻo e Talaʻofá naʻe kamata ke nau loto-fefeka. Ko e hā hono ʻuhingá? Naʻe ʻikai ke nau maʻu ʻa e tui ki he ʻOtuá. ʻI he ʻikai ke nau falala kia Sihová, naʻe kamata ke nau ilifia mo lāunga kia Mōsese. Naʻe aʻu ʻo nau loto ke foki ki ʻIsipite, ʻa e feituʻu naʻa nau nofo pōpula aí! Naʻe loto-mamahi lahi ʻa Sihova peá ne pehē: “ʻE tuku ʻafe ʻa e taʻetokaʻi au ʻe he kakai ni?” (Nōm. 14:1-4, 11; Saame 78:40, 41) Ko e kau ʻIsileli ko ení naʻa nau mate ʻi he toafá koeʻuhi ko ʻenau loto-fefeká mo e vaivai ʻenau tuí.

⁸ ʻI he ʻahó ni, ʻoku tau ofi ʻaupito ki he māmani foʻoú pea kuo ʻahiʻahi ai ʻetau tuí. Ko ia ʻoku fiemaʻu ke tau sivisiviʻi ʻa e tuʻunga ʻoku ʻi ai ʻetau tuí. ʻE lava fēfē ke tau fakapapauʻi ʻoku mālohi ʻetau tuí? ʻE lava ke tau sivisiviʻi ʻa e ngaahi lea ʻa Sīsū ʻi he Mātiu 6:33. ʻEke hifo kiate koe: ‘ʻOku fakamoʻoniʻi ʻi heʻeku ngaahi taumuʻá mo ʻeku ngaahi filí ʻoku ou tui moʻoni ki he ngaahi lea ʻa Sīsuú? Te u liʻaki ʻa e ngaahi fakatahá pe ngāue fakamalangá ka u feinga ke toe maʻu ha paʻanga lahi ange? Ko e hā ʻa e meʻa te u faí kapau ʻoku ou fakamoleki ʻa e taimi mo e ivi lahi ange ki heʻeku ngāué? Te u fakaʻatā ʻa e māmani ko ení ke ne fakafuo au pea aʻu ʻo taʻofi nai au ʻi heʻeku tauhi kia Sihová?’

9. Ko e hā ʻoku totonu ai ke tau “hanganaki siviʻi” pe ʻoku tau ʻi he tuí, pea ʻe lava fēfē ke tau fai eni?

⁹ Kapau ʻoku ʻikai ke tau muimui ki he meʻa ʻoku leaʻaki ʻe he Tohi Tapú fekauʻaki mo e feohi koví, tuʻusí pe fakafiefiá, ʻe lava ke fefeka hotau lotó. Ko e hā ʻoku totonu ke ke faí kapau ʻoku kamata ke hoko eni kiate koe? ʻOku fiemaʻu fakavavevave ke ke sivisiviʻi hoʻo tuí! ʻOku pehē ʻe he Tohi Tapú: “Hanganaki siviʻi pe ʻoku mou ʻi he tuí, hanganaki fakamoʻoniʻi ʻa e tuʻunga totonu ʻoku mou ʻi aí.” (2 Kol. 13:5) Faitotonu kiate koe pea ngāueʻaki maʻu pē ʻa e Folofola ʻa e ʻOtuá ke ne fakatonutonu hoʻo fakakaukaú.

HOKOHOKO ATU ʻI HE HANGĒ HA ʻUMEA MOLUÚ

10. Ko e hā ʻe lava ke ne tokoniʻi kitautolu ke tau hangē ha ʻumea molū ʻi he nima ʻo Sihová?

¹⁰ Ke tokoniʻi kitautolu ke tau hanganaki hangē ha ʻumea moluú, kuo ʻomai ai ʻe he ʻOtuá ʻene Folofolá, ko e fakatahaʻanga Kalisitiané mo e ngāue fakafaifekaú. ʻI he taimi ʻoku tau lau ai ʻa e Tohi Tapú mo fakalaulauloto fakaʻaho ki aí, ʻe tokoniʻi ai kitautolu ke tau hoko ʻo molū ʻi he nima ʻo Sihová pea fakaʻatā ia ke ne fakafuo kitautolu. Naʻe fekau ʻe Sihova ki he ngaahi tuʻi ʻo ʻIsilelí ke nau hiki ha tatau ʻo e Lao ʻa e ʻOtuá pea lau ia ʻi he ʻaho kotoa pē. (Teu. 17:18, 19) Naʻe ʻiloʻi ʻe he kau ʻapositoló ko hono lau ʻa e Folofolá mo fakalaulauloto ki aí naʻe mātuʻaki mahuʻinga ia ki heʻenau ngāue fakafaifekaú. Naʻe tuʻo lauingeau ʻenau ngāueʻaki ha ngaahi konga ʻo e Ngaahi Konga Tohi Tapu Faka-Hepeluú ʻi heʻenau ngaahi hiki tohí, pea ʻi he taimi naʻa nau malanga ai ki he kakaí naʻa nau fakalototoʻaʻi kinautolu ke nau ngāueʻaki ʻa e Folofola ko iá. (Ngā. 17:11) ʻI he founga meimei tatau, ʻoku tau toe ʻiloʻi ʻa e mahuʻinga ke lau fakaʻaho ʻa e Folofola ʻa e ʻOtuá mo fakalaulauloto ki ai. (1 Tīm. 4:15) ʻE tokoniʻi heni kitautolu ke tau hanganaki anga-fakatōkilalo pea ʻe malava leva ai ke fakafuo kitautolu ʻe Sihova.

11, 12. ʻOku anga-fēfē hono ngāueʻaki ʻe Sihova ʻa e fakatahaʻanga Kalisitiané ke ne fakafuo kitautolu fakafoʻituitui ʻo fakatatau ki hotau tuʻungá? Fakatātaaʻi.

¹¹ ʻOku ʻafioʻi ʻe Sihova ʻa e meʻa ʻoku fiemaʻu kiate kitautolu taki taha, pea ʻokú ne ngāueʻaki ʻa e fakatahaʻanga Kalisitiané ke fakafuo kitautolu. Ko Jim, ʻa ia naʻe lave ki ai ki muʻá naʻe kamata ke liliu ʻene fakakaukaú ʻi he taimi naʻe fakahaaʻi ai ʻe ha tokotaha mātuʻa ʻene mahuʻingaʻia ʻiate iá. ʻOku pehē ʻe Jim: “Naʻe ʻikai ʻaupito haʻane teitei tukuakiʻi au ki he meʻa naʻe hokó pe fakaangaʻi au. ʻI hono kehé, naʻá ne hanganaki fakakaukau pau pea fakahaaʻi ʻa e holi loto-moʻoni ke tokoni.” ʻI he māhina ʻe tolu nai, naʻe fakaafeʻi ʻe he tokotaha mātuʻa ko ení ʻa Jim ki he fakatahá. ʻOku pehē ʻe Jim, naʻe talitali anga-ʻofa ia ʻe he fakatahaʻangá pea naʻe hoko ʻenau ʻofá ke tokoniʻi ia ke liliu ʻa e anga ʻene fakakaukaú. Naʻe kamata ke ne ʻiloʻi naʻe ʻikai ko ʻene ngaahi ongoʻí ʻa e meʻa mahuʻinga tahá. Naʻe fakalototoʻaʻi ʻa Jim ʻe he kau mātuʻa ʻi heʻene fakatahaʻangá pea pehē ki hono uaifí, pea naʻe faai atu pē ʻo ne toe tauhi kia Sihova. Naʻe toe maʻu ʻaonga ʻa Jim ʻi heʻene lau ʻa e ongo kupu “ʻOku ʻIkai Totonu ke Tukuakiʻi ʻa Sihova” mo e “Tauhi Mateaki ʻa Sihova,” ʻoku hā ʻi he Taua Leʻo ʻo Siulai 1, 1993.

¹² Naʻe faai atu pē ʻo toe hoko ʻa Jim ko ha mātuʻa. Talu mei ai, kuó ne tokoniʻi ai ʻa e fanga tokoua kehé ke fakaleleiʻi ʻa e ngaahi palopalema meimei tatau mo fakaivimālohiʻi ʻenau tuí. ʻOkú ne pehē, naʻá ne fakakaukau naʻá ne maʻu ha vahaʻangatae vāofi mo Sihova ka ko hono moʻoní naʻe ʻikai! ʻOkú ne fakaʻiseʻisa ʻi heʻene fakaʻatā ʻa e pōlepolé ke fakatupunga ia ke ne nōfoʻi ʻi he ngaahi fehālaaki ʻa e niʻihi kehé kae ʻikai ʻi he ngaahi meʻa ʻoku mahuʻinga angé.​—1 Kol. 10:12.

13. Ko e hā ʻa e ngaahi ʻulungaanga ʻe lava ʻe he ngāue fakafaifekaú ʻo tokoniʻi kitautolu ke tau fakatupulekiná, pea ko e hā hono ngaahi ʻaongá?

¹³ ʻOku lava ʻe he ngāue fakafaifekaú ke ne toe fakafuo mo tokoniʻi kitautolu ke tau hoko ko ha kakai lelei ange. Anga-fēfē? ʻI he taimi ʻoku tau malangaʻi ai ʻa e ongoongo leleí, kuo pau ke tau fakahāhā ʻa e ngaahi ʻulungaanga ʻo hangē ko e anga-fakatōkilaló pea mo e ngaahi tafaʻaki kehekehe ʻo e fua ʻo e laumālie ʻo e ʻOtuá. (Kal. 5:22, 23) Fakakaukau ki he ngaahi ʻulungaanga lelei kuo tokoniʻi koe ʻe he ngāue fakafaifekaú ke ke fakatupulekiná. ʻI heʻetau faʻifaʻitaki kia Kalaisí, ʻe tohoakiʻi mai ai ʻa e kakaí ki heʻetau pōpoakí pea ʻe liliu nai ai ʻenau fakafeangai mai kiate kitautolú. Ko e fakatātaá, naʻe feinga ha ongo Fakamoʻoni ʻi ʻAositelēlia ke malanga ki ha fefine ʻi hono ʻapí, ka naʻá ne ʻita ʻaupito mo anga-kovi kiate kinaua. Neongo ia, naʻe fanongo anga-fakaʻapaʻapa pē ʻa e ongo Fakamoʻoní. Ki mui ai, naʻe fakaʻiseʻisa ʻa e fefiné ʻi heʻene tōʻongá peá ne tohi ki he ʻōfisi vaʻá. Naʻá ne kole fakamolemole koeʻuhi ko ʻene tōʻonga peheé. Naʻá ne pehē: “Ko e fuʻu vale ʻatā au ʻi heʻeku tōʻonga naʻe fai ki he ongo meʻa ʻokú na fakamafola ʻa e Folofola ʻa e ʻOtuá, mo feinga ke tuli peheʻi kinauá.” Mei he hokosia ko ení, ʻoku lava ke tau sio mei ai ʻa e mātuʻaki mahuʻinga ʻo e hoko ʻo anga-malū ʻi he taimi ʻoku tau malanga aí. ʻIo, ʻoku tokoniʻi ʻe heʻetau ngāue fakafaifekaú ʻa e niʻihi kehé, ka ʻoku toe tokoniʻi ai kitautolu ke fakaleleiʻi hotau angaʻitangatá.

NGĀUE FAKATAHA MO E ʻOTUÁ ʻI HONO FAKAFUO HOʻO FĀNAÚ

14. Ko e hā kuo pau ke fai ʻe he ngaahi mātuʻá kapau ʻoku nau loto ke ola lelei hono fakafuo ʻenau fanaú?

¹⁴ Ko e tokolahi taha ʻo e fānau īkí ʻoku nau anga-fakatōkilalo pea vēkeveke ke ako. (Māt. 18:1-4) Ko ia ʻoku fakapotopoto ki he ngaahi mātuʻá ke tokoniʻi ʻenau fānaú ke nau ako ʻa e moʻoní pea ke nau ʻofa ai lolotonga ʻenau kei īkí. (2 Tīm. 3:14, 15) Ke lavameʻa ení, kuo pau ki he ngaahi mātuʻá ke nau ʻofa ki he moʻoní pea ngāueʻaki ʻi heʻenau moʻuí ʻa e meʻa ʻoku leaʻaki ʻe he Tohi Tapú. ʻI he taimi ʻoku fai ai eni ʻe he ngaahi mātuʻá, ʻe faingofua ange ai ki heʻenau fānaú ke nau ʻofa ki he moʻoní. Pehē foki, ʻe mahinoʻi ʻe he fānaú ko e ngaahi akonaki mei heʻenau ngaahi mātuʻá, ko e fakahāhā ia ʻo e ʻofa ʻenau ngaahi mātuʻá pea mo Sihova ʻiate kinautolú.

15, 16. ʻOku totonu ke fēfē hono fakahāhā ʻe he ngaahi mātuʻá ʻenau falala ki he ʻOtuá kapau ʻoku tuʻusi ha taha ʻi heʻenau fānaú?

¹⁵ Neongo hono akoʻi ʻe he ngaahi mātuʻá ʻa e moʻoní ki heʻenau fānaú, ko e fānau ʻe niʻihi ʻoku nau mavahe meia Sihova pe tuʻusi kinautolu. Kapau ʻoku hoko eni, ʻoku faingataʻaʻia lahi ai ʻa e fāmilí. Naʻe pehē ʻe ha tuofefine ʻi ʻAfilika Tonga: “ʻI he taimi naʻe tuʻusi ai hoku tuongaʻané, naʻe hangē ia kuó ne maté. Naʻe fakalotomamahi ʻaupito!” Ka ko e hā naʻá ne fai mo ʻene ongo mātuʻá? Naʻa nau muimui ʻi he ngaahi fakahinohino ʻi he Tohi Tapú. (Lau ʻa e 1 Kolinitō 5:11, 13.) Naʻe ʻiloʻi ʻe he ongo mātuʻá ko e talangofua ki he akonaki ʻa e ʻOtuá ʻe ʻaonga ia ki he tokotaha kotoa. Pea naʻa nau ʻiloʻi ko e tuʻusí ko ha akonaki anga-ʻofa ia meia Sihova. Ko ia ai, naʻa nau toki fetuʻutaki pē mo hona fohá ʻi ha meʻa fakafāmili naʻe fuʻu fiemaʻu moʻoni.

¹⁶ Naʻe fēfē ongoʻi ʻa e fohá? Ki mui aí naʻá ne pehē: “Naʻá ku ʻiloʻi naʻe ʻikai fehiʻa hoku fāmilí ʻiate au, ka naʻa nau talangofua kia Sihova mo ʻene kautahá.” Naʻá ne toe pehē, “ʻI he taimi ʻokú ke kōlenga ai ki he tokoni mo e fakamolemole ʻa Sihová, ʻokú ke ʻiloʻi ai ʻa e lahi hoʻo fiemaʻu iá.” Sioloto atu ki he fiefia ʻa e fāmilí ʻi he taimi naʻe toe foki mai ai ʻa e tokotahá ni kia Sihová! ʻIo, te tau fiefia mo lavameʻa ʻi he taimi ʻoku tau talangofua maʻu pē ai ki he ʻOtuá.​—Pal. 3:5, 6; 28:26.

17. Ko e hā ʻoku totonu ai ke hoko ʻetau talangofua kia Sihová ko ʻetau founga moʻuí ia, pea ʻe anga-fēfē ʻetau maʻu ʻaonga ʻi he ʻalunga ko ení?

¹⁷ Naʻe tomuʻa tala ʻe he palōfita ko ʻAiseá ko e kau Siu ʻi Pāpiloné te nau fakatomala mo nau pehē: “ʻE Sihova, ko ʻemau tamai koe; ko kimautolu ko e ʻumea, pea ko koe ko ʻemau tufunga; pea ko e ngaue ʻa ho nima ʻa kimautolu kotoa pe.” Te nau toe kōlenga kia Sihova: “Oua te ke fakamanatu kovi ʻo taʻengata: Sio ange, vakai muʻa, ko ho kakai ʻa kimautolu kotoa.” (ʻAi. 64:8, 9) ʻI he taimi ʻoku tau anga-fakatōkilalo ai mo talangofua maʻu pē kia Sihová, ʻokú ne ʻofeina lahi ai kitautolu, ʻo hangē ko Tanielá. ʻE hokohoko atu hono fakafuo kitautolu ʻe Sihova ʻo ngāueʻaki ʻene Folofolá, laumālié mo ʻene kautahá, koeʻuhí ke tau hoko ai ʻo haohaoa ʻi he kahaʻú ko e “fānau ʻa e ʻOtuá.”​—Loma 8:21.