Ko ha Utu-Taʻu Lahi!

NAʻE tomuʻa tala ʻe Sīsū ʻe fiefia ʻa hono kau muimuí ʻi ha utu-taʻu lahi ʻi he taimi ko eni ʻo e ngataʻangá. (Māt. 9:37; 24:14) Fakakaukau angé ki hono fakamoʻoniʻi ʻa e hoko ʻa ʻene lea ko ení ʻi ha founga makehe ʻi ha feituʻu ko Transcarpathia, ʻi ʻIukalaine. ʻI he lotolotonga ʻo e ngaahi kolo kaungāʻapi pē ʻe tolu ʻi he feituʻu ko iá, ʻoku ʻi ai ʻa e fakatahaʻanga ʻe 50 mo e kau malanga ʻe toko 5,400 tupu.a Ko e moʻoni, ko e toko 1 mei he kakai ʻe toko 4 ʻo e tokolahi fakakātoa ʻo e kolo ʻe tolu ko ení ko e taha ia ʻo e Kau Fakamoʻoni ʻa Sihová!

ʻOku fēfē ʻa e feituʻu ngāue fakamalangá? “ʻOku fakaʻapaʻapaʻi ʻe he kakai ʻi hení ʻa e Tohi Tapú, fakamahuʻingaʻi ʻa e fakamaau totonú, maʻu ʻa e ngaahi haʻi fakafāmili mālohi, pea feinga loto-moʻoni ke fetokoniʻaki,” ko e lau ia ʻa ha tokoua ʻi he feituʻú ko Vasile. ʻOkú ne toe pehē: “ʻOku ʻikai maʻu pē ke nau loto-tatau mo ʻetau tuí. Ka ʻi he taimi ʻokú ke fakahaaʻi ange ai kiate kinautolu ha meʻa mei he Tohi Tapú, ʻoku nau fanongo tokanga.”

Ko e moʻoni, ʻoku fehangahangai hotau fanga tokouá mo e fanga tuofāfiné mo ha ngaahi pole anga-kehe ʻi heʻenau malanga ʻi ha feituʻu ʻoku māʻolunga ai ʻa e ʻavalisi ʻo e kau malangá ʻi he tokolahi ʻo e kakaí. Ko e fakatātaá, ko e fakatahaʻanga ʻe taha ʻoku ʻi ai ʻa e kau malanga ʻe toko 134 ka ko e ngaahi ʻapi tāutaha pē ʻe 50 ʻoku ʻi hono feituʻu ngāué! ʻOku anga-fēfē ʻa e feʻunuʻaki ʻa e kau malangá ki he tuʻunga ko ení?

ʻOku ngāue mālohi ʻa e fanga tokoua mo e fanga tuofāfine tokolahi koeʻuhí ke nau malanga ʻi he ngaahi feituʻu ʻoku lahi ange ai ʻa e fiemaʻú. “Ko e ʻavalisi ʻo e kau malangá ki he ngaahi ʻapi ʻi he feituʻu ngāue ʻo ʻemau fakatahaʻangá ko e toko 1 ki he 2,” ko e lau ia ʻa ha tokoua taʻu 90 ko Ionash. “ʻOku ou malanga ʻi he koló, ka ki muí ni mai ʻi he hōloa ʻa hoku tuʻunga moʻui leleí, naʻá ku fononga foki ai ʻi he maile nai ʻe 100 (kilomita ʻe 160) ki ha feituʻu naʻe teʻeki ke ngāueʻi, ʻa ia naʻá ku malanga ai ʻi he lea faka-Hungalí.” Kuo pau ke fai ʻe he kau malangá ʻa e ngaahi feilaulau ke nau tokoni ʻi he ngaahi feituʻu ngāue kehé. “Ke maʻu ʻa e lēlué, ʻoku ou tuʻu hake ʻi he 4:00 hengihengi peá u malanga ʻo aʻu ki he 6:00 efiafi ʻi he mavahe ʻa e lēlué ki ʻapí. Naʻá ku fai tuʻo ua pe tuʻo tolu ia ʻi he uike,” ko e lau ia ʻa Ionash. Naʻá ne ongoʻi naʻe tuha ʻa ʻene ngaahi feingá? “Naʻá ku maʻu ʻa e fiefia lahi ʻi he founga ngāue fakafaifekau ko iá,” ko ʻene laú ia. “Naʻá ku fiefia ʻi hono tokoniʻi ha fāmili naʻe nofo mamaʻo ke nau ako ʻa e moʻoní.”

ʻOku hā mahino, ʻoku ʻikai malava ke fononga mamaʻo ʻa e tokotaha kotoa ʻi he ngaahi fakatahaʻanga ʻi he feituʻu ko ení. Ka ko e faʻahinga kotoa, kau ai ʻa e kau malanga taʻumotuʻá, ʻoku nau feinga lahi ke ʻosiki fakaʻāuliliki ʻa e feituʻu ngāue fakalotofonuá. Ko hono olá, ʻi he 2017, ko hono fakatahaʻi ʻa e kau maʻu Fakamanatu ʻi he kolo ko eni ʻe tolú naʻe meimei liunga ua ia ʻi he tokolahi ʻo e kau malangá​—pe vaeua ʻo e tokolahí fakakātoa. ʻOku ʻikai toe fehuʻia, ko fē pē ha feituʻu ʻoku tau ngāue ai, ʻoku kei fiemaʻu ke tau “femoʻuekina ai pē ʻi he ngāue ʻa e ʻEikí.”​—1 Kol. 15:58.