Ke ʻAufuatō!
1 ʻOku tau maʻu ha ngaahi ʻuhinga lahi ke tau fakamālō ai kia Sihova. ʻOku kau atu ki ai ʻa e ngaahi meʻa naʻá ne fai ʻi he kuohilí, ʻokú ne lolotonga fai he taimi ní, pea mo ia te ne fai maʻatautolu he kahaʻú. Ko e hā ʻoku totonu ke ueʻi ʻe heʻetau houngaʻiá kitautolu ke tau faí? ʻOku tali mai ʻe he sāme ʻa Tēvitá: “Teu fakafetai kia Jihova i he kuoga kotoabe: e tuu mau be ene fakafetai i hoku gutu.”—Sāme 34:1, PM.
2 ʻOku fakahā mahino ʻe he Tohitapú ʻoku fekauʻi kitautolu ke malanga. Ko e ngāue ia ʻoku tau fakahoko “ʻaufuatō kia Sihová.” (Kol. 3:23, NW) Ko e hā hono lahi ʻo e meʻa te tau fai ʻi he ngāue fakafaifekaú kapau ʻoku tau ʻaufuatō moʻoni? ʻI heʻetau fakalaulauloto atu ki he ʻofa ʻa Sihova koeʻuhi ko kitautolú, ko e moʻoni ʻe ueʻi hotau lotó ke tau kau tōtōivi ʻi hono tala ki he niʻihi kehé ʻo kau kiate ia pea mo ʻene ngaahi taumuʻa maʻongoʻongá! ʻOku ueʻi ai kitautolu ke tau fai ʻa e meʻa te tau malavá.
3 ʻOku ʻuhinga lelei ke ʻamanekina ko ha tokotaha ʻoku ʻaufuatō ʻoku fiemaʻu ke tauhi maʻu ʻene tokangá ʻo huʻufataha ki he ngāue toputapú. Ko e tokotaha-tohi-sāmé, ʻa ia naʻá ne ongoʻi peheé, naʻá ne fakahā: “Tuʻo fitu ʻi he ʻaho ʻoku ou hiki hoʻo fakafetaʻi.” (Sāme 119:164) Ko e faʻahinga ʻoku nau ongoʻi tatau mo e tokotaha-tohi-sāmé ʻoku nau feinga ke ngāueʻaki ʻa e ngaahi faingamālié ke fakahīkihikiʻi ʻa Sihova. ʻI hono fakangofua ʻe honau ngaahi tuʻungá, ʻoku nau ngāue faivelenga ki he lahi taha ʻoku malavá.
4 ʻOku ʻĀtakaiʻi Kitautolu ʻe he Ngaahi Faingamālie ke Fakahīkihikiʻi Ai ʻa Sihova: ʻOku ʻikai te tau tatali pē kae ʻoua ke tau kau ki he ngāue matapā-ki-he-matapaá ke toki malangaʻi ai ʻa e ongoongo leleí. Ko hotau kaungāngāué, kaungāakó, ngaahi kāingá, pea mo e ngaahi mahení ʻoku fiemaʻu kotoa kinautolu ke fanongo ki he pōpoaki ʻo e Puleʻangá. ʻI he taimi fefonongaʻakí, ʻe lava ke tau kamata ha ngaahi fetalanoaʻaki ʻa ia ʻe taki atu nai ke fai ha fakamoʻoni ki he kau ngāue hōtelé, kau ngāue falekaí, kau ngāue pausá, pe kau fakaʻuli tekisī. ʻI he lolotonga ʻa e nofo ʻi ʻapí, te tau fakamoʻoni nai ki he kaungāʻapí pe kau ʻaʻahí. Kapau ʻoku tau ʻi he falemahakí, ʻoku ʻi ai ʻa e kau neesi, kau toketā, pea mo e kau mahaki kehe ʻa ia ʻe lava ke tau malanga kiate kinautolu ʻi he founga ʻikai anga-mahení.
5 Ko e Fakamoʻoni ʻi he Founga ʻIkai Anga-Mahení ʻOku Maʻu Ai ʻa e Ngaahi Ola: Naʻe luelue atu ha ongo Fakamoʻoni ʻi ha paʻake he ʻaho ʻe taha peá na kamata ai ha fetalanoaʻaki mo ha tangata kei talavou ʻa ia naʻe ʻeveʻeva fakataha mo ʻene kiʻi tamá. Naʻe faai atu pē, ʻo ne kau mo hono uaifí ki he moʻoní. Naʻe fakahā ki mui mai ʻe he tangata talavoú ni ʻo pehē, ʻi ha taimi nounou ki muʻa peá ne ʻuluaki fetaulaki mo e ongo Fakamoʻoní, naʻá ne lotu ki he ʻOtuá ʻo kole, ‘Kapau ʻokú ke ʻi ai, kātaki ʻo ʻai au ke u ʻiloʻi koe.’ Naʻá ne fakakaukau atu ko e fetaulaki ko ia ʻi he paʻaké ko e tali ia ʻa Sihova ki heʻene lotú.
6 Ko kinautolu ʻoku nau ʻaufuatō ʻi heʻenau holi ke tokoniʻi fakalaumālie ʻa e niʻihi kehé, ʻoku nau maʻu ʻa e fiefia lahi tahá. ʻOku nau ʻiloʻi ko e ngāue peheé “ʻaki ʻa e loto haohaoa,” ʻoku hōifua ai ʻa Sihova.—1 Kal. 28:9.