Maʻu Fakataha Maʻu Pē—ʻOku Fiemaʻu Ia ki Heʻetau Tuʻumaʻú
1 Naʻe enginaki mai kiate kitautolu ʻa e ʻaposetolo ko Paulá ke tau nofo maʻu ai pē ʻi he ‘moʻui lelei ʻetau lotu.’ (Tai. 1:9, 13) ʻI he ngaahi fakataha ʻa e fakatahaʻangá ʻoku tau vakai ai ki he ngaahi fakakaukau leleí, pea ʻoku fakahinohinoʻi ai kitautolu ʻi he founga ke hanganaki teunga kakato ʻaki ai ʻa e teunga tau fakalaumālié koeʻuhi ke lava ke tau “tuʻu ki he ngaahi tuʻutuʻuni kākā ʻa e Tevolo.”—ʻEf. 6:11; Fili. 4:8.
2 ʻOmai ʻi he Ngaahi Fakatahá ʻa e Meʻa ʻOku Tau Fiemaʻú: Ko e maʻu maʻu pē ʻa e ngaahi fakataha ʻa e fakatahaʻangá ʻoku fiemaʻu ia ki heʻetau tuʻumaʻú. (1 Kol. 16:13) ʻI he ngaahi fakatahá ʻoku fai ai ʻa e ngaahi lotu ke fakamālōʻiaʻi ai mo fakahīkihikiʻi ʻa e ʻOtuá, pehē foki ki he kole kiate ia koeʻuhi ko e fakatahaʻangá mo ʻene ngaahi fiemaʻú. (Fili. 4:6, 7) Ko e kau ʻi he ngaahi hiva ʻo e Puleʻangá ʻokú ne hiki hake kitautolu pea ʻai ai ʻo malava ke tau fakahaaʻi ʻa ʻetau ngaahi fakakaukaú mo ʻetau ngaahi ongoʻí ʻi heʻetau lotu kia Sihová. (ʻEf. 5:19, 20) Ko ʻetau feohi fakataha ʻi he Fale Fakatahaʻangá ki muʻa pea ʻi he hili ʻa e ngaahi fakatahá ʻokú ne fakalototoʻaʻi kitautolu, langa hake kitautolu, pea fakaivia foʻou kitautolu.—1 Tes. 5:11.
3 ʻI ʻEpeleli ʻo e taʻu ní ko e malanga makehe, “ʻOku Ofi ʻa e Ngataʻanga ʻo e Lotu Loí,” naʻá ne ʻai ʻo maongo mālohi ki he ʻatamai ʻo e kau ʻofa ki he moʻoní ʻa e fiemaʻu fakavavevave ke ngāue ʻi he taimí ni ke hū ki tuʻa mei Pāpilone ko e Lahí. (Fkh. 18:4) Ki muí ni mai, he meʻa fakaueʻiloto ia, ʻi hono ako ʻo ʻosi ʻa e kupu ʻe tolu ko ia ʻi he Taua Leʻo ʻo kau ki he ngaahi tapa ʻa e maamá, ʻa ia kuó ne fakamaama ʻa e hala ʻo e māʻoniʻoní! (Pal. 4:18) Fakakaukau atu ki he meʻa naʻa tau mei tō mei ai kapau naʻa tau liʻaki ʻo ʻikai maʻu ʻa e ngaahi fakataha ko iá.
4 ʻI heʻetau Fakataha-Lahi Fakavahe “Kau Fakahīkihikiʻi Fiefia,” ʻe fai ʻa e fakamamafá ʻi he fiemaʻu ke ako ke toe fakaleleiʻi ange ai ʻa ʻetau ngāue fakafaifekaú. Hangē ko ia ʻoku fakahaaʻi ʻe he Organized to Accomplish Our Ministry ʻi he peesi 72, ko e Akoʻanga Fakafaifekau Fakateokalatí ko ha tokonaki ia ki he hokohoko atu ʻo e ako ʻa e fakatahaʻangá kotoa. ʻOku ʻikai lava ke fetongi haʻatau liʻaki ʻa e ako ko ʻení.
5 ʻOku teuʻi kitautolu ʻi heʻetau Fakataha Ngāué ke tau hoko ʻo toe ola lelei ange ʻi he ngāue fakafaifekaú. Naʻe fakatātaaʻi ʻeni ʻi he fakataha ʻa ia naʻa tau maʻu ai ʻa e ngaahi fakahinohino ki he kau ʻi hono tufaki takai ʻo e Ongoongo ʻo e Puleʻangá Fika 34. Naʻe hulu fau ʻa e ngaahi tāpuaki ʻa Sihová ʻi he ngāué ni, hangē ko ia kuo fai ʻa e sio ki ai ʻi he kehe atu pē ʻa hono ngaahi olá ʻi māmani lahi. (Fakafehoanaki mo 2 Kolinitō 9:6, 7.) Ko kinautolu ko ia naʻe maʻu maʻu pē ʻa e ngaahi fakatahá naʻe fakalototoʻaʻi, pea naʻa nau tokoni ʻo kamataʻi ʻa e poupou ko ia naʻe fai ki he feingatau ko iá.
6 ʻI he Ako Tohi ʻa e Fakatahaʻangá, ko ʻetau ongoʻi ko ia ke fakavavevavé ʻoku toe fakalahiʻi ia ʻe he ngaahi meʻa ko ia ʻoku tau ako mei he Folofola ʻa e ʻOtuá fakataha mo e tokoni ʻa e tohi Moʻui Taʻengata. ʻI he ngaʻunu vave ʻa e ngaahi meʻa ko ia ʻoku hoko ʻi he māmaní takatakai, ʻoku fiemaʻu ke tau mahinoʻi ʻa e fakahoko ʻo e ngaahi kikite loloto ange ʻi he Tohitapú.
7 Fakamuʻomuʻa ʻa e Maʻu Maʻu Pē ʻo e Fakatahá: ʻOku ʻiloʻi ai pē ʻe he ngaahi tokoua ko ia ʻoku faingataʻaʻia he ngaahi ʻahiʻahí ʻi he ngaahi fonua lahi ʻa e mahuʻinga ʻaupito kiate kinautolu ke nau fakatahataha ʻi he uike taki taha. Ko e fakatātaá, ʻi Pulunitī, Luanitā, Laipīlia, pea mo Posinia mo Hesikovina, ʻoku tokolahi ʻaupito ai ʻa e kau foʻou ʻoku nau maʻu ʻa e ngaahi fakatahá ʻa ia ʻoku liunga ua ʻo aʻu ki he liunga tolu ʻa e tokolahi ʻo e kau malangá. ʻI he foungá ni ʻoku tokoniʻi ai ʻe Sihova ʻa e ngaahi tokouá ke nau tuʻumaʻu ʻi he laumālie pē ʻe taha.—Fili. 1:27; Hep. 10:23-25.
8 ʻOku totonu ki ha taha pē kuó ne liʻaki ʻa hono maʻu maʻu pē ʻa e fakatahá ke ne fai ha feinga ʻi he taimí ni ke fakatonutonu ʻa e hehema ko ʻení. (Koh. 4:9-12) Koeʻuhi pē ke tau tuʻumaʻu, ʻoku fiemaʻu ke tau fetalanoaʻaki fakataha mo e faʻahinga matuʻotuʻá, ʻa ia ʻoku maʻu ia ʻi he maʻu maʻu pē ʻa e fakatahá.—Loma 1:11.