Ko e Hā ʻa Hoʻo Ngaahi Fokotuʻutuʻu ki he Ngaahi Māhina Hoko Maí?

Ko e hā ʻokú ke fokotuʻutuʻu ke fai ʻi he ngaahi māhina hoko maí? Mahalo pē ʻokú ke fai ha ngaahi fokotuʻutuʻu ke maʻu ha fakataha-lahi fakavahe, pea mo hono fai ha ngaahi fokotuʻutuʻu ki ha mālōlō ʻeveʻeva, pe ko ha ʻaʻahi fiefia ki he ngaahi kāingá mo e ngaahi kaungāmeʻá. ʻI hono fai hoʻo ngaahi fokotuʻutuʻú, ko ha ngaahi fakamanatu pē ʻeni ʻe niʻihi ʻe tokoni nai kiate koe ke hanganaki fakamuʻomuʻa ʻa e ngaahi meʻa mahuʻinga ʻo e Puleʻangá:

◼ Fai ha ngaahi fokotuʻutuʻu pau ke maʻu ʻa e fakataha-lahi fakavahé. Fokotuʻutuʻu ki hoʻo meʻalelé pea mo e ngaahi nofoʻangá ʻi ha taimi lōloa feʻunga ki muʻa koeʻuhi ke fakaʻehiʻehi ai mei ha faʻahinga palopalema pē.

◼ Kapau te ke ʻalu ki ha feituʻu ko ha mālōlō, fokotuʻutuʻu ke kau ki he ngaahi fakataha ʻa e fakatahaʻanga fakalotofonuá pea kau ki he ngāue fakafaifekaú. Fakapapauʻi ke ʻoatu hoʻo ngaahi lipooti ngāue fakamalangá; kapau ʻoku fiemaʻu, meiliʻi kinautolu ki he sekelitali ʻi hoʻo fakatahaʻangá.

◼ Ko ha ʻaʻahi ki he ngaahi kāinga ʻoku ʻikai te nau ʻi he moʻoní te ke maʻu ai ha faingamālie ke fai ha ngaahi fakamoʻoni ola lelei ʻikai ʻi he founga anga-mahení. Fakapapauʻi ke toʻo maʻu pē hoʻo Tohitapú mo ha ngaahi tohi kehe.

◼ Kuó ke fakakaukau ʻo fekauʻaki mo hono tokoniʻi ha fakatahaʻanga ofi ʻokú ne fiemaʻu tokoni ʻi hono ngāueʻi hono feituʻú? Talanoa ki he kau mātuʻá pe ko e ʻovasia fakafeituʻú ke maʻu ha fakamatala ʻo fekauʻaki mo e ngaahi fiemaʻu ʻi ho feituʻú.

◼ Ko e tutuku ʻa e akó ko ha faingamālie mātuʻaki lelei ia ki he kau talavoú ke fakalahi atu ai ʻenau ngāue fakamalangá. Kau talavou, ʻe lava ke mou hoko ko ha kau tāimuʻa tokoni?

◼ Te ke ʻilo nai ʻe lava ke ke maʻu ha ngaahi ola mātuʻaki lelei ʻi he malangá ʻaki hono fai lahi ange ʻa e faifakamoʻoni ʻi he efiafí, ʻi he taimi ʻoku ʻi ʻapi ai ʻa e kakai tokolahi.

◼ ʻOku totonu ki he kau mātuʻá ke nau tokanga ke hanganaki fokotuʻutuʻu lelei ʻa e ngaahi ngāue ʻa e fakatahaʻangá, ʻo fokotuʻutuʻu ki ha taha ke tokangaʻi ʻa e ngaahi fatongia kuo vaheʻi ki ha faʻahinga te nau mamaʻo.

Manatuʻi “ko e ngaahi tuʻutuʻuni ʻa e faʻa ngaue ʻoku iku pe ki he maʻu ha meʻa.” (Pal. 21:5) Fokotuʻutuʻu ke ngāueʻaki ki he lahi tahá ʻi he ngaahi māhina hoko maí ʻa e ngaahi faingamālie fakateokalatí.