“Ke Faitāpuekina Koe ʻi Hoʻo Fakakaukau Leleí!”

KO E ngaahi lea ʻi ʻolungá naʻe leaʻaki ia ʻe Tēvita ʻo ʻIsileli ʻo e kuonga muʻá ʻi heʻene fakahīkihikiʻi ha fefine naʻá ne fetaulaki mo ia. Ko hono hingoá ko ʻApikale. Ko e hā naʻá ne ueʻi ʻa Tēvita ke ne fakahīkihikiʻi iá, pea ʻe lava fēfē ke tau maʻu ʻaonga mei heʻene faʻifaʻitakiʻangá?

Naʻe fetaulaki ʻa Tēvita mo e fefine mali ko ení ʻi he taimi naʻá ne hola holo ai meia Tuʻi Saulá. Naʻe mali ʻa ʻApikale mo Nāpale, ko ha tangata tuʻumālie ʻa ia naʻe fakakaikai ʻene fuʻu tākanga sipi ʻi he feituʻu moʻungaʻia ʻo e fakatonga ʻo Siutá. Ko Tēvita mo ʻene kau tangatá naʻa nau “hangē ha ʻā maluʻi” ki he kau tauhi-sipi mo e tākanga sipi ʻa Nāpalé. Naʻe fekau atu ʻe Tēvita ʻene kau talafekaú ke nau ʻalu kia Nāpale ʻo kole ‘ha meʻa pē ʻe lava ke ne foaki’ mai ke nau maʻu meʻatokoni mei ai. (1 Sām. 25:8, 15, 16) Naʻe ʻikai ʻaupito ke taʻeʻuhinga ʻa e kolé ʻi he fakakaukau atu ki hono maluʻi ʻe Tēvita mo ʻene kau tangatá ʻa e ngaahi meʻa ʻa Nāpalé.

Ka ko Nāpalé naʻá ne hangē pē ko hono hingoá ʻa ia ʻoku ʻuhingá ko e “Taʻeʻatamai” pe “Vale.” Naʻá ne fakafeangai ʻi ha founga naʻe fefeka mo fakatupu ʻita ʻo ʻikai ke ne tali ʻa e kole ʻa Tēvitá. Ko ia naʻe teuteu leva ʻa Tēvita ke ne tauteaʻi ʻa Nāpale ʻi heʻene anga-kovi mo taʻefakaʻatuʻí. ʻE fua ʻe Nāpale mo hono falé ʻa e nunuʻa ʻo ʻene tōʻonga valé.—1 Sām. 25:2-13, 21, 22.

ʻI hono ʻiloʻi ʻe ʻApikale ʻa e nunuʻa mafatukituki ʻo e palani naʻe teu ke fakahokó, naʻá ne loto-toʻa ke tuʻu vahaʻa ai. Naʻá ne kōlenga anga-fakaʻapaʻapa kia Tēvita makatuʻunga ʻi hono vahaʻangatae mo Sihová. Pea naʻá ne tokonaki ha fuʻu meʻakai lahi maʻa Tēvita, ʻa ia ʻe hoko ko e tuʻi hono hokó, pea ki heʻene kau tangatá. Ko ia naʻe fakahaaʻi ʻe Tēvita naʻe ngāueʻaki ʻe Sihova ʻa ʻApikale ke taʻofi ia mei hono fai ha meʻa naʻá ne mei ʻai ia ke ne halaia ʻi he ʻao ʻo e ʻOtuá. Naʻe pehē ʻe Tēvita kia ʻApikale: “Ke faitāpuekina koe ʻi hoʻo fakakaukau leleí! ʻOfa ke faitāpuekina koe ʻi hono taʻotaʻofi au he ʻahó ni mei hono ʻai ke hoko ha halaia ʻi he totó.”—1 Sām. 25:18, 19, 23-35.

ʻOku faingofua ʻetau sio heʻikai ʻaupito te tau loto ke hangē ko Nāpalé, ʻo taʻehoungaʻia ʻi he ngaahi meʻa lelei kuo fai maʻatautolú. ʻIkai ko ia pē, ʻi heʻetau sio ki he hoko ha tuʻunga ʻoku kovi, ʻoku lelei ke tau fai ʻa e meʻa te tau malavá ke taʻofi ia. ʻIo, ʻoku lava ke tau fakaongo atu ʻa e fakakaukau ʻa e tokotaha-tohi-sāmé ʻi heʻene kole ki he ʻOtuá: “Akoʻi mai kiate au ʻa e fakakaukau lelei mo e ʻilo.”—Saame 119:66.

Ko e niʻihi te nau fakatokangaʻi nai ʻa e poto pe fakakaukau lelei ʻoku hā ʻi heʻetau tōʻongá. Tatau ai pē pe te nau tala mai pe ʻikai, te nau maʻu nai ʻa e ongoʻi ʻo hangē ko Tēvitá, ʻa ia naʻá ne pehē: “Ke faitāpuekina koe ʻi hoʻo fakakaukau leleí!”