Founga ke ʻAi Ai Hoʻo Ako ʻa e Tohi Tapú ke Ola Lelei mo Fakafiefia Ange

Lau ‘e Siosiua ‘a e Laó; holo ‘a e ‘ā ‘o Sielikoó pea ‘oku tu‘u pē ‘a e fale ‘o Lēhapí; hiki ‘e Siosiua hono nimá ki he langí ‘i he lotu

NAʻE pau ke taki ʻe Siosiua ʻa e puleʻanga ʻo ʻIsilelí ki he Fonua ʻo e Talaʻofá. Naʻe mātuʻaki faingataʻa eni. Kae kehe, naʻe fakaivimālohiʻi mo fakalototoʻaʻi ia ʻe Sihova ʻaki ʻene pehē: “Ke ke loto-toʻa peá ke mātuʻaki tuʻu mālohi.” Naʻá ne tala ange kia Siosiua kapau te ne lau mo talangofua ki he Laó, te ne fai leva ai ha ngaahi fili fakapotopoto pea te ne lavameʻa.—Sios. 1:7, 8.

ʻOku tau moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia,” ko ia ʻe lava foki ke ʻi he tuʻunga faingataʻa ʻa ʻetau moʻuí. (2 Tīm. 3:1) Kapau ʻoku tau loto ke lavameʻa ʻo hangē ko Siosiuá, ʻoku fiemaʻu ke tau muimui ʻi he faleʻi naʻe ʻoange ʻe Sihova kiate iá. ʻOku fiemaʻu ke tau lau maʻu pē ʻa e Tohi Tapú pea ngāueʻaki ʻa e meʻa ʻoku tau akó ke fai ha ngaahi fili lelei.

Ka ʻoku ʻikai nai ke ʻiloʻi ʻe he niʻihi ʻo kitautolu ʻa e founga ke ako aí, pe ʻoku ʻikai nai ke tau fiefia ʻi he akó. Neongo ia, ʻoku mātuʻaki mahuʻinga ʻa e ako Tohi Tapu fakafoʻituituí. ʻI hoʻo vakaiʻi ʻa e puha “ʻAhiʻahiʻi ʻa e Ngaahi Fokotuʻu ko Ení,” te ke maʻu ai ʻa e ngaahi fakakaukau ʻa ia ʻe tokoni kiate koe ke ke maʻu ʻaonga ai mei hoʻo akó peá ke toe fiefia ange ai.

Naʻe hiva ʻa e tokotaha-tohi-sāmé: “Tataki ange au ʻi he ʻalunga ʻo hoʻo ngaahi fekaú, he ko ia ʻoku ou fiefia aí.” (Saame 119:35) Ko koe foki ʻe lava ke ke fiefia ʻi hono ako ʻa e Folofola ʻa e ʻOtuá. Te ke ʻilo ʻa e ngaahi fakakaukau fakaʻofoʻofa lahi ʻi he hokohoko atu hoʻo ako ʻa e Tohi Tapú.

Neongo heʻikai nai te ke taki ha puleʻanga ʻo hangē ko Siosiuá, ʻoku ʻi ai ʻa hoʻo ngaahi palopalema. Ko ia, ʻi he hangē ko Siosiuá, ako mo talangofua ki he Folofola ʻa e ʻOtuá. Kapau te ke fai pehē, te ke fai ai ha ngaahi fili fakapotopoto pea te ke lavameʻa.

ʻAHIʻAHIʻI ʻA E NGAAHI FOKOTUʻU KO ENÍ

Lotu ki muʻa ke ke akó. ʻOku ʻi he Tohi Tapú ʻa e fakakaukau ʻa Sihová, pea kuo hiki ia ke ke maʻu ʻaonga mei ai. Ko ia ʻi hoʻo lau ʻa e Tohi Tapú, kole kia Sihova ke ne tokoniʻi koe ke ke mahinoʻi ʻa e meʻa ʻokú ke laú, manatuʻi ia, pea ngāueʻaki ia ke ke fai ha ngaahi fili lelei ʻi hoʻo moʻuí.—ʻĒsela 7:10.
ʻEke hifo ʻa e ngaahi fehuʻi ko ení ʻi hoʻo lau ʻa e Tohi Tapú pe ko e ʻū tohi makatuʻunga ʻi he Tohi Tapú. Ko e fakatātaá: ‘Ko e hā ʻoku tala mai ʻe he konga ko ení kiate au fekauʻaki mo Sihová? ʻOku anga-fēfē ʻa e felāveʻi eni mo e kaveinga ʻo e Tohi Tapú? ʻE lava fēfē ke u ngāueʻaki ʻa e ngaahi fakakaukau ko ení ke tokoni ki he niʻihi kehé?’
Fakalaulauloto ki he meʻa ʻokú ke akó. Kiʻi tuʻu ʻi ha mōmeniti, ʻo fakakaukau fekauʻaki mo e meʻa kuó ke toki ʻosi laú. ʻEke hifo: ‘ʻOku ʻai au ʻe he meʻá ni ke u ongoʻi fēfē? Ko e hā ʻokú ne ʻai ai au ke u ongoʻi peheé? ʻOku anga-fēfē ʻene felāveʻi mo e meʻa kuo hoko kiate au ʻi he kuohilí, meʻa ʻoku hoko kiate au he taimi ní, pe ko e meʻa nai ʻe hoko kiate au ʻi he kahaʻú? ʻE lava ke u ngāueʻaki fēfē ʻa e ngaahi tefitoʻi moʻoni Fakatohitapu ko ení pe ko e akonaki ko ení ʻi heʻeku moʻuí?’ (Siope 23:5; Saame 49:3) ʻI hoʻo fakalaulaulotó, sio angé pe ʻe lava ke ke fakamatalaʻi ʻa e ʻuhinga ʻoku tala ai ʻe Sihova ki hono kakaí ke nau fakaʻehiʻehi mei ha ngaahi tōʻonga pau. Pe fakakaukau ki he nunuʻa ʻe hokó kapau ko e tokotaha ʻokú ke toki ʻosi lau fekauʻaki mo iá kuó ne fai ʻa e ngaahi meʻá ʻi ha founga kehe.—Teu. 32:28, 29.
Sioloto ki he ngaahi meʻá ʻi he taimi ʻokú ke lautohi aí. Ko e fakatātaá, ʻe lava ke ke sioloto atu ki he taimi naʻe fakatau atu ai ʻe he fanga tokoua ʻo Siosifá ʻa ia tonu ki he kau ʻIsimeʻelí? (Sēn. 37:18-28) Ko e hā ʻokú ke sio ki ai, fanongo, mo nāmuʻí? ʻAi koe ʻi he tuʻunga ʻo e faʻahinga ʻoku fai ki ai ʻa e talanoá. Ko e hā ʻenau fakakaukaú mo e ongoʻí? ʻI hoʻo sioloto ki he ngaahi meʻá, ʻe toe mohu ʻuhinga lahi ange ai ʻa hoʻo akó.
Ngāueʻaki ʻa e ngaahi meʻangāue fakaeako kuo tokonaki mai ʻe he kautahá. ʻE lava ke ʻai ʻe he ngaahi meʻá ni ke fakamānako ʻa hoʻo fekumí. Ako ki he founga ke ngāueʻaki ai ʻa e ngaahi meʻangāue ʻoku ala maʻu ʻi hoʻo leá, fakatouʻosi ʻi he ʻinitanetí mo e meʻa kuo pulusí. ʻOua ʻe toumoua ke kole ki he niʻihi kehé ke nau tokoniʻi koe ke ke ako ki he founga ke ngāueʻaki ola lelei ai iá. Ko e fakatātaá, ko e Watch Tower Publications Index pe ko e Tataki Fakaefekumi Maʻá e Kau Fakamoʻoni ʻa Sihová te ne tokoniʻi koe ke ke ʻilo ʻa e meʻa kuo hiki ʻi he ngaahi kaveinga pau pea ʻe fakamatalaʻi ai ʻa e ngaahi veesi Tohi Tapu lahi. Ngāueʻaki ʻa e fakamatala fakalahi ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní kapau ʻoku ala maʻu eni ʻi ha lea ʻoku lava ke ke lautohi ai. ʻOku ʻi ai ʻa e fakamatala ʻaonga ʻi he siokālafí, fakahokohoko taimí, fua mamafá mo e ngaahi fuá, mo e ngaahi kaveinga kehe.
Fakanounouʻi ʻa e ngaahi poini tefitó. ʻE tokoniʻi ai koe ke ke manatuʻi ʻa e meʻa kuó ke toki ʻosi akó. Kae kehe, ʻoku lelei ange ke talanoa mo e niʻihi kehé fekauʻaki mo e meʻa kuó ke akó. ʻOku ʻi ai ha meʻa ʻe lava ke ke ngāueʻaki ʻi hoʻo ngāue fakafaifekaú? ʻI hono fai ʻa e ngaahi meʻa ko ení, te ke manatuʻi ai ʻa e ngaahi poini tefitó, pea ʻe maʻu ʻaonga foki mo e niʻihi kehé mei hoʻo akó.