Fakamafola ʻa e Ongoongo Lelei ʻo e ʻOfa Maʻataʻataá

1, 2. Naʻe anga-fēfē hono fakahaaʻi ʻe he ʻapositolo ko Paulá ʻene fakafetaʻi koeʻuhí ko e ʻofa maʻataʻatā ʻa e ʻOtuá?

NAʻE lava ke leaʻaki faitotonu ʻe he ʻapositolo ko Paulá ʻo pehē: “Ko ʻene [ʻOtuá] ʻofa maʻataʻatā kiate aú naʻe ʻikai ko e koto kulanoa.” (Lau ʻa e 1 Kolinitō 15:9, 10.) Naʻe ʻiloʻi moʻoni ʻe Paula naʻe ʻikai ke ne maʻu pe tuha mo e lahi ʻo e faimeesi ʻa e ʻOtuá. Naʻá ne hoko ko ha tokotaha fakatanga ʻo e kau Kalisitiané.

² ʻI he konga ki mui ʻo e moʻui ʻa Paulá, naʻá ne tohi ai kia Tīmote: “ʻOku ou fakafetaʻi kia Kalaisi Sīsū ko hotau ʻEikí, ʻa ia naʻá ne ʻomi kiate au ʻa e mālohi, koeʻuhí naʻá ne lau au ʻoku ou faitōnunga ʻaki ʻene vaheʻi au ki ha ngāue.” (1 Tīm. 1:12-14) Ko e hā ʻa e ngāue ko iá? Naʻe tala ʻe Paula ki he kau mātuʻa ʻi he fakatahaʻanga ʻi ʻEfesoó: “ʻOku ʻikai te u lau ʻeku moʻuí ko ha meʻa ʻoku teitei mahuʻinga kiate au, kehe pē ke u ʻosiki hoku ʻalungá pea mo e ngāue ko ia kuó u maʻu mei he ʻEiki ko Sīsuú, ke faifakamoʻoni fakaʻāuliliki ki he ongoongo lelei ʻo e ʻofa maʻataʻatā ʻa e ʻOtuá.”​—Ngā. 20:24.

3. Ko e hā ʻa e ngāue makehe naʻe ʻoange kia Paulá? (Sio ki he ʻuluaki fakatātā ʻi he kupú ni.)

³ Ko e hā ʻa e “ongoongo lelei” naʻe malangaʻi ʻe Paulá, pea naʻe anga-fēfē hono fakahāhā ai ʻa e ʻofa maʻataʻatā ʻa Sihová? Naʻe tala ʻe Paula ki he kau Kalisitiane ʻi ʻEfesō: “Kuo mou fanongo ʻo fekauʻaki mo e fatongia ʻo e ʻofa maʻataʻatā ʻa e ʻOtuá ʻa ia naʻe tuku mai kiate au ki ha lelei maʻamoutolú.” (ʻEf. 3:1, 2) Naʻe tala ʻe Sīsū kia Paula ke ne malangaʻi ʻa e ongoongo leleí ki he faʻahinga naʻe ʻikai ko e kau Siú. Naʻe malava heni ʻa e kakai mei he ngaahi puleʻangá ke nau hoko ko e konga ʻo e founga-pule ʻa e Puleʻanga ʻoku pule ai ʻa e Mīsaiá. (Lau ʻa e ʻEfesō 3:5-8.) Naʻe malanga faivelenga ʻa Paula pea fokotuʻu ʻa e faʻifaʻitakiʻanga lelei ki he kau Kalisitiané ʻi he ʻahó ni. Naʻá ne fakahaaʻi ko e ʻofa maʻataʻatā ʻa e ʻOtuá naʻe ʻikai “ko e koto kulanoa,” pe ʻikai hano ʻaonga kiate ia.

ʻOKU UEʻI KOE ʻE HE ʻOFA MAʻATAʻATĀ ʻA E ʻOTUÁ?

4, 5. Ko e hā ʻe lava ke tau pehē ai ko e ‘ongoongo lelei ʻo e Puleʻangá’ ʻoku tatau mo e ongoongo lelei ʻo e “ʻofa maʻataʻatā ʻa e ʻOtuá”?

⁴ ʻI he taimi ko eni ʻo e ngataʻangá, kuo maʻu ʻe he kakai ʻa Sihová ʻa e fatongia ko hono malangaʻi ʻa e ‘ongoongo lelei ʻo e Puleʻangá ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.’ (Māt. 24:14) Ko e ongoongo lelei ʻo e Puleʻangá ʻoku toe hoko ko e “ongoongo lelei ʻo e ʻofa maʻataʻatā ʻa e ʻOtuá.” Anga-fēfē? Ko e ngaahi tāpuaki kotoa te tau maʻu mei he Puleʻanga ʻo e ʻOtuá ko e tupu ia mei he ʻofa maʻataʻatā ʻa Sihová. (ʻEf. 1:3) Naʻe fakahaaʻi ʻe Paula ʻene houngaʻia ʻi he ʻofa maʻataʻatā ʻa Sihová ʻaki ʻene malanga faivelenga. ʻOku tau faʻifaʻitaki ki he faʻifaʻitakiʻanga ʻa Paulá?​—Lau ʻa e Loma 1:14-16.

⁵ ʻI he kupu ki muʻá, naʻa tau ako ki he ngaahi founga ʻoku tau maʻu ʻaonga ai mei he ʻofa maʻataʻatā ʻa Sihová ʻi he tuʻunga ko e kau angahala. Koeʻuhí ko e lahi fau ʻo e ngaahi ʻaonga kuo tau maʻu mei aí, kuo tau maʻu ai ʻa e fatongia ke akoʻi ki he niʻihi kehé ʻa e founga hono fakahāhā ʻe Sihova ʻene ʻofá mo e founga ʻe lava ke nau maʻu ʻaonga ai mo kinautolú. ʻI he ngaahi founga fē ʻe lava ke tau tokoniʻi ai ʻa e niʻihi kehé ke nau houngaʻia ʻi he ʻofa maʻataʻatā ʻa e ʻOtuá?

FAKAMAFOLA ʻA E ONGOONGO LELEI ʻO E FEILAULAU HUHUʻÍ

6, 7. ʻI heʻetau fakamatalaʻi ʻa e huhuʻí ki he kakaí, ʻe anga-fēfē ʻetau fakamafola atu ai ʻa e ongoongo lelei ʻo e ʻofa maʻataʻatā ʻa e ʻOtuá?

⁶ ʻI he ʻahó ni, ʻoku ʻikai ongoʻi halaia ʻa e kakai tokolahi ʻi he taimi ʻoku nau faiangahala aí, ʻi heʻene peheé, ʻoku ʻikai ai ke nau mahinoʻi ʻa e ʻuhinga ʻoku fiemaʻu ai ki he faʻahinga ʻo e tangatá ʻa e huhuʻí. ʻI he taimi tatau, ʻoku ʻalu ke tokolahi ange ʻa e kakai ʻoku nau ʻiloʻi ʻoku ʻikai ke ʻomai ʻe heʻenau founga moʻuí ʻa e fiefiá. Pea ko e kakai tokolahi ʻoku ʻikai ke nau ʻiloʻi ko e hā ʻa e angahala, founga hono uesia kitautolú mo e meʻa ʻoku fiemaʻu ke tau fai ke tau tauʻatāina ai mei he nofo pōpula ki he angahalá kae ʻoua kuo nau toki talanoa mo e Kau Fakamoʻoni ʻa Sihová. ʻI hono mahinoʻi pē ʻe he kakai loto-moʻoní ʻa e angahalá, ʻoku nau houngaʻia ʻi heʻenau maʻu ʻa e ʻilo fekauʻaki mo hono ʻomai ʻe Sihova hono ʻAló ki he māmaní ke fakatauʻatāinaʻi kitautolu mei he angahalá mo e maté. Naʻe fai ia ʻe Sihova koeʻuhí ko e lahi ʻo ʻene ʻofá mo e ʻofa maʻataʻataá.​—1 Sio. 4:9, 10.

⁷ Fakatokangaʻi ʻa e meʻa naʻe leaʻaki ʻe Paula fekauʻaki mo e ʻAlo ʻofaʻanga ʻo Sihová: “Ko e meʻa ʻiate ia ʻoku tau maʻu ai ʻa e fakatauʻatāina ʻi he huhuʻí fakafou ʻi he taʻataʻa ʻo e tokotaha ko iá, ʻio, ko e fakamolemole ʻo ʻetau ngaahi faihalá, ʻo fakatatau ki he hulu fau ʻo e ʻofa maʻataʻatā ʻa e ʻOtuá [ʻa Sihova].” (ʻEf. 1:7) Ko e feilaulau huhuʻi ʻa Kalaisí ko e fakamoʻoni lahi taha ia ʻo e ʻofa ʻa e ʻOtuá kiate kitautolú pea ʻoku fakahaaʻi ai ʻa e lahi ʻo ʻEne ʻofa maʻataʻataá. Ko ha meʻa fakafiemālie ia ʻetau ʻiloʻi kapau te tau fakahāhā ʻa e tui ki he feilaulau ʻa Sīsuú, ʻe fakamolemoleʻi ʻetau angahalá pea te tau maʻu ai ha konisēnisi maʻa! (Hep. 9:14) Ko e ongoongo lelei moʻoni eni ke vahevahe atu ki he niʻihi kehé!

TOKONIʻI ʻA E KAKAÍ KE NAU HOKO KO E NGAAHI KAUMEʻA ʻO E ʻOTUÁ

8. Ko e hā ʻoku fiemaʻu ai ki he faʻahinga angahalaʻia ʻo e tangatá ke nau hoko ʻo fakalelei mo e ʻOtuá?

⁸ Kapau ʻoku ʻikai ke fakahaaʻi ʻe he kakaí ʻa e tui ki he feilaulau ʻa Sīsuú, ʻoku vakai ʻa e ʻOtuá kiate kinautolu ko e ngaahi fili. ʻI heʻene peheé, ʻoku tau maʻu ai ʻa e fatongia ke tala kiate kinautolu ʻe lava ke nau hoko ko e ngaahi kaumeʻa ʻo e ʻOtuá. Naʻe tohi ʻe he ʻapositolo ko Sioné: “Ko ia ʻokú ne ngāueʻi ʻa e tui ki he ʻAló ʻokú ne maʻu ʻa e moʻui taʻengatá; ko ia ʻokú ne talangataʻa ki he ʻAló heʻikai te ne mamata ki he moʻuí, ka ʻoku nofo maʻu ʻiate ia ʻa e houhau ʻa e ʻOtuá.” (Sione 3:36) ʻOku lava ke tau fiefia ʻi hono ʻai ʻe he feilaulau ʻa Kalaisí ke tau malava ʻo hoko ko e ngaahi kaumeʻa ʻo e ʻOtuá. Naʻe fakamatalaʻi ia ʻe Paula ʻi he founga ko ení: “Ko kimoutolu ʻa ia naʻe fakamavaheʻi pea mou hoko ko e ngaahi fili ki muʻa koeʻuhí ko e tuku ʻa hoʻomou ngaahi fakakaukaú ʻi he ngaahi ngāue naʻe fulikivanú, kuó ne fai eni ha fakalelei maʻamoutolu ʻaki ʻa e sino fakaekakano ʻo e tokotaha ko iá fakafou ʻi heʻene maté.”​—Kol. 1:21, 22.

9, 10. (a) Ko e hā ʻa e fatongia naʻe ʻoange ʻe Kalaisi ki hono fanga tokoua paní? (e) ʻOku anga-fēfē ʻa e tokoni ʻa e “fanga sipi kehe” ki he kau paní?

⁹ Kuo ʻoange ʻe Kalaisi ki hono fanga tokoua pani ʻi he māmaní “ʻa e ngāue ʻo e fakaleleí.” Naʻe tala ʻe Paula kiate kinautolu: “Ko e ngaahi meʻa kotoa pē ʻoku mei he ʻOtuá, ʻa ia naʻá ne fakalelei kimautolu kiate ia fakafou ʻia Kalaisi pea foaki mai kiate kimautolu ʻa e ngāue ʻo e fakaleleí, ʻa ia, naʻe fakalelei ʻe he ʻOtuá fakafou ʻia Kalaisi ha māmani kiate ia, ʻo ʻikai lau ʻenau ngaahi faihalá kiate kinautolu, pea naʻá ne tuku mai kiate kimautolu ʻa e pōpoaki ʻo e fakaleleí. Ko ia ai, ko e kau fakafofonga kimautolu ʻo fetongi ʻa Kalaisi, ʻo hangē ia ne fai ʻe he ʻOtuá ha tautapa fakafou ʻiate kimautolú. ʻI he tuʻunga ko e kau fetongi ʻo Kalaisí ʻoku mau kole atu: ‘Mou hoko ʻo fakalelei ki he ʻOtuá.’”​—2 Kol. 5:18-20.

¹⁰ Ko e monū ia ʻoku maʻu ʻe he “fanga sipi kehe” ke nau tokoni ki he kau paní ʻi he ngāue fakafaifekaú. (Sione 10:16) ʻI he tuʻunga ko e “kau talafekau” ʻo Kalaisí, ko e “fanga sipi kehe” ʻoku nau fakahoko ʻa e konga lahi taha ʻo e ngāue fakamalangá, akoʻi ʻa e moʻoní ki he kakaí pea tokoniʻi kinautolu ke nau maʻu ha vahaʻangatae vāofi mo Sihova. Ko e tafaʻaki mahuʻinga eni ʻo hono malangaʻi ʻa e ongoongo lelei ʻo e ʻofa maʻataʻatā ʻa e ʻOtuá.

AKOʻI KI HE KAKAÍ ʻOKU FANONGO MAI ʻA E ʻOTUÁ KI HE NGAAHI LOTÚ

11, 12. Ko e hā ko ha ongoongo lelei ai ki he kakaí ʻi heʻenau ʻilo ʻoku lava ke nau lotu kia Sihová?

¹¹ ʻOku lotu ʻa e kakai tokolahi koeʻuhí ʻoku ʻai ai kinautolu ke nau ongoʻi lelei, ka ʻoku ʻikai ke nau tui moʻoni ʻoku fanongo mai ʻa e ʻOtuá ki heʻenau ngaahi lotú. ʻOku fiemaʻu ke nau ʻiloʻi ko Sihová ko e tokotaha “tali lotu.” Naʻe tohi ʻe he tokotaha-tohi-saame ko Tēvitá: “Ko e tali lotu ʻa e ʻAfiona, ko ia ʻe alu atu ai kiate koe ʻa e kakano kotoa. Kuo haʻaki au ʻe he ngaahi kovi: Ko e [meʻa] ki heʻetau ngaahi hia ko e ʻAfiona kuo ne ʻufiʻufi.”​—Saame 65:2, 3.

¹² Naʻe tala ʻe Sīsū ki heʻene kau ākongá: “Kapau te mou kole ha meʻa pē ʻi hoku hingoá, te u fai ia.” (Sione 14:14) ʻOku ʻuhinga ení ʻe lava ke tau lotu ki ha “meʻa pē” ʻa ia ʻoku fehoanaki mo e finangalo ʻo Sihová. Naʻe tohi ʻe Sione: “Ko e loto-falala eni ʻoku tau maʻu kiate iá, ʻa ia, ʻilonga ha meʻa ʻoku tau kole ʻo fakatatau ki hono finangaló, ʻokú ne fanongo mai kiate kitautolu.” (1 Sio. 5:14) Ko ha meʻa lelei ia ke tokoniʻi ʻa e kakaí ke nau mahinoʻi ko e lotú ʻoku ʻikai ko ha meʻa pē ke ʻai kinautolu ke nau ongoʻi lelei, ka ko ha founga ia ke nau fakaofiofi ai ki he ‘taloni ʻo e ʻofa maʻataʻatā’ ʻa Sihová! (Hep. 4:16) ʻI he taimi ʻoku tau akoʻi ai ʻa e kakaí ki he founga totonu ke lotu aí, ki he Tokotaha totonú pea ki he ngaahi meʻa totonú, ʻoku tau tokoniʻi ai kinautolu ke nau hoko ko e ngaahi kaumeʻa ʻo Sihova, pea ke nau maʻu ai ʻa e fakafiemālie ʻi he taimi ʻoku nau faingataʻaʻia aí.​—Saame 4:1; 145:18.

ʻOFA MAʻATAʻATĀ ʻI HE FOKOTUʻUTUʻU FOʻOÚ

13, 14. (a) Ko e hā ʻa e ngaahi monū fakaofo ʻe maʻu ʻe he kau paní ʻi he kahaʻú? (e) Ko e hā ʻa e ngāue fakaofo ʻe fai ʻe he kau paní maʻá e faʻahinga ʻo e tangatá?

¹³ ʻE fakahaaʻi ʻe Sihova ʻene ʻofa maʻataʻataá ʻo toe lahi ange “ʻi he ngaahi fokotuʻutuʻu ka hoko maí.” Anga-fēfē? ʻE ʻoange ʻe he ʻOtuá ki he toko 144,000 ko ia ʻe pule fakataha mo Kalaisi ʻi hēvaní ha monū fakaofo. Naʻe fakamatalaʻi ʻe Paula ʻa e meʻa ʻe hoko ki he monū ko iá ʻi heʻene tohi: “Ko e ʻOtuá ʻokú ne mohu ʻi he mēsí, pea koeʻuhi ko ʻene ʻofa lahi ʻa ia naʻá ne ʻofa ʻaki kiate kitautolú, naʻá ne ʻai kitautolu ke tau moʻui fakataha mo e Kalaisí, neongo naʻa tau mate ʻi heʻetau ngaahi faihalá​—ʻi he ʻofa maʻataʻataá kuo fakahaofi ai kimoutolu. ʻIkai ko ia pē, naʻá ne fokotuʻu fakataha hake kitautolu ʻo fakanofo fakataha kitautolu ʻi he ngaahi potu fakahēvaní ʻi he hoko ko ia ʻo fāʻūtaha mo Kalaisi Sīsuú, koeʻuhí ke ne fakahāhā ai ʻi he ngaahi fokotuʻutuʻu ka hoko maí ʻa e hulu fau ʻo ʻene ʻofa maʻataʻataá ʻi heʻene ʻaloʻofa kiate kitautolu ʻi he hoko ko ia ʻo fāʻūtaha mo Kalaisi Sīsuú.”​—ʻEf. 2:4-7.

¹⁴ ʻOku faingataʻa ke sioloto atu ki he ngaahi meʻa fakaofo kuo teuteu ʻe Sihova maʻá e kau Kalisitiane paní ʻi he taimi te nau pule fakataha ai mo Kalaisi ʻi hēvaní. (Luke 22:28-30; Fil. 3:20, 21; 1 Sio. 3:2) ʻE hanga ʻe Sihova ʻo ‘fakahāhā ʻa e hulu fau ʻo ʻene ʻofa maʻataʻataá’ kia kinautolu ʻi ha founga makehe. Te nau hoko ko e “Selusalema foʻou,” ʻa e taʻahine mali ʻo Kalaisí. (Fkh. 3:12; 17:14; 21:2, 9, 10) Te nau ngāue fakataha mo Kalaisi ʻi hono “faitoʻo ʻo e ngaahi puleʻangá.” Te nau tokoniʻi ʻa e faʻahinga ʻo e tangatá ke nau hoko ʻo tauʻatāina mei he mafasia ʻi he angahalá mo e maté pea tokoniʻi kinautolu ke nau hoko ʻo haohaoa.​—Lau ʻa e Fakahā 22:1, 2, 17.

15, 16. Ko e hā ʻa e founga ʻe fakahaaʻi ai ʻe Sihova ʻi he kahaʻú ʻene ʻofa maʻataʻatā ki he “fanga sipi kehe”?

¹⁵ ʻOku pehē ʻi he ʻEfesō 2:7, ʻe fakahaaʻi ʻe he ʻOtuá ʻa e ʻofa maʻataʻataá “ʻi he ngaahi fokotuʻutuʻu ka hoko maí.” ʻI he taimi ko iá, ʻe hokosia moʻoni ai ʻe he tokotaha kotoa ʻi he māmaní ʻa e “hulu fau ʻo ʻene ʻofa maʻataʻataá.” (Luke 18:29, 30) Ko e taha ʻo e ngaahi founga lahi taha ʻe fakahaaʻi ai ʻe Sihova ʻene ʻofa maʻataʻatā ʻi he māmaní, te ne fokotuʻu mai ʻa e kau maté mei he “faitoka.” (Siope 14:13-15, PM; Sione 5:28, 29) Ko hai ʻa e faʻahinga ʻe toetuʻu maí? Ko e kau tangata mo e kau fefine faitōnunga naʻa nau mate ki muʻa ke pekia ʻa Kalaisí mo e faʻahinga ʻo e “fanga sipi kehe” ʻa ia ʻoku nau mate faitōnunga kia Sihova lolotonga ʻa e ngaahi ʻaho fakaʻosí. Ko e faʻahinga faitōnunga ko ení ʻe toe fakamoʻui mai kinautolu ke hokohoko atu ʻenau tauhi kia Sihová.

¹⁶ ʻE toe fokotuʻu mai mo e laui miliona ʻo e faʻahinga ʻo e tangatá ʻa ia kuo nau mate naʻe teʻeki ai ke nau ʻiloʻi ʻa e ʻOtuá. Naʻe tohi ʻe Sione: “Naʻá ku sio ki he kau maté, ʻa e lalahi mo e iiki, ʻoku nau tuʻu ʻi he ʻao ʻo e taloní, pea naʻe fakaava ʻa e ngaahi takainga tohi. Ka naʻe toe ʻi ai ha takainga tohi ʻe taha naʻe fakaava; ko e takainga tohi ia ʻo e moʻuí. Pea naʻe fakamāuʻi ʻa e kau maté mei he ngaahi meʻa ko ia naʻe hiki ʻi he ngaahi takainga tohí ʻo fakatatau ki heʻenau ngaahi ngāué. Pea naʻe tuku mai ʻe he tahí ʻa e kau mate naʻe ʻi aí, pea ko mate mo Hētesi naʻá na tuku mai ʻa e kau mate naʻe ʻiate kinauá, pea naʻe fakamāuʻi fakatāutaha kinautolu ʻo fakatatau ki heʻenau ngaahi ngāué.” (Fkh. 20:12, 13) Ko e faʻahinga ʻe toetuʻu maí te nau maʻu ʻa e faingamālie ke nau ako fekauʻaki mo Sihova pea tali ʻene founga-pulé. Kuo pau ke nau ako mo ngāueʻaki ʻa e ngaahi tefitoʻi moʻoni Fakatohitapú mo e ngaahi fakahinohino foʻou ʻoku hā ʻi he “ngaahi takainga tohí.” Ko e ngaahi fakahinohino foʻou ko ení ko ha toe founga ia ʻe taha ʻe fakahaaʻi ai ʻe Sihova ʻene ʻofa maʻataʻataá.

HOKOHOKO ATU HONO MALANGAʻI ʻA E ONGOONGO LELEÍ

17. Ko e hā ʻoku totonu ke tauhi maʻu ʻi heʻetau fakakaukaú ʻi he taimi ʻoku tau kau atu ai ʻi he ngāue faifakamoʻoní?

¹⁷ ʻOku mahuʻinga ange ʻi he ʻahó ni ʻi ha toe taimi ki muʻa ʻetau malangaʻi ʻa e ongoongo lelei ʻo e Puleʻangá, koeʻuhí ʻoku ofi ʻa e ngataʻangá! (Mk. 13:10) ʻOku fiemaʻu ke tau manatuʻi ko e taumuʻa ʻetau malangá ke fakalāngilangiʻi ʻa Sihova. ʻE lava fēfē ke tau fai eni? ʻOku fiemaʻu ke tau tala ki he kakaí ko e ngaahi tāpuaki kotoa te tau maʻu ʻi he māmani foʻoú ʻe malava pē iá koeʻuhí ko e anga-lelei lahi ʻa Sihová.

18, 19. ʻOku anga-fēfē ʻetau fakalāngilangiʻi ʻa e ʻofa maʻataʻatā ʻa Sihová?

¹⁸ ʻI he taimi ʻoku tau malanga ai ki he kakaí, ʻoku lava ke tau fakamatalaʻi ko e taimi ʻe pule mai ai ʻa e Puleʻanga ʻo Kalaisí, ʻe maʻu ʻe he faʻahinga ʻo e tangatá ʻa e ngaahi ʻaonga kotoa ʻo e huhuʻí pea te tau hoko māmālie ai ʻo haohaoa. ʻOku pehē ʻe he Tohi Tapú: “Ko e fakatupú tonu ʻe fakatauʻatāinaʻi foki mei he pōpula ki he ʻauhá pea maʻu ʻa e tauʻatāina lāngilangiʻia ʻa e fānau ʻa e ʻOtuá.” (Loma 8:21) ʻE malava pē ení fakafou ʻi he ʻofa maʻataʻatā ʻa Sihová.

¹⁹ Kuo tau maʻu ʻa e monū ke tala ki he kakai kotoa fekauʻaki mo e talaʻofa fakafiefia ʻoku hā ʻi he Fakahā 21:4, 5: “Te ne [ʻOtuá] holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.” Pea pehē ʻe Sihova, ko e tokotaha naʻe ʻafio ʻi he taloní: “Vakai! ʻOku ou ngaohi ke foʻou ʻa e ngaahi meʻa kotoa pē.” ʻOkú ne toe pehē: “Tohi, koeʻuhi ko e ngaahi foʻi folofola ko ení ʻoku alafalalaʻanga mo moʻoni.” ʻI he taimi ʻoku tau malangaʻi faivelenga ai ʻa e ongoongo leleí ki he niʻihi kehé, ʻoku tau fakalāngilangiʻi moʻoni ai ʻa e ʻofa maʻataʻatā ʻa Sihová!