Tōʻongaʻaki ha ʻUlungaanga ʻOku Taau mo e Ongoongo Leleí

¹ ʻI hotau tuʻunga ko e Kau Fakamoʻoni ʻa Sihová, ʻoku tau holi ke ʻomai ʻa e lāngilangi ki he huafa ʻo Sihová. ʻOku tau ʻiloʻi ko hotau ʻulungaangá, leá, teuteú, mo hotau valá ʻoku lava ke ne tākiekina ʻa e anga ʻo e vakai mai ʻa e niʻihi kehé ki he lotu moʻoní. ʻOku tautefito ʻa e moʻoni ʻo ʻení ʻi he taimi ʻoku tau ʻi heʻetau ngaahi fakatahá aí. ʻOku tau loto ke fakapapauʻi ko e meʻa kotoa pē ʻoku leaʻaki mo fai ʻi he ngaahi fakatahá ʻoku taau ia mo e ongoongo leleí pea ʻoku ʻomai ai ʻa e lāngilangi kia Sihova.​—Fili. 2:4.

² Ko e ngaahi tuʻunga lahi ʻa e māmaní ki he valá mo e teuteú ʻoku ʻikai ke toe ala tali ia ʻe he kau Kalisitiané. Ko ha meʻa ʻeni ia ʻoku totonu ke mātuʻaki tokanga ki ai ʻa e kau faifekau ʻo e ongoongo leleí. ʻOku fakamatala ʻi he Taua Leʻo ʻo Tīsema 1, 1989, ʻi he peesi 21: “Ko hotau vala ʻoku ʻikai fiemaʻu ke fakamole paʻanga, ka ʻoku totonu ke maʻa mo matamatalelei, mo taau. Ko hotau ngaahi sū ʻoku totonu ke lelei foki pea mo hā lelei. ʻOku tatau pē, ʻi he ngaahi fakataha kotoa, kau ai ʻa e Ako Tohitapu Fakaefakatahaʻanga, ʻoku totonu ke maʻa hotau ngaahi sino, pea ʻoku totonu ke maau mo taau hotau teungá.”

³ Ko e tauhi taimí ko ha fakaʻilonga ia ʻo e fakaʻatuʻi anga-ʻofa mo e faʻa fakakaukau. ʻI he taimi ki he taimi, ʻoku taʻofi nai kitautolu ʻe ha ngaahi tuʻunga taʻealaleʻeia mei he aʻu ʻi he taimí ki ha fakataha. Ka ko e angaʻaki ʻa e aʻu tōmuí, ʻoku fakahaaʻi nai ai ʻa e ʻikai ke tokaʻi ʻa e taumuʻa toputapu ʻo e ngaahi fakatahá, pea mo ha ʻikai ke houngaʻia ʻi hotau fatongia ke fakaʻehiʻehi mei hono fakahohaʻasi ʻa e niʻihi kehé. ʻOku faʻa fakaleluʻi ʻe he kau haʻu tōmuí ʻa e niʻihi kehé pea taʻofi ai kinautolu mei hono maʻu ʻa e ʻaonga kakato mei he polokalamá. ʻOku fakahaaʻi ʻe he tauhi taimí ʻa hono tokaʻi ʻa e ngaahi ongoʻi mo e ngaahi mahuʻingaʻia ʻa e tokotaha kotoa ʻoku maʻu fakatahá.

⁴ ʻOku totonu ke ʻai kitautolu ʻe he ʻofa ki he kaungāʻapí ke tau tokanga ke fakaʻehiʻehi mei hono fakatupu ʻa e ngaahi fakahohaʻa ʻi he lolotonga ʻo e ngaahi fakatahá. Ko e fafana, kai, lamu pululole, fakangahaha ʻa e ngaahi lauʻi pepa, mo e ʻalu noaʻia pē ki he falemālōloó, ʻe uesia nai ai ʻa e tokanga ʻa e niʻihi kehé pea fakasiʻisiʻi ai ʻa e ngeia ko ia ʻoku taau mo e feituʻu faiʻanga lotu kia Sihová. ʻOku ʻikai totonu ki ha taha pē ke ne fai ai ha meʻa ʻa e fakatahaʻangá pe fetalanoaʻaki mo e niʻihi kehé tuku kehe pē kapau ʻoku ʻi ai ha ngaahi meʻa fakavavevave ʻa ia ʻoku fiemaʻu ai ʻa e ngaahi tokouá ke nau mavahe ai mei honau tangutuʻangá. Ka ʻikai, ʻoku totonu ke tangutu kotoa pea fanongo ki he polokalamá koeʻuhi ke maʻu ai ʻa e ʻaonga kiate kinautolu pea mo honau fāmilí. ʻOku ʻikai ke ʻi ai ha feituʻu ia ʻi he Fale Fakatahaʻangá ki he ʻulungaanga koví koeʻuhi “ko ʻofa . . . ʻoku ʻikai te ne fai taʻetāu.”​—1 Kol. 13:​4, 5; Kal. 6:10.

⁵ ʻOku toe ʻomai ʻe he ʻulungaanga lelei ʻo ʻetau fānaú ʻi he fakatahá ʻa e fakahīkihiki mo e lāngilangi ki he huafa ʻo Sihová. ʻOku mahuʻinga ʻaupito ʻa hono tokangaʻi fefeka ʻe he ngaahi mātuʻá. ʻOku totonu ke fakalototoʻaʻi ʻa e fānaú ke fanongo pea kau ki he fakatahá. ʻOku tokolahi ʻa e ngaahi mātuʻa ʻoku ʻi ai ʻenau fānau iiki ʻoku nau fili ke tangutu ʻi ha feituʻu ʻa ia ʻoku lava ke faingofua ai ʻa e hū ki tuʻá ʻo tokangaʻi ʻa e ngaahi fiemaʻu ʻa ʻenau fānau tupú, ʻo ʻikai fakahohaʻasi lahi ai ʻa e niʻihi kehé.

⁶ Naʻe enginaki ʻa Paula: “Ke tāu hoo mou ulugaaga moe ogoogolelei.” (Fili. 1:​27, PM) Ke tau feinga leva, ke hoko ʻo ʻulungaanga lelei mo fakaʻatuʻi ʻa e niʻihi kehé ʻi he taimi ʻoku tau maʻu ai ʻa e ngaahi fakatahá. ʻE fakapapauʻi ʻi he ngāue fakataha kotoá, ʻe ʻi ai ʻa e “fiemalie fakataha . . . i he tui be taha.”​—Loma 1:12, PM.