1 Tokoni ke Fakaʻehiʻehi mei he Ngaahi Palopalemá

NGĀUEHALAʻAKI ʻA E ʻOLOKAHOLÓ

Ko Delphine, naʻe lave ki ai ʻi he kupu ki muʻá, naʻá ne ongoʻi ne hanga ʻe heʻene ngaahi loto-moʻuá ʻo teke ia ki he inu tōtuʻá. ʻOku ʻikai ke fakahalaiaʻi ʻe he Tohi Tapú ʻa hono ngāueʻaki fakafuofua ʻa e ʻolokaholó, ka ʻokú ne pehē: “ʻOua naʻá ke kau fakataha mo kinautolu ʻoku nau inu ʻo fuʻu lahi ʻa e uainé.” (Palōveepi 23:20) Ko hono ngāuehalaʻaki ʻa e ʻolokaholó kuo hoko ai ha ngaahi palopalema fakaemoʻuilelei mafatukituki, motu mo maumau ai ʻa e ngaahi vahaʻangatae, pea laui miliona ʻa e ngaahi mate mutukia ʻi he taʻu taki taha. Ko e konga lahi ʻo e faingataʻá ni naʻe mei malava pē ke fakaʻehiʻehi mei ai kapau naʻe muimui ʻa e kakaí ki he faleʻi fakapotopoto ʻa e Tohi Tapú.

Naʻe fai ia ʻe Delphine. ʻOkú ne pehē he taimí ni: “Naʻá ku fakatokangaʻi naʻe ʻikai solova ʻe he ʻolokaholó ʻeku loto-moʻuá. Naʻá ku ngāueʻaki ʻa e poto ʻi he Filipai 4:6, 7, ʻa ia ʻoku pehē: ‘ʻOua ʻe hoko ʻo loto-moʻua ʻi ha faʻahinga meʻa, ka mou ʻai ke ʻilo hoʻomou ngaahi kolé ʻe he ʻOtuá.’ ʻI he pō taki taha ʻi heʻeku ongoʻi ʻa e felēleaki ʻa e fakakaukaú mo e malanga hake ʻa e loto-moʻuá, naʻá ku kōlenga kia Sihova. Naʻá ku fakamatalaʻi ʻa e kotoa ʻo ʻeku ngaahi ongoʻí, kau ai ʻeku ʻitá, loto-mamahí, mo e siva e ʻamanakí, pea naʻá ku kōlenga kiate ia ke ne tokoniʻi au ke u maʻu ʻa e founga ʻe lava ke u ongoʻi lelei ange ai. ʻI he pongipongí, naʻá ku fakapapauʻi kuó u tukuange atu ʻa e ngaahi ongoʻi ko iá. Ne hā ngali ne fakahuʻufataha ʻe he tōʻonga lotu ko iá hoku ʻatamaí ʻi he meʻa naʻá ku maʻú kae ʻikai ʻi he meʻa naʻe ʻikai ke u maʻú. Naʻá ku fili ke ʻoua ʻaupito naʻá ku toe inu ʻolokaholo. Koeʻuhi ko e nonga naʻá ku maʻú naʻe mahuʻinga ʻaupito ia kiate au, naʻe ʻikai ʻaupito te u tuku ia ke mole.”

ʻULUNGAANGA TAʻETAAU

Ko e ngaahi palopalema ʻe niʻihi ʻokú ne fakatupunga ʻa e loto-mamahi mo e faingataʻaʻia. Ka ʻoku lava ke tokoniʻi kitautolu ʻe he ngaahi tefitoʻi moʻoni ʻi he Tohi Tapú ke tau fakaʻehiʻehi ai mei hono fakatupu ʻa e niʻihi ʻo e tupuʻanga tefitó​—ko e fakatātaá, ko e fakamalinga taʻetotonú mo e ʻata fakalieliá. “Naʻe faingofua ʻaupito ke fakamalinga,” ko e lau ia ʻa ha talavou ko Samuel. “ʻI he taimi ʻe niʻihi naʻe ʻikai tohoakiʻi au ia ki he tokotaha ʻe tahá, ka naʻe lava ke u tala naʻá ne saiʻia ʻiate au​—pea naʻe ʻai ai ke te fiefia ke fakamalinga.” Naʻe fakatokangaʻi ʻe Samuel naʻe tukuakiʻi ia ki he fuʻu lahi ʻene fakamalingá​—naʻa mo e taimi naʻe ʻikai ai te ne taumuʻa pehē aí—​naʻe faai atu pē ʻo ne fili ke hoko atu ā ʻo fai fakakaukauʻi pē ʻa e fakamalingá. Ka naʻe fakahohaʻasi ia ʻe he tōʻongá ni. “Naʻe fakatupu maumau,” ko ʻene leá ia, “koeʻuhi naʻe tupu ai ʻa e ngaahi hehema mātuʻaki siokita.”

Naʻe lau ʻe Samuel ha kupu ki he toʻutupú naʻe pulusi ʻi he uepisaiti jw.org. Pea naʻá ne fakakaukau ki he Palōveepi 20:11, ʻa ia ʻoku pehē: “Naʻa mo ha kiʻi tama [pe “tamasiʻi,” fakamatala ʻi lalo] ʻoku ʻiloʻi ia ʻi heʻene ngaahi ngāué, pe ko ʻene tōʻongá ʻoku maʻa mo totonu.” Naʻe tokoni fēfē ia? Naʻe fakatokangaʻi ʻe Samuel ko ʻene fakamalingá naʻe ʻikai ke maʻa mo totonu. ʻOkú ne pehē leva: “Naʻá ku toe ʻiloʻi ko ha talavou ʻoku fakamalinga ʻokú ne fakatupu ʻa e ngaahi ʻulungaanga ʻe hoko ai ko ha hoa mali ʻikai lelei. Naʻá ku kamata fakakaukau pe ʻe anga-fēfē ʻa e ongoʻi ʻa hoku uaifi ʻi he kahaʻú kapau naʻá ne sio kiate au heʻeku fakamalinga mo ha fefine kehe. Naʻe ʻai ai au ke u ʻiloʻi ʻoku ʻikai ke taʻeʻiai hano maumau ʻa e tōʻonga ko iá. Ko e moʻoniʻi meʻa ko ia ʻoku faingofua hono fai iá ʻoku ʻikai ʻai ai ia ke tonu.” Naʻe liliu ʻa Samuel. Ko e fakaʻehiʻehi mei he fakamalingá kuó ne toe tokoniʻi ia ke ne fakaʻehiʻehi mei he ʻulungaanga taʻetāú.

Ko Antonio naʻá ne ʻi ha fakatuʻutāmaki lahi koeʻuhi ko e ʻulungaanga taʻetāú: Naʻe maʻunimā ia ʻe he ʻata fakalieliá. Neongo naʻá ne ʻosi mali ki ha fefine ʻa ia naʻá ne ʻofa lahi ai, ka naʻá ne toutou tō ki he tōʻonga ko ení. ʻOkú ne pehē ko e fakakaukau ʻo fekauʻaki mo e 1 Pita 5:8 naʻá ne tokoniʻi lahi ia. ʻOku pehē ai: “Tauhi maʻu hoʻomou fakakaukau leleí, faʻa leʻo! Ko homou filí, ʻa e Tēvoló, ʻokú ne ʻalu fano holo ʻo hangē ha laione ngungulú, ʻo kumi ki ha taha ke ne folofua.” ʻOku fakamatala ʻa Antonio: “Ko e ngaahi ʻata fakalieliá ʻoku takatakai ia ʻiate kitautolu ʻi he māmani ko ení, pea ko e ngaahi ʻata ko ení ʻoku lava ke piki maʻu ia ʻi he fakakaukaú. Naʻe tokoniʻi moʻoni au ʻe he veesi ko ení ke u fakakaukau ʻo fekauʻaki mo e matavai ʻo e ngaahi fakatauele ko ení. Naʻe fiemaʻu ke u manatuʻi ko e ngaahi fakatātā fakalielia ko iá ko e haʻu ia mei he Tēvoló. ʻI he taimí ni ʻoku ou lāuʻilo ko Sihova tokotaha pē ʻoku lava ke ne tokoniʻi au ke u ‘tauhi maʻu ʻeku fakakaukau leleí mo faʻa leʻo’ koeʻuhi ke u tauʻi ʻa e ngaahi ʻoho ʻoku fai ki heʻeku fakakaukaú, ki hoku lotó, mo ʻeku nofo malí.” Naʻe maʻu ʻe Antonio ʻa e tokoni naʻe fiemaʻu kiate iá, pea kuó ne sītuʻa mei he tōʻonga kovi naʻá ne maʻú. Ko hono olá, kuo tokoniʻi ai ia ke ne fakaʻehiʻehi mei he ngaahi faingataʻa ʻoku toe kovi angé.

ʻOku hā mahino, ʻoku tokonaki mai ʻe he Tohi Tapú ʻa e faleʻi ʻaonga ʻoku lava ke ne tokoniʻi kitautolu ke tau fakaʻehiʻehi ai mei he ngaahi palopalema mafatukitukí. Kae fēfē ʻa e ngaahi palopalema kuo faiaka mo fakamoʻoniʻi kuo hoko taʻetukú? Tau sio angé ki he founga ʻoku lava ke tokoniʻi ai kitautolu ʻe he Folofola ʻa e ʻOtuá ke tau fakaleleiʻi ʻa e ngaahi ʻīsiu faingataʻa peheé.