ʻOku Mālohi ʻa e Tākiekina ʻa e Ngaahi Meʻa ʻOku Akoʻi mei he ʻOtuá
1 Ko e toki monū lahi ē kiate kitautolu ʻa hono maʻu ʻa e fakahinohino mei he ʻOtuá, ko hotau Toko Taha Fakatupú, ko Sihova ko e ʻOtuá! (Sāme 50:1; ʻAi. 30:20e) ʻI he ʻahó ni, ʻoku ʻaukolo ʻa e fuʻu tokolahi ʻo e kakai mei he ngaahi puleʻanga kotoa ki hono moʻunga ko e lotu moʻoní ke ne akoʻi kinautolu. (Mai. 4:2) Ko e laui miliona kehe ʻoku nau lēsisita ʻi he ngaahi ʻapi ako ʻa ia ʻoku fakamāʻolungaʻi ai ʻa e fakakaukau fakaetangatá mo e poto fakamāmaní. Ka ko e poto ʻokú ne taʻetokaʻi ʻa Sihova mo ʻene Folofola naʻe tohí ko e vale ia ʻi he vakai ʻa e ʻOtuá pea ko kinautolu ʻoku tataki ʻe he poto ko iá ʻoku nau hoko ʻo vale.—Sāme 14:1; 1 Kol. 1:25.
2 ʻI heʻetau fakataha fakavahe ʻe hoko maí, te tau ʻilo ʻi ha founga makehe ʻa e mālohi ʻo e ngaahi meʻa ʻoku akoʻi mei he ʻOtuá. Ko e kaveinga “Ngaahi Meʻa ʻOku Akoʻi mei he ʻOtuá” ʻe kaunga ia ki he polokalamá kotoa. Te tau ako ai ko e Folofola ʻa e ʻOtuá fakataha mo hono laumālié ʻokú na fakafāʻūtahaʻi kitautolu ko e ngaahi tokoua ʻi māmani lahi, ʻokú na fakafōtunga ʻetau tōʻongá, maluʻi kitautolu mei he ngaahi akonaki ʻa e kau tēmenioó, mo akoʻi kitautolu ke hoko ko e kau faifekau lelei ange. Ko e hā ʻa e ʻaonga kuó ke maʻu ʻe koe tonu mei he ngaahi meʻa ʻoku akoʻi mei he ʻOtuá?
3 Ola ʻi he Founga Moʻui Faka-Kalisitiané: ʻOku tokoniʻi ʻe he ngaahi meʻa ʻoku akoʻi mei he ʻOtuá ke oʻi hotau ngaahi konisēnisí. ʻOku fanauʻi mai ʻa e toko taha kotoa pē ʻo ʻi ai hono konisēnisi, ka kuo pau ke akoʻi ia ke ne tataki kitautolu ʻi ha founga ʻo e māʻoniʻoní mo e ngāue ʻoku fakahōifua kia Sihová. (Sāme 19:7, 8; Loma 2:15) ʻOku ʻikai ke oʻi ʻe he kakai ʻo e māmaní ʻenau fakakaukaú ke fakatatau ki he Folofola ʻa e ʻOtuá, pea ko e ʻuhinga ia ʻoku nau puputuʻu mo taʻepau ai ʻo kau ki he meʻa ʻoku totonú mo ia ʻoku halá. ʻOku lahi ʻa e fekīhiaki ʻoku fai ʻo kau ki he ngaahi pole fakaeʻulungāangá koeʻuhi ko e toko taha taki taha ʻokú ne vilitaki ʻi he fai ʻo e meʻa ʻoku totonu ʻi he anga pē ʻo ʻene vakaí. Ko e tokolahi taha ʻoku nau fie maʻu ʻa e tauʻatāina fakaʻaufuli ke taki taha fakapapauʻi ʻa e founga ʻo ʻene moʻuí. ʻOku nau fakafisi ke tokaʻi ʻa e maʻuʻanga pē ʻe taha ʻo e poto moʻoní. (Sāme 111:10; Sel. 8:9; Tān. 2:21) Ka ko e ngaahi meʻa ʻoku akoʻi mei he ʻOtuá kuó ne fakaleleiʻi kiate kitautolu ʻa e faʻahinga pole pehē, pea ʻoku tau fāʻūtaha ʻi he fale ʻo e ʻOtuá koeʻuhi ʻokú ne akoʻi kitautolu. ʻOku tau hanga atu loto-maʻu ki he kahaʻú ʻi he konisēnisi lelei, ʻo tau femoʻuekina ai pē ʻi heʻetau ngāue fakamalangá.
4 ʻOku tokoniʻi kitautolu ʻe he ngaahi meʻa ʻoku akoʻi mei he ʻOtuá ke tekeʻi ʻa e “matangi fakaakonaki kotoa pe.” (ʻEf. 4:14) ʻOku ʻikai te tau vēkeveke ʻi he ako ki he poto fakafilōsefá, ʻa ia ʻokú ne ʻai ʻa e kakaí ke nau heuheu mo faʻa veiveiua ʻi heʻenau fakakaukaú, ʻo fakalototoʻaʻi ʻa e faʻitelihá, ʻo tataki ki he maumau fakaeʻulungāanga. ʻOku tau fiefia ʻi hono akoʻi kitautolu ʻe Sihová, pea ko ia ʻoku tau fakaʻehiʻehi ai mei he loto-mamahi ʻoku hoko ki he tokolahi. Ko e ngaahi lao mo e fakamanatu ʻa Sihová ʻoku hangē ia ‘ha lea mei mui kiate kitautolu,’ ʻo ne pehē: “Ko eni ʻa e hala, fou ai.”—ʻAi. 30:21.
5 Ko ʻEtau Ngaahi Fakatahá mo e Ngāue Fakamalangá: ʻOku tau vakai ki he meʻa ʻoku hā ʻi he tohi Hepelū 10:23-25 ko e fekau mei he ʻOtuá. ʻI he ngaahi fakataha ʻa e fakatahaʻangá, ʻoku akoʻi ai kitautolu ʻe Sihova. ʻOku tau angaʻaki ke tau maʻu maʻu pē ʻa e ngaahi fakatahá, pe ʻoku tau sio ki he maʻu ʻo e ngaahi fakatahá ko ha meʻa ʻoku mahuʻinga siʻi ke fakamuʻomuʻa? Manatuʻi, ko e fakatahataha fakatahá ko e konga ia ʻo ʻetau lotú. ʻOku ʻikai ke totonu ke lau ia ko e meʻa faʻiteliha pē. ʻOku ʻikai totonu ke tau liʻaki ha konga ʻo e polokalama fafanga fakalaumālie kuo teuteu ʻe Sihova maʻatautolú.
6 Naʻe lotu ʻa Mōsese ki he ʻOtuá: “Ako mai ke mau fakafuofua pehe homau ngaahi ʻaho, ka mau utu mai ha loto poto.” (Sāme 90:12) ʻOku toe pehē ʻetau lotú? ʻOku tau houngaʻia ʻi he ʻaho maʻongoʻonga taki taha? Kapau ʻoku tau pehē, pea te tau “utu mai ha loto poto” ʻi hono fakamoleki ʻa e ʻaho taki taha ʻi ha founga ʻaonga, ke fakalāngilangiʻi hotau Toko Taha Fakahinohino Maʻongoʻongá, ko Sihova ko e ʻOtuá. ʻE tokoniʻi kitautolu ʻe he ngaahi meʻa ʻoku akoʻi mei he ʻOtuá ke tau fai ia.