ʻOkú Ke Fuʻu Femoʻuekina?
1 Naʻe enginaki mai ʻa Paula ke tau ‘tupulekina maʻu ai pe ʻi he ngaue ʻa e ʻEikí.’ (1 Kol. 15:58) ʻOku naʻinaʻi mai kiate kitautolu ke tau tauhi maʻu ha taimi-tēpile fakaʻaho ki he ako fakafoʻituituí, kau maʻu pē ʻi he ngāue fakafaifekaú, loto-tōnunga ʻi hono maʻu ʻo e ngaahi fakatahá, pea tokanga fakamātoato ki he ngaahi konga ʻoku vaheʻi mai ʻe he fakatahaʻangá. Tānaki atu ki aí, kuo pau ke tau tokoniʻi ʻa e niʻihi kehe ʻoku nau fiemaʻu ʻetau tokoní. ʻI he lahi ʻo e meʻa ke faí ʻe ʻi ai ha taimi te tau ongoʻi lōmekina nai ai, ʻo fakakaukau ʻoku totonu ke tau kumi ki ha ngaahi founga ke fakasiʻisiʻi ange ai ʻa ʻetau kavengá.
2 ʻOku ʻi ai ʻa e ngaahi tuʻunga te ne ʻai nai ke fakatou fakapotopoto mo ʻuhinga lelei ke toʻo atu ai ha ngaahi ngāue pau pe fakasiʻisiʻi ai hono lahí. ʻOku ongoʻi ʻe he faʻahinga ʻe niʻihi ʻoku ʻamanekina meiate kinautolu ke nau fai ʻa e meʻa kotoa pē ʻa ia ʻoku kole kiate kinautolu ʻe he niʻihi kehé. Ko e ʻikai ke mafamafatatau ʻi he meʻá ni ʻe lava ke ne fakatupu ai ha fakafeʻātungia mo e faingataʻa ʻa ia ʻe lava ke toki hoko ai ha maumau.
3 Ke Mafamafatatau: Ko e kī ki he mafamafatataú ʻoku fakatuʻunga ia ʻi hono ngāueʻaki ʻa e akonaki ʻa Paulá ke “mou sivi ʻo ʻilo ʻa e ngaahi meʻa ʻoku lelei lahi.” (Fili. 1:10) ʻOku ʻuhinga pē iá ke tau tokanga taha ki he ngaahi meʻa ʻoku mahuʻinga moʻoní, pea kapau ʻoku fakaʻatā ʻe he taimí mo e ngaahi tuʻungá, pea toki tokanga ki ha ngaahi meʻa ʻoku mahuʻinga siʻisiʻi angé. ʻOku māʻolunga ʻaupito ʻa e ngaahi fatongia fakafāmilí ʻi he ngaahi meʻa ko ia ʻoku mātuʻaki mahuʻingá. Kuo pau ke fakahoko ʻa e ngaahi fatongia ʻe niʻihi ʻi he ngāue fakaemāmaní. Kae kehe, naʻe akoʻi ʻe Sīsū ko ʻetau ngaahi meʻa ke fakamuʻomuʻá ʻoku totonu ke makatuʻunga ia ʻi he tefitoʻi moʻoni ke tau fuofua kumi ki he Puleʻangá. Kuo pau ke tau ʻuluaki fai ʻa e ngaahi meʻa te ne fakaʻatā ai kitautolu ke fakahoko ʻa ʻetau fakatapui kia Sihová.—Mt. 5:3; 6:33.
4 ʻI hono maʻu ʻeni ʻi hotau ʻatamaí, te tau fakapapauʻi ke fakasiʻisiʻi mei heʻetau taimi-tēpile moʻumoʻuá ha ngaahi meʻa fakafoʻituitui pē ʻoku tulimui ki ai ka ʻoku ʻikai fuʻu fiemaʻu, ko e tōtuʻa ʻo hono fai ʻo e ngaahi fakafiefiá, pea mo e fai ki he niʻihi kehé ʻa e ngaahi meʻa ʻoku ʻikai loko mahuʻinga. ʻI hono fokotuʻutuʻu ʻetau ngāué ki he uike taki taha, te tau vaheʻi ai ha taimi ki ha ako fakafoʻituitui feʻunga, ko ha kau feʻunga ki he malangá, maʻu ʻa e ngaahi fakatahá, pea mo ha toe ngaahi meʻa pē ʻoku fekauʻaki vāofi mo ʻetau lotú. Ko e taimi leva ʻoku toé ʻe vaheʻi nai ia ki he ngaahi meʻa kehe ʻoku kumi ki aí, ʻo fakatuʻunga pē ʻi he lahi ʻe lava ke tānaki atu ki hono lavaʻi ʻo ʻetau taumuʻa tefitó ko e hoko ko e kau Kalisitiane mafamafatatau ʻa ia ʻoku nau fakamuʻomuʻa ʻa e Puleʻangá.
5 Neongo ia, ʻoku tau kei ongoʻi pē nai ko ʻetau kavengá ʻoku mamafa. Kapau ko ia, ʻoku fiemaʻu ke tau tali ʻa e fakaafe ʻa Sīsuú: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu.” (Mt. 11:28) Pehē foki, hanga kia Sihova, ʻa ia “ʻoku ne fua kavenga maʻatautolu he ʻaho kotoa” pea ʻokú ne foaki ʻa e mālohí ki he faʻahinga ongosiá. ʻOkú ne talaʻofa ʻe ʻikai ʻaupito te ne tuku ʻa e faʻahinga māʻoniʻoní ke ueʻia. (Sāme 55:22; 68:19; ʻAi. 40:29) ʻE lava ke tau tui pau ko ʻetau lotú ʻe tali, ʻo ʻai ia ke faingofua kiate kitautolu ke malava ke tau kītaki ʻi he longomoʻui he ngāue fakateokalatí.
6 ʻI he lolotonga ʻetau fakapapauʻi ke hokohoko atu ʻetau femoʻuekina ʻi he tulimui ki he ngaahi meʻa mahuʻinga ʻo e Puleʻangá, ʻoku lava ke tau fiefia ʻi hono ʻiloʻi ko ʻetau ngāué ʻoku ʻikai ke laufānō ia ki he ʻEikí.—1 Kol. 15:58.