Ngaahi ʻUlungaanga ʻOkú Ne ʻAi Ke Tau Maʻu ʻEtau Ngaahi Fakatahá

1-2. (a) Ko e hā ʻoku vakai hifo ki ai ʻa Sihova ʻi he fakatahataha ʻa e laui miliona ki he Kai Efiafi ʻa e ʻEikí? (Sio ki he fakatātā ʻi he takafí.) (e) Ko e hā te tau lāulea ki ai ʻi he kupu ko ení?

SIOLOTO atu ki he meʻa ʻoku vakai hifo ki ai ʻa Sihova ʻi he fakatahataha ʻa e laui miliona takatakai ʻi he māmaní ki he Kai Efiafi ʻa e ʻEikí. ʻOku ʻikai ke ne vakai pē ki he fuʻu tokolahi ʻo e kakaí; ʻokú ne fakatokangaʻi ʻa e tokotaha taki taha ʻoku ʻi aí. Ko e fakatātaá, ʻokú ne vakai ki he faʻahinga faitōnunga ʻoku nau haʻu he taʻu kotoa. ʻOku kau ʻiate kinautolu ʻa e niʻihi tāutaha ʻoku nau haʻu neongo ʻa e fehangahangai mo e fakatanga kakahá. Ko e niʻihi ʻoku ʻikai ke nau faʻa haʻu ki he ngaahi fakataha kehé, ka ʻoku nau vakai ki hono maʻu ʻa e Fakamanatú ko ha fakataha kuo pau ke nau maʻu. ʻOku toe fakatokangaʻi foki ʻe Sihova ʻa e faʻahinga ʻoku nau fuofua maʻu ʻa e Fakamanatú, mahalo ko haʻanau fieʻilo.

² Ko e moʻoni, ʻoku hōifua ʻa Sihova ʻi heʻene vakai ki he fuʻu tokolahi ʻoku nau maʻu ʻa e Fakamanatú. (Luke 22:19) Kae kehe, ʻoku ʻikai ke tokanga tefito pē ʻa Sihova ki he tokolahi ʻo e kakai ʻoku nau haʻú. ʻOkú ne mahuʻingaʻia ange ʻi he ʻuhinga ʻo ʻenau haʻú; ʻoku tokanga ʻa Sihova ia ki he fakaueʻilotó. ʻI he kupu ko ení, te tau lāulea ai ki he fehuʻi mātuʻaki mahuʻinga: Ko e hā ʻoku tau maʻu ai ʻa e Fakamanatu fakataʻú pea pehē foki ki he fakataha fakauike ʻoku tokonaki ʻe Sihova maʻá e faʻahinga ʻoku ʻofa kiate iá?

UEʻI KITAUTOLU ʻE HE ANGA-FAKATŌKILALÓ KE MAʻU ʻA E FAKATAHÁ

3-4. (a) Ko e hā ʻoku tau maʻu ai ʻa e ngaahi fakatahá? (e) Ko e hā ʻoku fakahaaʻi ʻe heʻetau maʻu ʻa e fakatahá fekauʻaki mo kitautolú? (f) ʻI he vakai ki he meʻa ʻoku lave ki ai ʻa e 1 Kolinitō 11:23-26, ko e hā ʻoku totonu ai ke ʻoua te tau liʻaki ʻa e Fakamanatú?

³ Ko e ʻuhinga tefito ʻoku tau maʻu ai ʻa e ngaahi fakataha ʻa e fakatahaʻangá he ko e konga ia ʻo ʻetau lotú. ʻOku tau toe maʻu ia koeʻuhí ʻoku akoʻi kitautolu ʻe Sihova ʻi he fakatahá. Ko e kakai pōlepolé ʻoku nau talitekeʻi ʻa e fakakaukau ʻoku fiemaʻu ke akoʻi kinautolú. (3 Sio. 9) ʻI hono kehé, ʻoku tau vēkeveke ke akoʻi kitautolu ʻe Sihova mo e kautaha ʻokú ne ngāueʻakí.​—ʻAi. 30:20; Sione 6:45.

⁴ Ko ʻetau maʻu ʻa e fakatahá ʻoku fakahaaʻi ai ʻoku tau anga-fakatōkilalo​—mateuteu pea loto-lelei ke akoʻi kitautolu. ʻI he pō ʻo e Fakamanatu ʻo e pekia ʻa Sīsuú, ʻoku tau maʻu ʻa e kātoanga mahuʻinga ko ení ʻo ʻikai koeʻuhí pē ʻoku tau ongoʻi ko ha fatongia ka koeʻuhí foki ʻoku tau talangofua anga-fakatōkilalo ai ki he fekau ʻa Sīsū: “Hanganaki fai eni ko hoku fakamanatu.” (Lau ʻa e 1 Kolinitō 11:23-26.) ʻOku fakaivimālohiʻi ʻe he fakataha ko iá ʻetau ʻamanaki ki he kahaʻú pea fakamanatu mai ai ʻa e ʻofa lahi ʻa Sihova ʻiate kitautolú. Neongo ia, ʻoku ʻiloʻi ʻe Sihova ʻoku fiemaʻu ke fakalototoʻaʻi mo fakaivimālohiʻi kitautolu ʻo laka hake ʻi he tuʻo taha pē he taʻu. Ko ia ʻokú ne tokonaki mai ʻa e ngaahi fakataha ʻi he uike taki taha pea fakaʻaiʻai kitautolu ke tau maʻu ia. ʻOku ueʻi kitautolu ʻe he anga-fakatōkilaló ke tau talangofua. ʻOku tau vaheʻi ʻa e ngaahi houa lahi ʻi he uike kotoa ke teuteu pea maʻu ʻa e ngaahi fakataha ko iá.

5. Ko e hā ʻoku tali ai ʻe he kakai anga-fakatōkilaló ʻa e fakaafe ʻa Sihová?

⁵ ʻI he taʻu taki taha, ʻoku tali ʻe he kakai anga-fakatōkilalo tokolahi ʻa e fakaafe ʻa Sihova ke ne akoʻi kinautolú. (ʻAi. 50:4) ʻOku nau fiefia ʻi hono maʻu ʻa e Fakamanatú pea kamata ke nau maʻu mo e ngaahi fakataha kehé. (Sāk. 8:20-23) ʻOku tau fiefia fakataha mo kinautolu ke akoʻi mo tataki ʻe Sihova, “[ko hotau] tokoní mo [hotau] faifakahaofí.” (Saame 40:17) Ko hono moʻoní, ko e hā ʻe lava ke toe fakafiefia ange​—pe mahuʻinga ange—​ʻi hono tali ha fakaafe ke akoʻi ʻe Sihova mo Sīsū, ʻa e ʻAlo ʻokú ne ʻofa lahi taha aí?​—Māt. 17:5; 18:20; 28:20.

6. Naʻe anga-fēfē hono tokoniʻi ʻe he anga-fakatōkilaló ha tangata ke ne maʻu ʻa e Fakamanatú?

⁶ ʻI he taʻu taki taha, ʻoku tau fai ʻa e feinga ke fakaafeʻi ʻa e tokolahi ʻe ala lavá ke maʻu ʻa e Fakamanatu ʻo e pekia ʻa Kalaisí. Kuo maʻu ʻaonga ʻa e kakai anga-fakatōkilalo tokolahi ʻi hono tali ʻetau fakaafé. Fakakaukau ki ha fakatātā. ʻI he ngaahi taʻu kuohilí, naʻe maʻu ʻe ha tangata ha tohi fakaafe ki he Fakamanatú, ka naʻá ne tala ange ki he tokoua naʻá ne ʻoange ia kiate iá heʻikai lava ke ne maʻu ia. Kae kehe, ʻi he pō ʻo e Fakamanatú, naʻe ʻohovale ʻa e tokouá ʻi he sio ki he hū ange ʻa e tangatá ki he Fale Fakatahaʻangá. Naʻe maongo ʻaupito ki he tangatá hono talitali lelei iá peá ne kamata maʻu ʻetau ngaahi fakataha fakauiké. Ko hono moʻoní, naʻá ne liʻaki pē ʻa e fakataha ʻe tolu ʻi he toenga ʻo e taʻú. Ko e hā naʻá ne tokoniʻi ia ke ne maʻu kotoa ʻa e ngaahi fakatahá? Naʻá ne anga-vaivai moʻoni ke liliu ʻene fakakaukaú. Naʻe pehē ʻe he tokoua naʻá ne fakaafeʻi iá ki mui ai, “Ko ha tangata anga-fakatōkilalo moʻoni ia.” ʻOku ʻikai ha veiveiua naʻe tohoaki mai ʻe Sihova ʻa e tangatá ni ke lotu kiate Ia, pea ko ha tokoua ʻosi papitaiso ia he taimí ni.​—2 Sām. 22:28; Sione 6:44.

7. ʻOku tokoniʻi fēfē kitautolu ʻe he meʻa ʻoku tau ako ʻi he fakatahá mo lau ʻi he Tohi Tapú ke tau anga-fakatōkilaló?

⁷ Ko e meʻa ʻoku tau ako ʻi he ngaahi fakatahá mo e meʻa ʻoku tau lau ʻi he Tohi Tapú ʻoku lava ke tokoniʻi ai kitautolu ke tau anga-fakatōkilalo. ʻI he ngaahi uike ki muʻa he Fakamanatú, ʻoku faʻa fakatefito ʻetau ngaahi fakatahá ʻi he faʻifaʻitakiʻanga ʻa Sīsuú mo e anga-fakatōkilalo naʻá ne fakahāhā ʻi hono foaki ʻene moʻuí ko ha huhuʻí. Pea ʻi he lolotonga ʻa e ngaahi ʻaho ki muʻa he Fakamanatú, ʻoku lelei kapau ʻe malava ke tau lau ʻa e fakamatala Fakatohitapu fekauʻaki mo e ngaahi meʻa naʻe hoko ʻi he pekia mo e toetuʻu ʻa Sīsuú. Ko e meʻa ʻoku tau ako ʻi he ngaahi fakataha peheé mo e meʻa ʻoku tau lau ʻi he ngaahi fakamatala Fakatohitapu ko iá ʻoku ʻai ai ke lahi ange ʻetau houngaʻia ʻi he feilaulau naʻe fai ʻe Sīsū maʻatautolú. ʻOku ueʻi kitautolu ke tau faʻifaʻitaki ki heʻene tōʻonga anga-fakatōkilaló pea fai ʻa e finangalo ʻo Sihová, naʻa mo ʻene faingataʻa kiate kitautolú.​—Luke 22:41, 42.

TOKONIʻI KITAUTOLU ʻE HE LOTO-TOʻÁ KE MAʻU ʻA E FAKATAHÁ

8. Naʻe anga-fēfē hono fakahāhā ʻe Sīsū ʻa e loto-toʻá?

⁸ ʻOku tau feinga foki ke faʻifaʻitaki kia Sīsū ʻi hono fakahāhā ʻa e loto-toʻá. Fakakaukau ki he loto-toʻa naʻá ne fakahāhā ʻi he ngaahi ʻaho ki muʻa ʻi heʻene pekiá. Naʻá ne ʻiloʻi lelei naʻe vave ke ngaohikovia, haha pea tāmateʻi ia ʻe hono ngaahi filí. (Māt. 20:17-19) Ka, naʻá ne loto-lelei ke fehangahangai mo e maté. ʻI he aʻu ki he taimi ko iá, naʻá ne tala ange ki heʻene kau ʻapositolo faitōnungá, ʻa ia naʻa nau ʻi Ketisemani fakatahá: “Tuʻu hake, tau ʻalu. Vakai! Kuo fakaofi mai ʻa hoku tokotaha lavakí.” (Māt. 26:36, 46) Pea ʻi he haʻu ʻa e fuʻu kakaí mo e ngaahi meʻataú ke puke iá, naʻá ne laka atu ki muʻa, ʻo ʻai ke ʻiloʻi ia, pea fekauʻi ʻa e kau sōtiá ke tuku ange ʻene kau ʻapositoló. (Sione 18:3-8) He loto-toʻa tuʻu-ki-muʻa ē naʻe fakahāhā ʻe Sīsuú! ʻI he ʻahó ni ko e kau Kalisitiane paní mo e fanga sipi kehé ʻoku nau feinga ke faʻifaʻitaki kia Sīsū ʻi hono fakahāhā ʻa e loto-toʻá. Anga-fēfē?

9. (a) Ko e hā ʻe fiemaʻu nai ai kiate kitautolu ʻa e loto-toʻá ke maʻu maʻu pē ʻa e ngaahi fakatahá? (e) ʻE lava fēfē ke kaunga ʻetau faʻifaʻitakiʻangá ki hotau fanga tokoua ʻoku tuku pilīsoné?

⁹ Ke maʻu maʻu pē ʻa e ngaahi fakatahá, ʻe fiemaʻu nai ke tau fakahāhā ʻa e loto-toʻa ʻi he ngaahi tuʻunga faingataʻá. Ko e niʻihi ʻo hotau fanga tokouá mo e fanga tuofāfiné ʻoku nau maʻu ʻa e ngaahi fakatahá neongo ʻa hono lōmekina kinautolu ʻe he mamahi, fakalotosiʻi pe ko e mahamahakí. Ko e niʻihi ʻoku nau maʻu loto-toʻa ʻa e ngaahi fakatahá neongo ʻa e fakafepaki mālohi mei he ngaahi mēmipa ʻo e fāmilí pe kau maʻu mafai fakapuleʻangá. Kiʻi tuʻu hifo ʻo fakakaukau fekauʻaki mo e kaunga ʻetau faʻifaʻitakiʻangá ki hotau fanga tokoua ʻoku tuku pilīsone koeʻuhi ko ʻenau tuí. (Hep. 13:3) ʻI he taimi ʻoku nau fanongo ai ʻoku tau hokohoko atu ke tauhi kia Sihova neongo ʻa e ʻahiʻahi ʻoku tau fekuki mo iá, ʻoku fakaivimālohiʻi ai kinautolu ke tauhi maʻu ʻenau tui, loto-toʻa mo e anga-tonú. Naʻe hokosia ʻe he ʻapositolo ko Paulá ʻa e meʻa meimei tatau. ʻI hono tuku pilīsone ia ʻi Lomá, naʻá ne fiefia ʻi ha taimi pē naʻá ne fanongo ai naʻe tauhi faitōnunga ki he ʻOtuá ʻa hono fanga tokouá. (Fil. 1:3-5, 12-14) ʻI he ki muʻa pē pe ʻi he hili pē hono tuku ange ʻa Paulá, naʻá ne hiki ʻene tohi ki he kau Hepeluú. ʻI heʻene tohí naʻá ne ekinaki ai ki he kau Kalisitiane faitōnunga ko iá ke “hokohoko atu ʻa [ʻenau] ʻofa fakatokouá” pea ʻoua ʻe liʻaki ʻa e fakataha fakatahatahá.​—Hep. 10:24, 25; 13:1.

10-11. (a) Ko hai ʻoku totonu ke tau fakaafeʻi ki he Fakamanatú? (e) Ko e hā ʻa e ʻuhinga ʻoku ʻomai ʻi he ʻEfesō 1:7 ke tau fai pehē aí?

¹⁰ ʻOku tau fakahāhā ʻa e loto-toʻa ʻi heʻetau fakaafeʻi hotau ngaahi kāingá, kaungāngāué mo e kaungāʻapí ki he Fakamanatú. Ko e hā ʻoku tau fakaafeʻi ai ʻa e faʻahinga peheé? ʻOku tau houngaʻia lahi ʻi he meʻa kuo fai ʻe Sihova mo Sīsū maʻatautolú ʻo ʻikai ai ke tau toumoua ke fakaafeʻi ʻa e niʻihi kehé ke nau maʻu ʻa e Fakamanatú. ʻOku tau loto ke nau ako ki he founga ʻe lava foki ke nau maʻu ʻaonga ai mei he “ʻofa maʻataʻatā” ʻa Sihová fakafou ʻi he huhuʻí.​—Lau ʻa e ʻEfesō 1:7; Fkh. 22:17.

¹¹ ʻI he taimi ʻoku tau fakahāhā ai ʻa e loto-toʻá ʻaki ʻa e fakataha fakatahatahá, ʻoku tau toe fakahāhā ai ha ʻulungaanga mahuʻinga ʻe taha, ʻa e ʻulungaanga ʻoku fakatou fakahāhā ʻe he ʻOtuá mo hono ʻAló ʻi he ngaahi founga tuʻu-ki-muʻa.

KOUNAʻI KITAUTOLU ʻE HE ʻOFÁ KE MAʻU ʻA E FAKATAHÁ

12. (a) ʻOku anga-fēfē hono fakaivimālohiʻi ʻe heʻetau ngaahi fakatahá ʻa ʻetau ʻofa kia Sihova mo Sīsuú? (e) Ko e hā ʻoku fakalototoʻaʻi kitautolu ʻe he 2 Kolinitō 5:14, 15 ke fai ʻi he faʻifaʻitaki kia Sīsuú?

¹² Ko ʻetau ʻofa kia Sihova mo Sīsuú ʻokú ne kounaʻi kitautolu ke maʻu ʻa e ngaahi fakatahá. Ko e meʻa leva ʻoku tau ako ʻi he ngaahi fakatahá ʻokú ne ʻai ke toe mālohi ange ʻetau ʻofa kia Sihova mo hono ʻAló. ʻI he ngaahi fakatahá ʻoku toutou fakamanatu mai ai kiate kitautolu ʻa e meʻa kuó na fai maʻa kitautolú. (Loma 5:8) Ko e Fakamanatú ʻoku tautefito ʻene fakamanatu mai ʻa e lahi ʻo ʻena ʻofá, ʻo aʻu ki he faʻahinga ʻoku teʻeki ke nau mahinoʻi ʻa e huhuʻí. ʻI he houngaʻia lahi, ʻoku tau feinga ke faʻifaʻitaki kia Sīsū ʻaki ʻetau founga moʻuí ʻi he ʻaho taki taha. (Lau ʻa e 2 Kolinitō 5:14, 15.) Tānaki atu ki aí, ʻoku ueʻi kitautolu ʻe hotau lotó ke fakahīkihikiʻi ʻa Sihova ʻi hono tokonaki mai ʻa e huhuʻí. Ko e founga ʻe taha ʻoku lava ke tau fakahīkihikiʻi ai iá ko hono fai ʻa e ngaahi tali loto-moʻoni ʻi heʻetau fakatahá.

13. ʻE lava fēfē ke tau fakahāhā ʻa e lahi ʻo ʻetau ʻofa kia Sihova mo hono ʻAló? Fakamatalaʻi.

¹³ ʻOku lava ke tau fakahāhā ʻa e lahi ʻetau ʻofa kia Sihova mo hono ʻAló ʻaki ʻa e loto-lelei ke fai ha ngaahi feilaulau maʻanaua. Kuo pau ke tau faʻa fai ʻa e ngaahi feilaulau kehekehe ke maʻu ʻetau ngaahi fakatahá. Ko e ngaahi fakatahaʻanga ʻe niʻihi ʻoku fakahoko ʻenau fakatahá ʻi he fakaʻosinga ʻo ha ʻaho ngāue ʻi he taimi ʻoku tau helaʻia nai aí. Ko ha fakataha ʻe taha ʻi he fakaʻosinga uiké ʻi he taimi ʻoku mālōlō ai ʻa e kakai kehé. ʻOku fakatokangaʻi ʻe Sihova ʻoku tau maʻu ʻa e ngaahi fakatahá neongo ʻoku tau helaʻia? ʻAupito! Neongo pe ko e hā ʻa e lahi ʻo e faingataʻa ʻoku tau fehangahangai mo iá, ʻoku ʻafioʻi ia ʻe Sihova pea fakamahuʻingaʻi ʻetau feinga kotoa ke maʻu ʻa e fakatahá.​—Mk. 12:41-44.

14. Naʻe anga-fēfē hono fokotuʻu ʻe Sīsū ʻa e sīpinga ʻi hono fakahāhā ʻa e ʻofa feilaulauʻi-kitá?

¹⁴ Naʻe fokotuʻu ʻe Sīsū ʻa e sīpinga kiate kitautolu ʻi hono fakahāhā ʻa e ʻofa feilaulauʻi-kitá. Naʻe ʻikai ngata pē ʻi heʻene loto-lelei ke pekia koeʻuhi ko ʻene kau ākongá ka naʻá ne toe moʻui ʻi he ʻaho taki taha ʻi ha founga naʻá ne fakamuʻomuʻa ai ʻenau fiemaʻú ʻi haʻaná. Hangē ko ení, naʻá ne fakataha mo hono kau muimuí naʻa mo e ʻi he taimi naʻá ne helaʻia fakaesino ai pe mamahi fakaeongó. (Luke 22:39-46) Pea naʻá ne tokangataha ki he meʻa naʻe lava ke ne ʻoatu ki he niʻihi kehé, ʻo ʻikai ki he meʻa naʻe lava ke ne maʻu meiate kinautolú. (Māt. 20:28) ʻI he taimi ʻoku mālohi pehē ai ʻetau ʻofa kia Sihova mo hotau fanga tokouá, te tau fai ʻa e kotoa te tau malavá ke maʻu ʻa e Kai Efiafi ʻa e ʻEikí pehē foki ki he kotoa ʻo e ngaahi fakataha ʻa e fakatahaʻangá.

15. Ko hai ʻoku tautefito ʻetau mahuʻingaʻia ke tokoniʻí?

¹⁵ ʻOku tau kau ki he fetokouaʻaki faka-Kalisitiane moʻoni pē tahá, pea ʻoku tau fiefia ke fakamoleki ʻa e taimi lahi taha ʻe ala lavá ʻi hono fakaafeʻi ʻa e faʻahinga foʻoú ke kau fakataha mo kitautolu. Kae kehe, ʻoku tautefito ʻetau mahuʻingaʻiá ʻi he faʻahinga ko ia ʻoku “fekauʻaki mo kitautolu ʻi he tuí” ka kuo ʻikai ke nau kei longomoʻuí. (Kal. 6:10) ʻOku tau fakamoʻoniʻi ʻetau ʻofa ʻiate kinautolú ʻaki hono fakalototoʻaʻi ke nau maʻu ʻa e ngaahi fakatahá, tautefito ki he Fakamanatú. Hangē ko Sihova mo Sīsuú, ʻoku tau fiefia lahi ʻi he foki mai ha taha ʻikai longomoʻui kia Sihova, ʻa ʻetau Tamai mo e Tauhi-Sipi anga-ʻofá.​—Māt. 18:14.

16. (a) ʻE lava fēfē ke tau fefakalototoʻaʻaki, pea ʻe tokoniʻi fēfē kitautolu ʻe heʻetau ngaahi fakatahá? (e) Ko e hā ko ha taimi lelei ai eni ʻi he taʻú ke manatuʻi ʻa e lea ʻa Sīsū ʻi he Sione 3:16?

¹⁶ ʻI he ngaahi uike ka hoko maí, fakaafeʻi ʻa e tokolahi taha te ke ala lavá ke nau maʻu ʻa e Fakamanatú ʻi he efiafi Falaite, ʻEpeleli 19, 2019. (Sio ki he puha “Te Ke Fakaafeʻi Kinautolu?”) ʻOfa ke tau hanganaki fefakalototoʻaʻaki ʻi hono maʻu maʻu pē ʻa e kotoa ʻo e ngaahi fakataha kuo tokonaki mai ʻe Sihova maʻatautolú. ʻI he ofi ange ke ngata ʻa e fokotuʻutuʻu ko ení, ʻe tokoniʻi kitautolu ʻe heʻetau ngaahi fakatahá ke tau nofoʻaki anga-fakatōkilalo, loto-toʻa mo ʻofa. (1 Tes. 5:8-11) Tau fakahaaʻiʻaki ʻa e kotoa hotau lotó ʻa e anga ʻo ʻetau ongoʻi fekauʻaki mo Sihova mo hono ʻAló ʻi heʻena ʻofa lahi kiate kitautolú!​—Lau ʻa e Sione 3:16.