Ko Hai ʻa e ʻOtuá?

Ko e kakai tokolahi ʻoku nau pehē ʻoku nau tui ki he ʻOtuá. Ka ʻi he ʻeke pe ko hai ʻa e ʻOtuá, te ke maʻu ʻa e tali kehekehe. Ki he niʻihi, ko e ʻOtuá ʻoku anga-fefeka ʻene fakamāú, ʻoku manako pē ke tauteaʻi ʻa e kakaí ʻi heʻenau ngaahi fehālaakí. Ki he niʻihi, ʻokú ne ʻofa maʻu pē mo fakamolemole, ʻo tatau ai pē pe ko e hā ʻoku nau faí. Ka ʻoku kei tui pē ʻa e niʻihi ko e ʻOtuá ʻoku mamaʻo ʻaupito ia pea ʻikai mahuʻingaʻia ʻiate kitautolu. Ko hono maʻu ʻa e ngaahi fakakaukau fepakipaki peheé, ʻoku ongoʻi ai ʻe he tokolahi ʻoku mātuʻaki taʻemalava ke ʻiloʻi pe ko hai ʻa e ʻOtuá.

ʻOku mahuʻinga ke ʻiloʻi pe ko hai ʻa e ʻOtuá? ʻIo, ʻoku pehē. Ko hono ʻiloʻi lelei ʻa e ʻOtuá ʻoku lava ke ne ʻomai ʻa e taumuʻa mo e ʻaonga ki hoʻo moʻuí. (Ngāue 17:26-28) Ko hoʻo ʻunuʻunu ofi ange ki he ʻOtuá, ko e lahi ange ia ʻene ʻofa mo ʻene tokoniʻi koé. (Sēmisi 4:8) Ko e moʻoni, ko hono maʻu ʻa e ʻilo totonu ki he ʻOtuá ʻoku lava ke taki atu ki he moʻui ʻoku ʻikai hano ngataʻanga.​—Sione 17:3.

ʻE lava fēfē ke ke ʻiloʻi ʻa e ʻOtuá? Fakakaukau ki ha tokotaha ʻokú ke ʻiloʻi lelei, hangē ko ha kaumeʻa ofi. Naʻe anga-fēfē hono fakatupulekina ʻo e kaungāmeʻa ko iá? Ngalingali naʻá ke ʻiloʻi ʻa e hingoa ʻo e tokotahá, ʻulungāngá, meʻa ʻoku saiʻia aí mo ia ʻoku ʻikai ke saiʻia aí, pehē ki he meʻa kuó ne fai mo palani ke faí, mo ha toe meʻa kehe pē. Ko e meʻa ia naʻá ne tohoakiʻi koe ki he tokotaha ko iá​—naʻá ke ʻilo ʻo fekauʻaki mo ia.

ʻI he tuʻunga meimei tatau, ʻe lava ke tau ʻiloʻi ʻa e ʻOtuá ʻaki ʻa e fakakaukau ki he meʻa ko ení:

• KO HAI ʻA E HUAFA ʻO E ʻOTUÁ?

• KO E TOKOTAHA FĒFĒ IA?

• KO E HĀ KUO FAI ʻE HE ʻOTUÁ?

• KO E HĀ TE NE FAÍ?

• KO E HĀ ʻA E ʻAONGA ʻO HOʻO ʻILOʻI ʻA E ʻOTUÁ?

Ko e makasini ko ení ʻoku faʻu ke ne ʻomai ha ngaahi tali ʻi he Tohi Tapú ki he ngaahi fehuʻi ko iá. ʻE ʻikai ngata pē hono tokoniʻi koe ʻe he ngaahi kupú ke ke ʻiloʻi pe ko hai ʻa e ʻOtuá kae pehē ki he meʻa ʻoku tuku tauhi mai kiate koe ʻi hono maʻu ʻa e vahaʻangatae fakafoʻituitui mo iá.