Fehuʻi mei he Kau Lautohí
ʻOku ngāueʻaki ʻa e Saame 144:12-15 ki he kakai ʻa e ʻOtuá pe ki he kau muli fulikivanu ʻoku lave ki ai ʻi he veesi 11?
Ko e fakalea faka-Hepeluú ʻoku lava ke toe ʻi ai hono ngaahi ʻuhinga. ʻI hono leaʻaki iá, ko e ngaahi meʻa tefito ko ení ʻoku tokoniʻi ai kitautolu ke tau mahinoʻi ʻa e fakakaukau totonú:
Fakakaukau ki he toenga ʻo e sāmé. Ko e ngāueʻaki ʻo e “pea” ʻi he veesi 12 ʻoku ʻuhinga iá ko e ngaahi tāpuaki ʻoku hoko atu ʻi he veesi 12 ki he 14 ʻoku mahinoʻi ko e ʻuhinga ia ki he kau māʻoniʻoní—ʻa e faʻahinga ʻoku nau kole ke ‘fakahaofi pea fakamoʻui’ kinautolu mei he kau fulikivanú (veesi 11). ʻOku toe tapua atu ʻa e fakakaukau ko ení ʻi he veesi 15, ʻa ia ʻi heʻene ʻasi tuʻo ua ai ʻa e foʻi lea “fiefia ē” ʻoku ʻuhinga iá ki he kakai tatau—ko e faʻahinga “ʻa ia ko honau ʻOtuá ʻa Sihová!”
Ko e mahino ko ení ʻoku fehoanakimālie ia mo e ngaahi kupu kehe ʻi he Tohi Tapú ʻoku talaʻofa mai ai ʻa e ngaahi tāpuaki fakaʻotua ki he kakai faitōnunga ʻa e ʻOtuá. Ko e saame ko ení ʻoku fakahaaʻi ai ʻa e ʻamanaki makatuʻunga lelei ʻa Tēvita ʻi he hili hono fakahaofi ʻe he ʻOtuá ʻa ʻIsileli mei hono ngaahi filí, te Ne tāpuakiʻi ʻa e kakaí ʻaki ʻa e fiefia mo e lakalakaimonū. (Liv. 26: 9, 10; Teu. 7: 13; Saame 128: 1-6) Ko e fakatātaá, ʻoku fakahaaʻi ʻi he Teutalōnome 28:4: “ʻE tāpuekina ʻa hoʻo fānaú mo e fua ʻo ho kelekelé mo e ʻuhiki ʻo hoʻo fanga manú, ʻa hoʻo ʻuhikiʻi pulú mo e sipí.” Ko e moʻoni, lolotonga ʻa e pule ʻa e foha ʻo Tēvita ko Solomoné, naʻe maʻu ai ʻe he puleʻangá ʻa e melino mo e lakalakaimonū taʻehanotatau. Ko e toe meʻa ʻe taha, ko e ngaahi tafaʻaki ʻo e pule ʻa Solomoné ʻoku fakahaaʻi ai ʻa e pule ʻa e Mīsaiá.—1 Tuʻi 4:20, 231; Saame 72:1-20.
ʻI he fakamulitukú, ko e mahino ko eni fekauʻaki mo e Saame 144 ʻoku ʻai ai ʻa e sāmé fakakātoa ke hā mahino lelei ange ai ʻa e ʻamanaki kuo fuoloa hono koloaʻaki ʻe he kau sevāniti ʻa Sihová—ko e tauteaʻi fakaʻotua ʻo e fulikivanú pea hoko atu ai ʻa e fokotuʻu maʻu ʻo e melino mo e lakalakaimonū tuʻuloa ki he māʻoniʻoní.—Saame 37:10, 11.