Ko e Hā ʻOku Leaʻaki ʻe he Tohi Tapú?

ʻOku fakatupunga ʻe he ʻOtuá ʻa e faingataʻá?

Ko e hā te ke leaʻakí?

• ʻIo

• ʻIkai

• Mahalo Pē

Meʻa ʻoku leaʻaki ʻe he Tohi Tapú

“Mole ke mamaʻo ʻa e fai angahala ʻa Ela; mo e faikovi ʻa Satai.” (Siope 34:10) ʻOku ʻikai ʻaupito ko e ʻOtuá ʻokú ne ʻomai ʻa e koví mo e faingataʻa ʻoku tau sio ai ʻi he māmaní.

Ko e hā te tau toe ako mei he Tohi Tapú?

• Ko Sētane ko e Tēvoló, “ʻa e pule ʻo e māmaní” ko e tokotaha tefito ia ʻokú ne fakatupunga ʻa e faingataʻaʻiá.—Sione 14:30.

• Ko e faingataʻaʻiá mo e koví ko e toe ola ia ʻoku faʻa hoko mei he ngaahi fili kovi ʻa e kakaí.—Sēmisi 1:14, 15.

ʻE toe ngata koā ʻa e faingataʻá?

ʻOku tui ʻa e kakai ʻe niʻihi ko e faʻahinga ʻo e tangatá ʻoku lava ke nau toʻo atu ʻa e faingataʻá fakafou ʻi heʻenau ngaahi feingá, ka ʻoku sio ʻa e niʻihi ia ʻoku ʻikai pē ha ʻamanaki ia neongo ʻa e fuʻu liliu lahi kuo hoko ʻi he māmaní. Ko e hā hoʻo fakakaukaú?

Meʻa ʻoku leaʻaki ʻe he Tohi Tapú

ʻE toʻo ʻosi atu ʻe he ʻOtuá ʻa e faingataʻá. ‘“E ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:3, 4.

Ko e hā te tau toe ako mei he Tohi Tapú?

• ʻE ngāueʻaki ʻe he ʻOtuá ʻa Sīsū ke toʻo atu ʻa e faingataʻa naʻe fakatupunga ʻe he Tēvoló.—1 Sione 3:8.

• Ko e kakai leleí te nau nofo melino ʻi he māmaní ʻo taʻengata.—Saame 37:9-11, 29.