Hoko ʻo Fakatupu Langa Hake
1 Koeʻuhi ʻoku tau moʻui ʻi he “kuonga fakamui” ʻoku faingataʻa ke fekuki mo iá, ʻoku fiemaʻu kiate kitautolu hono kotoa ha fakalototoʻa. (2 Tīm. 3:1) ʻI hono ʻilo lelei ʻa e fiemaʻu ko ʻení naʻa mo hono taimí, naʻe tokanga ʻa Paula ke ne ngāueʻaki ʻene ngaahi fetuʻutaki mo hono ngaahi tokouá ko e ngaahi faingamālie ia ke ‘ʻai ai ha fetokoniʻaki.’ Naʻá ne naʻinaʻi ki hono ngaahi tokouá ke ‘nofo ki he ngaahi meʻa . . . ʻoku kau ki heʻenau fefaiʻaki honau langa hake.’ (Loma 1:11, 12; 14:19) Naʻe lavameʻa ʻa e ngaahi feinga ko ʻení ʻi he “tokoni kinautolu ke nau nofo maʻu ʻi he lotu.” (Ng. 14:22) ʻOku mātuʻaki fiemaʻu kiate kitautolu ʻa e faʻahinga fakalototoʻa ko iá ʻi he ʻahó ni.
2 ʻOku lava ke tau fakatupu langa hake ki he niʻihi kehé ʻaki ʻa e meʻa ʻoku tau leʻaʻakí. ʻI hono ngāuetotonuʻakí, ʻe hangē ʻa ʻetau ngaahi leá ko e “apele koula ʻi he ainga siliva.” (Pal. 25:11) ʻI heʻetau kau ki he ngaahi fakatahá, ʻoku tau “feenginakiʻaki” ai. (Hep. 10:25) ʻOku lava ke ngāueʻaki ʻa hotau ʻeleló ʻi ha founga pau ʻi heʻetau fakahā ha ngaahi meʻa naʻe hoko, fai ha fakaongoongolelei, pe fetalanoaʻaki ki he ngaahi meʻa fakalaumālié. Ko e ngāueʻaki lelei pehē ʻaki ʻo e ʻeleló ‘ʻe lelei ia ki he langa hake, ʻo e kau fanongo.’—ʻEf. 4:29.
3 Talanoa Fekauʻaki mo e Ngaahi Meʻa ʻOku Fakatupu Langa Haké: ʻI he Filipai 4:8, naʻe tokonaki mai ai ʻe Paula ha ngaahi fakahinohino ʻaonga ki heʻetau leá. Naʻá ne pehē ʻoku totonu ke tau tokanga ki he ngaahi meʻa ʻoku moʻoni, ʻoku taau, totonu, maʻa, fakaʻofoʻofa, ongoongolelei, ʻulungaanga lelei, mo fakamālōʻia. ʻOku lava ke tau fakapapauʻi maʻu ai pē ko e meʻa ʻoku tau leaʻakí ʻe moʻoni mo ʻaonga ki he niʻihi kehé kapau ʻoku makatuʻunga ia ʻi he Folofola ʻa e ʻOtuá. (Sione 17:17) Ko ʻetau fakatapui faka-Kalisitiané, mo e meʻa ʻoku tau ako ʻi he ngaahi fakataha ʻa e fakatahaʻangá, mo e founga ʻo ʻetau fakahoko ʻa ʻetau ngāue fakafaifekaú, mo e ngaahi meʻa kehe peheé ko e ngaahi meʻa ia ke tokanga mamafa ki ai. Ko e ngaahi fetalanoaʻaki pau ʻo fekauʻaki mo e ngaahi tuʻunga mo e ngaahi tefitoʻi moʻoni ʻo e Folofola ʻa e ʻOtuá ko e moʻoni ʻe tokoniʻi ai kitautolu ke hoko ʻo ‘fakapoto ke maʻu ʻa e fakamoʻui.’ (2 Tīm. 3:15) ʻOku lava ke tau fakahāhā ʻa ʻetau houngaʻia ki he ʻulungaanga maʻa ʻoku angaʻaki ʻe he faʻahinga ʻi he kautaha maʻa ʻa Sihová. ʻOku lava ke tau fakahīkihikiʻi ʻa e ngaahi ngāue angaʻofa ʻa hotau ngaahi tokouá. (Sione 13:34, 35) Ko e ngaahi meʻa ʻoku lelei ʻa e lāulea ki aí ʻoku kau atu ki ai ʻa e ngaahi ʻulungaanga lelei faka-Kalisitiane ʻo e tui, fiefia, melino, mo e kātaki fuoloa ʻoku tau ʻilo ʻi hotau ngaahi tokouá. Ko e fetalanoaʻaki ʻo fekauʻaki mo e ngaahi meʻa ongoongo lelei mo fakamālōʻia pehē ʻoku ‘ʻaonga ki he langa hake’ ʻo e niʻihi kehé.—Loma 15:2.
4 ʻI he ʻaho kotoa pē, ʻoku tau fehangahangai ai mo e ngaahi loto-moʻua fakalotosiʻi ʻo e māmaní. Ko ha ongoʻi fiemālie ē ke tuku ki he tafaʻakí ʻa e ngaahi meʻa ko ʻení kae feohi angaʻofa mo hotau ngaahi tokouá! Ko e taimi mahuʻinga ʻoku lava ke tau fakatahataha aí ko ha koloa ia ke tau lotoʻaki. Kapau ʻoku tau fakalototoʻa mo fakatupu langa hake maʻu ai pē, ʻe moʻoni ʻa e pehē ʻa e niʻihi ʻo fekauʻaki mo kitautolú: “He kuo nau fakafiemalie hoku loto.”—1 Kol. 16:18.