Naʻá Ke ʻIloʻi?

Naʻe lava fēfē ke hanganaki nonga ʻa e ākonga ko Sitīvení ʻi hono fakatangaʻí?

NAʻE fehangahangai ʻa Sitīveni mo ha kulupu ʻo e kau tangata fakafili. ʻI he hoko ko e kau mēmipa ʻo e fakamaauʻanga māʻolunga ʻi ʻIsilelí, ʻa e Sanetalimí, ko e kau fakamaau ko ia ʻe toko 71 naʻa nau kau ʻi he kau tangata maʻu mafai lahi taha ʻi he fonuá. Naʻe fakatahatahaʻi kinautolu ʻe he Taulaʻeiki Lahi ko Kaiafasí, ʻa ia naʻá ne tokangaʻi ʻa e fakamaauʻangá ʻi ha ngaahi māhina siʻi ki muʻa ange ʻi he taimi naʻe fakahalaiaʻi ai ki he mate ʻa Sīsuú. (Māt. 26:57, 59; Ngā. 6:8-12) ʻI heʻenau ʻomi taha taha ha ngaahi tukuakiʻi loí, naʻa nau fakatokangaʻi ai ha meʻa mātuʻaki fakaʻohovale fekauʻaki mo Sitīveni​—ko hono fofongá naʻe “hangē ko e fofonga ʻo ha ʻāngeló.”​—Ngā. 6:13-15.

Naʻe lava fēfē ke hanganaki nonga mo fiemālie ʻa Sitīveni ʻi ha tuʻunga fakamanavahē pehē? Ki muʻa ke toho atu ia ki he ʻao ʻo Sanetalimí, naʻe nōfoʻi kakato ʻa Sitīveni ʻi heʻene ngāue fakafaifekaú ʻi he malumalu ʻo e tataki mālohi ʻa e laumālie ʻo e ʻOtuá. (Ngā. 6:3-7) ʻI hono fakamāuʻí, naʻe ngāue ʻiate ia ʻa e laumālie tatau, fakatouʻosi ko ha fakafiemālie pea ko ha fakamanatu. (Sione 14:16) ʻI hono fai ʻe Sitīveni ʻa ʻene taukapo loto-toʻa, ʻoku hiki ʻi he Ngāue vahe 7, naʻe fakamanatu ʻe he laumālie māʻoniʻoní kiate ia ha kupu nai ʻe 20 pe lahi ange mei he Ngaahi Konga Tohi Tapu Faka-Hepeluú. (Sione 14:26) Ka naʻe fakaivimālohiʻi lahi ange ʻa e tui ʻa Sitīvení ʻi heʻene maʻu ha vīsone fekauʻaki mo Sīsū ʻokú ne tuʻu ʻi he nima toʻomataʻu ʻo e ʻOtuá.​—Ngā. 7:54-56, 59, 60.

Te tau fehangahangai nai ʻi ha ʻaho mo ha ngaahi fakamanamana mo e fakatanga. (Sione 15:20) ʻI he fafangaʻi tuʻumaʻu kitautolu ʻaki ʻa e Folofola ʻa e ʻOtuá pea ʻi he longomoʻui ʻi he ngāue fakafaifekaú, ʻoku tau fakaʻatā ai ʻa e laumālie ʻo Sihová ke ngāue ʻiate kitautolu. Te tau maʻu foki ai ʻa e mālohi ke matuʻuaki ʻa e fakafepakí lolotonga ʻa e tauhi maʻu ʻetau nonga ʻi lotó.​—1 Pita 4:12-14.